ÉXODO 13
13
Punta huacharijcunataca Diospajlla cachun ch'icanchinami
1Mandaj Diosca Moisestaca:
2“Punta huacharishcacunataca Diospajlla cachun ch'icanchichij. Israelcunapurapi punta huacharishcacunaca gentecuna cashpa, animalcuna cashpapish ñucapajmi” nircami.
3Chaimi Moisesca israelcunataca: “Egiptopi huatashca shina ruracujta Mandaj Dios tucuita rurai tucuj maquihuan cai punllapi llujshichishcataca yuyaricunallami canguichij. Chai punllapica levadurayuj tandataca ama micunguichijchu. 4Cunan cancuna caimanta llujshin quillaca Abib quillami. 5Cananeocuna, heteocuna, amorreocuna, heveocuna, jebuseocuna causacun llajtamanmi Mandaj Diosca cancunataca yaicuchinga. Lechepish, sacha chuspipaj mishquipish yacu llujshicuj shina tiyan llajtataca cancunapaj ñaupa yayacunamanmi Mandaj Diosca cusha nishpa ari nishca carca. Chai llajtapi ña cashpaca cai quillallapitaj Pascua micuitaca ruranguichij. 6Cancunaca canchis punllacamami levadura illajlla tandataca micuna canguichij. Chai canchis punllacuna tucuri punllaca Mandaj Diosta yuyaringapajlla shuj fiestata ruranguichij. 7Chai canchis punllacunapica, levadura illajlla tandatami micuna canguichij. Chai punllacunapica tucui llajtapi levadurahuan p'unguillichishcatapish, levaduratapish amataj charinguichij. 8Pascua micuita ruracui punllapica cancunapaj huahuacunamanca: Mandaj Dios ñucanchijta Egiptomanta llujshichimushpa ñucanchijpaj imallata rurashpa llujshichishcata yuyarishpami chashna ruracunchij nishpa parlanguichij. 9Cai ruraicunaca Mandaj Dios tucuita rurai tucuj maquihuan Egiptomanta canta llujshichimushcataca cambaj maquipi, mana cashpaca ñahui patapi ricunapaj churashca shinami yuyachicungalla. Mandaj Dios mandashca cambaj shimipi cachunmi chashna canga. 10Chaimantami cancunaca cai fiestataca huatanta ima quillapi, ima punllapi rurachun nishcapitaj rurana canguichij.
11Mandaj Dios cancunamanpish, cancunapaj ñaupa yayacunamanpish cusha nishca shinallataj Canaán llajtaman ña chayachijpica, 12cancunapaj punta churicunataca Mandaj Diospaj cashcamanta paiman cunguichij. Cancunapaj animalcunamanta punta huacharishca animalcunatapish Mandaj Diosman cunguichij. Punta huacharishca c'aricunaca Mandaj Diospajmi. 13Punta huacharishca burropaj randica shuj ovejata cushpa chai burrotaca llujshichichun. Mana chashna llujshichishpaca cungata p'aquishpa huañuchichun. Punta huacharishca churicunatapish chashnallataj llujshichinguichij. 14Caya mincha cambaj huahua: ¿Imapajtaj cashnaca ruranguichij? nijpica: Egipto llajtapi huatashca shina llaquinayajta causacujpimari Mandaj Diosca ñucanchijtaca tucuita rurai tucuj paipaj maquihuan llujshichimurca. 15Faraonca rumi shungu tucushpami, ñucanchijtaca chai llajtamanta llujshichun manataj saquisha nirca. Chaimi Mandaj Diosca, Egipto llajtapi causajcunapajtaca tucui punta c'ari huahuacunata huañuchirca. Punta huacharishca animalcunatapishmi tucuita huañuchirca. Chaimantami ñucanchijca punta huacharishca c'ari animalcunataca Mandaj Diosman cushpa huañuchinchij. Ñucanchij punta churicunatapish paicunapaj randi imata cuna cashcata Mandaj Diosman cushpami llujshichimunchij. 16Mandaj Dios tucuita rurai tucuj maquihuan Egiptomanta llujshichimushcataca cambaj maquipi, mana cashpaca ñahui patapi ricunapaj churashca shinami cancunataca yuyachicungalla nishpa huillanguichij” nircami.
Diosca israelcunataca p'uyupi ninapi ñaupashcami
17Israelcunata richun faraón ña saquijpica, Taita Diosca Canaanman utca chayanalla filisteocunapaj ñantaca mana pusharcachu. Macanacui tiyajpica, manamari shamuna cashcanchijchu nishpa Egiptollamantaj tigranamantami mana chaita pusharca. 18Taita Diosca israelcunataca shitashca pambata Puca Cuchaman rina ñanta muyuchishpami pusharca. Israelcunaca Egiptomantaca tucuicunami soldadocuna shina mirga mirgapi ch'icanchishca huichiyarcacuna. 19Moisesca Josepaj tullucunata apashcami llujshirca. Joseca: “Taita Diosca cancunata ricunaman shamungatajmi. Chaipica, ñuca tullucunataca cai llajtamantaca apashpa ringuichij” nishpami israelcunataca ari nichishca carca.
20Israelcunaca Sucotmanta rishpaca, Etam shitashca pambaman chayanllapimi, carpa huasicunata shayachishpa saquirircacuna. 21Mandaj Diosca israelcunata ñaupashcami rirca. Punllaca suni p'uyuhuanmi paicuna rina ñanta ñauparca. Tutaca lunyacuj ninahuanmi achijyachishpa ñauparca. Punllapish, tutapish richunmi chashna ñauparca. 22Punllacunaca suni p'uyumi israelcunapaj ñaupajmantaca manataj anchurca. Tutaca lunyacuj ninami paicunapaj ñaupajmantaca manataj anchurca.
Currently Selected:
ÉXODO 13: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.