Lúkɑ́shi 4
4
Sɑ́ttɑ kwɑꞋnɛ Yɛ́su kɔ̂ŋtɛt
(Mɑtʉ̈ɔ 4.1-11; Mɑ́lɛ́kúshi 1.12-13)
1Jɑ̂ŋ kɑ pɔ́ tɛ ńnuꞋ Yɛ́su ŋki, ɑ fú mbʉʉ-ŋki Juudɛŋ ŋ́ɡʉ. Zẅikŋɛ Lɛ́ɛnɛ́nɛ kúu nǔu wɛ́, ńdɔk wɛ́ ŋ́ɡʉ nɛ́ kɔ̂ŋtɛt. 2Ńtswɛ́ zúꞋu lɛ́Ꞌlɑ́Ꞌ mɛɡɛ́mɛ́nɛ́kwɑ, Zẅikŋɛ Lɛ́ɛnɛ́nɛ pɔ́ ńtʉ̈ɔ́Ꞌlɛ wɛ́, Sɑ́ttɑ tɔ́ ḿbɔ́ ŋ́kwɑꞋlɛ wɛ́ kwɑꞋnɛ́nɛ. Yɛ́su ɡɛ ńnɑ́ŋ zúꞋu, ńdɑ́Ꞌ ḿbɔɔ yúu kwɛ́t tɛ ɛ́ tsʉ́Ꞌ nɛmɛ; nji zɑ́ŋ wɛ́ tɛꞋ. 3Sɑ́ttɑ tɔ́ ńcú mbɔ̌ wɛ́ ŋɡɔ: «Pɑ́Ꞌ ɔ mɔ́ɔ-Sɛ́ lɑ́, kɛ́ ŋ́ɡɔ́ɔ ńcú mbɔ̌ ŋɡɔꞋ yɔ ŋɡɔ ɛ́ shɔtnɛ ńtsʉ́Ꞌ yúujʉ́ ɔ jʉ́!» 4Yɛ́su pɑꞋ mbɔ̌ Sɑ́ttɑ ŋɡɔ: «Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: Ŋu kɛ́ lɔk pɔ ndɑꞋ yúu minɛ ɑ jʉ́nɛ lɑ ḿbɔ́ ɡú pɔ́.»
5Sɑ́ttɑ pɛn ńdɔk wɛ́ ŋ́ɡʉ ńtík yɛcɔ́ zʉꞋ tɛ tʉ́, ńtʉ́ʉ zúꞋu ŋ́ɡɛ ɑ jʉ́ɔ mɛŋɡɔŋ mi ɛ́ ndǔ tsɛ́tsɑ́ꞌ tsʉʉ tɑ́Ꞌ ŋkɑ́, 6ńcú mbɔ̌ wɛ́ ŋɡɔ: «Pɛ́ kɑ ɡɑ́ mɛŋɡɔŋ mɔ́ mbɔ̌ mɔ, m bɛn ŋ́kuꞋ nɛɡɑ́ mbɔ̌ mbɑ wɔ̌lɑ́ ẅi ŋ kɔŋnɛ. Ŋ ɡʉ ńzɛɛ ŋ́ɡɑ́ nɛfɔɔ mbɔ̌ wu, ɡu tsʉ́Ꞌnɛ ńdɔk ŋ́ɡẅɛɛ yúu sʉ́Ꞌnɛ yi ɛ́ tsɛtú tsʉʉ. 7N cú pɔ ndɑꞋ ŋɡɔ ɔ pi mɛkẅíꞋlɛ mú mbi mɔ, ŋ́ɡúꞋlɛ wɑ́ɑ pɑ́Ꞌ Sɛ́, ɛ́ kɛ́ ŋ́ɡɔ́ɔ ńtsʉ́Ꞌ yú.» 8Yɛ́su tsɔ́Ꞌ mbɔ̌ wɛ́ ŋɡɔ: «Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: Ŋu ɡúꞋlɛ pɔ ndɑꞋ tɑ̌ɑ wɔp Sɛ́ jʉ́ zɛnɛ jʉ́, ḿbɛn ńzúꞋ pɔ ndɑꞋ ntsu wɛ́.»
