ÉXODO 15
15
Moiseshuan Mariahuan cantashcami
1Moisespish, tucui israelcunapish cai cantotami Mandaj Diosta alabashpa cantarcacuna:
“Mandaj Diostami ñucaca cantasha.
Paica jatun cashcahuan pillurishcami.
Caballocunatapish, soldadocunatapish cuchapimi shitashca.
2Mandaj Diosca ñuca fuerzami.
Mandaj Diosca ñuca cantanami.
Mandaj Diosca ñuca quishpirinami.
Chaimi ñuca Diosca, paitami ñucaca alabacuni.
Paica ñuca yayapaj Diosmi, paitami jatunyachini.
3Mandaj Diosca alli macanacujmi.
Paipaj shutica Mandaj Diosmi.
4Faraonpaj carrocunatapish soldadocunatapish, cuchapimi shitarca.
Soldadocunata mandaj tucuimanta yalli allicunatapish Puca Cuchapimi huashicuchirca.
5Yacuca ucujmanmi millpurca.
Rumi shinamari cucha ucujman huashicurcacuna.
6Mandaj Dioslla, cambaj alli maquica tucuita rurai tucujmari.
Mandaj Dioslla cambaj alli maquica p'iñajcunataca chingachishcamari.
7Canta p'iñashpa jatarijcunataca, tucuita rurai tucuj cashcahuanmi urmachishcangui.
Canca jatunta p'iñarishpami, p'angacunata shinalla chingachishcangui.
8Can p'ucujpica yacucunaca patami tucurca.
Volacuj yacupish patami tucurca.
Ucujta yacuca patami tucurca.
9P'iñajca cashnami nirca:
Paicunataca cati japijtami risha.
Mirga mirgatami rurasha.
Quichushcacunatapish chaupicushami.
Chashna rurashpami ñuca almaca samaringa.
Ñuca espadata llujshichishami.
Ñuca maquihuanmi tucuchisha nircami.
10Ashtahuanpish cambaj huairahuan p'ucushpami, yacuhuan tapachircangui.
Jatun yacupica plomo shinami huashicurcacuna.
11Mandaj Dioslla, dioscunapaj chaupipica ¿pitaj can shinaca tiyangari?
¿Can shina jucha illaj, tucuita rurai tucujca pitaj tiyangari?
Canca pi mana rurai tucushca jatun mancharinacunata rurajmi cangui.
Milagrocunata rurajmi cangui.
12Cambaj alli maquita chutajpica, allpaca millpurcami.
13Quiquin quishpichishca cai gentecunataca cambaj llaquij cashcapimi pusharcangui.
Tucuita rurai tucujhuanmi pushangui.
Jucha illaj cambaj huasimanmi pushangui.
14Tucui llajtacunami uyanga. Chujchungacunami.
Filisteocunaca jatun nanaihuanmi huañucungacuna.
15Edom llajtata mandajcunaca musparicungacunami.
C'ari c'ari moabitacunataca manchaimi chujchuchicunga.
Canaanpi causajcunapish tucuicunami imata mana rurai tucuj cangacuna.
16Paicunapaj jahuapica chujchuipish, manchaipish urmachun.
Tucuita rurai tucuj cambaj rigrata ricushpaca, rumi shina upa cashca cachun.
Mandaj Dioslla can agllashcacuna pasangacama chashna cachun.
Can quishpichishca cai gentecuna pasangacama chashna cachun.
17Mandaj Dios cambaj urcumanmi yaicuchingui.
Cambaj urcupimi tarpungui.
Mandaj Dios can causanapaj maipi allichishcamanmi pushangui.
Cambaj maquihuan rurashca cambajlla ucumanmi pushangui.
18Mandaj Diosca huiñai huiñaitami mandanga.
Paica mandacungallami” nishpami cantarcacuna.
Moisespaj pani María cantashcami
19Faraonpaj caballocuna paipaj carrocunandij, gentecunandij mama cuchaman yaicujpica, chai mama cucha montonarishcatami Mandaj Diosca paicunapaj jahuaman cacharirca. Ashtahuanpish israelcunaca chaupi cuchatami chaquishca allpata ch'imbarcacuna. 20Chaipimi Aaronpaj pani profeta Mariaca, shuj panderota japishpa tocajpi, shujtaj huarmicunapish panderocunapi tocashpa tushuihuan paita catishca llujshircacuna. 21Mariaca cashna nishpami cantarca:
“Mandaj Diosta cantaichij.
Paica jatun cashcahuan pillurishcami.
Caballocunatapish, soldadocunatapish cuchapimi shitashca” nishpami cantarca.
Israelcuna jayaj yacuta ubyashcami
22Moisesca israelcunata Puca Cuchamanta pushashpa rishpaca, Shur nishca shitashca pambatami quimsa punllacunata ima yacuta mana japishpa rircallacuna. 23Maraman chayashpaca, Marapi caj yacucunaca jayaj cashcamanta mana ubyai tucurcacunachu. Chaimi Mara nishpa shutichircacuna.
24Chaipimi israelcunaca Moisestaca: “¿Imatataj ubyashunri?” nishpa juchachishpa rimai callarircacuna. 25Mandaj Diosta caparishpa Moisés mañajpi, Mandaj Dios shuj yurata ricuchijpi, chai yurata yacupi urmachijpimi chai yacuca mishquijlla tucurca. Chashnami Mandaj Diosca paicuna ima shina cashcata ricurca. Chaitataj pajtachichun nishcatapish, mandashcatapishmi curca. 26Chaipica cashnami nirca: “Cancunaca Mandaj Dios ima nishcata alli uyashpa, paipaj ñaupajpi ima pandata mana rurashpa, pai mandashcacunata alli uyashpa, chaitataj pajtachichun nishcacunata pajtachijpica, egipciocunaman cachashca ungüicunataca shujllatapish cancunapaj jahuaman mana apamushachu. Ñucaca Mandaj Diosmi cani. Cancunata alliyachijmi cani” nircami.
27Chai q'uipaca chunga ishqui pugyucunamanta achca yacucuna llujshicun, canchis chunga palmeracuna tiyan Elim pambaman chayashpami, chai yacu c'uchullapi carpa huasicunata shayachishpa tiyarircacuna.
Currently Selected:
ÉXODO 15: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.