HECHOS 26

Agripaman Pablo huillashcami

1Chaimi Agripaca Pablotaca:

–Can ima shina cashcata huillai– nijpi Pabloca, pai ima shina cashcata huillai callarishpaca maquita alzashpami cashna nirca:

2–Jatun mandaj Agripalla, ñucata judiocuna imata nishpa juchachicushcata canman huillai tucushcamanta achcatami cushicuni. 3Ashtahuantajca judiocuna imata ruraj cashcata, imamanta rimanacuj cashcatapish canca allimi yachangui. Chaimantami ñuca huillashcataca mana p'iñarishpalla uyachun rogani.

Pabloca pai ima shina cashcata parlashcami

4Ñuca llajtapipish, Jerusalenpipish huahua pachamanta ñuca ima shina cashcataca tucui judiocunami alli yachancuna. 5Ñucaca uchillamanta pacha fariseo, ñucanchij llajtapi crinataca chaitataj pajtachijcunapuramantami cani. Chaita paicuna huillashun nishpaca huillai tucunmi. 6Ñucanchij ñaupa yayacunaman Taita Dios imallata cusha nishcata shuyacushcamantami, cunanca juchachishpa caiman pushamushca shayacuni. 7Chai cusha nishcataca ñucanchij ñaupa yayacunamanta chunga ishqui aillucunaca tutapish punllapish, chai cusha nishcata japina yuyaillami Taita Diospajta rurashpa shuyacuncuna. Jatun mandaj Agripalla, ñucapish chai shinallataj shuyacushcamantami, judiocuna juchachishca cani. 8Huañushcacunata Taita Dios causachinaca cancunapaj yuyaipica maita mana cripajmari yuyachin.

Crijcunata llaquichij cashcata Pablo parlashcami

9Nazaretmanta Jesusta caticujcunata llaquichinaca alli cashcatami ñaupaca ñucapish yuyarcani. 10Chashna cashpami Jerusalenpica chaitataj rurarcani. Chaita rurangapajca curacunata mandajcunata quillcata mañashpami Jesusta caticuj achcacunata carcelcunapi churachircani. Shinallataj huañuchijpipish, allimi nircanimi. 11Mai sinagogacunapipish paicuna crishcataca c'amishpa saquichunmi achcata llaquichij carcani. Paicunataca jatunta p'iñashpami shujtaj pueblocunapi cajcunatapish llaquichishpa purircani.

Ima shina crij tucushcata Pablo huillashcami

(Hch 9.1-19; 22.6-16)

12Ñucaca chashna llaquichina yuyailla cashpami, curacunata mandajcuna quillcata cushcahuan pi mana ima nipaj Damascoman ricurcani. 13Jatun mandajlla, chaupi punlla shinata ñanta ricujpimi, intitapish yalli achij nicuj jahua pachamanta ricurirca. Chaica ñucata, ñucahuan ricujcunatapishmi achij nirca. 14Chaimi ñucanchijca tucuicuna pambaman urmarcanchij. Chaipimi hebreo rimaipi cashna nishpa rimashca uyarirca: “Saulo, Saulo, ¿ima nishpataj ñucataca p'iñashpa llaquichina yuyailla llaquichicungui? Garrucha puntapi huagra jaitashpa chugririj shinami canllataj llaqui tucucungui” nircami. 15Chaimi ñucaca: “Amito, canca ¿pitaj canguiyari?” nijpi, Mandaj Jesusca: “Ñucaca can p'iñashpa llaquichina yuyailla llaquichicun Jesusmi cani. 16“Cunanca jatarishpa shayari. Cantaca ñuca mandashcata ruraj cachun, cunan imallata ricushcacunata, q'uipata ñuca ricuchishcacunata huillaj cachun churangapajmi canmanca ricurini. 17Ñucami cantaca judiocunamanpish, mana judiocunamanpish huillachun cachani. Paicuna imata rurachunpish mana saquishachu. 18Can huillashpa ñahuita pascajpimi, paicunaca amsamanta luzman cutirishpa Satanaspajta ruracushcata saquishpa Taita Diospajta rurangacuna. Ñucata crishpami juchacunamantapish quishpichishcacuna canga. Chashna cashpami Taita Diospajlla cajcunahuan herenciata japingacuna” nircami.

Pabloca muscuipi shina ricushcatami cazurcani nishcami

19Jatun mandaj Agripalla, jahua pachamanta ricurishpa mandashcataca cazunatajmi carcani. 20Chaimi Damascopi huillai callarishpaca, Jerusalenpipish, tucui Judeapipish huillarcani. Chai q'uipaca mana judiocunamanpishmimana allita ruracushcata saquishpa Taita Diosman cutirichij nishpa huillarcani. Taita Diosman cutirishcata ricuchingapajca allicunata ruraichij nircanimi. 21Chaimantami judiocunaca, Taita Diospaj huasipi japishpa ñucataca huañuchishun nircacuna. 22Chashna cajpipish Taita Dios ñucata huaquichijpimi, profetacunapish, Moisespish imalla tucuna cashcata huillashca pajtashcataca uchillacunamanpish, jatuncunamanpish cunancama chaitataj huillacunilla. 23Cristoca llaquita apashpa, huañushcacunapaj chaupimanta causarishpami judiocunaman, mana judiocunamanpish ima shina quishpirinataca achijyachishpa ricuchinga nishcatami huillacuni” nircami.

Pabloca Agripatami crichuntaj nishca

24Pai ima shina cashcata Pablo alli huillajpimi Festoca:

–¡Pablo, canca locomari cangui! ¡Achcata yachacushpallamari loco tucushcangui!– nishpami sinchita rimarca.

25Chaimi Pabloca cashna nirca:

–Tucuicuna alli nishca mandaj Festo, ñucaca mana locochu cani. Alli yuyaihuanmari ima shina cashcatataj huillacuni. 26Pai jatun mandaj Agripapish chai tucui imalla tucushcataca allimi yachan. Mai pacallapi mana chashna tucushcachu. Chaimantami ñucaca paipaj ñaupajpi imata mana manchashpa huillacuni. 27Jatun mandaj Agripa, ¿quiquinpish profetacuna huillashcataca cringuimi? Quiquinpish profetacuna huillashcataca crina cashcata yachanimi– nircami.

28Chaimi Agripaca, Pablotaca:

–Ashallamantami Cristota catijta mana rurangui– nijpi, 29Pabloca:

–¡Ashallamanta cashpa, achcamanta cashpapish, Taita Dios munajpica mana canlla, ashtahuanpish cunan caipi ñucata tucui uyajcunapish ñuca shina crij cachunmi munani! ¡Cadenahuan ñuca shina huatashca cachunllami mana munani!– nirca.

30Pablo chaicunata nijpica, jatun mandaj Agripapish, llajtata mandaj Festopish, Berenicepish, tucui chaipi paicunahuan tiyacujcunapish jatarishpa, 31rishpa paicunapuralla tandanacushpami:

–Cai runaca huañuchishca canapaj ima millaitaca mana rurashcachu, prezupi canapajllapish mana cashcachu– nishpa parlanacurcacuna.

32Chaipimi Festotaca, Agripaca:

–César tapushpami ñucataca imatapish ninga nishpa mana nishca cajpica, chai runataca cacharinallami cashca– nircami.

Currently Selected:

HECHOS 26: QCHI04

Highlight

Copy