HECHOS 24

Mandaj Felixhuan Pablo parlashcami

1Pichca punlla q'uipami, curacunata jatun pushaj Ananiasca, cunaj yuyajcunamanta maijancunandij, Tértulo shuti abogadohuan Cesareaman rircacuna. Chaipimi llajtata mandajpaj ñaupajpi Pablota juchachingapaj shayarircacuna. 2Pablota Felixpaj ñaupajman pushamujpica, Tértulo runaca Pablota juchachingapajca cashna nishpami callarirca:

–Mandaj Félix, canca alli yachaj cashpami, ñucanchij llajtapi alli mandangui. Chaimantami ñucanchijca cushicushpa sumajta causanchij. 3Chashna sumajta causacushcamantami can mandaj Felixtaca, maipi cashpapish tucuicuna alli ninchij. 4Chaimanta ama achcata uniyashpa p'iñachingapaj cambaj alli shunguhuan cai ashalla huillashcata uyapai. 5Ñucanchijpajca cai runaca purij ungüi shinami. Chashna cashpami paica tucui llajtacunata rishpa judiocunata pandata yachachishpa p'iñanacuita jatarichishpa puricushca. Paica chai nazareno runata catijcunata mandajmi cashca. 6Taita Diospaj huasitapishmari mapayachisha nicushca. Chaimi japishpa, ñucanchij Mandashcapi nishca shina tapushun nicurcanchij. 7Chashna japishpa charicujpimi, huaranga soldadocunata mandaj Lisias shamushpaca, ñucanchij maquimanta maipish cachun quichurca. 8Chaimantami paita juchachijcunata cambajman shamuchun mandashca. Chaitaca canllataj tapushpami, ñucanchij imamanta juchachicushcataca alli yachangui– nircami.

9Chashna huillashcataca paihuan caj judiocunapish chashnatajmi nicurcacunami. 10Shina nijpimi mandaj Felixca, Pablo rimachun maquihuan ricuchijpi, Pabloca cashna nirca:

–Canca, achca huatacunata cai llajtapi alli mandaj cashcataca yachanimi. Chaimanta cushicushpa ñuca ima shina cashcataca huillashallami. 11Jerusalenpi Taita Diosta adorangapaj ñuca rishcaca cunan chunga ishqui punllacunallami. Chaitaca canllataj tapushpami ñuca nishca chashnataj cashcataca alli yachangui. 12Ñucataca Taita Diospaj huasipi, sinagogacunapi, pueblopipish pihuan rimanacucujta, chaipi cajcunata p'iñanacuita jatarichicujtapish mana japircacunachu. 13Cunan ñucata juchachicushcataca, paicunaca chashnatajmi nishpaca mana ni tucuncunachu. 14Caitami quiquinman huillagrini: Paicuna panda yachachinata caticun nijpipish, ñucaca Mandashcacunatapish, profetacunaman quillcachishcacunatapish ñucanchij ñaupa yayacuna shinallatajmi crishpa caticuni. 15Ima shinami paicunaca, tucui huañushcacunatami cashcata rurajcunatapish, mana cashcata rurajcunatapish Taita Dios causachinga nincuna. Ñucapish chai yuyaillatajmi cani. 16Chaimantami Taita Diospaj ñaupajpi, runacunapaj ñaupajpipish pi mana juchachipaj caiman yuyacuni.

17Tauca huatacunata shujtaj llajtacunapi purishca q'uipami, Taita Diosman cushca cullquita ñuca llajtapi causajcunapaj cungapaj, ñucapish imallatapish Taita Diosman cungapaj Jerusalenman rircani. 18Cachashca cullquita cushca q'uipaca, Taita Diospajta ruranata pajtachishcata ricuchingapaj maillarishca q'uipaca, ñapish Asiamanta maijan judiocuna Taita Diospaj huasi ucupi ricurircallami. Paicunaca ñuca achcacunahuan cajtapish, pita p'iñanacuchicujtapish mana japircacunachu. 19Chaicunami ñucata imata juchachishun nishpaca, cambaj ñaupajman shamuna carca. 20Mana cashpaca, mandajcunapuralla tandanacushcapaj ñaupajman ñucata pushajpi ima mana allita rurashcata japishca cashpaca, caipi cajcunallataj huillachun. 21Paicunapaj ñaupajpi cashpaca: “Huañushcacunapaj chaupimanta causarinata huillashcamantami, cunanca cancuna juchachishca cani” nishpami sinchita caparircani– nircami.

22Chashna nijta mandaj Félix uyashpaca, alli huillaimanta ima shina cashcata yachashcamantami:

–Huaranga soldadocunata mandaj Lisias shamujpimi, cancuna imata nisha nishcataca alli yachashpa imatapish nisha– nishpami cutinpaj saquirca.

23Shina nishpaca, patsaj soldadocunata mandajtaca, Pablotaca alli cuidangui, ashataca cacharij shina saquingui, pi paita ricuj shamujcunatapish, imata cusha nijcunatapish ama jarcangui nishpami mandarca.

24Asha punllacuna q'uipami, Felixca paipaj huarmi Drusilandij shamurca. Chai huarmica, judiami carca. Paimi Pablota cayashpa, Jesucristota ima shina crinata parlachirca. 25Pabloca cashcata ruraj canamanta, quiquin munaita jarcarinamanta, shamuj punllapica ima shina cashcatataj ricuchishpa Taita Dios llaquichina cashcatapish huillajpimi, Felixca achcata mancharishpaca:

–Cunanca rilla, cutin cayana tucushpaca cayashallami– nirca.

26Pablotaca cullquita cujpi cacharisha yuyashpami Felixca tauca cutin parlanacungapaj cayachicujlla carca. 27Ishqui huata q'uipa, Felixca pai mandacushcamanta llujshijpi Porcio Festomi mandaj tucurca. Chai Felixca, judiocunapi alli ricuringapajmi Pablotaca prezullapitaj saquirca.

Currently Selected:

HECHOS 24: QCHI04

Highlight

Copy