Lûk 17
17
Yɛso zòʼn Tsə̀təndə̄ghā tə wə̄n aleghuūw maʼà èbo, àsùghò alekele tə̀fə̀ŋ
(Mat 18:6-7, 21-22; Mâk 9:42)
1Yɛso n daŋso dzɛ̀ â tsə̀təndə̄ghā tə wə̄n to enyəa, “À lò èsəŋò enyəa ghùw lo nû alekele kə̀tsòmlo aleghəŋlo eghəa, e kuuwn lò enyəa ghùw wəla u tsoō kɔʼɔ ghùw, ù lò an tsù! 2Â wə̄n alekuūwn tsom wɛ̂ɛtùghu u mɔ̀ʼ aŋ wɛghêtùghu ghən enyəa ù ghəŋlo èbo, e bɛso lo enyəa ghe nî də̀làdə̀n kə etia, ghe kɔ̂n a zəŋo ughùe, ghe ndûw maʼà alo kətsə̀m. 3#Mat 18:15 E ghomlō nlò aŋ ghùe zɛʼɛ̄; abugho wàazùghù ghəə̄ŋ tsughu bo zo, komso ndǔw wə̄n, mò ù n tigh kuwnlo, ghù ŋ ghuuw màʼà bo e wə̄n; 4abugho ù bùʼ ghəə̄ŋ boōn ko ghû â ghəa gho tənəghā sə̀ghàmbəgha alo fətsuʼ, vʉ̀a ù kòom buʼ wô sughò ghu ko tənəghā sə̀ghàmbəgha enyəa e ŋ kūwnlo, ghù ghuuw maʼa bo e wə̄n zo, ghù kì alewuūwmaʼà bo e wə̄n.”
55 Tum tə Kə̀lestò tə̀ n dzɛ̀ â Mughu ù te enyəa, “Ghəəŋ tsughu boo zaʼa zə e tughuu.” 6Mughu ù te fi dzɛ̂ nù â ghee enyəa, “Abugho ghɛ̀ mô bûʼ boōm fughuu tsughu ko fənyàŋlò tò aŋ sam e kàʼ fə̀ mostàd#17:6 Sam e kàʼ fə̀ mostàd: Sam e kàʼ fə ukəm, a taā tsughuu, fə n noo fughu kɔʼ kâʼ fə ne fo. fə̀ nyâaŋ toō a te, to ghɛ̀ mò lò nû aledzàa tsughu â faŋkwu kə fəkàʼ kən ko enyəa, ‘Dwə̀la nùghu kɔʼ ghue wʉ̀a wò, ghù tsughu tam tsughu an dzùghùntsòʼ!’ Kâʼ fə te fə sò zuūw wô â ghɛ̀.”
Fəgha kə ghùw ù kəfwàʼ ki alefwaʼā
7“Ghùw wɛʼɛ ù lì kpaʼ lò nû ù ki ghùw ù kə̀fwàʼ ù wə̄n ù gwə̀nlo â wə̄n ŋkāa ù chǐin ndzì tə wə̄n to, ghùw ù kə̀fwàʼ ù te vʉ̀a ù ndùw kwən wo, ghùw wɛʼɛ ù te vʉ̀a ù dzɛ̀ â wə̄n enyəa mba bùghò dòʼo tsughù ghù zə kɔʼ à? 8To ù sə̀ lǔum dzàa ndùw â ghùw ù kə̀fwàʼ vʉ̀ enyəa, ‘Fəghaan tsughu ghue wo, ghù ghəəŋ tsughu fəgha kə̀ zəa ko â mùghò tò Ǹ zəā kɔʼɔ̄ dzə̂, sěe ghù sə̀ zəā mʉā kɔʼɔ sughò lo