ÉXODO 14
14
Puca Cuchata israelcuna ch'imbashcami
1Mandaj Diosca Moisestaca:
2“Israelcunataca: Puca Cuchahuan, Migdol pueblohuan chaupipi caj Pi-hahirot, Baal-zefón pueblocuna ch'imbapuraman tigrashpa chaillapi saquirichij. Chai pueblocuna ch'imbapurapi caj cucha yacu c'uchullapi cancunapaj carpa huasicunata shayachishpa tiyarichij. 3Chaimi faraonca israelcunataca: Israelcunaca maiman rinatapish mana yachajchu yuyachin, chai shitashca pamballapimi chingarishpa puricunllacuna yuyanga. 4Faraontaca, ñucami rumi shunguta rurashpa cancunata catishpa rina yuyaita cugrini. Ñucaca faraonpi paipaj soldadocunapimi jatun cashcata ricuchisha. Chaimi egipciocunaca ñucataca Mandaj Diostaj cashcata yachangacuna ninmi ningui” nircami.
Israelcunaca chashnatajmi rurarcacuna. 5Egipto llajtapi causajcunaca, paicunata jatun mandajmanca: “Israelcunaca ñami cai llajtamanta llujshishpa rincuna” nishpa huillajpimi, faraonpish, paipajta rurajcunapish cutin p'iñarishpaca: “Israelcuna ñucanchijta ama ashtahuan ruraj cachun paicuna richun saquishpaca ¿imatataj rurashcanchijchu imamí?” ninacurcacuna.
6Chashna nishcahuanmi jatun mandajca, paipaj carrota caballocunahuan aisachishpa paipaj soldadocunata pushashpa rirca. 7600 agllashca alli carrocunatapish, Egipto llajtapi tiyaj tucui carrocunatapish tandachishpami, cada carropi mandajcunata churashpa rirca. 8Tucuita rurai tucuj maquihuan llujshichishca cajpipish Mandaj Diosllataj faraonpaj shunguta rumi shunguta rurajpimi israelcunata catishpa rirca.
9Egipciocunaca caballopi tiyarishcacunandij, faraonpaj carrocunandij tucui soldadocunandij rishpaca, Baal-zefón ch'imbapurapi caj Pi-hahirot pueblo c'uchupi caj cucha uripi carpa huasicunata shayachishpa tiyacujpimi israelcunataca japigrircacuna. 10Faraón ñalla c'uchuyagricujta israelcuna ricushpami, paicunata egipciocuna caticushcata ricushpa, jatunta mancharishpa Mandaj Diosta caparishpa mañarcacuna. 11Israelcunaca Moisestaca:
–¿Egiptopica pambana jutcucuna mana tiyajpichu cai shitashca pambapi huañuchun ñucanchijtaca llujshichimurcangui? Egiptomanta ñucanchijta llujshichimushpaca mana ruranatamari rurangui. 12¿Manachu Egiptopi ñucanchij nishca shinallataj tucucunchij? Ñucanchijca: Egiptopi cashpallatajmi egipciocunapajta rurashpa causachun ñucanchijtaca saquilla. Shitashca pambapi huañugrinapaj randica, egipciocunapajta rurashpa causanami alli canman nircanchij– nircacuna.
13Chaimi Moisesca israelcunataca:
–Ama manchashpa sinchi sinchi caichijlla. Ricunguichij cunan ima shinami Mandaj Dios cancunata quishpichinga. Cunan punlla cancuna ricushca egipciocunataca cutinca ña manataj ashtahuan ricunguichijchu. 14Mandaj Diosmi cancunamantaca macanacunga. Cancunaca imata mana ruranachu canguichij– nirca.
