ÉXODO 11
11
Punta churicunata huañuchinata huillashcami
1Mandaj Diosca Moisestaca:
–Faraonpaj, cai Egiptopi causajcunapaj jahuamanca yallitaj llaquitami apamugrini. Chaipimi cancunataca paica richun saquinga. Paitajmi cancunataca shuj cutin llujshichishpa cachanga. 2Israelcunataca c'aricunatapish, huarmicunatapish paicunapaj c'uchullapi causaj egipciocunataca cullquimanta, curimanta rurashca sumaj charinacunata mañachun mandai– nircami.
3Mandaj Diosca, israelcunataca egipciocunapaj ñahuipi alli ricurij cajtami rurarca. Moisestapish faraonpajta rurajcunapaj ñaupajpi, egipciocunapaj ñaupajpi chai llajtapica allita ruraj runa cashcatami ricuchirca.
4Moisesca faraontaca:
–Mandaj Diosca cashnami nin: Cunan chaupi tutatami egipciocunapaj llajtata purigrini, 5Egipto llajtapi causajcunapaj punta huacharishca c'ari huahuacunami huañunga. Mandashpa tiyanapi tiyacuj faraonpaj punta churimanta callarishpaca, molinopi cutashpa paipajta ruraj huarmipaj punta churicamami huañunga. Punta huacharishca animalcunapish tucuimi huañunga. 6Tucui Egipto llajtapimi, caparishpa huacana tiyanga. Chashna llaquica nunca mana tiyashcachu, cutinpish manataj tiyangachu ninmi. 7Ashtahuanpish israelcunataca paicunatapish, paicunapaj animalcunatapish shuj allcupaj c'allullapish mana cuyuringachu. Egipciocunahuan, israelcunahuanca Mandaj Diosca ch'ican cashcata ricuchingapajmi chashna ruranga. 8Chaipica tucui cambajta rurajcunami ñucapajman shamushpa ñuca ñaupajpi cungurishpaca: Canpish, tucui cambaj ucupi caj gentecunapish richij ningacuna. Tucui chai q'uipami ñucaca llujshishpa risha– nishpaca, Moisesca yallitaj p'iñarishcami faraonpaj ñaupajmanta llujshishpa rirca. 9Cutinpish Mandaj Diosca Moisestaca:
–Egipto llajtapi mancharinacunata ñuca ashtahuan rurachunmi faraonca cancuna nishcataca manaraj uyanga– nircami.
10Moiseshuan Aaronhuanca, tucui cai milagrocunata faraonpaj ñaupajpi rurajpipish Mandaj Diosllataj faraonpaj shunguta rumi shunguta rurashcamantami, israelcunataca chai llajtamanta llujshichunca manataj saquirca.
Currently Selected:
ÉXODO 11: QCHI04
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.