Lúkɑ́shi 1
1
Nzɛnɛ-nu
1Nɛtʉʉndɛn Tɛɔfîl, ɔ jí ŋɡɔ pʉɔ tɛ ńzɑ́ɑ tíi mɔ́ fɑꞋ nɛcúꞋlɛ mɛnu mi ɛ́ kɑ lɛɛnɛ tsɛtsɛt pɛkŋɛ tɛ ŋ́ŋwɑꞋnɛ, 2ŋ́ŋwɑꞋnɛ kwɑꞋ pɑ́Ꞌ pʉɔ pi pɔ́p kɑ jʉ́ɔnɛ pɑ́Ꞌ nu yɔ kɑ zɛnɛ, ḿbɛn ńjʉ́ɔ pɑ́Ꞌ ɛ́ kɑ nɛnnɛ pɔ́Ꞌɔ. 3Pɑ́Ꞌ ɛ́ kɑ ɡɔ ḿbɔ́, mbɑ mɔ yɑ́ɑ, ŋ kɑ kɛ́ mɔ́ ŋ́kɑ́t ńtúŋtɛ ńdɔ́ɔ yɔ tɛ ɛ́fú nɛtsɛ́n-nu lɑ́, ŋ kɑ jʉ́ɔ ŋɡɔ ɛ́ pɔ́ŋ ŋɡɔ n niitɛ yɔ sʉ́Ꞌnɛ, ńníꞋ tsɛt yɔ ŋwɑꞋnɛ, ŋ́ɡɑ́ mbɔ̌ wu. 4Ŋ ɡɛ pɑ́Ꞌɑ nɛlɔk ŋ́ɡɛ ŋɡɔ ɔ ɡʉ ɛ́fúŋ ńdɔk ńjí ŋɡɔ mɛnu mi pɛ́ kɑ zíꞋnɛ wú ɛ́ zúꞋu ḿbɔ́ kwɑꞋ pɔ́Ꞌɔ.
Wɛcɔ́ Cʉ̈ɔꞋ-Sɛ́ ɡʉ ḿbʉ̈ɔt ŋɡɔ pɛ́ ɡʉ ńdɑ́Ꞌ ḿbí Jɑ̂ŋ Mbɑptíshi
5Ɛ́ kɑ pɔ́ ŋkɑ́ yi Ɛlɔ̂dɛ m̄bɔ́nɛ fɔɔ-ŋɡɔ́ŋ-Jẅidɛ̂,#1.5 Fɔɔ-ŋɡɔ́ŋ-Jẅidɛ̂: Ɛ́ lɔk ńcú ŋɡɔ Ɛlɔ̂dɛ ḿbɔ́nɛ ɛ́sɑ́Ꞌ ŋɡɔŋ-Pɑyúdɑ tsʉʉ. Wɛcɔ́ nɔŋpɔꞋ pɔ́ ɡú, lík yɛ́ pɔ́ ŋɡɔ Sɑkɑlíyɑ, ɑ pɔ́ ŋɡɑŋfɑꞋ tsɛtsɛt pʉɔ pɛ́ Ábyɑ. Nzwɛ́ wɛ ḿbɔ́ yɛ́ ɡúu nǔu njẅɛt-Álɔ̂ŋ, tɑ́tndɑ́-pɑnɔŋpɔꞋ, lík yɛ́ pɔ́ ŋɡɔ Lísɑpɛ. 6Sɑkɑlíyɑ pɔ́p nzwɛ́ wɛ kɑ pɔ́ pʉɔ, ŋ́ɡẅɛɛ nɛpʉ́ʉ-Sɛ́ kwɑꞋ sʉ́Ꞌnɛ, ńzúꞋ ntsu-Sɛ́, ḿbɛn ŋ́ɡɛ pɔ yúu mi ɑ sɛ́ ŋ́kɔŋ tɛ lɔ́Ꞌ pɔɔ ńcẅɛt pɔ́. 7Pɔ́p ŋ́kɑɑ mɔ́ɔ ɡẅɛɛ, mbíꞋŋɡɔ Lísɑpɛ kɑ pɔ́ ŋkɛ́n mɑŋɡɛ́, mbɔ pɔ́p pɛn mɔ́ ńdɛn.