15Chaipimi Mandaj Diosca Moisestaca:
–¿Ima nishpataj ñucata caparingui? Ashtahuanpish israelcunataca maiman ricushcaman rishpa catichun mandai. 16Israelcuna cucha chaupita chaquishca allpata ch'imbachun, canca cambaj caspita alzashpa, cambaj maquita cucha ladoman chutashpa yacuta ishquindij ladoman chaupi. 17Egipciocunapaj shungutaca ñucami rumi shunguta rurashpa cancunata ashtahuan catina yuyaita cugrini. Chaipica ñucaca faraonpi, paipaj tucui soldadocunapi, paipaj carrocunapi, paipaj caballopi tiyarij soldadocunapimi ñuca tucuita rurai tucuj jatun cashca ricurisha. 18Faraonpi, paipaj carrocunapi, paipaj caballopi tiyarishca soldadocunapi ñucaca tucuita rurai tucuj cashcata ricuchijpimi egipciocunaca ñucaca Mandaj Diostaj cashcata yachangacuna– nircami.
19Israelcunata ñaupashpa ricuj Taita Diospaj angelca paicunapaj huasha ladoman tucushpami huashata catirca. Paicunata ñaupashpa ricuj suni p'uyupish paicunapaj huasha ladoman tucushpa huashata catishpami, 20egipciocunahuan, israelcunahuan chaupipi rirca. Suni p'uyuca egipciocunataca yallitajmi amsayachirca. Ashtahuanpish chai tutaca israelcunataca achijyachircami. Chaimi chai tutaca caishujmanta chaishujmanta mana c'uchuyai tucurcacuna.
21Moisesca jatun cucha jahuatami paipaj maquita chutarca. Mandaj Diosca tucui tutami inti llujshin lado sinchi huairata cacharca. Chai huaira tucui tuta p'ucujpimi, jatun cucha yacuca ishquipi chaupirirca. Chai cucha yacu cada ladoman chaupirijpimi chaquishca allpa tucurca. 22Chaupi yacuca lluqui ladoman, chaupica alli ladoman jatun patacuna shina tucujpimi, chaupi mama cuchata chaquishca allpata ch'imbangapaj israelcunaca yaicurcacuna.
23Egipciocunaca israelcunata catishcami, caballopi tiyarishca faraonpaj soldadocunandij, carrocunandij, yaicushpa chaupi cuchacama rircacuna. 24Chai tuta ña pacaricuitami Mandaj Diosca lunyacuj ninamanta, suni p'uyumanta ricurishpa, Egipto soldadocunataca tucui muspachishpa, 25paicunapaj carrocunapaj ruedacunatapish llujshijpi chai carrocunapish urata janajta llaqui tucurcacuna. Chaimi egipciocunaca:
–Israelcunamanta anchushpa callpashunchij. Mandaj Diosmari paicunapaj randi egipciocunahuan macanacugrin– nircacuna.
26Mandaj Diosca Moisestaca:
–Egipciocunatapish, carrocunatapish, caballopi tiyarishcacunatapish, yacu tapachun cucha jahuata cambaj maquita chutai– nircami.
27Shina nijpi Moisés paipaj maquita cucha jahuata chutajpi ña pacaricuitaca, chai yacuca ñaupaman ima shina cashca shinallamantaj tucui fuerzahuan tigrajpimi, egipciocuna tigrashpa callpagrishpaca chai yacupi millpurircacuna. Chashnami Mandaj Diosca egipciocunataca chai cuchapi chingachirca. 28Chai cucha ñaupaman cashca shinallataj tucujpica, faraonpaj carrocunapish, caballopi tiyarishca soldadocunapish, tucui soldadocunami israelcunata caticujcunaca chai cuchapi millpurishpa shujllapish mana saquirircacuna. 29Ashtahuanpish israelcunaca chai yacu alli ladomanpish lluqui ladomanpish pata shina tucushcatami, chaupi cuchata chaquishca allpata rircallacuna.
30Chashnami chai punllaca, Mandaj Diosca israelcunataca egipciocunapaj maquimanta quishpichirca. Israelcunaca egipciocunataca mama cucha uripi huañushca siricujtami ricurcacuna. 31Mandaj Dios chai Egipto llajta soldadocunata jatun mancharinata rurajta ricushpami, israelcunaca Mandaj Diostaca mancharcacuna. Mandaj Diospipish, paipajta ruraj Moisespipishmi shunguta churarcacuna.
Currently Selected:
ÉXODO 14: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.