9Sɑ́ttɑ ɡɔ́ɔ ńdɔk Yɛ́su ŋ́ɡʉ nɛ́ Yɛlúsɑlɛm ŋkɔ̂ɔnɛ, ńtík wɛ́ ndǔ ntsɔꞋ-ndɑ́-nɛnɔŋpɔꞋ, Ńcú mbɔ̌ wɛ́ ŋɡɔ: «Ɔ lɑɑ ḿbɔ́ mɔ́ɔ-Sɛ́, ɔ fú zɑ́Ꞌnɛ, ŋ́kít, ńcʉ́ɔ sɛ́! MbíꞋŋɡɔ 10pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: Sɛ́ ɡʉ ńcú pɛcʉ̈ɔ́Ꞌ pɛ́ tɔ́ ńdʉ̈ɔ́tɛ wú. 11Pɛ́ kɑ pɛn ŋ́ŋwɑꞋnɛ ŋɡɔ: Pɔ́p ɡʉ ńdɔk mbɔ́ mɔ́p ńtíi wú tɛ ɔ pɔɔ tɛ́m ku yú nǔu ŋɡɔꞋ pɔ́.» 12Yɛ́su tsɔ́Ꞌ mbɔ̌ Sɑttɑ ŋɡɔ: «Pɛ́ kɑ pɛn ŋ́ŋwɑꞋnɛ tsɛt ŋwɑꞋnɛ-Sɛ́ ŋɡɔ: Ḿbɑ́ɑ ɡu nɛkwɑꞋnɛ Tsɑpʉɔ Sɛ́ wu kwɑꞋnɛ́nɛ ŋɡɔ ɑ ɡɛ yúu nǔu ɡu!» 13Sɑ́ttɑ kwɑꞋnɛ Yɛ́su tɛ ḿmik mɛntɛ́, ńjʉ́ɔ kɛ́kɑ́ŋ, ńnɑ́ wɛ́, ŋ́ɡʉ, ḿbɔ́ ńzẅíꞋlɛ ŋkɑ́ ndɛꞋ yi ɑ ɡʉ ŋ́ɡɛ ḿbɛn ńtɔ́ nǔu wɛ́.
Yɛ́su ɡʉ ńzɛ fɑꞋ yɛ́ ŋɡɔ́ŋ-Ŋɡɑlilɛ́
14Yɛ́su ɡɔ ḿbɛn nɛ́ Ŋɡɑlilɛɛ, zẅikŋɛ-Tsɑpʉɔ Sɛ́ pɔ́ ŋ́ɡɑ́ wɛ́ nɛ́ mɛtʉʉ, ńdɔk ńnyɛt mɛfɑꞋ-Sɛ́. Lík yɛ́ sɑt yîyɑ́ pɑk-ŋɡɔŋ, 15mbíꞋŋɡɔ ɑ kɑ pɔ́ ńzíꞋ pʉɔ nɛ́ nu-Sɛ́ ndɑ́-cúꞋlɛ-Pɑyúdɑ, pʉɔ pɛtsʉʉ pɔ́ ŋ́ɡɑ́ mɛkuꞋ mɛ́.
