HECHOS 27

Pablota Romaman cachashcami

1Italiaman ñucanchijta cachana tucushpaca, patsaj soldadocunata mandaj Juliomanmi Pablondij shujtaj prezucunandij cacharca. Paica Augusta shutita shutichishca soldadocunamantami carca. 2Adramitio barcopi huichiyashpami rircanchij. Chai barcoca Asia llajtapica, maillapi shayarinapimi shayarishpa rina carca. Tesalonicamanta rishpa Macedoniapi causacuj Aristarcopish ñucanchijhuanmi rirca. 3Cayandij punllaca Sidonmanmi chayarcanchij. Julioca achcata llaquishpami, Pablopaj amigocuna paiman imallatapish cuchun nishpa ricugrichun saquirca. 4Sidonmanta llujshishpaca huaira jarcajpimi, huaira mana tiyan Chipre alli ladota rircanchij. 5Cilicia, Panfilia llajtacuna tiyan mama cuchata rishpami, Licia llajtapi caj Mira puebloman chayarcanchij.

6Chaipimi patsaj soldadocunata mandajca, Alejandriamanta Italiaman ricuj barcopi ñucanchijtaca huichiyachirca. 7Achca punllacunatami allimantalla rircanchij. Huaira jarcajpimi, shaicushca llaquinayajta Gnido ch'imbapuraman chayarcanchij. Chaimantaca huaira jarcajpimi, Salmón ch'imbapurata rishpa, huaira mana tiyan Cretata muyushpa rircanchij. 8Achcata shaicushpa allimanta rishpaca, jatun barcocuna shayarina Lasea pueblo uranijpi caj, Alli Shayarina shutimanmi chayarcanchij.

9Tauca punllacunata uniyajpi tamya punllacuna ña chayamucujpimi yacuta rinapajca ña mana alli cajpi, Pabloca paicunata yuyachishpaca:

10–Mandajcuna, tamya punllacunapi rishpaca, jatun llaquimari tucushun. Cai barcopish chaipi tucui imallata apacushcacunapish yacupi chingaringami. Mana chaicunallachu chingaringa ñucanchijpish huañunchijman– nircami.

11Pablo chashna nijpipish patsaj soldadocunata mandajca, Pablo nishcata uyanapaj randica, barcoyujta, barcota purichijtami cazurca. 12Chai shayarinapica, tamyata huairata pasanaca mana alli yuyachijpimi, Cretapi caj Feniceman chayashunpishchari yuyashpa tucuicuna chaimanta rinata yuyarircacuna. Chai Fenicepica barco shayarinapajca allimi carca. Janajmanta uramanta huaira shamushpapish mana imata ruraipajmi carca. Chaimantami tamya punllacunataca chaipi cashun nircacuna.

Mama cuchapi huairandij tamya jatarishcami

13Huichi huaira ña ashalla tucujpimi, cunantajca ña rinallami yuyachin nishpa, barcota charichishca fierrocunatapish tandashpa ri callarircacuna. Ña rishpaca yacu chaupipi caj Creta c'uchu cuchullatami rircacuna. 14Chaita ricujpica manaraj achcata rijpimi, ñapish Euroclidón nishca huaira janajmanta shamushpa barcota apai callarirca. 15Barcota huaira apajpi ñucanchij ricushcaman mana pushai tucushpaca huaira apachun saquircanchijllami. 16Yacu chaupipi caj Clauda shuti uchilla llajta huashatami ña mana achca huaira cajpi, ñucanchij purichishpa rircanchij. Chashna ricushpaca, barco aisashpa ricushca uchilla canoatami achcata shaicushca yacumanta barcoman huichiyachircanchij. 17Chai canoata huichiyachishpaca, barco ama p'aquirichunmi, huascacunahuan huatarcacuna. Chaimantaca Sirte nishca t'iyupi pambarinata manchashpami, linsocunata uricuchishpa huaira maita barcota apashcata ringapaj saquircacuna. 18Chai cayandij punllapish, huairandij tamyaca ashtahuan caiman chaiman shitacujpimi, barcopi imalla apacushcacunataca yacupi shitai callarircacuna. 19Ña quimsa punllata chashnallataj cajpimi, barcota purichinapaj imalla charinacunatapish ñucanchij maquihuan yacupi shitarcanchij. 20Achca punllacunata intipish, luzerocunapish mana ricurijpimi, jatun tamyalla huairalla cajpi ña mana causashunchu yuyarcanchij.

