Lûk 19

Yɛso ghèe Zàkyôs

1Yɛso n tsə̀ghàa dàŋà tsə̀ghàa dzì, ù n tsə̀ghà nyə̀ ndùw dzì an Yɛ̀lekò. 2Ghùw ù ne ù ghì à dzəā a kəmwàʼsò ù lì n lo a fughu ghe mò tɔŋlo enyəa à lǒ Zàkyôs, mò ù kǔu, lò aŋ kə̀mà fə ughùe. 3Ù ŋ kəŋo kèe dzì alekòʼ ŋgòʼ è ghùw wəla Yɛso lǒ ghè wò, ù màʼa fə̀ lo aŋ kə̀mà fə ughùe, ghî a màʼa fə̀ ŋge tsūŋ sugho. 4Ù fi ndûw nyə̀ŋ tsə̀ghà ndùw nù â sə ko, ndùw kɔʼ kɔʼ aŋ kàʼ fə Sikamò #19:4 faŋkwu kə fəkàʼ fə̀ li fo, kə fə̀ lo tò kâʼ fə àŋgəm. enyəa e kôʼ Yɛso, Yɛso màʼà tsəghàa nduw dzì a fughu. 5Ghəa Yɛso bùghò tɛ̂ tsughu an lùʼù kə te ko, ù n lɛɛn kɔʼ edzūŋ, dzɛ̀ â Zàkyôs enyəa, “Zàkyôs, mba sə̀ tsùghù wò, nu Ǹ nɛ e zēe alô ghù.” 6Zàkyôs ŋ ghàlà sə̀ tsùghù è wo, tsughu kpè nì kɔʼ Yɛso alo eduʼnlo. 7Ghəa ghî à kôʼ tsughu ghəa yì, ghe ŋ kāʼ tsughu aletsə̀əm kə̂aa kaŋlo enyəa, “Ù ndùw alendùw bwîin kôʼ ghùw mò ù bǒo â mwam wo.” 8Zàkyôs n nùghù těe è kɔʼ, dzɛ̀ â Mughu ù te enyəa, “Kòʼô, Mughùbè, êzə̄ŋ aŋghəa a ti fɛ, Ǹ nîi kɔ̀ʼɔ̂ kə̀m kə ufʉgha kaŋā, Ǹ dzughù â ghì à laa gho. Mò à lò enyəa M̀ maā ghùw kpaʼ tsè kòʼ an dziī è lì, Ǹ tsəā tsəghàa ndûw èbàm tənəghā tə chìakò.” 9Yɛso n dzɛ̀ â wə̄n enyəa, “Nɛ an tsuʼ u nɛ wə̄n, ndughu zən n tuw kə zə bòʼ tûwbʉ̀ghà wən lo sugho wɛ ù Abə̀làhâm. 10#Mat 18:11Nu Wɛ ù Ghùw mò am mbī bugho alebùghò kəŋo səā kɔʼ ghî ghəla ghe lâʼ mughu, alebəghaasə ghee.”

Kwə̀ən kə etsʉ̀ aŋ kua wə ŋgɔ̀ʼ wə etsɛ̄ eghə̄m

(Mat 25:14-30)