Yɛ́su pɔ́ ɛ́sɑ́Ꞌ Ŋkʉʉ sʉ́Ꞌnɛ
(Mɑtʉ̈ɔ 13.53-58; Mɑ́lɛ́kúshi 6.1-6)
16Yɛ́su lɑ́Ꞌ ńnɑ́ŋ tɛ ḿbɛn Nɑ̌ɑzɑlɛt, zʉꞋ yi ɑ kɑ ɡúꞋnɛ zúꞋu. Lɛ́Ꞌ-nji yɔ́p kuꞋ, ɑ ɡʉ ndɑ́-cúꞋlɛ Pɑyúdɑ pɑ́Ꞌ ɑ lɔ ńzɛɛ ŋ́ɡʉ. Ŋkɑ́ kuꞋ, ɑ lɔ sɛ́ nɛfúŋ ŋwɑꞋnɛ-Sɛ́. 17Pɛ́ pɛ́ɛ ŋwɑꞋnɛ-Ɛsɑ̌yɑ ŋɡɛ́mndʉ̈ɔ́Ꞌ-Sɛ́, ŋ́ɡɑ́ mbɔ̌ wɛ́. A níɛꞋ nǔu zʉꞋ yi pɛ́ kɑ ŋwɑꞋnɛ zúꞋu ŋɡɔ:
18«Zẅikŋɛ-Tsɑpʉɔ nǔu mɔ, mbíꞋŋɡɔ ɑ kɑ zɔ́Ꞌ wɑ́ɑ,
ńtúu wɑ́ɑ ŋɡɔ ŋ ɡʉ, ɛ́sɑ́Ꞌ Ŋkʉʉ sʉ́Ꞌnɛ mbɔ̌ ɡɑŋɡʉ̈ɔ́Ꞌ,
ńtúu wɑ́ɑ ŋɡɔ ŋ ɡʉ ɛ́sɑ́Ꞌ mbɔ̌ ɡɑŋtsɑ́ŋ ńcú ŋɡɔ:
Pɛ́ ɡʉ ńcẅɛɛtɛ wɔ́p ndɑ́-kwɑɑ,
ńtúu wɑ́ɑ ŋɡɔ ŋ ɡʉ, ŋ́ɡɛ pɛfʉmík jʉ́ɔ zʉꞋ,
ŋɡɔ ŋ ɡʉ, ńtɔ́ɔtɛ nzʉʉ pʉɔ pinɛ pɛ́ sɛ́ ɛ́fyɛ́t wɔ́p,
19ḿbɛn, ńtúu wɑ́ɑ ŋɡɔ ŋ ɡʉ ɛ́sɑ́Ꞌ mbɔ̌ lɑ́Ꞌ ŋɡɔ
yɔ ŋɡuꞋ yi Tsɑpʉɔ ɡʉ ńtsɑ́ɑ mɛjʉ́ŋ pʉɔ pɛ́.»
20Yɛ́su kɑ fúŋ yîyɑ́ zʉꞋ tɛ ɛ́ mɛ, ŋ́kɑ́tɛ ŋwɑꞋnɛ#4.20 Ŋ́kɑ́tɛ ŋwɑꞋnɛ: Pɛ́ cú ŋɡɔ ŋ́kɑ́tɛ mbíꞋŋɡɔ ɛ́ m̄bɔ́ ŋkɑ́ yîyɑ́ pɛ́ pɔ́ ŋ́ŋwɑꞋnɛ yúu pɔ nǔu pɑ́k-ŋɡup., ŋ́ɡɑ́ mbɔ̌ ŋu ẅí ɑ fɑꞋnɛ ndɑ́ zúꞋu, ńcúŋ, ńnɑ́ŋ sɛ́ nɛkyɛ́Ꞌtɛ. Pʉɔ pinɛ pɔ́p ḿbɔ́nɛ ndɑ́-cúꞋlɛ tík mík nǔu wɛ́, ḿbɔ́ ńzẅíꞋlɛ. 21A ɡɔ́ɔ ŋ́kɛ́ ńzɛ nɛkyɛ́Ꞌtɛ, ńcú ŋɡɔ: «Mɛnu mi pʉʉ fú zɑꞋnɛ nɛzúꞋ tsɛt ŋwɑꞋnɛ-Sɛ́ lɑɑnɛ, ɛ́ puutɛ lɔ́Ꞌnɛ.» 22Pɔ́p zúꞋ sẅiŋɛ yi ɛ́ cẅɛtnɛ ntsu wɛ́. Ɛ́ pɔ́ ḿbɔŋ wɔ́p, ḿbɛn ḿbɔ́ ŋ́kʉꞋnɛ wɔ́p. Pɔ́p zɛ nɛpíkŋɛ, ńcú ŋɡɔ: «Yɔ kɑ pɔ́ mɔ́ɔ-Yɔsɛ̂p pɔ́ ɔɔ?»
