ÉXODO 12
12
Israelcunaca Pascua fiestata callarichishcami
1Mandaj Diosca Egipto llajtapica Moisesta, Aarontaca cashnami nirca:
2“Cai quillaca cancunapajca huatapaj callari quilla, tucui quillacunamanta yalli alli quillami canga. 3Tandanacushca tucui israelcunataca cashna ni: Cai quillapaj chunga punllapica tucui cancunapaj cada huasi ucupuracuna cada huasi ucupurapaj shuj malta ovejatami charicuna canguichij. 4Maijan familia yallitaj ashalla cashpa malta ovejapaj aichata mana tucui micuipaj cashpaca, paipaj huasi c'uchullapi causajhuan tucushpa chai ishqui tandanacushca familiacunapaj yayacunaca mashna cashcata ricushpa shuj malta ovejata japinguichij. Chai aichataca cada quiquin mashnata micui tucuipajllata chaupishpa cunguichij. 5Chai animalca ima mana tucushca shuj huatata charij c'ari animal cachun. Ovejata cashpa, chivota cashpa cancunapaj canllamanta shujta japinguichij. 6Chai animaltaca, cai quillapaj chunga chuscu punllacama alli cuidashpa chai chishi zuyuyacuita huañuchinguichij. Tucui tandanacushca israelcunami chai horasllataj huañuchina canguichij. 7Chai animalpaj yahuarta japishpaca, chai aichata micuna huasi pungu ishqui lado quisyupi, quinriman churashca caspipipish llihuinguichij. 8Chai tutaca cusashca aichata, levadura illajlla tandahuan, jayaj q'uihuacunahuan micunguichij. 9Chai animalpaj aichataca chahuata cashpapish, yacupi yanushcata cashpapish imata ama micunguichijchu. Umatapish, chaqui maquicunatapish, chunllullicunatapish, aichatapish tucuita cusashcata micunguichij. 10Chai aichataca cayandij tutamantapajca imata ama saquinguichijchu. Cayandij tutamantapaj ima saquirijpica tucui rupachinguichij. 11Chai aichataca alli chumbillirishca, pargatetapish churarishca, tauna caspitapish maquipi aisashcami micuna canguichij. Mandaj Diospaj Pascua cashcamantaca utcami micuna canguichij. 12Chai tutaca Egipto llajtatami puricusha. Chai llajtapi causajcunapaj punta huacharishcacunataca gentecunapajtapish, animalcunapajtapish punta huacharishca c'ari huahuacunataca tucuitami huañuchisha. Chashnami egipciocunapaj dioscunaca yangalla cashcata, ñucaca Mandaj Diostaj cashcata ricuchisha.
13Chai yahuarca israelcuna mai huasipi cashcata ricuchijmi canga. Chai yahuarta ricushpami cancunapaj huasi ñaupajtaca pasashpa rishalla. Chashnami egipciocunata huañuchishpa llaquichicujpica cancunapurapica huañui llaquica mana tiyanga. 14Chai punllataca cancunaca yuyaricunallami canguichij. Mandaj Diospaj jatun fiestataca cancunapaj huahua huahuacunapish ruracungallacunami. Chai mandashcaca huiñaipaj cashcamanta ruracunallami canguichij. 15Canchis punllacunapica levadura illajlla tandatami micuna canguichij. Chai punllacunapica punta punllamanta pacha tucuri punllacama cancunapaj huasicunamantaca levaduracunata anchuchinguichij. Maijanpish chai canchis punllacunapi maijan punllapi levadurayuj tandata micujca, israelcunapuramanta anchuchishcami canga. 16Punta punllapica tucuita cayashpa Diospajlla tandanacuimi canga. Tucuri canchis punllapipish tucuita cayashpa Diospajlla tandanacuita charinguichij. Chai ishqui punllacunapica amataj cancunapajca imata ruranguichijchu. Ashtahuanpish cancuna micungapajlla micunata allichinguichij. 17Levadura illajlla tandata micuna punllacunapica amataj saquishpa ruracunguichijlla. Chai punllacunallapitajmi cancunataca achca tandanacushcacunata Egiptomanta llujshichimurcani. Chaimanta cai mandashcataca cancunapaj huahua huahuacunapish huahua huahua huiñaita pajtachicuchunllacuna. 18Huata callari quillapaj chunga chuscu punlla chishimanta callarishpaca, chai quillapaj ishqui chunga shuj punlla chishicamami chashna levadura illajlla tandata micuna canguichij. 19Chai canchis punllacunapica cancunapaj huasicunapica levaduraca mana ricurinachu can. Maijanpish levadurahuan p'unguillichishcacunata micujcunaca israelcuna cashpapish, mana israelcuna cashpapish israelcunapuramantaca anchuchishcami canga. 20Chai punllacunapica, levadurahuan p'unguillichishcacunataca imata ama micunguichijchu. Cancunapaj huasicunapica levadura illajlla tandatami micuna canguichij ninmi nigri” nircami.