11Ghəa ghî à naam zyəə̄n ghəa a Yɛso yìa ù mò kəaa, ù n ndùw nyə daŋso ndùw aŋ kwə̀ən kə ushwāʼ kə̀ li ko, nu à fə̀ lo mò ù ŋ kuʼso Yɛ̀lusalɛ̀m, ghî ghə̀ m môʼn sùghò enyəa Fɔ̂e u Kəzə̀ u ki alekùʼù daŋso nî kə̀bəla. 12Ù fi dzɛ̂ nù enyəa, “Wàandùghèsā ù lì fə̀ nughu kɔʼ nû, nùghù mìasò ndùw an nāʼ è li zo alendùw zəā wô kə̀də̀ŋ. 13Tò ù è nughù mò ù n tɔŋɔ tsughu kɔ̀ɔ ŋ wə̄n mò eghə̄m dzùghùu fughu tsughu ghee â bɔ̀ŋ tò eghə̄m; chìa e mɔ̀ʼ, chìa e mɔ̀ʼ, dzɛ̀ â ghee enyəa, ‘E ghəəŋ nduw nlò bekewə̄n ko alo m vʉ̀, tò Ǹ ndûw kwəlā nyəā wô èbàm.’ 14Bəghà vʉ n lo êzə̀ mo naʼ e wə̄n e ləghaa yo wə̄n. Ghe n tùm ndùw tsə̀təndə̄ghā a bàâ wə̄n enyəa ghe ndûw naʼà enyəa, ‘Ghàʼ ləghaa yo enyəa tûw wən doʼò də̀ŋ kaʼa.’ 15Ghe n ndùw tsùʼ wò bə̀ghà vʉ alo kədə̀ŋ; ù ŋ kwə̀n nyə̀ wò èbàm, daŋso dzɛ̀ enyəa ghe tɔŋɔ̄ fughuu tsughu kɔ̀ɔ ŋ wə̄n mìa ù mò fughu kua wo â ghee enyəa e kôʼ enyəa ghe n namso kə kele to am bekewə̄n a. 16Fə sûesʉ fə m bùghò dzɛ̀ â wə̄n enyəa, ‘Mughùbè, bɔ̀ŋ zəghà zə̀n è mɔ̀ʼ m mùghò fughu kpeʼe â bɔ̀ŋ tò eghə̄m tò kənamso.’ 17Ù n dzɛ̀ â wə̄n enyəa, ‘Ghù ŋ ghəa e dzə̂! Ghù lǒ ghùw ù kə̀fwàʼ ù dzùŋ. Ghəa ghù lò dzə̂ alekele nyàaŋ fə fəfə̀ghà, ghù dòʼn nù, ghù è lɛɛn naʼà tò eghə̄m.’ 18Fə̀ li fə n ndùw bùghò sùghò a bàâ fə sûesʉ fì, dzɛ̀ â bə̀ghà vʉ enyəa, ‘Bɔ̀ŋ zə̀ghà zən m mùghò fughu â bɔ̀ŋ tò tə tɛ̀ tò kənamso.’ 19Ù n dzɛ̀ â fə te fo enyəa, ‘Ghù ki aledòʼò ghù è lɛnlo â nàʼà tò tə tɛ̀.’ 20Fə̀ li fə n daŋso ndùw è bugho, â wə̀n à, ‘Mughùbè, bɔ̀ŋ zə̀ghà zən zəla mùgho mò bɔ̄ɔm kɔlɔ̄ kɔʼ aŋ wàandzʉ̄, sɔʼ naŋa è nduw; 21mùgho màʼa fə̀ tsəŋō ghaʼā ghû, nu ghù lò enyə mwam wʉ̀a u ŋgee tughuu nù, ghù mbaaŋ ghəəŋ nù, ghù zə̌a aŋ kwe e ghì.’ 22Tûw vʉ n dzɛ̀ â fə te fo enyəa, ‘Ŋ̀ ki alefɔesō tsughu ghû bòʼ dzughu zə̀ghà, kɔ̂ɔ fə biigh fo tò ghû! Ghù màʼà kwo enyəa mwam waŋa u tughuu nù, yìa m mbaāŋ ghəŋlo, zəa sùghò am bəghàbəgha, 23à lǒ kwò ghù màʼa fə̀ doʼŋkè ndûw maʼà naŋâ kua waŋa alo kədzəŋe enyəa mò M̀ bughò nù, mùghò m bùghò nì kɔ̌ʼ à namso ko a tè à?’ 24Mughùbè vʉ̀ n daŋso fə̀n dzɛ̀ tsùghù â ghì ghəla ghe mò ti fughu enyəa, ‘Nǐi nùghu kɔʼ nlò bɔ̀ŋ è te aŋ ghùu wə̄n, ghɛ̀ fughu nduw â ghùw ù vʉ̀a ù ki bɔ̀ŋ tò eghə̄m.’ 25Ghe mo enyəa, ‘Mughùbè, ù bùʼ kì dzə təbɔŋ èghə̄m!’ 26#Mat 13:12; Mâk 4:25; Lûk 8:18 Mughu ù te m bɛ̀lɛ̀ ndùw ghee enyəa, ‘Ǹ so Ǹ dzâa wô â ghɛ̀ enyəa, ghî ghəla ghe bûʼ ki dzə̂ fəgha ko, Zə̀ kə̀ lo fughuu kpeʼe nu ghee â ndə̀m; ghəla ghe ki yo, nyàaŋ fəla ghe bûʼ ki, Ù lo nîi nughù kɔʼ aŋ ghùu ghee. 27#Mat 25:14-30Yia a kuūwn bughò ghî a kətuw ghaŋā ghəla ghe mò ləghaa yo enyəa Ǹ doʼò də̀ŋ kə ghee, nǐi wò nlǒ ghee fɛ, ghɛ̀ wiin tsughu fɛ an sə kaŋā!’ ” 28Ghəa Yɛso kə̀a mɛʼɛ̀ tsughu ghəa ghən, ù mo è daŋso, ù tsughuu an Yɛ̀lusalɛ̀m.