8Ŋkɑ́ yi cúꞋlɛ-fɑꞋ yɛ́ pɛ́ Sɑkɑlíyɑ ńdɛ́ɛnɛ tɛ ŋ́kɛ́ ŋ́kuꞋ, ɑ pɔ́ ndɑ́-nɛnɔŋpɔꞋ Yɛlúsɑlɛm ḿbɔ́ ńnɔ́ŋ pɔꞋ. 9PɑnɔŋpɔꞋ kɑ ɡẅɛɛ mɑt nɛmɑꞋ ńtíitɛ ńdɔk ŋ́kɑŋ tɑ́Ꞌ ŋu tsɛtsɛt pɔ́p ẅi ɑ ɡʉ ŋ́kúu tsɛt ndɑ́-nɛnɔŋpɔꞋ, ńtɔɔ lii nɛlɔk ŋ́ɡɛ́mtɛ Sɛ́, ŋ́ɡɛ pɔ́Ꞌɔ, yɛcɔ́ lɛ́Ꞌ, Sɛ́ tsɔ́Ꞌ Sɑkɑlíyɑ. 10A ɡɔ ḿbɔ́ ndɑ́ nɛtɔɔ lǐi ɛ̂yɑ́, lɑ́Ꞌ pɔ́ píi tɛ ńzɑ́ɑ, ḿbɔ́ ńcɛꞋlɛ Sɛ́ pɔ́p pɛtsʉʉ. 11Sɑkɑlíyɑ ɡɔ ńjʉ́ɔ, wɛcɔ́ Cʉ̈ɔꞋ-Sɛ́ cẅɛt mbi yɛ́ ḿvukŋɛ vukŋɛnɛ, ńtʉ́ʉ nɛkɛlɛmúk, nǔu ɡúŋ pɔ́ tʉʉ. 12Sɑkɑlíyɑ jʉ́ɔ wɛ́, lɛ́m yɛ́ sɑ́ɑnɛ, pɔ́k ɡẅɛɛ wɛ́. 13Lɑ́ Cʉ̈ɔꞋ-Sɛ́ cú mbɔ̌ wɛ́ ŋɡɔ:
«Sɑkɑlíyɑ, kɔɔ kíi ḿbɔ́k, Sɛ́ zúꞋ mɔ́ nu yi ɔ júknɛ ńcɛꞋlɛ wɛ́ nǔu, tɛ ɑ ŋ́ɡɛ ńcʉ̈ɔꞋ nzwɛ́ wu Lísɑpɛ, pʉʉnɛ ḿbí tɑ́Ꞌ mɔ́ɔ mbɛ́ɛnɛ, ɔ cẅi lík yɛ́ ŋɡɔ Jâŋ. 14Mɔ́ɔ ɛ̂wɑ́ ŋ́ɡɛ ńdɑ́Ꞌ ḿbɔ́ mbɔ̌ wu, ḿbɔ́ kwɑꞋ yúu-tsɑ́ɑtɛ, pʉɔ tɛ ńzɑ́ɑ pɛn ńtsɑ́ɑtɛ nǔu pɑ́Ꞌ pɛ́ pinɛ wɛ́. 15A ŋ́ɡɛ ńdɑ́Ꞌ ḿbɔ́ mbɔ̌ Sɛ́ ḿbɔ́ ŋu tɛꞋ. A ńdɑ́Ꞌ ḿbɔɔ mɛluꞋ ńnɔ́ pɔ́, tɛ mbɑ kʉ̈ɔ́ lɑ́ yi ḿbɔ́ ŋu nɔ́ ḿbɑ́. A ŋ́ɡɛ ńdɑ́Ꞌ ńzɛɛ ŋ́ɡɔ ńcẅɛt nɛpɛm-mɑ́ wɛ, mbɔ Zẅikŋɛ Lɛ́ɛnɛ́nɛ jʉ́ mɔ́ wɛ́. 16A ŋ́ɡɛ ŋ́ɡɛ pʉɔ-islɑyɛ̂l tɛ ńzɑ́ɑ shɔt tʉ́m yɔ́p, ḿbɛn mbɔ̌ Tsɑpʉɔ Sɛ́ wɔp. 17Sɛ́ ŋ́ɡɛ ńdɑ́Ꞌ ŋ́ɡɑ́ wɛ́ nɛ́ mɛtʉʉ, ɑ lɔk ḿbɔ́ yɛ́ pɑ́Ꞌ Ɛlíyɑ, ŋɡɛ́mndʉ̈ɔ́Ꞌ-Sɛ́, nɛlɔk ḿbɔ́ mbi ńdɔ́ɔ pɑ́Ꞌ ɑ ɡɛ ŋ́ɡɛ ŋɡɔ pɛtɑ́t ɡẅɛɛ kwɑŋɛ sʉ́Ꞌnɛ nǔu mbɔ́ŋkʉ̈ɔ́ pɔ́p, ɛ́ pɛn ŋ́ɡɛ ḿbɑ́ɑtɛ pɑtʉʉtú ɡẅɛɛ jínu-pʉɔ pi pɔ́p pɔ́knɛ Sɛ́. Pɔ́Ꞌɔ, Sɛ́ lɔk ńniitɛ pʉɔ pi pɔ́p ɡɛ ńdɑ́Ꞌ ŋ́kuꞋ nɛɡɑ́ mɛkuꞋ mbɔ̌ wɛ́.»