21Chaimi Moisesca, israelcunata cunaj yuyajcunata tandachishpaca: “Cancunapaj huasi ucupurapaj malta ovejata mashcanaman llujshishpa chai malta ovejataca Pascuapi sacrificaichij. 22Maqui junda hisopota japishpa chai ovejapaj yahuar bateapi tiyacunpi satishpa pungupi quinriman churashca caspipish, pungu ishqui lado quisyucunapipish llihuinguichij. Cancunaca shujllapish cancunapaj huasimantaca pacaringacama ama llujshinguichijchu. 23Mandaj Diosca Egipto llajtapi causajcunata huañuchicushpaca, cancunapaj pungupi quinriman churashca caspita pungu ishqui lado quisyucunata yahuarhuan llihuishcata ricushpaca pasajta ringallami. Huañuchij cancunapaj huasicunaman yaicushpa huañuchichun mana saquingachu. 24Chashna yachachishcacunataca cancunapish, cancunapaj huahua huahuacunapish huiñaipaj mandashca cashcamanta pajtachicunallami canguichij. 25Mandaj Diosca pai cusha nishca shinallataj cancunata chai llajtaman chayachijpica cancunaca chai mandashcacunataca pajtachicunallami canguichij. 26Cancunapaj huahuacuna: Cai cancuna ruracuntaca ¿imapajtaj ruranguichij? nishpa tapujpica, 27cancunaca: Cai Pascua ovejaca ñucanchij Mandaj Diosta alli nishpa yuyarishpa micunami. Mandaj Dios egipciocunata huañuchicushpaca, Egiptopi caj israelcunataca mana huañuchircachu. Chashnami ñucanchijtaca mana llaquichishpa quishpichirca ninmi ninguichij” nijpimi israelcunaca, cumurishpa Mandaj Diosta adorarcacuna. 28Israelcunaca Moisesta, Aaronta Mandaj Dios ima shinalla mandashca shinami chaitataj tucuita rurarcacuna.
Egiptocunapaj punta churicunata huañuchishcami
29Mandaj Diosca, chaupi tutami egipciocunapaj punta churicunataca tucuicunata huañuchirca. Mandashpa tiyanapi tiyacuj faraonpaj punta churimanta callarishpaca, macanacuipi prezu japimushca carcelpi tiyacujpaj punta churicamami huañuchirca. Punta huacharishca animalcunatapishmi huañuchirca. 30Egipciocunapaj huasicunapica tucuicunapajpi shuj huañushca tiyajpimi faraonpish, paipajta rurajcunapish, tucui egipciocunapish chai tuta jatarishpaca jatunta caparishpa huacarcacuna. 31Chai tutallataj Moisesta, Aaronta cayachishpami faraonca:
–Cancunapish, tucui israelcunapish cai llajtapi causaj ñuca runacunapaj chaupimanta llujshishpa cancuna nishca shinallataj cancunata Mandaj Diospajta ruranaman richij. 32Cancuna nishca shinallataj cancunapaj ovejacunatapish, vacacunatapish apashpa richij. Ñucatapish alli cashca cachun ninguichij– nircami.
