Lûk 18

Kwə̀ən kə ushwāʼ kə wìkpuw ghèe Sàʼàtə̀saʼ

1Yɛso n daŋso kwə̀ən kə̀a tsughu aghəa â tsə̀təndə̄ghā tə wə̄n to enyəa ghe lô bughū kômlo alegɔɔ̄ŋ tsəgha. 2Ù n dzɛ̀ tsùghù enyəa, “Sàʼàtə̀saʼ ù lì fə̀ lo an nàʼà fə̀ li fo, tsoo nìi yǒ ghùw lì tò kəfəgha, ù m buʼù tsə̀ŋo sùghò yǒ Zə̀ kò. 3Wìkpuw ù lì n lo a fughu alo enaʼ, ù mgbɛɛ̄ dzughòo tsəgha dzì a vʉ̀a tûwbʉ̀ghà vʉ̀ enyəa ù saʼā fughuu kɔʼ saʼ è ghèe ghê ghùw kə̀tuw ù wə̄n. 4Ù m bùʼ dzə̀ tue kəŋo è dzə, kòom nùghù bvʉ tsughu enyəa, ‘Ghəa M̀ buʼù ghəə̄ŋ ko fɛ enyəa Ǹ tsəŋo yo Zə̀ kò, nìi sùghò yǒ ghùw to kəfəgha, 5wìkpuw wən kuuwn fəmso mùghò, Ǹ saʼa fughuu kɔʼɔ nǔ sāʼ zən â wə̄n, kwo ù è kɔɔ̄ wī mugho ghəa ù mgbɛɛ̄ dzughòo zeē ko mugho â fuū kə ndughu ko fɛ zueezuee!’ ” 6Mughu ù te fi dzɛ̂ nù â tsə̀təndə̄ghā tə wə̄n to enyəa, “Zuw to nlò shwaʼ u bəən kə sàʼàtə̀saʼ wə̄n wo a. 7Bùghò ŋgòʼ è ghùw wən lô alekə̀a èghəa tò zən, Zə̀ kə̀ yo ênzə̂n aledaŋso saʼā fughuu kɔʼ sāʼ â ghì ghə̀là ù ləghaa lo, abugho ghe dîi zeē a vʉ̀a wə̄n à, ntsuʼu n dzə̀m n dzə̀m a? To ù kòom lɛɛ̄n boo enyəa gha kə sə mò ù kà êzə̀ â ghee ghəŋlo à? 8Ǹ dzâa wô â ghɛ̀, ù tsòo mbǎa saʼa fughuu kɔʼɔ sāʼ â ghee tsuetsue. Ǹ sô fɛ bvʉa enyəa, bugho Wɛ ù Ghùw lo bughò fɛ am mbī, ù lo bùghò kòʼò ko nù ghî ghəla ghe boō â wə̄n a?”

Kwə̀ən kə ushwāʼ kùu ndùw Falàsîi ghèe Dzə̀akə̀mwàʼsò

9Yɛso m fùghù ndùw sùghò kwə̀ən kə ushwāʼ â ghì à li ghəla ghe mò kɔʼso ghue zo enyəa ghe lo ghî à dzûŋ ghò ghe yia a kuuwn nîi yô ghî à li gho tò kəfəgha. 10Ù n dzɛ̀ â ghee enyəa, “Ghî à li a fə̀ nughu tsughu ghee a bə̀ghà alekɔʼɔ̄ gɔ̂ŋlò am be kə̀ ne ko; aŋ ghee ghən à bə̀ghà, ù mɔ̀ʼ fə̀ lo Falàsîi, u mɔ̀ʼ n lo dzə̀akə̀mwàʼsò. 11Falàsîi vʉ n nùghù těe è kɔʼ, gɔ̀ɔŋ tsùghù aŋ ghùe u wə̄n enyəa, ‘Zə̀ kò, M̀ fughuu zɔ̀ɔŋ kə̀a enyəa Ǹ yo dzə̂ tò ghî à li ghən, mbaaŋ tə aghì, bəən tə aghì, nùuŋ tə aghì, M̀ bûʼ yò sughò tǒ dzə̀akə̀mwàʼsò wə̄n. 12Yìa M̀ baā dzughu zo tə nəgha tə bə̀ghà alo ewə̄n, dzə̀a fùghuu sùghò ndzùghòo faŋa â Zə̀ kò am fʉgha waŋā eghə̄m Ŋ̀ kele tsughuu.’ 13Dzə̀akə̀mwàʼsò vʉ ŋ kuuwn ti alo kədɛ̀ mò ù m fə̀ŋ kwu kele. Ù m buʼù tsə̀ŋo ghaʼa ko alelɛɛ̄n kɔʼ kəwala, ù n dzâa tsùghuu ko enyəa, ‘Zə̀ kò, kwuso se zo a zəŋò mùghò, Ǹ lo ghûw ù bǐigh!’ 14#Mat 23:12; Lûk 14:11 Ghəa Ǹ dzâa wô fɛ â ghɛ̀, tûw wən fə̀ tsughuu nduw ebàm alô wə̄n mò ù zɔ̀lɔ an sə kə Kəzə̀ tsə̀ghàtàʼà Falàsîi vʉ̀; nu ghùw wəla ù kuuwn maʼà tsughu ghue u wə̄n wo, Zə̀ kə̀ lo kɔʼso wə̄n. Ghùw wəla ù kuūwn kɔʼso ghue wo, Zə̀ kə̀ lo tsughuso wə̄n.”

