ÉXODO 16
16
Maná shuti micunata Taita Dios carashcami
1Tandanacushca tucui israelcuna Elim pambamanta llujshishpaca, chai Elim llajtahuan, Sinaí urcuhuan chaupipi caj Sin nishca shitashca pambamanmi chayarcacuna. Paicunaca Egipto llajtamanta llujshishca punllamantaca, cati quillapaj chunga pichca punllapimi chaimanca chayarcacuna. 2Chai shitashca pambapimi tandanacushca tucui israelcunaca Moisestapish, Aarontapish juchachishpa rimarcacuna. 3Paicunaca:
–Ñucanchijca Egipto llajtallapitaj Mandaj Diospaj maquipi huañushca cashparajchari alli canchijman carca. Chaipica manga aichata ñaupajpi churashpami micuj carcanchij. Tandatapish mana nijtami micuj carcanchij. Cai tucuicunataca cai shitashca pambapi yaricaihuan huañuchingapajmi pushamushcanguichij– nircacunami.
4Chaipimi Mandaj Diosca Moisestaca:
–Ñucaca jahua pacha tandatami tamyachigrini. Chai micunataca tucuicuna quiquin micuna pajtallata punllanta tandanaman llujshichuncuna. Ñuca imallata rurachun mandashcata cazujta, mana cazujtami ricusha nini. 5Sujta punllapica punllanta tandaj cashcamantaca, cayandij punllapandij chaupihuan yallita tandanguichij– nircami.
6Chaimi Moisespish, Aaronpish tucui israelcunataca:
–Mandaj Dios Egiptomanta llujshichimushcataca, cunan chishimi yachanguichij. 7Mandaj Diosca cancuna paita juchachishpa rimacushcatami uyashca. Cunan pacarijpica Mandaj Dios tucuita rurai tucuj cashcatami ricunguichij. Shina cajpica ñucanchijca ¿imataj canchigari cancuna juchachishpa rimachunca?– nircami.
8Moisesca cashnapishmi nirca:
–Mandaj Diosca chishicunataca, aichatami cancuna micuchun cugrin. Tutamantacunataca, mana nijta micuchunmi tandata cugrin. Mandaj Diosca cancuna paita juchachishpa rimashcatami uyashca. Cancunaca mana ñucanchijtachu juchachishpa rimashcanguichij. Ashtahuanpish Mandaj Diostamari juchachishpa rimashcanguichij. Shina cajpica ñucanchijca ¿imapish mana canchijchu?– nircami.
9Chai q'uipami Moisesca, Aarontaca:
–Tandanacushca tucui israelcunataca: Mandaj Diosca cancuna paita juchachishpa rimashcatami uyashca. Chaimanta tucui israelcuna Mandaj Diospaj ñaupajman c'uchuyamuichij ni– nirca.
10Tandanacushca tucui israelcunaman Aarón chaita huillacujpica israelcunaca shitashca pamba ladoman tigrarishpa ricushpaca, Mandaj Diosca p'uyupi jatun achij nicuj ricurijtami ricurcacuna. 11Chaipimi Mandaj Diosca Moisestaca:
12–Israelcuna ñucata juchachishpa rimacujtami uyani. Cunanca paicunamanca: Chishicunaca aichatami micunguichij. Tutamantacunaca mana nijtami cancunaca tandata micunguichij. Chaimi cancunaca ñucataca, Mandaj Dios cancunapaj Dios cashcata yachanguichij ninmi ni– nircami.
13Chai chishillatajmi codorniz nishca pajarocuna shamushpa, israelcunapaj carpa huasicuna muyundijpi jundarirca. Tutamantacunaca ñutu tamyami carpa huasicuna muyundijllapitaj urmaj carca. 14Ñutu tamya ña pararijpica shitashca pambapica yuraj casatajlla nuyujlla uchilla granocunami ricurirca. 15Chaita israelcuna ricushpaca, ima cashcata mana yachashcamantami caishuj chaishuj: “¿Caica imashi?” ninacucujpi Moisesca:
–Cancuna micuchun Mandaj Dios cushca tandami. 16Caita ima shina japichunca Mandaj Diosca cashnami mandan: Chaitaca cada huasi familia mashnapura cashcapaj micuna pajtallata japichun. Cada shujpaj shuj gomerta apachun ninmi– nircami.
