ECLESIASTÉS 8
8
1¿Pitaj yachaj shinaca cangari? ¿Pitaj pai shina tucui imatapish yachangari? Alli yachaica runapaj ñahuita achijyachinmi, p'iña ñahuitapish shujtajyachinllami.
Jatun mandajta cazunamanta
2Cantaca caitami cunani: Canca Diospaj ñaupajpimi, jatun mandajta cazunata ari nircangui. Pai mandashcata cazunami cangui. 3Jatun mandajpaj ñaupajmantaca ama llujshishcahuan ringuichu. Ima mana allita rurashpapish ama chaillahuantaj catinguichu. Pai munashca shina llaquichingallatajmari. 4Jatun mandaj mandashcataca, pi mana jarcai tucunchu. ¿Imamantataj chaita rurangui? nishpapish, pi mana ni tucunchu.
5Mandashcata pajtachijtaca, ima llaqui mana japingachu. Yachaj runacarin, imalla rurashcata ricuna punlla chayamunata yachanmi. 6Cai pachapi causajcunaca quiquinpajllatajmi jatun mana allita rurancuna. Ima munashcata rurangapaj shuj punlla tiyashca shinallataj, tucui chaicunata ricuna punllapish chayamungami. 7Ima punlla, ima tucunataca mana yachanchu. Chaitaca ¿pitaj huillai tucungari?
Runaca causaitapish huañuitapish mana mandai tucunchu
8Runaca alma ama llujshichunca, mana charirai tucunchu. Huañuna punlla chayamujpica, mana jarcai tucunchu. Chai punlla chayamujpica, ima macanacunacunahuanpish mana mishai tucunchu. Diosta mana manchajtapish, mana manchashcaca mana quishpichingachu.
9Inti achijyachicun cai pachapi causajcuna tucui imallata ruracushcatami, shunguta churashpataj callarishpa ricurcani. Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna.
Millaicunatarajmi alli nincuna
10Shinallataj caitapishmi ricuni: Millai runacuna huañujpirajmi, yupashpa yupashpa huacashpa pambancuna. Ashtahuanpish Diospaj huasiman shamuraj, alli runacuna huañujpica, paicuna causashca pueblopi causajcunaca paicuna alli cashcata cungarinllacunami. Chashna tigraman yangatami rurancuna. 11Millaita rurajpi mana utca llaquipi churajpica, shungupica ashtahuan millaita rurana yuyaillami purincuna. 12Juchata ruraj runaca, mashna cutin millaita rurashpapish, unita causanllami. Shina cashpapish ñucaca Diospaj munaita rurajcuna, paipaj ñaupajpi cazushpa causajcunapish alli llujshina cashcatapish yachanimi. 13Ashtahuanpish Diosta mana manchajcunaca llaqui tucuna cashcata, paicunapaj causaipish llandu shina utca chingarina cashcatami yachani. Diosta mana manchashcamantami, chashna tucungacuna. 14Huaquinpica cai pachapica, imapish manapish cana tucunllami. Cashcata rurajcunamari, Diosta mana manchaj cashca shina llaquita apancuna. Diosta mana manchajcunarajmi, cashcata rurajcuna shina cushicushpa sumajta causancuna. Chaipish mana cana yangami ninimi.
15Chaimantami ñucaca cushicuna alli cashcata nini. Cai pachapica ñucanchij trabajomantaca micushpa, ubyashpa cushicunallatami charinchij. Causashcacamaca chaillatami rurai tucunchij.
16Ñucaca tucui shunguhuanmi cai pachapi causajcuna imallata ruraj cashcataca yacharcani. Huaquincunaca tutapish, punllapish mana samarincunachu. 17Ashtahuanpish Diosca inti achijyachicun cai pachapi chashna tucuchun, imamanta saquij cashcataca pi mana yachai tucuj cashcatami ricurcani. Ima shina cashcata yachaj chayasha nishpa, mashnata yuyashpapish manataj yachai tucuipajchu. Shuj jatun yachaj runa yachanimi nishpapish, tucuitaca mana yachanchu.
Currently Selected:
ECLESIASTÉS 8: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