18Sɑkɑlíyɑ zúꞋ pɔ́Ꞌɔ, ḿbíkŋɛ Cʉ̈ɔꞋ-Sɛ́ ŋɡɔ:
«Tɛ mɔ ŋ́ɡɛ ńjʉ́ɔ kʉ̈ɔ́ lɑ ńjí ŋɡɔ ɛ́ ŋ́ɡɛ ńdɑ́Ꞌ ḿbɔ́ nu? M bɔ́ mɔ́ ndɛn ŋu, nzwɛ́ wɑɑ pɛn ńdɛn yɛ!»
19Cʉ̈ɔꞋ-Sɛ́ pʉ̈ɔt ŋɡɔ: «Mɔ Ŋɡɑ́ɑpɛliyɑ, n zúꞋ pɔ mbɔ̌ Sɛ́. Jʉ́ túunɛ wɑ́ɑ ŋɡɔ n tɔ́ ɛ́sɑ́Ꞌ wɔ Ŋkʉʉ sʉ́Ꞌnɛ mbɔ̌ wu. 20Ɛ́ nu yi ɛ́ ŋ́ɡɛ ńtsuŋ ńcẅɛt nǔu yɛ́ ŋkɑ́, lɑ́ pɑ́Ꞌ ɔ kɑ́ pɛ́m lɑ́, ɔ ɡʉ ńtsʉ́Ꞌ ḿbɔ́ pɔ cípúꞋ tɛ yîyɑ́ ŋkɑ́ ɡɛ ŋ́kuꞋ.»
21Lɑ́Ꞌ yi ɛ́ m̄bɔ́nɛ píi ńzẅíꞋlɛ́ Sɑkɑlíyɑ kɑ jʉ́ɔ, mbɔ ɑ lɑ́ɑtɛ tsɛt ndɑ́ tɛ ɛ́ tsɑ, ɛ́ kʉꞋnɛ wɔ́p. 22A pɔ́ tɛ ńcẅɛt, ḿbɔɔ pɛn ŋ́kuꞋ nɛcú nu mbɔ̌ pɔ́p pɔ́, ńtsʉ́Ꞌ ńdɔk pɔ mbɔ́ ńdɛꞋlɛ nu. Pɔ́p ɡɔ́ɔ ńjí ŋɡɔ ɑ tɔ́ ndɑ́, Sɛ́ níɛꞋ mík mɛ́, ɑ jʉ́ɔ yɛcɔ́ ŋkʉꞋnɛ nu. A fú pɔ́Ꞌɔ, ńtsʉ́Ꞌ ḿbɔ́ pɔ cípúꞋ.
23Sɑkɑlíyɑ pɔ́ tɛ ḿmɛk mɛ́ mɛlɛ́Ꞌ-fɑꞋ ndɑ́-nɛnɔŋpɔꞋ Yɛlúsɑlɛm, ḿbɛn nɛ́ njɛ́Ꞌ yɛ. 24Mɔnɛ mɛnu kɑ lɛɛ, nzwɛ́ wɛ Lísɑpɛ ɡɔ́ɔ ɛ́shuŋ, ńnɑ́ŋ pɔ ńdʉɔmɛ lʉɔmɛ́nɛ nǔu pɛsɑŋ pɛ́tɑɑ, ḿbɔ́ ńcú tsɛt tʉ́m yɛ́ ŋɡɔ: 25«Yɔ nu yi Tsɑpʉɔ kɛ́nɛ ńdíŋɛ wɑ́ɑ tɛ ŋ́ɡɛ nǔu mɔ, nɛlɔk ńcẅɛɛtɛ sʉ́ʉ yi ɛ́ júknɛ ŋ́kɔ́ wɑ́ɑ tsɛtsɛt pʉɔmɛsɔŋ pɑ́Ꞌ mɔ yɑ́ɑ mɔ́ɔ kɑ́ ɡẅɛɛ.»
