ECLESIASTÉS 6
6
1Ñucaca cai pachapica, tucui runacunapurallapitaj cashna llaquipish tiyashcatami ricuni: 2Diosca maijanmanca achca charinacunatapish, alli nishca canatapishmi cun. Paicunapajca ima munashca mana illanchu. Shina cashpapish Diosca chai tucui charinacunamanta cushicuchunca mana saquinchu. Ashtahuanpish shujtajcunamanmi cushicuchun cun. Chaipish yangallatajmi, nanarina jatun llaquipishmi. 3Shuj runaca patsaj churicunata charinmanchari, unitapish causanmanchari. Chashna achca huatacunata causashpapish, ashallatapish mana cushicushpa causarcachari. Huañujpipish mana pambashca cangachari. Chashna cashca cajpica, ñucaca shullushca huahuaraj chai runata yalli alli cashcatami nini. 4Chai shullushca huahuaca, shuj punllallatapish mana cai pachapi causashpa rinchu. Paipaj shutillapish mana saquirinchu. Amsapi chingarishca shinami saquirin. 5Intillatapish mana ricushpa, mana rijsishpa rinchu. Shina cashpapish chai huahuarajmi chai runata yalli samaringa. 6Ishqui huaranga huatata causashca cashpapish, pai charishcacunamanta mana cushicushca cashpaca, chai runaca ima allitaj cangari. Ishquindijllatajmi chaillamantaj rincuna.
7Cai pachapi causajcunaca micungapajllami, mana samashpa trabajancuna. Shina cashpapish, micunataca manataj aminchu. 8Yachaj runaca, ch'ahuan runataca ¿imamanta yalli canchu? Yachaj nishca huajcha runaca ¿imamanta yallinchu?
9Manapish japipajta charina yuyai canapaj randica, ña charishcahuan cushicunami alli. Chaipish yuyaita yanga shaicuchinallami. 10Imapish cunan tiyajca, ñaupamantami quiquin shutihuan tiyashca. Runa ima shina cashcapish yacharinllatajmi. Runaca, paita yalli caj Dioshuanca mana shayari tucunchu.
11Yalli rimarijpica, manapish cana yangallami shimimantaca ashtahuan llujshin. Rimarishcahuanca pi mana imata japincunachu. 12Runacunapaj alli canataca pi mana yachanchu. Tucui imapish yangalla caj cai ashalla causaipi, ima ashtahuan alli cajtaca pi mana yachanchu. Ñucanchij huañushca q'uipaca, inti achijyachicun cai pachapi imalla tucunatapish pi mana huillaipajchu.
Currently Selected:
ECLESIASTÉS 6: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