Yɛso fùghù ebughuso â wɛghêtùghu gho

15Tsuʼ ù lì wo, ghî ghə̀ n nîi wò sùghò wɛ a ghee enyəa Yɛso lò mɔ̂ɔ tsughu ghee to ghe kele èbughunlo; tsə̀təndə̄ghā tə wə̄n tə ŋ kòʼ ghəa yì, ghe ŋ kee ndùw ghì a te gho. 16Yɛso ŋ kuuwn tɔŋɔ wò kô wɛ a te gho, dzɛ̀ tsùghù enyəa, “Zə̀gha nlò wɛghêtùghu gho ghe bughò kôʼ mùghò, kà nlǒ ghee bâʼ kòmlò, nu Fɔ̂e u Kəzə̀ ù lo â ŋgòʼ zə̀n. 17M̀ fɛ kùu dzàa wò nù â ghɛ̀ enyəa, bugho ghùw tàʼkè nî Fɔ̀e u Kəzə̀ tǒ wɛ̂ɛtùghu, ù lo nyə̀ kòʼ yò a te.”

Ghùw ù Kǔu

(Mat 19:16-30; Mâk 10:17-31)

18Ghùw ù ne ù lì m bvʉ â wə̄n enyəa, “Wàdè waŋa ù dzùŋ, Ǹ lo aleghəŋlo ênzə̂n tò Ŋ̀ kelê mùghù è doʼn təla zo a?” 19Yɛso n dzɛ̀ â wə̄n enyəa, “Ghù sə̀ tɔɔ̄ŋ mugho enyəa à lǒ ghùw ù dzùŋ a? Ghùw ù lì yo dzə ghùw ù dzùŋ, à gɔ̀ʼɔ̀ ko yo Zə̀ kò. 20#Ksm 20:14; Lwa 5:18; Ksm 20:13; Lwa 5:17; Ksm 20:15; Lwa 5:19; Ksm 20:16; Lwa 5:20; Ksm 20:12; Lwa 5:16 Ghɛ̀ mgbaŋ kwō nû lwâŋ u te wo enyəa, ‘Kà sə nùŋlò, kǎ ghùw wì, kà tsɔŋ, kà tee bvʉ̂nɔ̀ʼ alo agha, zuw â tsùghò àsùghò â zùghùu.’” 21Tûwbʉ̀ghà vʉ̀ m bɛ̀lɛ̀ tsùghù enyəa, “Aŋ ghu kə wɛ̂ɛtùghu ko, M̀ fɛ noo naŋa sə̀ kɔ̀ʼ wò kô lwàŋ wə̀n ù dzə̀m.” 22Yɛso n zyənlo è ko, dzɛ̀ â wə̄n enyəa, “Ghəa e nāam buw e mɔ̀ʼ. Fěe tsughu fʉgha wʉ̀a wò u dzə̀m ghù dzughuu fughu nduw kua u te wo â ghì à laa gho, ghù doʼo wo ghàʼ à ghù, ghù ke e kūu alo Kəwālā.” 23Ghəa tûw vʉ zuw tsughu ghəa yì, ghue wə ŋ gwə̀n tsùghu wə̄n enyə, ù màʼà ŋgeē kuū. 24Yɛso n lɛɛn ko wə̄n enyə, sɔm tsughu enyəa, “Ghəa e tughūu daŋà tsəghà â ghì à kuu gho, tò ghəa è nyəa zən am Fɔ̀e u Kəzə̀! 25E kuuwn bughuun nù â kə̀anyòm kò alenɛ̀ɛn tsəghà sə an sə e fəsaʼ tsə̀ghàtàʼà â ghùw ù kǔu alenyə am Fɔ̀e u Kəzə̀.” 26Ghî yia ghe mò zyəə̄n shwaʼ vʉ wo m bvʉ tsughu enyəa, “À kǔuwn lò ndughoo alezə̄ kətuw à?” 27Yɛso m fwə̀n bɛ̀lɛ̀ tsùghù enyəa, “Ghəa zəla ghùw yò aleghəə̄ŋ kôʼ, to Zə̀ kə̀ ghəŋlo.” 28Pità fi dzɛ̂ nù enyəa, “Kòʼô, ghàʼ maā fʉgha waʼa wo u dzə̀m zə̀ghàa tàʼà ndùw, nùghù wò a bàâ ghù.” 29Yɛso n daŋso dzɛ̀ â ghee enyəa, “M̀ fɛ kùu dzâa nù â ghɛ̀, ghùw tsə̀n yò ù zə̀ghà taʼà wô be kə wə̄n ko, wì ù wə̄n, waazə̂ a wə̄n, zə̂ ghèe tsele, ŋkāa wɛ a wə̄n, bòʼ ghəa e Fɔ̀e u Kəzə̀, 30ù lo dôʼnlo mò ù kà ndə̀mà tə ufʉgha tə kele tsuʼ u te wo, àsùghò mùghù è doʼn təla zo an tì kə̀ li kə chiā kə lo so e bughò.”

