HECHOS 25

Pabloca Cesarmi ñucataca tapunga nishcami

1Festoca Cesareaman chayashpa chai llajtata mandaj yaicushpaca quimsa punlla q'uipaca, Jerusalenmanmi rirca. 2Pai chaiman chayajpica, curacunata mandajcuna, judiocunata mandajcunapish Pablota juchachingapajmi Festopajman shamurcacuna. 3Chaipimi paitaca:

–Ñucanchijpaj allita rurashpa Pablota Jerusalenman pushaj cachapai– nircacuna.

Jerusalenman pushacujpi ñanpi chapashpa huañuchinatami yuyarinacushca carca. 4Ashtahuanpish Festoca paicunataca:

–Pablotaca Cesareallapitajmi alli cuidashpa prezu charicuncuna. Ñucallataj chaimanca ñami rigrini. 5Maijancuna imata juchachishun nishpaca Cesareaman ñucahuan jacuchij. Pai ima mana allita rurashca cajpica, chaipi juchachinguichij– nircami.

6Festoca Jerusalenpica pusaj punllacunata, mana cashpaca chunga punllacuna shinallatami chaipi carca. Chai q'uipaca Cesareamanmi tigrarca. Cayandij punllaca pai mandashpa tiyarinapi tiyarishpami, Pablota pushaj cacharca. 7Pablo ña chayajpica, Jerusalenmanta shamuj judiocunaca muyujta shayarishpami, paica achca jatun llaquicunatami rurashca nishpa juchachircacuna. Juchachicushpapish paicuna huillashca shinataj cashcataca imata mana ricuchi tucurcacunachu. 8Chashna juchachijpimi Pabloca:

–Judiocunapaj Mandashcacunatapish, Taita Diospaj huasitapish, Roma llajtata mandajtapish ima mana allita mana nishcanichu– nirca.

9Festoca, judiocunapaj allita rurasha nishpami Pablotaca:

–Jerusalenman risha ninguichu canta imallata juchachicushcata chaipi tapungapaj– nijpi,

10Pabloca:

–Ñucata caillapitaj tapuchunmi César churashca mandajpaj ñaupajpi cani. Ñucaca judiocunataca ima jatun llaquita mana rurashcanichu. Chaitaca canllataj allimi yachangui. 11Ima jatun llaquita, mana cashpaca huañuchipaj ima millaita rurashca cashpaca, huañuchichun mana mitsarimanchu. Ashtahuanpish paicuna ñucata juchachicushca manapish chashna cajpica, pi mana paicunaman cui tucunchu. Ñucataca Cesartaj alli tapuchun ninimi– nircami.

12Chaimi Festoca, paiman yuyaita cushpa ayudajcunahuan parlanacushca q'uipaca:

–Canllataj César ñucata tapuchun nishcamanta cunanca paipajmanmi rina cangui– nirca.

Agripapaj Berenicepaj ñaupajpi Pablo cashcami

13Tauca punllacuna q'uipami jatun mandaj Agripaca, Berenicendij Cesareaman Festota allillachu cangui ningapaj shamurcacuna. 14Paicuna tauca punllacunata chaipi cajpimi, Festoca jatun mandajmanca Pablomanta parlashpa cashna nirca:

–Shuj runatamari Felixca prezu saquishca. 15Jerusalenman ñuca rijpimi, curacunata mandajcuna, judiocunata cunaj yuyajcunapish ñucapajman shamushpa paitaca huañuchilla nircacuna. 16Ashtahuanpish ñucaca paicunataca: “Imata juchachicushcata manaraj ch'imbapura tapujpica, chai juchachicushca runaca pai ima shina cashcata tapuchun mañai tucunmi. Chaimantami Roma llajtata mandajcuna ruraj cashca shinaca pitapish mana huañuchichunlla ninchu” nircani. 17Paicuna ñucahuan tandalla caiman shamujpimi, mana uniyashpa chai cayandijtataj ñuca mandashpa tiyarinapi tiyarishpa, chai runataca pushaj cacharcani. 18Paita juchachicujcunaca, ñuca yuyacushca shinataca mana huillarcacunachu. 19Paicunaca Pablo imata crishcata, ña huañushca Jesusca causacunmi nishpa Pablo huillashcata juchachishpallami huillarcacuna. 20Chaimi ñucaca imata mana rurai tucushpa, Pablotaca: “¿Jerusalenman risha ninguichu chaipi canta juchachijcunahuan ch'imbapura tapungapaj?” nircani. 21Chaipimi paillataj: “Ñucataca Augusto tapushpami imatapish ninga” nishcamanta, Cesarpajman ñuca cachangacama prezullapitaj alli cuidachun mandarcani.

22Chaimi Agripaca Festotaca:

–Ñucapish chai runa ima nishcata uyasha ninimari– nijpi, Festoca:

–Caya uyangui– nirca.

23Chai cayandij punllami Agripaca, Berenicendij sumajta churarishpa, huaranga soldadocunata mandajcunandij, chai pueblopi mandajcunandij Festo mandashpa tiyana ucuman shamurcacuna. Paicuna chayamujpimi, Festoca Pablota pushanaman cacharca. 24Pablo chayamujpica Festoca cashnami nirca:

–Jatun mandaj Agripa, tucui caipi ñucanchijhuan cajcunapish, chai runaca ñami caipi. Paitaca Jerusalenpipish, cai Cesareapipish tucui judiocuna juchachishpami huañuchinatajmi nishpa caparicunllacuna. 25Chashna nijpipish ñucaca paipica huañuipaj ima millaita rurashcataca mana japircanichu. Paillatajmi: “Ñucataca Augustotaj tapushpami imatapish ninga” nishcallamantami paipajman cachana tucurcani. 26Ñucaca pai imata rurashcata mana alli yachashpami, mandaj Augustomanca imata mana quillcai tucuni. Chaimi tucui caipi cajcunapaj ñaupajman, ashtahuantajca can jatun mandaj Agripapaj ñaupajman canpish tapushpa ima yuyaitapish cujpi mandaj Augustoman quillcashpa cachangapaj pushamuni. 27Shuj prezuta imamanta juchachicushcata mana huillashpa cachashpaca, ñucaca imata mana yachaj shina ricurina cashcatami yuyani– nircami.

Currently Selected:

HECHOS 25: QCHI04

Highlight

Copy