Cʉ̈ɔꞋ-Sɛ́ cú mbɔ̌ Mɑlíyɑ ŋɡɔ ɑ ŋ́ɡɛ ḿbí mɔ́ɔ mbɛ́ɛnɛ
26Lísɑpɛ shuŋ tɛ ḿbɔ́ pɛsɑŋ pɛ́nɛ́ntúkú, Sɛ́ túu cʉ̈ɔ́Ꞌ wɛ Ŋɡɑ́ɑpɛliyɑ tsɛt yɛcɔ́ tʉ́sɔŋ-Ŋɡɑlilɛɛ yi pɛ́ fúŋnɛ ŋɡɔ Nɑ̌ɑzɑlɛt, 27mbɔ̌ wɛcɔ́ mɔ́ɔŋɡɔɔ ẅi pɛ́ fúŋnɛ wɛ́ ŋɡɔ Mɑlíyɑ, mbɔ pɛ́ kɑ pʉ́ wɛ́ mbɔ̌ Yɔsɛ̂p, ŋu nǔu tsɛ́nndɑ́-fɔɔ Ndɑvît, tɛ pɛ́ ńnɑ́ŋ sɛ́ nǔu.
28Cʉ̈ɔꞋ-Sɛ́ ɡʉ tɛ ŋ́kúu ndɑ́ pɔ́p, ńcú mbɔ̌ wɛ́ ŋɡɔ:
«N cɛꞋlɛ wú, mbɑ Mɑlíyɑ, mbɔ́tnɛ-Sɛ́ nǔu wu, Tsɑpʉɔ lɔk wú ŋ́ɡɛ yúu, ɑ sɛ́ ńdíŋɛ wú tɛꞋ.»
29Mɑlíyɑ zúꞋ, ɛ́ tsɑ wɛ́ tɛꞋ, ɑ kwɑŋɛ ŋɡɔ: «Yɔ ntɛ́ cɛꞋlɛ ɛ́ pɑ́Ꞌɑ ńdɔk ńcú ŋɡɔ kʉ̈ɔ́?» 30Cʉ̈ɔꞋ-Sɛ́ cú ŋɡɔ:
«Mɑlíyɑ, kɔɔ pɔ́k, Sɛ́ cʉɔꞌ wú. 31ZúꞋ: ɔ ɡʉ ḿbɔ́ shǔutɛ, ŋ́ɡɛ ḿbí tɑ́Ꞌ mɔ́ɔ mbɛ́ɛnɛ, ńcẅi lík yɛ́ ŋɡɔ Yɛ́su. 32A ŋ́ɡɛ ńdɑ́Ꞌ ḿbɔ́ ŋu ɡwɛ́, pɛ́ ɛ́fúŋ wɛ́ ŋɡɔ mɔ́ɔ-Sɛ́ ŋɡɑŋmɛtʉʉ tsʉʉ. KwɑꞋ jʉ́ Tsɑpʉɔ Sɛ́ pɛnnɛ ŋ́ɡɑ́ nɛfɔɔ-ŋɡɑpnjẅɛt yɔp Ndɑvît nɛ́ jʉ́. 33A ńdɑ́Ꞌ ḿbɔ́ ɛ́sɑ́Ꞌ njẅɛt-Íslɑyɛ̂l tsʉʉ; nɛfɔɔ nɛ́ pɔɔ lɑ́Ꞌ ḿmɛ pɔ́.»#1.33 Sɑm 16
34Mɑlíyɑ zúꞋ pɔ́Ꞌɔ, ńcú mbɔ̌ Cʉ̈ɔꞋ-Sɛ́ ŋɡɔ: «Tɛ yɔ nu ɡʉ ńdɑ́Ꞌ ńdɛɛ ŋɡɔ ku, pɑ́Ꞌ m bɛ́t kɛ́ jí ŋu mbɛ́ɛnɛ lɑɑnɛ?»
