Lúkɑ́shi Mɛtú-nu
Mɛtú-nu
Lúkɑ́shi ŋ́kɑɑ ŋu-Pɑyúdɑ pɔ́, ɑ ŋ́kɑɑ ŋu nǔu ɡɑŋku-Yɛ́su Kɛlístɔ tsɔ̌ppɑ́ nɛ́ nɛɡɛ́m pɔ́. Lɑ́ pɔ́p Pɔ̂l kɑ pɔ́nɛ ńnɛn ɑ pɔ́ ńcẅɛ́lɛ́ Pɔ̂l nǔu mɛfɑꞋ mɛ́. Lúkɑ́shi kɑ ŋwɑꞋnɛ ŋwɑꞋnɛ-ɡɑŋntúu. A kɑ ɡɔ́ ńzɛ, ńcú ŋɡɔ ɑ ɡʉ ńtsuŋ ńdɛꞋlɛ pɑ́Ꞌ Yɛ́su kɑ pɔ́nɛ. A kɑ pɔ́ ŋ́ŋwɑꞋnɛ pɔ́Ꞌɔ nǔu Pɑyúdɑ mbɑ nǔu pʉɔ pi pɔ́p kɑ́ pɔ́ Pɑyúdɑ pɔ́, ɛ́ lɛɛ pɔ́Ꞌɔ pɔ́p jí ŋɡɔ yúu mi pɛ́ kɑ sẅíinɛ wɔ́p nǔu Yɛ́su kwɑꞋ nɛ́nẅín; Lúkɑ́shi kɑ cú nu tɛꞋ nǔu ŋkɔŋɛ-Yɛ́su, ńtsuŋ ńtík pɔ́ nǔu ŋkɔŋɛ yi ɑ ɡẅɛɛnɛ mbíꞋ pɛpúŋ, mbɑ pʉɔ pi pɛ́ nyɛtnɛ wɔ́p nɛ́ ŋɡʉ̈ɔ́Ꞌ, mbɑ pɑŋɡɛ́ kɛ mbɑ pɛɡʉʉ. Lúkɑ́shi lɛꞋlɛ pɑ́Ꞌ pɛ́ kɑ pínɛ Jɑ̂ŋ-Mbɑptíshi, kɛ mbɑ Yɛ́su, ḿbɛn ńdɛꞋlɛ pɑ́Ꞌ Yɛ́su kɑ pɛ́tnɛ mɔ́ɔ. ŃdɛꞋlɛ pɑ́Ꞌ Mɑlíyɑ nɛ́ Sɑkɑlíyɑ ŋ́ɡɛ Símɔ kɑ ɡúꞋlɛ́nɛ Sɛ́ pɔ́Ꞌɔ. Ɛ́ mɛnu mi pɛ́ kɑ́ ŋwɑꞋnɛ tsɛt mɛcɔ́ mɛŋwɑꞋnɛ Ŋkʉʉ Sʉ́Ꞌnɛ pɔ́ (pɑk 1-2) Lúkɑ́shi pɑ́ɑtɛ ńnyɛt pɑ́Ꞌ Jɑ̂ŋ-Mbɑptíshi kɑ tɔ́nɛ ńniitɛ ndúŋ-Yɛ́su, mbɑ pɑ́Ꞌ ɑ kɑ cẅɛ́ɛnɛ ŋki mbɔ́ Jɑ̂ŋ, Sɑ́ttɑ pɛn ŋ́kwɑꞋnɛ wɛ́ (pɑk 3.1–4.13). Ɛ́ ɡɛ pɔ́Ꞌɔ, Lúkɑ́shi lɛꞋlɛ yúu mi Yɛ́su kɑ ɡɛnɛ tsɛt pɑk-ŋɡɔŋ-Ŋɡɑlilɛ́ɛ, pɑ́Ꞌ ɑ kɑ zíꞋnɛ nu-Sɛ́ mbɔ̌ pʉɔ ḿbɛn ŋ́ɡɛ ɡɑŋɡɔɔ fíitɛ (pɑk 4.14–9.50). Pɔ́Ꞌɔ, ɑ nyɛt ŋɡɔ Yɛ́su kɑ fú Ŋɡɑlílíyɑ ŋ́ɡʉ nɛ́ Yɛlúsɑlɛm, Lúkɑ́shi ɡʉ nǔu yɔ ɡúŋ-ŋwɑꞋnɛ yɛ́, ńdɛꞋlɛ mɛcɔ́ mɛnu mi ɛ́ kɑ́ pɔ́ tsɛt mɛcɔ́ mɛŋwɑꞋnɛ Ŋkʉʉ Sʉ́Ꞌnɛ pɔ́, mbɑ mi Yɛ́su kɑ zíꞋnɛ, ŋ́ɡɛ mɛsɑknɛkɛt pɑ́Ꞌ yi ŋɡɑŋ-pɔŋtʉ́m-ŋu-Sɑmɑlíyɑ, mbɑ nu ɡɛɡʉʉ-ŋɡɑŋyúu, nu-mɔ́ɔ wi ɑ kɑ pɛ́nɛ, pɛ́ pɛn ńjʉ́ɔ wɛ́ (pɑk 9.51–18.28) Lúkɑ́shi pɛn ńdɛꞋlɛ mɛyúu mi Yɛ́su kɑ ɡɛnɛ Yɛlúsɑlɛm mbɑ mi ɑ kɑ zíꞋnɛ zúꞋu (pɑk 19.29–21.38) Lúkɑ́shi cú nu nǔu ŋɡʉ̈ɔ́Ꞌ-Yɛ́su mbɑ nu nǔu nɛvú nɛ́ (pɑk 22-23). Ńcú nu nǔu pɑ́Ꞌ Yɛ́su kɑ zẅíimɛ́nɛ nǔu nɛvú ḿbɛn ńnyɛt mbʉʉ yɛ mbɔ̌ ɡɑŋku pɛ́. A ɡɔ́ ḿmɛkŋɛ ńcɔ́kŋɛ, ŋwɑꞋnɛ yɛ́ ńcú pɑ́Ꞌ Yɛ́su kɑ kɔ́Ꞌnɛ nɛ́ tʉ́nɛpú (Pɑk 24).
Currently Selected:
Lúkɑ́shi Mɛtú-nu: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017