21Achca punllacunata mana micushca cashpami Pabloca, paicunapaj chaupipi shayarishpa cashna nirca:

–Mandajcuna, ñuca nishcata uyashca cashpaca, manamari Cretamanta llujshimunchijmanchu carca. Mana ima cashna llaquitapish apanchijmanchu carca. Mana imatapish shitanchijmanchu carca. 22Shina cajpipish cunanca ama ashtahuan llaquilla cachun caitami nisha nini: Ama manchaichijchu, cancunaca shujllapish mana huañunguichijchu, cai barcollami chingaringa. 23Ñucaca Taita Diospaj cashpa paipajta ruraj cajpimi, Taita Diosca cunan tuta paipaj angelta cacharca. 24Chai angelmi ñucataca: “Pablo, ama manchaichu. Canca Cesarpajman chayanatajmi cangui. Canmantaca tucui canhuan rijcunatami Taita Diosca, huañuimanta quishpichisha ninmi” nirca. 25Chaimanta tucui caipi cajcuna, ama manchaichijchu. Taita Diosca paipaj angelman huillachishcata pajtachina cashcataca crinimi. 26Ñucanchijca, yacu chaupipi caj llajtallamanmi maiman cashpapish chayana canchij– nircami.

27Ña ishqui semanata huaira caiman chaiman shitashpa apashpa rijpi, ñapish shuj tutaca Adriático mama cuchapi ricurircanchijllami. Chai chaupi tutallatajmi barcota purichijcunaca, ña allpaman chayacushcata yuyarcacuna. 28Chashna ricushpa yacu jahuamanta ucu allpaman midijpica, quimsa chunga sujta metromi cashca carca. Cutin chai chaininijpi midijpica, ishqui chunga canchis metromi cashca carca. 29Rumicunapi huajtarinata manchashpami, barcota charij chuscu fierrocunata huashaman cacharircacuna. Tutaraj cajpimi ña achijyashca canman yuyarcacuna. 30Barcota purichijcunaca, barcota shitashpa rishun yuyashpami, barcota charij ñaupaj fierrocunata uriyachij tucushpa, uchilla canoata yacuman uriyachi callarircacuna. 31Chaimantami Pabloca patsaj soldadocunata mandajtapish caishuj soldadocunatapish:

–Barcota purichijcuna shitashpa rijpica cancunaca mana quishpiri tucunguichijchu– nircami.

32Chashna nijpi soldadocunaca huatashca huascacunata p'itishpami, chai uchilla canoataca yacupi chingarichun saquircacuna.

33Ña pacarimugrijpimi Pabloca tucuicuna micunami, can nishpa micunayachichun cashna nirca:

–Ña ishqui semanatamari mana dormishca, imata mana micushca canguichij. 34Chaimanta cancunaca cancunapaj cuerpopaj allipaj imallatapish micuichij. Cancunapaj umamanta shuj ajchallapish mana chingaringachu– nircami.

35Chashna nishpaca Pabloca tandata japishpa tucuicunapaj ñaupajpi Taita Diosta pagui nishpami tandata chaupishpa micui callarirca. 36Chashna micucujpimi, tucuicuna micunachishpa paicunapish micurcacuna. 37Chai barcopica, ishqui patsaj canchis chunga sujta gentecunami carcanchij. 38Ña mana nijta micushpaca, barco p'anguillayachun nishpami trigotaca mama cuchapi shitarcacuna.

Mama cuchapi barco huashicushcami

39Ña punllayajpica barcota purichijcunaca, mai llajtapi cashcatapish mana yacharcacunachu. Chashna mana yachashpapish, chaipi barco shayarinalla yuyachijpimi, barcota chaiman c'uchuyachishun yuyarcacuna. 40Yacu ucuman cacharishca fierrocunata charicuj huascacunata p'itishpa, chai fierrocunataca yacullapitajmi saquircacuna. Barcota caiman chaiman pushana caspicunataca cacharishpa barcota purichij ñaupaj lado linsotapish jahuaman churajpimi, huairaca barcotaca allpaman c'uchuyachi callarirca. 41Ñalla allpaman c'uchuyacushpaca, ishqui lado yacu tupanacushca ñutu allpa tandarishcapimi ñaupaj ladoca pambarirca. Chaimanta mana llujshi tucujpimi, yacu huajtarishpa barco chupata p'aquirca.

42Chashna tucujpimi soldadocunaca prezu cajcunataca, yacupi huambushpa maipi miticugrinamanta huañuchinata yuyarircacuna. 43Chashna nijpica patsaj soldadocunata mandajca, Pablota mana huañuchisha nishcamantami cashna nirca:

–Huambunata yachajcunaraj huambushpa allpaman llujshichun. 44Caishujcunaca tablacunapi, barco p'aquirishca caspicunapi huambushpa allpaman llujshichun– nirca. Chashnami tucuicuna mana huañushpa allpaman llujshircacuna.

Currently Selected:

HECHOS 27: QCHI04

Highlight

Copy