35Cʉ̈ɔꞋ-Sɛ́ pʉ̈ɔt mbɔ̌ wɛ́ ŋɡɔ:
«Zẅikŋɛ Lɛ́ɛnɛ́nɛ ɡʉ ńcúŋ ŋ́kúu nǔu wu, Sɛ́ ẅi ɑ piꞋnɛ mbɑ kʉ̈ɔ́ lɑ́ ńdɔk nɛ́ mɛtʉʉ mɛ́ ŋ́kẅíipɛ wú tɛ yɔ nu puutɛ. Ɛ́ lɛɛtɛ pɔ́Ꞌɔ, lɑ pɛ́ ɡɛ ɛ́fúŋ mɔ́ɔ ẅi ɔ ɡʉ ḿbí ŋɡɔ Ndɛ́ɛnɛ Lɛ́ɛnɛ́nɛ, ḿbɛn ɛ́fúŋ wɛ́ ŋɡɔ mɔ́ɔ-Sɛ́. 36Zɛɛ ńjʉ́ɔ mɔ́ɔmɑ́ wu Lísɑpɛ. Pɛ́ sɛ́ ɛ́fúŋ wɛ́ ŋɡɔ ŋkɛ́n mɑŋɡɛ́, ɑ kɛ́ mɔ́ ńdɛn tɛꞋ lɑ́, ɛ́ ŋkɔ̂ɔnɛ ḿbɔ́ pɛsɑŋ pɛ́nɛ́ntúkú pɑ́Ꞌ ɑ shǔutɛ, lɑ́ ɑ ŋ́ɡɛ ńtɑ́ɑ ḿbí mɔ́ɔ mbɛ́ɛnɛ. 37Ɛ́ lɔk ḿbɔ́ ŋɡɔ ḿbɔ́ nu pɔɔ Sɛ́ tsɑ.»#1.37 Gen 18.14
38Mɑlíyɑ pʉ̈ɔt ŋɡɔ: «Mɔ pɔ ŋɡɑŋfɑꞋ-Tsɑpʉɔ: Ɛ́ pɔ́ŋ ŋɡɔ ɑ ɡɛ mɛnu mi ɔ sẅíinɛ́ wɑɑ lɑ́, ɛ́ puutɛ nǔu mɔ.» A cú pɔ́Ꞌɔ, Cʉ̈ɔꞋ-Sɛ́ ɡɔ́ɔ ŋ́kɛ́ ŋ́ɡʉ.
Mɑlíyɑ ɡʉ ŋ́ɡwɑ́ Lísɑpɛ
39Ɛ́ pɔ́ mîmɑ́ mɛlɛ́Ꞌ, Mɑlíyɑ lɔ sɛ́, ńnɛn pɔ nɛ́ mɛtʉʉ ńdɔk yi mɛŋkɔ́Ꞌ Jẅidɛ̂ ḿbʉʉ ŋ́ɡʉ nɛ́ yɛcɔ́ tʉ́sɔŋ, 40ŋ́ɡʉ tɛ ŋ́kúu njɛ́Ꞌ-Sɑkɑlíyɑ, ŋ́kúu ndɑ́, ńcɛꞋlɛ Lísɑpɛ. 41Lísɑpɛ zúꞋ cɛꞋlɛ-Mɑlíyɑ, mɔ́ɔ ŋɑtnɛ nɛpɛm yɛ́, Zẅikŋɛ Lɛ́ɛnɛ́nɛ ńcúŋ ŋ́kúu nǔu wɛ́. 42A kɑꞋ ŋɡi yɛ ŋ́ɡɑ́ tʉ́ ńcú mbɔ̌ Mɑlíyɑ ŋɡɔ:
«Ɔ ɡẅɛɛ mbɔ́tnɛ-Sɛ́ tɛ ńtsɑ pɑŋɡɛ́ pɛtsʉʉ. Mbɔ́tnɛ pɛn ḿbɔ́ nǔu mɔ́ɔ ẅi ɔ ɡɛ ńtɑ́ɑ ḿbí. 43Mɑ́ pɛ́ Tsɑpʉɔ wɑɑ tɔ́ ŋ́ɡwɑ́ wɑɑ pɑ́Ꞌɑ, m bɔ́ yɑ́ɑ wɔ̌? 44Jʉ́ɔ pɑ́Ꞌ n dɛɛnɛ tɛ ńzúꞋ cɛꞋlɛ yú, mɔ́ɔ ŋɑtnɛ, ńtsɑ́ɑtɛ nɛpɛm mɔ. 45Ɔ pɔ́ttú, mbíꞋŋɡɔ ɔ kɑ pɛ́m ŋɡɔ mɛnu mi Sɛ́ kɑ ɡɛnɛ ɔ jí, ńtɑ́ɑ ḿbuutɛ.»