23Yɛ́su pʉ̈ɔt mbɔ̌ pɔ́p ŋɡɔ: «Pʉʉ ɡʉ ŋ́ɡẅɛɛ kwɑŋɛ-sɑknɛkɛt nɛcú ŋɡɔ: Ŋɡɛmɛfu zɔŋ tú mbʉʉ yu! Pɛk zúꞋ ndɑɑkɑ́jʉ́ɔ mɛnu ɔ ŋ́ɡɛnɛ Kɑpɛɛnɑwûm, pɛn ŋ́ɡɛ zɑꞋnɛ lɑ́Ꞌ pʉʉ lɑ́.» 24Yɛ́su pɛn ŋ́kẅiꞋ ńcú mbɔ̌ pɔ́p ŋɡɔ: «Lɑ́ ŋ kɛ́ ɛ́sẅíi wʉ́ʉ nɛ́nẅín, pɛ́ lɔ́ɔ ḿbɛ́m nu-ŋɡɛ́mndʉ̈ɔ́Ꞌ-Sɛ́ lɑ́Ꞌ pɔ́p pɔ́.»
25Lɑ́ ɛ sẅíi wʉ́ʉ, kwɑꞋ nɛ́nẅín, ɛ́ ḿbɔ́ ŋkɑ́ yi Ɛlîi, ŋɡɛ́mndʉ̈ɔ́Ꞌ-Sɛ́, pɛpfúk pɑŋɡɛ́ pɔ́ tsɛt ŋɡɔ́ŋ-Pɑíslɑɛ̂l tɛꞋ. Mbʉŋ lɑ́Ꞌ ńnɑ́ŋ ŋɡuꞋ yɛ́tɑ́t nɛ́ pɛsɑŋ pɛ́nɛ́ntúkú kɛ́ lɔ́, tɛ mɑ́mɑ́ cʉ́ ḿvu tsɛt lɑ́Ꞌ-pʉɔ-Islɑɛ̂l tsʉʉ. 26Tɑ̌ɑ Sɛ́ kɛ́ ńdɑ́Ꞌ ḿbɔɔ ńtúu Ɛlîi njɛ́Ꞌ-ŋu wɔp pɔ́, ńcú, ɑ cẅɛt ŋ́ɡʉ pɔ ndɑ́-mpfúk mɑŋɡɛ́-Sɛlɛ́ptɑ tsɛt ŋɡɔŋ-Sidɔŋ.
27Ɛ́ lɑ́Ꞌ ḿbɔ́ nǔu ŋkɑ́ yi ŋɡɛ́mndʉ̈ɔ́Ꞌ-Sɛ́ Ɛlizɛ̂ɛ, pɛɡɑŋkɑꞋ-pɑ́p pɔ́ tsɛt ŋɡɔ́ŋ-Pɑíslɑɛ̂l tɛ ńzɑ́ɑ, Ɛlizɛ̂ɛ ŋ́kɑɑ kɛ́ ŋ́ɡɛ wɛcɔ́ tɑ́Ꞌ nǔu pɔ́p fíitɛ pɔ́, tɛ ńdíꞋ ndɑꞋ Nɑɑmɑ̂n ŋu-Silîi.
28Pʉɔ pɛtsʉʉ pinɛ pɔ́p m̄bɔ́nɛ ndɑ́-cúꞋlɛ zúꞋ pɔ́Ꞌɔ, lɔ́ŋ wɔp kɔ́Ꞌ. 29Pɔ́p lɔ sɛ́ pɛtsʉʉ, ŋ́ɡẅɛɛ Yɛ́su ńdɔk wɛ́ ɛ́fú tʉ́sɔŋ, ńcẅɛt tɛ ŋ́kúu ndǔ tú-nɛŋkɔ́Ꞌ, zʉꞋ yi pɛ́ kɑ kútnɛ tʉ́sɔŋ wɔp zúꞋu, ḿbɔ́ ńdɔɔ nɛfu ndǔ nɛŋkɔ́Ꞌ ńtsʉ́ʉ wɛ́ ḿmɑꞋ tsɛt fúꞋ. 30Lɑ́ Yɛ́su tɔ́k tsɛtsɛt pɔ́p ńdɛɛ ndúŋ wɛ́, ŋ́ɡʉ.