a?’ 9Ù sə̀ fùghuu to nǔ zɔ̀ɔŋ kò â ghùw ù kə̀fwàʼ vʉ̀a fwǎʼ fwàʼ kə̀là ù mò tum wə̄n a te a? 10E bɔɔm lò sugho êzə̀ à ghɛ̀, abugho ghɛ̀ fwâʼ mɛʼɛ̀ tsughu fwàʼ kə̀là ghe fughu â ghɛ̀, ghɛ̀ ki aledzàa tsughu enyəa, ‘Ghàʼ lo ko bvùʼù mə̀ ŋkɔ̀ɔ, ghàʼ fɛ fwàʼà kô fwàʼ kaʼa.’ ”
Yɛso bǎaŋ ghî a tətsùghò eghə̄m
11Yɛso n tsəghàa dzì an twee Sàmalìa ghèe ghê Galèlîi, ù tsughuu an Yɛ̀lusalɛ̀m. 12Ghəa ù kuʼso ndûw naʼà fə̀ li fo, ù m kpeen ndùw ghèe ghê ghì ghò eghə̄m mo ghe dzaŋà tə̀tsùghò, ghe n lɔʼso ti alo kədɛ̀, 13nàʼn zɛ̀ʼɛ wò an dzə̂ tə̀ tughu to enyəa, “Kee â ghù a Mughùbè Yɛso, kwuso se zo a zəŋò ghàʼ.” 14#Lɛv 14:1-32 A m bùghò ù kòʼ nduw ghee, ù n dzɛ̀ â ghee enyəa, “Ndǔw děe ndùw nlò ghue zo â fɔ̀e tə Kəzə̀ tò.” A m bùghò ghe nduūw, ghe n tùghù kòom kɔ̀ʼ an dziī. 15Ghəa ghùw ù ghee u mɔ̀ʼ zyəə̄n zuw tsughu enyəa dzâŋ zə̀ ŋ wə̄n zəghàa, ù ŋ kòom kɔ̀ʼ ebàm, kɔʼso ndùw Kə̀zə̀ dzîidziī. 16Ù m bɔ̄ɔm ndùw nyə̀ŋè pfʉ̌a ndùw ùsʉ̄ a tsəlà Yɛso, fughu zɔ̀ɔŋ kə wə̄n. Tûw wən fə̀ lo ghùw ù Sàmalìa. 17Yɛso fi daŋso bvʉ nû enyəa, “Yìa Ǹ so a mô ghɛ̀ baŋlo èghəm a? Ghən tɛ̀ndzughu sô kǔuwn lò ghɛ â ghee à? 18To e fɛ kùum lò enyəa ghùw mò ŋgə̀mso yò alekòom bughò fughu kəzɔ̀ŋlò â Zə̀ kò a, gɔ̀ʼɔ̀ ko yo ghùw ù kə̀tum wən à?” 19Yɛso fi dzɛ̂ nù â bə̀ghà vʉ enyəa, “Nùghu kɔʼɔ̀, ghù nduw è zəghà zò, boo zəghà zə ŋ ghù bəghasə.”
Nəghā zəla Fɔ̂e u Kəzə̀ ù kê bughòo a te
(Mat 24:23-28, 37-41)
20Ghəa Falàsîi tə̀ bvʉ â Yɛso enyəa Fɔ̂e u Kəzə̀ ù laʼà bughòo zə̀n a, ù m bɛ̀lɛ̀ tsùghu ghee enyəa, “Fɔ̂e u Kəzə̀ ù lo bùghòo yò wə e deē wo tsə̌a to, tò ghùw è koʼōkɛlɛ enyəa Fɔ̂e u Kəzə̀ wə̀ ŋ kaʼ, 21ghùw mɔʼɔ̄ yo ù kè sɔʼɔ̀ dêe tsughuu â ghù enyəa, ‘Kòʼô, wən à!’ Ŋkāa, ‘Vʉ̀a!’ Tɔŋlo enyəa Fɔ̂e u Kəzə̀ ù lo ziī am bvʉa zɛʼɛ̄.”