46Mɑlíyɑ zúꞋ ńcú ŋɡɔ:
«Mɔ sɛ́ ŋ́ɡɑ́ ɡúꞋlɛ mbɔ̌ Tsɑpʉɔ,
47tʉ́m yɑ́ɑ sɛ́ ńtsɑ́ɑtɛ tɛꞋ nǔu Tsɑpʉɔ Sɛ́ Nzɑ́Ꞌŋkʉ wɑɑ.
48A kẅíitɛ wɑ́ɑ, lɑ́ ŋ kɛ́ ḿbɔ́ pɔ nzʉʉ nǔu pʉɔ pi pɔ́p zúꞋnɛ ntsu wɛ́:
pʉɔmɛsɔŋ nǔu mɛzuŋ mɛzuŋ ŋ́ɡɛ ńdɑ́Ꞌ ńtsʉ́Ꞌ ɛ́fúŋ wɑ́ɑ nɛ́ pɔ́ttú,
49mbíꞋŋɡɔ Sɛ́ ŋɡɑŋmɛtʉʉ tsʉʉ kɛ́ ŋ́ɡɛ ŋkʉꞋnɛ nu sʉ́Ꞌnɛ nǔu mɔ.
Sɛ́ Sɛ́!»
50«A lɔ ŋ́ɡɛ nu sʉ́Ꞌnɛ nǔu pʉɔ pi pɔ́p ɡɛ́mtɛnɛ wɛ́,
ḿbɛn ŋ́ɡɛ nǔu pɔ́ɔ pɔ́p nǔu mɛzuŋ mɛzuŋ
51A nyɛt mɛtʉʉ mɛ́, ŋ́ɡɛ pɛmɑ́mɑ́ mɛnu.
A sɑt pɑnyɛt mbʉʉ.
52A kɔk pɛfɔɔ ndǔ kɔꞋ-nɛfɔɔ nɔ́p
ńtsẅíkŋɛ pɛpúŋ ndǔ.
53A lɔk yúu sʉ́Ꞌnɛ ńzẅík ɡɑŋnji kuꞋ,
ńzuŋ ɡɑŋyúu pɔ́p ɡʉ mbɔ́ fɛ̌ɛ
54A tɔ́ ńcẅɛ́lɛ́ pʉɔ-Íslɑyɛ̂l, ɡɑŋfɑꞋ pɛ́
A kɑ́ likŋɛ nɛnyɛt pɔ́ŋtʉ́m yɛ́ pɔ́,
55ɛ́ yúu minɛ ɑ kɑ kɑꞋnɛ mbɔ̌ pɛmɑ́ŋɡɑpnjẅɛt pɛkŋɛ,
mbɑ mbɔ̌ Ábɛlɛhɑ̂m pɔ́p njẅɛt yɛ mɛzuŋ mɛzuŋ.»
56Mɑlíyɑ kɑ cú pɔ́Ꞌɔ, pɔ́p Lísɑpɛ lɔ ńnɑ́ŋ yúu pɛsɑŋ pɛtɑ́t, lɑ ɑ pɛn nzʉʉ.
Pɛ́ ɡɛ ḿbí Jâŋ
57Ŋkɑ́ nɛpí-Lísɑpɛ kɑ kuꞋ, ɑ pí mɔ́ɔ mbɛ́ɛnɛ. 58Pɛtɑ̌ɑlɑ́Ꞌ pɔ́p pɔ́ɔpɛmɑ́ pɛ́ zúꞋ pɑ́Ꞌ Tsɑpʉɔ tsɑ́ɑnɛ mɛjʉ́ŋ mɛ́, ŋ́ɡɑ́ wɛ́ nɛ́ mɔ́ɔ, pɔ́p pɛ pɔ́p tsɑ́ɑtɛ. 59Mɔ́ɔ ɡɛ ŋ́ɡẅɛɛ lɛ́Ꞌ pɛ́nɛ́fɔ́m, pɛ tɔ́ nɛpúꞋ wɛ́ ḿbɛn ńcẅi lík yɛ́, ḿbɔ́ ńdɔ́ɔ nɛfúŋ wɛ́ ŋɡɔ Sɑkɑlíyɑ pɑ́Ꞌ tɑ́t wɛ. 60Lɑ́ mɑ́ wɛ lʉꞋ ńcú ŋɡɔ:
«Pɛ́ ɛ́fúŋ wɛ́ ŋɡɔ Jâŋ.» 61Pɔ́p tɛn ndʉꞋ; ńcú ŋɡɔ: «Sɑ̌ɑ ŋu kɑ́ pɔ́ tsɛtsɛt pɔ́ɔpɛmɑ́ pʉ́ʉ lík yɛ́ pɔ́ pɑ́Ꞌɑ pɔ́.»