Yɛ́su ɡɛ wɛcɔ́ ŋu ẅí zẅikŋɛ kɛpɔŋ nǔu wɛ́ fíitɛ
(Mɑ́lɛ́kúshi 1.21-28)
31Yɛ́su ɡɛ pɔ́Ꞌɔ, ńcúŋ ŋ́ɡʉ nɛ́ Kɑpɛɛnɑwûm, ɛ́ pɔ́ wɛcɔ́ tʉ́sɔŋ nǔu ŋɡɔ́ŋ-Ŋɡɑlilɛ́. Lɛ́Ꞌ-nji yɔ́p kuꞋ, ɑ pɔ́ ńzíꞋ pʉɔ nɛ́ nu-Sɛ́. 32Pɛ́ mɑɑ yɛ ntɛ́ nɛzíꞋ pʉɔ nɛ́ yúu, mbíꞋŋɡɔ Sɛ́ kɑ pɔ́nɛ ŋ́ɡɑ́ wɛ́ nɛ́ mɛtʉʉ lɑ ɑ lɔk ńcú nu. 33Wɛcɔ́ ŋu pɔ́ yɛ́ ndɑ́-cúꞋlɛ zúꞋu, yɛcɔ́ zẅikŋɛ kɛpɔŋ pɔ́ nǔu wɛ́, ńnɑ́ŋ tɛ ńtsʉꞋnɛ wɛ́, ɑ lɔk ŋɡi tɛnnɛ ḿbɔ́ ŋ́kíi ńcú ŋɡɔ: 34«Yɛ́su mɔ́ɔ-Nɑ̌zɑlɛt, pɛkŋɛ ɡẅɛɛ kʉ̈ɔ́? Ɔ kɑ fɑ́ɑ ńtɔ́ pɔ nɛpík wɛ́k? Mɔ sɛ́ ńjí, ɔ fú mbɔ̌ Sɛ́, ḿbɔ́ mɔ́ɔ nɛ.» 35Yɛ́su cɔ́k yîyɑ́ zẅikŋɛ kɛpɔŋ, ńcú mbɔ̌ wɛ́ ŋɡɔ: «NɑꞋ, fú nǔu ŋu wɔ ńcẅɛt!» Zẅikŋɛ kɛpɔŋ ɛ̂yɑ́ ɛ́shɔt ŋu ɛ̂wɑ́, ḿmɑꞋ sɛ́ tsɛtsɛt pʉɔ ŋ́ɡɔ́ɔ ŋ́kɛ́ ɛ́fú nǔu wɛ́ ńcẅɛt kɛ́ ɡɛ yúu kɛpɔŋ nǔu wɛ́. 36Pʉɔ pɛtsʉʉ kɑ jʉ́ɔ pɔ́Ꞌɔ, ńcʉ̈ɔꞋ, ńzɛ nɛshɔtnɛ ḿbíkŋɛ tsɛtsɛt pɔ́p ŋɡɔ: «Sẅiŋɛ-ndʉ́m wɔ pɑ́Ꞌɑ ḿbɔ́ ŋɡɔ ku lɑ́ɑ? A tʉ́ʉ tɛ ńcú nu mbɔ̌ mɛzẅikŋɛ kɛpɔŋ pɔ́p fú nǔu ŋu ńcẅɛt. 37Lík-Sɛ́ kɛ́ ŋ́ɡɔ́ɔ ɛ́sɑt yîyɑ́ pɑk-ŋɡɔŋ.»
