ECLESIASTÉS 7
7
Ashtahuan alli cajta uyashpa cazunamanta
1Tucuicuna rijsishca alli runa canaca, sumaj mishquijllata ashnaj jambihuan llihuirishcata yalli allimi. Huañui punllaca huachari punllata yalli allimi. 2Jatun micuita ruracun huasiman rinapaj randica, huañui tiyashca huasipi compañanaman rinami alli. Cai pachapi causajcunapajca, chai punllami tucui imapish tucurin. Causaj runaca chaita ricushpami yuyaringa.
3Huacanaca asinata yalli allimi. Llaquilla ñahui tucujpimi, shunguca manchashpa alli tucun.
4Yachaj runacunaca, huañui tiyashca huasiman rinatami yuyan. Ashtahuanpish ch'ahuan runacunaca, jatun micuita ruracun huasimanmi callpan.
5Ch'ahuan runacuna cantashcata uyanapaj randica, yachaj runa cunashcata uyanami alli.
6Ch'ahuan runa asishcaca, casha trasyashpa manga ucupi rupacuj shinallami. Asinapish yangallatajmi.
7Pitapish llaquichishpaca, yachaj runapish upa runa shinallatajmi tucun. Camaricunaca alli canata saquichinllami.
8Imata ruranapish ña tucurishca cashpaca, cunanlla callarishcata yalli allimi. Mana utca p'iñarij canaca, c'ari tucushca canata yalli allimi.
9Imamantapish ama jahualla p'iñaringuichu. Ch'ahuancunallami chashna p'iñarincuna.
10Ama: ¿Imamantashi ñaupa huatacunaca tucui imapish cunan horasta yalli alli carca? niringuichu. Chashna nishpaca, mana yachaj cashcamantachu chashna tapungui.
11Cai pachapi achij intita ricushpa causajcunapajca, yachaj canaca allimari. Ima charinahuanpish cashpacarin ashtahuan allimari. 12Yachaica escudo shina huaquichijmi, cullquipish escudollatajmi. Shina cashpapish yachaica yachaj runamanca causaita cuj cashcamantaca, cullquita yallimari.
13Dios rurashcata alli ricushpa yuyari. Paillataj huishtuta rurashcataca ¿pitaj allichi tucungari? 14Alli punlla chayamujpipish, chai punllallapi cushicungui. Mana alli punlla chayamujpipish, alli yuyaringui. Caya mincha huañushpaca, ña ama imata ashtahuan ricuchunmi cushicunatapish, llaquitapish Diosllataj churarca.
15Ñuca yanga causai punllacunapica, tucui caicunatami ricurcani: Cashcata ruraj runataca alli cashca jahua huañui japinllami. Diosta mana manchajrajmi, millaita rurashcahuan ashtahuan unita causan.
16Chashna cashcamantaca, tucui imatapish cashcata ruraj mana ricurinachu cangui. Tucuita yachaj shinapish mana ricurinachu cangui. ¿Maitataj canllatajca tucuchiringuiyari?
17Ama yalli millai canguichu, ch'ahuanpish ama canguichu. Manaraj huañuna punllapica, ama huañuna tucunguichu.
18Caita chariranaca allimi. Caishujtapish cambaj maquimantaca ama cacharinguichu. Diosta manchaj runaca, tucuimanta allimi llujshinga.
19Yachaimi yachaj runataca, chunga mandajcuna shuj pueblollata mandacujtapish yalli allita pushan.
20Cai pachapica cashcata ruraj cashpapish, manataj ima juchata rurashpa, allillata rurashpa causajca, shujllapish mana tiyanchu.
21Ima parlotapish ama uyacunguillachu. Chashna mana uyajpimi, cambaj rinrinmanca cambaj runa canta c'amishcapish mana uyaringa. 22Canpish tauca cutinmi shujtajcunata huashalla ima mana allita rimashcangui. Chaitaca canllataj yachanguimi.
Yachaj canata mashcanamanta
23Tucui chaicunatami alli yuyaihuan callarishpa ricurcani, ñucaca yachaj cana yuyaillami carcani. Shina cajpipish yachaica, ñucamantaca carupimi. 24Imamanta chashna tucuj cashcatataj yachanaca, carupimi yallitaj ucuman tiyacujtaca ¿pitaj pajtai tucungari?
25Chaimantami alli yachaj chayangapaj, alli ricungapaj ñuca tucui shunguta churashpataj, callarishpa alli yuyarircani. Chashna yuyarishpaca, ch'ahuan cashcamanta mana allita ruraj cashcata, yuyai chingarishca shina pandarij cashcatami ricurcani.
26Caitapishmi ricurcani: Trampa shina, urmachij linchi shina shunguta charij, c'uyaj tucushpa ugllarij huarmica huañuitapish yalli jayajmi. Diosta cushichij runaca, chashna huarmipaj maquimantaca quishpirinmi. Ashtahuanpish millaita ruraj runaca, chai huarmihuanca linchipi shina urmangallami.
27Huillaj ñucaca, tucui imatapish callarishpa, alli ricushpa yachacushpaca caitami ricurcani: 28C'aricunataca huaranga c'aricunapurapi shujllatami alli cajta japini. Ashtahuanpish huarmicunataca tucuicunamanta shujllapish alli cajtaca, mana japinichu. Mashnata mashcashpapish, manaraj japinichu. 29Caillatami ricuni: Diosca runataca allitami rurashca. Ashtahuanpish paicunallatajmi tucui laya mana allita mashcancuna.
Currently Selected:
ECLESIASTÉS 7: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
