ÉXODO 10
10
Langostacunahuan llaquichishcami
1Mandaj Diosca Moisestaca:
–Faraonpajmanca cutinllataj rilla. Ñucallatajmi paitapish, paipajta rurajcunatapish rumi shunguta rurarcani. Ñucaca imatapish rurai tucuj cashcata paicunallamantaj ricuchingapajmi chashna rurarcani. 2Egipto llajtapi imallata rurashcata, paicunapurapi milagrocunata rurashcata cambaj churicunaman, cambaj nietocunaman huillachunmi chashna rurarcani. Chaita ricushpami cancunapish ñucataca Mandaj Dios cashcata yachanguichij– nircami.
3Shina nijpimi Moiseshuan, Aaronhuanca faraonpajman rishpaca:
–Mandaj Dios hebreocunapaj Taita Diosmi cashna nin: Ñuca agllashcacuna richun saquiyari. ¿Maicamataj ñuca ñaupajpica mana cumurisha ninguiyari? 4Can mana cazushpa, paicuna richun mana saquijpica cambaj llajtamanca cayatajmi langostacunata ñuca apamujpi, 5tucui allpata tapangacuna. Allpataca mirgallatapish maipi mana ricuipajmi canga. Chaicunami rundumanta saquirishca granocunatapish tucuita micunga. Yurapi huiñacujcunatapish tucuimi micunga. 6Langostacunaca cambaj huasipipish, cambajta rurajcunapaj huasicunapipish, tucui egipciocunapaj huasicunapipishmi jundanga. Cancunapaj ñaupa yayacuna, cancunapaj abuelocuna causai callari punllamanta cunan punllacama cai allpapi nunca mana ricushcatami ricunguichij ninmi– nircacunami.
Moisesca chashna nishcahuanmi faraonpaj ñaupajmantaca muyurishcahuan rirca. 7Chaimi faraonpajta rurajcunaca:
–¿Cai runaca maicamataj ñucanchijpajca ñitcana cangari? Paicunataca saquilla paicunapaj Mandaj Diospajta ruragrichun. Egipto llajta jatun llaquipi cashcataca ¿manachu yachangui?– nircacuna.
8Faraonca Moisestapish, Aarontapish paipaj ñaupajman cutin cayashpaca:
–Mandaj cancunapaj Diospajta rurangapaj richijlla. Chaiman pilla rina cashcallata huillaichij– nirca.
9Shina nijpi Moisesca:
–Ñucanchij Mandaj Diospaj jatun fiestapi alabana cashcamantaca ñucanchijca ñucanchij huahuacunandij, ñucanchij yuyaj yayacunandij, ñucanchij churicunandij, ñucanchij ushushicunandij, ñucanchij ovejacunandij, ñucanchij vacacunandijmi rina canchij– nircami.
10Chaimi faraonca:
–Mandaj Dioshuan cancuna chashna cana cajpipish ¿maitataj cancunataca cancunapaj huahuacunandij richunca saquishari? Riqui, cancuna mana alli yuyaihuan cashcaca cancunapaj ñahuillapitaj ricunallamari. 11Cancuna nishca shinaca mana cangachu. Ima shina cancuna mañashca shinallataj Mandaj Diospajta ruranamanca c'aricunallami rina canguichij– nishpami, faraonpaj ñaupajmanta, llujshichishpa cacharcacuna. 12Chaimi Mandaj Diosca, Moisestaca:
–Rundu mana tucuchishca granocunata langostacuna tucui micuchun, Egipto llajta jahuata cambaj maquita chutashpa langostacunata pushamui– nirca.
13Egipto llajta jahuata Moisés paipaj caspita chutajpica, Mandaj Diosca inti llujshin lado huairatami tucui tuta, tucui punlla huairachun apamurca. Chai huairaca cayandij punllaca langostacunatami apamurca. 14Langostacuna tucui Egipto llajtata huichiyashpaca tucui chai llajtatami taparca. Chashna yallitaj langostacunaca ñaupamanpish mana tiyashcachu q'uipatapish mana tiyangachu. 15Langostacuna Egipto llajtata tucui tapajpica tucui chai llajta allpami amsayarca. Chai llajtapi tiyaj tucui q'uihuacunata rundu mana tucui tucuchishca yuracunapi saquirij granocunatapish tucui micujpimi, tucui Egipto llajtapica yuracunapi ima verdijllacunapish, Egipto llajtapi tiyaj tucui q'uihuacunapish ima mana saquirirca.
16Chaimi faraonca Moisesta, Aaronta utca cayaj cachashpaca:
–Ñucaca mana allita rurashpami, cancunata Mandaj Diostapish, cancunatapish p'iñachishpa juchallishcani. 17Shina cajpipish, ñuca mana allita rurashcataca cunanllahuan perdonahuaichij. Ashtahuanpish cai huañuchij llaquica ñucallamantapish anchurichun cancunata Mandaj Diosta mañahuaichij– nirca.
18Shina nijpi faraonpaj ñaupajmanta Moisés llujshishpa, Mandaj Diosta mañajpica, 19Mandaj Diosca, inti huashicun lado sinchi huairata apamushpami, langostacunataca chai huairahuan apashpa Puca Cuchapi shitarca. Egipto llajtapica shuj langostallapish mana saquirircachu. 20Mandaj Diosllataj faraonpaj shunguta rumi shunguta rurajpimi, paica israelcuna richunca mana saquirca.
Punllata tutayachishpa llaquichishcami
21Mandaj Diosca, Moisestaca:
–Tucui Egipto llajta yallitaj amsayajpi maijan cashpapish maquihuan tantiacuchunlla cambaj maquita jahua pachaman huichi chutai– nircami.
22Moisés paipaj maquita jahua pachaman chutajpica, tucui Egipto llajtapimi quimsa punllata yallitaj amsa carca. 23Chaimantami caishuj chaishuj mana ricui tucurcacuna. Paicuna maipi canmantaca quimsa punllacama mana jatari tucurcacunachu. Ashtahuanpish israelcunapaj huasicunapica achijllami carca.
24Chaimi faraonca Moisesta cayachishpaca:
–Cancunapaj huahuacunatapish pushashpa Mandaj Diospajta ruragrichijlla. Cancunapaj ovejacunata, vacacunallata saquishpa richij– nirca.
25Shina nijpi Moisesca:
–Ñucanchijta Mandaj Diosman animalcunata cunapajpish, cushpa tucui rupachinapajpish ¿canchari cunguiyari?. 26Ñucanchijca ñucanchij animalcunataca apashpami rina canchij. Shuj sillullapish mana saquiringachu. Chai animalcunamanta agllashpa japishpami, ñucanchijta Mandaj Diospajta rurana canchij. Chaiman chayashpa Mandaj Diospajta rurana punllacama maijan animalta agllashpa cuna cashcataca mana yachanchijchu– nircami.
27Mandaj Dios faraonpaj shunguta rumi shunguta rurajpimi, israelcuna richunca mana saquishpa, 28faraonca Moisestaca:
–Ñuca ñaupajmanta anchui. Ñuca ñahuita ricunamanca amataj shamungui. Ñuca ñahuita ricunaman shamushpaca chai punllallatajmi huañungui– nirca.
29Chaimi Moisesca:
–Allitami ningui, cambaj ñahuitaca ña mana ashtahuan ricushachu– nirca.
Currently Selected:
ÉXODO 10: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