22Ù n daŋso dzɛ̀ â tsə̀təndə̄ghā tə wə̄n to enyəa, “Nəghā e kê kpěe nù, ghɛ̀ ke di kē tsughu alekɛ̀sò kôʼ Wɛ ù Ghùw alo fətsuʼ fə mɔ̀ʼ etɔ̀ŋ, ghɛ̀ ke ŋgəmso yo alekòʼ. 23Ghî à ke so â ghǔ a, ‘Ghù wɛ̀ɛ, à lò fɛ!’ Ŋkāa, ‘Ghù wɛ̀ɛ, à lò fî!’ E kwo ghɛ̀ è ke e ndûw, kà kê è nlò dɔ̂ɔm tsə̀ghà tə̀ŋò a bàâ ghee; 24Tɔŋlo enyəa ghɛ̀ lo kòʼòkɛ̀lɛ̂ tsuʼu Wɛ ù Ghùw tò aŋghəa ghɛ̀ koʼòkɛlɛ kɔʼɔ aŋghəa ghuuw e nughùun mwâa tsughuu a te alo kəwālā. 25À kǔuwn lò ko enyəa, ù lo ki alebùʼù fala dzə̂ an ndə̀mà tə aghəa, ghɛ̀ a nɛ ghən ke tue maʼa tsughu wə̄n. 26#Dzs 6:5-8 Tî kə Wɛ ù Ghùw kə̀ kê bɔ̌ɔm nyoʼn lò sugho tò kə Nôa ko. 27#Dzs 7:6-24An tì kə Nôa kə te ko, ghî a fə̀ zuuw ko alezə̄a, mʉa, duʼnlo, zuʼso nìi kǎaŋ ko àyi, yîzən ghə n nîi ndùw ànum, ndùw tɛ̀ ndùw an nə̀gha zəla Nôa fə̀ nyəā kɔʼɔ̄ alo kəkwə̀n. Fʉ̀ghàdzughù tə̀ n daŋso è sə, bùghò lə̀ŋe tsughu ghee a dzə̀m. 28#Dzs 18:20—19:25 À fə̀ lo sugho eghəla an tì kə Lɔ̂t, ghî ghə̀ n zuuw ko èzə, mʉa ndùw zuʼso zueen ndùw sùghò bekewə̄n, ghəəŋ ko ghee â bekewə̄n ko, gwə̀ən ndùw èsum, bəghaa ndùw tə̀ndughu. 29Tsuʼ wəla Lɔ̂t fə̀ zəghàa tsughu Sodòm, Zə̀ kə̀ n zə̀ghàsò sə̀ tsùghù wò chia tə ŋwə̀n, tə n tsughu a zəŋò ghee tò eghuuw, ləŋe tsughu ghee a dzə̀m. 30À kè bɔ̌ɔm lò sugho êzə̀ tsuʼ wəla Wɛ ù Ghùw kè dêe wô sʉ wo a te. 31#Mat 24:17, 18; Mâk 13:15, 16 An tsuʼ fə̀ è fì, mò ghùw kè lo an gɔ̀ŋ kə ndughu, mo fʉgha u wə̄n u lo an ndughu, e kwo ù lò lɛso ndûw səā tsughuu wô enyəa e se bughò kûum sə, wəla ù kè lo aŋ ŋgwə̄n, e kwo ù lò kôom lɛsō kwəlā wo. 32#Dzs 19:26 Mòʼn tsughu nlò ghəa zə̄lā e fə̀ sə a zəŋò wì ù Lɔ̂t. 33#Mat 10:39; 16:25; Mâk 8:35; Lûk 9:24; Dzn 12:25 Ghùw wəla ù bəghāa səā mughù e wə̄n zo, ù lo gùuŋ nù, wə̄n ù laam nî tsughu enyəa e yo dzə̂ fəgha ko, ù lo zə kətuw. 34M̀ fɛ dzàa wò nù â ghɛ̀, â tsuʼ wo, an tsuʼ wə e vʉ̀, ghî ghə̀ e kē nyəŋ a bə̀ghà akə̀ ùchùa, ghe n nì ù mɔ̀ʼ, naŋatàʼà ù mɔ̀ʼ. 35Yîzən ghə e ke e dzoo fʉgha wo ghee a bə̀ghà an tia è gwuūn zo, ghe n nì ù mɔ̀ʼ, naŋatàʼà ù mɔ̀ʼ.” 36[Mo yînûu à lo a bə̀ghà an usum, a n nì ù mɔ̀ʼ, naŋatàʼà ù mɔ̀ʼ.] 37Ghe fi daŋso bvʉ nû â wə̄n enyəa, “À kè lò ghɛ a Mughùbè?”
Ù n dzɛ̀ â ghee enyəa, “Dzʉghadzʉgha u alo kəlùʼù zuʼù ko abugho gwən e nyôm è nyəŋ fughu.”
Currently Selected:
Lûk 17: agq
Highlight
Share
Copy
Want to have your highlights saved across all your devices? Sign up or sign in