62Ńdɔk mbɔ́ ḿbíkŋɛ Sɑkɑlíyɑ pɑ́Ꞌ ɑ kɔŋnɛ ŋɡɔ pɛ́ ɛ́fúŋ mɔ́ɔ pɔ́Ꞌɔ. 63A píkŋɛ yúu minɛ ɑ ɡɛ ŋwɑꞋnɛ yúu nǔu, pɛ́ ɡɑ́, ɑ ŋwɑꞋnɛ lík yɛ́ ŋɡɔ Jɑ̂ŋ. Pɔ́p jʉ́ɔ ɛ́ kʉꞋnɛ wɔ́p tɛꞋ. 64Pɔ́p ɡɔ́ɔ ńjʉ́ɔ ntsu-Sɑkɑlíyɑ ńtsɔ́Ꞌnɛ tɛ ɑ ɡɔ́ɔ ḿbɛn ńzɛ nɛcú nu, ḿbɔ́ ŋ́ɡúꞋlɛ Sɛ́. 65Pɛtɑ̌ɑlɑ́Ꞌ kɑ zúꞋ ŋɡɔ Sɑkɑlíyɑ pɛn ńcú nu ḿmɑɑ tɛꞋ. Yɔ nu kɛ́ ŋ́ɡɔ́ɔ ɛ́sɑt lɑ́Ꞌ, tɛ pɛ́ tsʉ́Ꞌ ḿbɔ́ mbɑ ɡɔ́ lɑ́ shʉ́ mɛŋkɔ́Ꞌ Pɑjẅidɛ̂ ɛ́sẅíi pɔ yɛ́tɛ́. 66Mbɑ wɔ̌ lɑ́ ẅi ɑ kɑ zúꞋnɛ mɔnɛ mɛnu lẅɛꞋ pɔ tsɛt tʉ́m yɛ́. Pɔ́p pɔ́ ḿbíkŋɛ ŋɡɔ: «Yɔ ntɛ́ mɔ́ɔ pɑ́Ꞌɑ ńdɑ́Ꞌ ḿbɔ́ ku?»
Ɛ́ zɛɛ ŋ́ɡɔ ḿbɔ́ Tsɑpʉɔ pɔ́ ńdɔk mɛtʉʉ mɛ́ ńtɔ́ɔtɛ wɛ́.
Zɔpŋki-Sɑkɑlíyɑ
67Zẅikŋɛ Lɛ́ɛnɛ́nɛ jʉ́ tɑ́t wɛ Sɑkɑlíyɑ, ɑ cú nu pɑ́Ꞌ ŋɡɛ́mndʉ̈ɔ́Ꞌ-Sɛ́ lɑ́, ŋɡɔ:
68«Mbɔ́tnɛ mbɔ̌ Tsɑpʉɔ Sɛ́ pɑ Íslɑɛ̂l,
pɑ́Ꞌ ɑ tɔ́nɛ ńcẅɛ́lɛ́ pʉɔ pɛ́, ńtsúꞋ wɔ́p ndɑ́-kwɑɑ.
69A túu Nzɑ́Ꞌŋkʉ wɛ ɡwɛ́ mbɔ̌ pɛkŋɛ.
A cẅɛt nǔu njẅɛtndɑ́-ŋɡɑŋfɑꞋ wɛ́, fɔɔ Ndɑvît,
70ɛ́ pɔ́ nu yinɛ ɑ kɑ lɑ́Ꞌ ńcú tɛ ntí ɡú,
ɔ́ɔŋ, ɑ kɑ lɔk ntsu-pɛɡɛ́mndʉ̈ɔ́Ꞌ pɛ́ ńcú ŋɡɔ: 71“Mɔ ŋ́ɡɛ ńdɑ́Ꞌ ńcẅɛɛtɛ wʉ́ʉ mbɔ̌ pɛɡɑŋ mbuu pʉ́ʉ,
mbɑ nǔu mbɔ́ pʉɔ pi pɔ́p sɛ́ ḿbɔɔ ŋ́kɔŋ nɛjʉ́ɔ wʉ́ʉ pɔ́.” 72Yɔ pɑ́Ꞌ pɔŋtʉ́m-Sɛ́ kɑ zɛnɛ nǔu pɛmɑ̂ɑŋɡɑpnjẅɛt pɛkŋɛ,
ɛ́ pɛn ḿbɔ́ lɔ́Ꞌnɛ,
kẅíitɛ kɑɑ yinɛ kwɑꞋ Sɛ́ pɔ́p pɛ pɔ́p kɑ ɡwɑtnɛ, 73kẅíitɛ pɑ́Ꞌ ɑ kɑ cúnɛ tɛ ŋ́kɑɑ mbɔ̌ Ábɛlɛhɑ̂m, mɑ̂ɑŋɡɑpnjẅɛt wɛkŋɛ.