33Egipciocunaca: “Tucuicunami ña huañugrinchij” yuyashpami, israelcunataca: “Cai llajtamanta utca richij” nishpa llujshichishpa cacharcacuna. 34Israelcunaca tandata rurangapaj masacushcataca levadurata manaraj churashpami, linsocunapi quipishpa rigra jahuapi churashpa aparcacuna. 35Israelcunaca Moisés mandashca shinallatajmi egipciocunataca cullquimanta, curimanta rurashca sumaj charinacunatapish, churanacunatapish mañarcacuna. 36Mandaj Diosca israelcunataca egipciocunapaj ñahuipi alli ricurij cajta rurajpimi, egipciocunaca mashnata israelcuna mañashcata cujpi, israelcunaca egipciocunataca quichushpa rircacuna.
Egiptomanta israelcuna llujshishcami
37Israelcunaca Ramesés pueblomanta llujshishpaca, Sucot pueblomanmi rircacuna. Paicunaca huahuacunata mana yupashcami chaquillahuan rij 600.000 runacuna carca. 38Paicunahuanca yallitaj achca tucui laya runacunami huichiyarcacuna. Achca ovejacunata, achca huagracunatami aparcacuna. 39Israelcunaca Egiptopi tandata ruracushpa levadurata manaraj churashca masata apashpa llujshishcallatami tortillata rurashpa cusashpa micurcacuna. Egipciocuna utca llujshichij nicujpimi israelcunaca paicunapaj micunata allichinataca mana pajtarishca carcacuna.
40Israelcunaca Egiptopica, 430 huatacunatami causarcacuna. 41Ña 430 huatacuna pajtai punllami, Mandaj Dios agllashcacunaca soldadocuna shina mirga mirgapi ch'icanchishca Egiptomanta tucuicuna llujshircacuna. 42Chai tutaca Mandaj Dios israelcunata Egiptomanta tucui tuta llujshichishcamanta Mandaj Diospaj tutami. Chaimanta israelcunaca huahua huahua chai tutapica mana dormishpa Mandaj Diosta alli nishpa yuyaricuchunllacuna.
Pascua micuimanta mandashcami
43Mandaj Diosca Moisesta, Aarontaca:
“Cai mandashcacunaca Pascua micuimanta mandashcami. Pascua micuitaca mana Israel cajca pipish mana micungallachu. 44Maijancunata paipajta ruraj cachun cullquihuan randishca cashca cashpapish, circuncisionta rurashca cashpallami micunga. 45Mana Israel cajpish, mana cashpaca trabajacushcallamanta chaipi cajca mana micui tucunchu. 46Chai aichataca shuj huasi ucullapi micunguichij. Mirgallatapish ama canllaman llujshichinguichijchu. Tullutaca shuj tullullatapish ama p'aquinguichijchu. 47Tucui israelcunami chashna rurana can. 48Mana israelcuna cancunahuan causacujcuna Mandaj Diospaj Pascua micuita micusha nishpaca, tucui c'aricuna circuncisiontaraj rurachishpa, chai q'uipa chai Pascua micuita rurachun. Chashna rurashpaca, israelpurallatajmi canga. Maijanpish circuncisionta mana rurachishca cashpaca Pascua micuitaca amataj micuchun. 49Chai mandashcallatajmi israelcunatapish, cancunapurapi causacuj mana israelcunatapish mandanga” nircami.
50Chaitaca israelcunaca Mandaj Dios Moisesman, Aaronman mandashca shinallatajmi rurarcacuna. Tucuitami chashnataj rurarcacuna. 51Mandaj Diosca chai punllallatajmi pai agllashca israelcunataca, soldadocunata shina mirga mirgapi ch'icanchishcata Egiptomanta llujshichirca.
Currently Selected:
ÉXODO 12: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