Dò kə enyə̄ an Yɛ̀lusalɛ̀m

29A m bùghò Yɛso kuʼso ndûw naʼ e Bɛtfàch zò à naʼ e Bɛtānì zò, aŋ kwàʼ u tə̀ Olèf, ù n tum tsughu tsə̀təndə̄ghā tə wə̄n tə bə̀ghà, 30dzɛ̀ â ghee enyəa, “Ndùw nlò an nàʼà fì â sə ko, ghəa ghɛ̀ nyəā nduw, ghɛ̀ koʼ tsughu tsʉa u fəndzàkâs ù nûu wò mo ghe n tə̀ŋò nàŋa; mò ghùw kaan kaam kɔ̀ʼ kòʼ a te, zěe wò nlò fɛ. 31Mò ghùw bvʉ̀ â ghɛ̀ enyəa, ‘Ghɛ̀ zêe nùghùnlò enyəa à lǒ kwò?’ Ghɛ̀ mò â wən enyəa, ‘Mughu ù te ki kəfwàʼ a te.’ ” 32Ghee ghəla ù tum tsughu m bɔɔm ndùw kòʼ ndùw ko ghəa yia a dzə̀m ù mò dzɛ̂ â ghee. 33Ghəa ghe sô kaʼ ndùw tsʉa u fəndzàkâs vʉ̀ a lùʼù zeē wo, ghê mughu a te ghə m bvʉ â ghee enyəa, “Ghɛ̀ zêe ndùw ghɛ̀ â ndzàkâs fi à?” 34Ghe m bɛ̀lɛ̀ ndùw enyəa “Mughu ù te ki kəfwàʼ a te.” 35Ghe m bùghò â ghè fò a vʉ̀a Yɛso, ghe n zìi kɔ̀ʼ ndùw ndzʉ tə ghee a zəŋò ndzàkâs fì, dòʼso nàŋa kɔʼ Yɛso a te. 36Ghəa ndzàkâs fə te fə boʼn ndûw â wə̄n, ghî ghə̀ n zîi ndùw ndzʉ tə ghee an dziī. 37Ghəa ù kuʼso ndûw alendùw kuū tsughuu ndûw kwàʼ u tə̀ Olèf, saʼ kə tsə̀təndə̄ghā chi kə ŋ kàʼ ndùw aleduʼnlo, fughuu ùkɛɛ â Zə̀ kò an dzə̀ tə̀ tughu to aŋ kɔ tə aghəa təla ghe koʼ, 38#Sms 118:26 Ghe n dzàa tsùghuu enyəa, “Dzɔ̀ lǒ də̀ŋ kəla kə bugho an zən e Mughu u te! Bughunlo e lo alo kəwālā à kəma mò â Zə̀ ghaʼa kən kə̀ dzə̀m!” 39Falàsîi tə̀ li to an saʼ kə aghì chì n dzâa sə̌a kɔʼɔ â Yɛso enyəa, “Wàdè, ke tsughu tsə̀təndə̄ghā tə̀ghà tò enyəa ghe doʼò mɔŋ.” 40Yɛso n dzɛ̀ ndùw à ghee enyəa, “Ǹ so Ǹ dzâa wô â ghɛ̀ enyəa abugho ghî ghən doʼò tsughu mɔŋ, tia a sô kaʼā tsughu bɔ̀ŋ m bùʼn mò.”

Yɛso dì Yɛ̀lusalɛ̀m

41A m bùghò Yɛso kòʼ nduw Yɛ̀lusalɛ̀m ghəa u kuʼso ndûw naʼ e te zo, sə̀ mə̀ n nyə̀ŋ kwə̀là wò wə̄n, 42ù n dîi, dzâa tsùghuu enyəa, “Abugho ghuūghùe zɛʼɛ̄ e mô lô alekpaʼā buʼù kele kô ghəa ghəla a bughòo â bughuso zo tsuʼ u nɛ wə̄n, à sò fɛ lo ko enyəa ghe n nàn ghəa a te gho â ghɛ̀, enyəa e kwo ghɛ̀ lô kele. 43Tî kə̀ li kə lo bùghòo fɛ̄, ghî a kətūw ghɛʼɛ̄ a kê baʼn fêe ŋgəaa wô tɔŋ tɛʼɛ̄ tə dzə̀m, 44ghe lo foʼ ghɛ am fʉgha wə ŋkwə̀n ghɛ̀ à ghê wɛ ghɛʼɛ gho, ghe buū sâʼ naʼ zɛʼɛ, fəgha kə lo e koōm tɛɛ̄n daŋso yo fughu; tɔŋlo enyəa, ghɛ̀ kaā kôʼkɛ̀lɛ nəgha zəla Zə̀ kə̀ mò bwîin wo alebùghò bəghaā sə ghɛ.”

Yɛso nyə̀ an be kə̀ ne kə Kəzə̀ kò

45Yɛso n nyə̀ ndùw am be kə̀ ne ko, kàʼ ndùw aledzùu sə ghî ghəla ghe fə̀ fêen fʉgha wo fughu. 46#Èzy 56:7; Dzl 7:11Ù n dzâa tsùghuu enyəa, “Ghe tɔm naŋa enyəa, ‘Ndughu zaŋā kê lò tsəgha ndùghù è gɔ̀ŋlo, ghɛ̀ yia kuūwn nî naŋā tsughu tò bûʼ kə aghì à tsɔŋɔ ko.’ ”

47 # Lûk 21:37 A m bùghò ù ndùw kɔʼɔ̄ tsʉ̂a zeē tsəghà sughò ghî ghò am be kə̀ ne ko ntsuʼu n dzə̀m n dzə̀m, Tuw u təfɔ̀e u Kəzə̀ tə ŋ kəŋo dzì alemìasò wə̄n, ghèe ghê Dèekə̀làŋ àsùghò tsoʼ tə enaʼ to; 48ghe ŋ kuuwn kəŋo kèe ghəa ghe lo alekaʼā tsughu a te, ghî ghə̀n à dzə̀m màʼà boōm fughuu ndûw ko â wə̄n.

Currently Selected:

Lûk 19: agq

Highlight

Copy