ECLESIASTÉS 9
9
Tucuicunallataj huañuna cashcamanta
1Tucui caicunataca tucui shunguhuanmi yacharcani. Chaimantami caita huillani: Yachajcunahuan, cashcata rurajcunahuanca paicuna rurashcacunandij Diospaj maquipimi. Tucui imapish paicunapaj ñaupajpimi. Shina cajpipish c'uyaimantapish, p'iñaimantapish imata mana yachancunachu. 2Shujcuna imami tucun, tucuicuna chaillatajmi tucun. Cashcata ruraj runapaj, Diosta mana manchaj runapaj, alli shungu runapaj Diospaj ñaupajpi mana mapa caj runapajpish, mapa caj runapajpish, Diosman cushpa rupachij runapajpish, mana chaita rurajpajpish, alli runapajpish, juchata rurajpajpish, quiquin shimihuan imata rurani nij runapajpish, chashna ninata manchaj runapajpish tucuicunapajllatajmi chai shinallataj tucuncuna.
3Cai pachapi tucui imalla ruraricujcunamantaca chaimari mana alli ricurin. Shujcuna imami tucun, tucuicuna chai shinallatajmi tucun. Inti achijyachicun cai pachapi causajcunaca tucui causaipimi shungupica, millaita rurana yuyaihuan junda causancuna. Ch'ahuan yuyaicunaca huatashpa shinami charicun. Punlla pajtajpica huañushcacunahuanmi tandanacugringacuna.
4Causacujrajcunaca imallatapish rurai tucunrajmi. Huañushca leonpaj randica, allculla cashpapish causaj cashpamari alli. 5Causacujrajcunaca huañuna cashcallatapish yachanmi. Ashtahuanpish huañushcacunaca ña imata mana yachanchu, imata ashtahuan mana japincunapishchu. Pi ashtahuan mana yuyarinllapishchu. 6Paicunapaj c'uyaipish, paicunapaj p'iñaipish, pipajta imata munacushcapish chaipimi tucurin. Inti achijyachicun cai pachapi imata ruranaman ña mana tigramungacunachu.
7Can imallata rurashcamantaca Diosca cushicushcamari. Cushicushpa cambaj micunata micuilla, cushi shunguhuan cambaj vinota ubyailla. 8Punllanta yuraj churanata churailla, umapipish mishquijllata ashnaj jambitaca ama illachinguichu. 9Inti achijyachicun pachapi causachun Dios canman cushca cambaj yanga causaipica, tucui causaipi cambaj c'uyashca huarmihuan cushicungui. Inti achijyachicun cai pachapi yangamanta shaicuita trabajashcamantaca, chashna cushicunallatami charingui. 10Imata ruranatapish cambaj maquipi tiyacujtaca fuerza tiyashcahuan rurailla, canpish Seolman ringuillatajmi. Chaipica imata rurana mana tiyanchu. Imata yuyanallapish, imata yachanapish, alli yachaipish mana tiyanchu.
Yachajcunapajpish llaquica shamujlla cashcamanta
11Inti achijyachicun cai pachapica caitapishmi ricuni: Mishanacuipica mana alli callpajcunallachu mishancuna. Macanacuipipish mana c'ari c'aricunallachu mishancuna. Micunatapish mana yachajcunallachu allita micuncuna. Charijyanatapish mana alli yuyaiyujcunallachu charijyancuna. Chasquinatapish mana sumajta rimajllata alli chasquincunachu. Ashtahuanpish ima punlla ima tucuna cashpaca, chashna tucunllami. 12Ima punlla ima tucunataca pi mana yachanchu. Chalhuacunataca linchica ñapish japinllami. Pajarocunapish trampapi japi tucunllami. Runacunatapish chashnallataj mana alli punlla chayajpica, ñapish ima llaqui japinllami.
13Inti achijyachicun cai pachapica, shujtami alli yachaj tiyashcata ricurcani. Chaita ricushpaca alli yuyaitami japircani. 14Ashalla gentecunayuj uchilla pueblomi tiyan. Chai pueblomanca achca soldadocunayuj jatun mandaj shamushpami, macanacungapaj muyundijta jatun baluartecunata shayachirca. 15Chai pueblopica alli yachaj huajcha runami causan. Chai runami pueblota chai jatun mandajpaj maquimanta quishpichin. Chai huajcha runa chaita rurai tucuna cashcataca pi mana yuyarircachu.
16Chaimantami cashna yuyarcani: Huajcha runa cashcamantami yachaj cajpipish, pai yuyaita cushcataca mana uyashun nincuna, pai cunashcatapish mana chasquishun nincunachu. Shina cajpica ñucaca yachaj canataca, c'ari c'ari canatapish yalli allimari ninimi.
17Rumi shungu runacunata jatun mandaj caparishpa rimashcapaj randica, yachaj runa rimashcata upajlla uyashcarajmi allita ruran.
18Alli yachaica macanacunata charishcatapish yalli allimari. Ashtahuanpish pandarishpaca, shuj runallataj jatun llaquicunata ruranllami.
Currently Selected:
ECLESIASTÉS 9: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.