Yɛ́su ɡɛ ɡɑŋɡɔɔ tɛ ńzɑ́ɑ fíitɛ
(Mɑtʉ̈ɔ 8.14-17; Mɑ́lɛ́kúshi 1.29-34)
38Yɛ́su cẅɛt ndɑ́-cúꞋlɛ, ŋ́ɡʉ njɛ́Ꞌ Simɔ̂ŋ, ŋ́ɡɔ ŋ́kúu zúꞋu, mbɔ wɛcɔ́ ntʉʉ lyɔknút kɑ ɡẅɛɛ Mɑ́kẅiꞋ-Simɔ̂ŋ. Pɛ́ púꞋ mbɔ́ mbɔ̌ Yɛ́su ŋɡɔ ɑ cẅɛ́lɛ́ wɛ́. 39A tɔ́ ŋ́ŋɔ́Ꞌnɛ mbʉʉ kúu, ńdɔk tʉʉ ńcú nu, ɡɔɔ ɡɔ́ɔ ńzɑ́Ꞌnɛ. Mɑ́kẅiꞋ-Simɔ̂ŋ ɛ̂wɑ́ ɡɔ́ɔ ńdɔ sɛ́, ńniitɛ yúujʉ́ ŋ́ɡɑ́ mbɔ̌ pɔ́p.
40TúꞋ kɑ ɡɔ ɛ́sʉ́ʉ, pʉɔ pinɛ pɛɡɑŋ ɡɔ́ɔ ntɛ́ ntɛ́ ḿbɔ́nɛ mɛndɑ́ mɔ́p lɔk wɔ́p tɔ́. Yɛ́su zɑ́p mbɔ́ nǔu mbɑ wɛ́t ŋɡɔɔ lɑ́, ɑ fíitɛ. 41Mɛzẅikŋɛ kɛpɔŋ pɔ́ ŋ́ɡɔ́ ɛ́fú nǔu nɛlʉ́m wɔp ńcẅɛt, ŋ́kíi ńcú ŋɡɔ: «Ɔ mɔ́ɔ-Sɛ́.» Lɑ́ Yɛ́su cɔ́k wɔ́p, ḿbɔɔ pɛ́m ŋɡɔ pɔ́p cú nu pɔ́, mbíꞋŋɡɔ pɔ́p kɑ jí ŋɡɔ Yɛ́su Nzɑ́Ꞌŋkʉ-puꞋ ẅí Sɛ́ kɑ kɑꞋnɛ mbɔ̌ pʉɔmɛsɔŋ.
Yɛ́su ncẅiŋkʉʉ sʉ́Ꞌnɛ Jẅidɛ̂
(Mɑ́lɛ́kúshi 1.35-39)
42Njí kiɛ, Yɛ́su fú tʉ́sɔŋ ńcẅɛt, ḿbɔ́ ńdɔk wɛ́ kɔ̂ŋtɛt ŋ́ɡʉ, lɑ́Ꞌ cẅɛt ńzɛ nɛmɔɔ zʉꞋ ḿbɔ́ ńdɔ́ɔ wɛ́. Ŋ́kẅɛ́ɛtɛ wɛ́ pɔ́Ꞌɔ, ńdɔɔ nɛɡẅɛɛ wɛ́ ŋɡɔ kɔɔ ɑ nɑ́ wɔ́p, ŋ́ɡʉ. 43Lɑ́ Yɛ́su cú mbɔ̌ pɔ́p ŋɡɔ: «N ɡẅɛɛ nɛpɛn ŋ́ɡʉ tsɛt mɛcɔ́ mɛtʉ́sɔŋ, ɛ́sɑ́Ꞌ Ŋkʉʉ sʉ́Ꞌnɛ ẅí Sɛ́ kɑ túunɛ wɑ́ɑ nɛsɑ́Ꞌ, nɛɡɛ pʉɔmɛsɔŋ jí ŋɡɔ yɔ ŋkɑ́ yi Sɛ́ zɛ nɛnyɛt nɛfɔɔ nɛ́.» 44Ńcú pɔ́Ꞌɔ, ńzɛ nɛnɛn tsɛt mɛndɑ́-cúꞋlɛ-Pɑyúdɑ, tsɛt ŋɡɔ́ŋ-Jẅidɛ̂ ɛ́sɑ́Ꞌ Ŋkʉʉ sʉ́Ꞌnɛ.
Currently Selected:
Lúkɑ́shi 4: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