17Shina nijpica, israelcunaca chashnallatajmi rurarcacuna. Maijancunaca achcata, maijancunaca ashallatami tandashpa aparcacuna. 18Paicuna mashna cashcapaj medishpa apashcamantaca, achcata tandajpajpish ima mana yallircachu. Ashallata tandajpajpish mana illarcachu. Tucuicunami paicuna micuna pajtallata tandashpa aparcacuna.
19Moisesca israelcunataca:
–Chai tandataca cayandijpajca pi ama saquinguichijchu– nircami.
20Ashtahuanpish maijancunaca Moisés mandashcata mana cazushpami, cayandijpaj ashata saquircacuna. Ashtahuanpish chai micunapica c'urucuna huiñajpi ashnacujmi tucurca. Chaimi Moisesca paicunataca p'iñarishpa rimarca.
21Cada tutamantami israelcunaca cada shuj mashnata micui tucushcallata tandajcuna carca. Saquishcacunataca inti rupachishpami yacuyachij carca. 22Sujta punllapica cada shujpajmi punllanta japij cashcamanta shujtaj chai shinahuan japijcuna carca. Cada shujpajmi ishqui gomerta japircacuna. Chaitaca tandanacushca israelcunata mandajcunaca Moisespajman rishpami ima shina ruracujta huillarcacuna. 23Chaita huillajpimi Moisesca:
–Mandaj Diosca chashnallatajmi mandarca. Cayaca Mandaj Diospajlla ch'icanchishca samana punllami. Chai samana punllataca Mandaj Diospajlla ch'icanyachishcami. Cusashcata micunayajpica cusanguichij. Yanushcata micunayajpica yanunguichij. Saquirishcacunataca tucuita cayapaj huaquichichijlla– nircami.
24Moisés mandashca shinallatajmi, paicunaca tucui saquirishcacunataca cayandij tutamantapaj huaquichircacuna. Chai micunapica ima c'urupish mana jundarcachu, mana ashnajyarcachu. 25Chaimi Moisesca:
–Cunan punllaca Mandaj Diospajlla ch'icanchishca samana punllami. Cunanca ima mana tiyangachu. Chaillatataj micuichijlla. 26Sujta punllacunacamaca micungapaj tandai tucunguichijmi. Ashtahuanpish canchis punllapica, samana punlla cashcamanta imata mana japinguichijchu– nirca.
27Chashna nijpipish maijancunaca, canchis punllapipish tandanaman llujshircacunami. Ashtahuanpish imata mana japircacunachu. 28Chaimi Mandaj Diosca Moisestaca:
–¿Cancunaca maicamataj ñuca yachachishcacunata, mandashcacunata chaitataj ruranataca mana rurashun ninguichij? 29Riquichij, Mandaj Diosca canchis punllapica samarina punllatami curca. Chaimi sujta punllapica, samana punllapandij tandata japichun curca. Canchis punllapica, maiman mana llujshishpa cancuna maipi cashcallapitajmi saquirina canguichij ninmi Mandaj Diosca– nircami.
30Chashna nishcamantami israelcunaca, canchis punllapica samarijcuna carca.
31Israelcunaca chai tandataca Maná shutitami shutichircacuna. Chaica culantro muyu shina yurajlla, sacha chuspipaj mishquihuan caj tortilla shina mishquijllami carca.
32Chai q'uipami Moisesca israelcunataca:
–Mandaj Diosca cashnami nin: Maná shuti tandataca shuj gomerta japishpa huaquichichij. Egipto llajtamanta cancunata llujshichishpa cai shitashca pambapi cancunaman cai tandata carashcata cancunapaj huahua huahuacuna ricuchun ninmi– nircami.
33Moisesca Aarontaca:
–Cancunapaj huahua huahuacuna ricunapaj cachun shuj mangata japishpa chaipica shuj gomer maná shuti tandata churashpa, Mandaj Diospaj ñaupajpi huaquichi– nircami.
34Aaronca Mandaj Dios, Moisesta mandashca shinallatajmi shuj mangapi chai tandata churashpa, Mandaj Dioshuan shuj yuyailla tucushcata ricuchij quillcata huaquichina arca ñaupajpi churashpa huaquichirca.
35Chashnami israelcunaca chuscu chunga huatacunata shitashca pambataca Canaán llajta lindeman chayangacama maná shuti tandata micushpa causarcacuna.
36(Shuj gomerca, shuj efa nishcata chungapi chaupishca shuj mirgami.)
Currently Selected:
ÉXODO 16: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.