Yɛso kə̀a kùeen kpèʼe àghəa kùu ndùw vʉ e wə̄n

31Yɛso n nì kɔ̌ʼ tsə̀təndə̄ghā tì eghə̄m à ghè tò tə bə̀ghà dzɛ̀ â ghee enyəa, “Kele tsughu nlò enyəa sɛ̀ fɛ êzə̄ŋ e kɔʼɔ ndùw an Yɛ̀lusalɛ̀m, à lǒ fughu ghəa ghə̀n à dzə̀m ghîishʉ̀gha fə̀ tɔm naŋā kùu ndùw Wɛ ù Ghùw, a lo nîi bəla ko. 32Nu ghe lô wə̄n fughuu nyəa tsughuu aŋ ghu kə Etòʼò, ghe lo e sɔʼsō wə̄n, ghəəŋ wə̄n â ghəa à dəla a kətuw gho, tsyənlo ntə̀ghà a zəŋo ughùe; 33ghe lo nyâʼ wə̄n am fʉgha wə ŋkwə̀n, ù kè daŋso kɔʼɔ̄ səā kɔʼ alo evʉ̄ abugho tsuʼ m kpe tsughu n təgha.” 34Tsə̀təndə̄ghā tə wə̄n tə ŋ ŋgəmso kuūwn zuuw tɔ̄ɔ yo ghəa zo aŋ ghəa ghən, nu ghəa ghən fə̀ deē yo ghee â tɔ è li zo, ghe n tsoo zuuw kɛ̄lɛ̄ yo fəgha kə̀là ù kə̌aa ghè kò. Tɔŋlo enyəa à màʼâ lo mo ghe ŋ ghəa ghən nân tsughu â ghee.

Yɛso bǎaŋ ghùw ù fǒo

35A fə̀ bugho ghê Yɛso kuʼso nduw Yɛ̀lekò, ghùw ù fǒo ù lì n doʼ fughu am bùghu e dziī, nɔɔ kə̄nɔ̄e; 36ghəa tûw vʉ zuw dəm kə səŋō tsəghāa, ù m bvʉ enyəa, “À bòʼn tùghù kwò a?” 37Ghe n dzɛ̀ â wə̄n enyəa, “Yɛso, ghùw Nazalɛ̀t wən tsəghàa dzì.” 38Ù n dzàŋ è tɔŋɔ, “Yɛso, wɛ ù Dɛvìd, kwuso se zo a zəŋò mùghò!” 39Ghî ghəla ghe fə̀ bughōo esə̄ ŋ ke wə̄n enyəa ù mbaā doʼò mɔŋ; ù m fəghaan saa mɛ̀ʼn sə̌a kɔʼɔ ko kə̀bɔ̀ŋ enyəa, “Wɛ ù Dɛvìd, kwuso se zo a zəŋò mùghò!” 40Yɛso mo è tee, dzɛ̀ â ghee enyəa ghe nîi wô wə̄n a vʉ̀a ghee; ghəa ù kuʼso wô a vʉ̀a wə̄n, Yɛso m bvʉ â wə̄n enyəa, 41“Ghù lə̀ghâa kwò aŋ ghùu mùgho a?” Ù n dzɛ̀ enyəa, “Mughùbè, ghəəŋ tsùghùu, mùghò è koʼō luʼū to.” 42Yɛso n dzɛ̀ â wə̄n enyəa, “E koʼō luʼū to, boo zəghà zə̀ ŋ ghù baŋlo.” 43Ù n daŋso kàʼ tsughu alekòʼ tə̀luʼū, nùghù ndùw sùghò a bàâ Yɛso, fughuu ndùw ŋkɔʼso â Zə̀ kò. Ghî yì fughu a dzə̀m ŋ kòʼ ghəa yì, təm ŋkəma â Zə̀ kò.

Currently Selected:

Lûk 18: agq

Highlight

Copy