A ḿbɔ́ ńcú ntɛ́ wɛkŋɛ ŋɡɔ:
74A ŋ́ɡɛ ńdɑ́Ꞌ ńcẅɛɛtɛ mbɔ́ŋkʉ̈ɔ́ pʉ́ʉ, nǔu mbɔ́-ɡɑŋmbuu pɔ́p,
lɑ pɔ́p kɛ́ ḿbɔɔ ŋ́kuꞋ nɛɡúꞋlɛ wɛ́ kɛ́ pɔ́k.
75Pɔ́p tsʉ́Ꞌ pʉɔ pɛ́, ŋ́ɡɛ pɔ wɛ nɛkɔŋ nǔu mɛŋɡɔŋ mɛlɛ́Ꞌ lɑ́Ꞌ mɔ́p
ndǔ tsɛ́tsɑ́Ꞌ.» 76Sɑkɑlíyɑ pɛn ńcú ŋɡɔ:
«Ɛ́ ɡʉ nǔu ɡu mɔ́ɔ wɑɑ, mbɔ pɛ́ ŋ́ɡɛ ńdɑ́Ꞌ ɛ́fúŋ wú
ŋɡɔ ŋɡɛ́mndʉ̈ɔ́Ꞌ-Sɛ́, Sɛ́ ẅi ɑ piꞋnɛ mbɑ kʉ̈ɔ́ lɑ́.
Tsɑpʉɔ ɡɔ ḿbɛn ńtɔ́, mbɔ ɔ piitɛ ḿbɔ́ mbi
ńniitɛ sɛ̂ndúŋ yɛ́.
77Ɔ ɡɛ ńtɑ́ɑ ŋ́ɡɛ pʉɔ pɛ́ jí ŋɡɔ
ɑ kẅɛ́Ꞌlɛ mɔ́ tɛ ḿbɑ́ɑtɛ pɑ́Ꞌ ɑ ɡɛ ńdikŋɛ mɛnu kɛpɔŋ mɔ́p, ŋ́ɡɛ pɔ́p luk,
78mbíꞋŋɡɔ ɑ sɛ́ ńdíŋɛ wɛkŋɛ sʉ́Ꞌnɛ, ḿbɛn ḿbɔ́ ńtsɑ́ɑ mɛjʉ́ŋ mɛkŋɛ tɛꞋ.
A ɡɛ ńtúu ŋu ẅi ɑ ŋ́ɡɛ pɛkŋɛ luk, ŋɡɑŋ fú tʉ́nɛ́pú ńtɔ́ ḿbɔ́ kyɛꞌ,
79ŋ́kyɛꞋ pʉɔ pi pɔ́p nɑ́ŋnɛ tsɛt nzɛ́nzʉ́ʉ, nɛvú pɛn ḿbɔ́ ńnʉk wɔ́p,
ńcɑklɛ wɔ́p ńníꞋ tsɛt mɔ́fíitɛ.»
80Ŋ́ɡʉ nǔu Mɔ́ɔ-Sɑkɑlíyɑ, ɑ pɔ́tnɛ ŋ́ɡúꞋ nǔu mbɑp-mbʉʉ mbɑ nɛ́ jínu yɛ́. Pɔ́Ꞌɔ, ŋ́ɡɛ ŋ́ɡʉ ńnɑ́ŋ kɔ̂ŋtɛt, ńdɑ́Ꞌ ńtswɛ́ pɔ zúꞋu tɛ ŋ́kúu lɛ́Ꞌ yinɛ ɑ kɑ nyɛtnɛ shʉ́ wɛ́ mbɔ̌ pʉɔ-Íslɑyɛ̂l.
Currently Selected:
Lúkɑ́shi 1: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
