Maak 9
9
1Anye amaanyʌñ abo ammọ ate: “Ami ntañ akpanikọ inọ ndufo, ubaak ndufo e-edaaha mi idiikpaññake mbemiso ammọ ekịt abio ubọọñ Abasi naña adidi ke adudu.”
Adikpəhọ uduod
2Usen itiokeed amaakeboiyo Yisọs amaadat Bita, Yemsi ye Yọọn adọọk anyọñ anyan abod, ekebañña do ammọ ikpọọñ. Do Yisọs amaakpəhọ idem uduod ke iso ammọ. 3Afọñidem amọ akediyama mreñ-mreñ, ayama afia akan naña awo ndomokeed akpekekan anam anye afia. 4Do Edaiya ye Moses emaewuọ efonno, edi editañ ikọ ye Yisọs.
5Bita amaabo Yisọs ate, “Andikpeeb, afọn ñnyịn adiba mi. Yak ñnyịn ibọp atayad ita, keed unie fiin, keed anie Moses, keed anie Edaiya.” 6(Anye ikidiọọñọke se anye akpetañ, sia ndịk amaamʌm ammọ.)
7Ndin ntọñanyọñ amaawuọ adifʌk ammọ, uyo anyʌñ ato ke ntọñanyọñ ami ate, “Ami ado Ayịn mmi, a-ami mmaaha. Ikop uyo amọ.”
8Ke ndondo ado, ammọ etikanna anyen iseed, ikikịtte ndomo awo keed ama, ibọhọke Yisọs.
9Idaha ammọ esọiyọke ke abod ado, Yisọs adʌt ammọ utọñ ate ammọ ikiitañ enọ awo ndomokeed se ekekịt tutu Ayịn Awo aset ke ñkpa. 10Ammọ emaemʌm ñkpọ ami ekama ke atu idem ammọ. Ukweeñe ñkpọ se ammọ ekeneme ke atu ammọ akedo se “adised ke ñkpa” awuọọñọ.
11Ammọ emaebịp anye ete, “Ntak a-mme akpeeb ibed ebooho ke ana Edaiya ato adi-e?”
12Yisọs amaabọọrọ ate, “ke aditʌm ntañ, Edaiya adidi, anyʌñ adineeñe afịd ñkpọ abon. Ntak eewette ndin ebo ke Ayịn Awo anaabọ akpọsọñ ufen, enyʌñ ekañ anye? 13Ado ami ntañ inọ ndufo, Edaiya adidi, ndin ammọ enam anye afịd ñkpọ se ammọ ekeduak ukem naña ekewet ebaña anye.”
Yisọs akọk etəkayịn a-akenieeghe ndedeghe sịbidịd
14Ke ammọ emaekeedisoobo ye mbed mbon ako, ammọ emaekịt nte atu awo ekanna ammọ ekʌk ye mme andikpeeb ibed esʌk efaaña mfaaña ye ammọ. 15Ke ndo-ndo ado mme awo ekekịt Yisọs, idem amaakpa ammọ eti-eti, ndin ammọ efeeñe ekekọọm anye.
16Anye amaabịp ammọ ate, “Nso-o ke ndufo efaaña ye ammọ ebaña?”
17Awo keed ke atu ami amaabọọrọ ate, “Andikpeeb, ñkedat ayịn mmi a-ndedeghe sịbidịd mmiiyakka atañ ikọ ndi. 18Amaadịppe anye, aseetop anye aduọk ke isọñ. Efụụd awuọọñọ anye ke inua, anye ata eded, ndin idem amọ akappa asọọñ, anen. Mmaabo mbed mfo ebịn ndedeghe sịbidịd ami esio, ado ammọ ikikanna.”
19Yisọs abọọrọ ate, “O emana unana mbuọdidem. Ami ndiiba ye ndufo ñkpeene die? Ndiiyọ ndufo nọ akpeene die? Ben ayịn ado nsọk.”
20Ammọ emaeben ayịn ami esọk anye. Ke ini sịbidịd ami akịtte Yisọs, amaanam ndukpi adịppe ayịn ami. Anye aduọ ke isọñ, amiañña, efuud anyʌñ awuọọñọ anye ke inua.
21Yisọs amaabịp ete ayịn ami ate, “Akpeene die ayịn ami akeaba ntom?”
Ete ayịn ami amaabọọrọ ate, “Tọọñọ ke uyịn.” 22Amaadịppe, aseetop anye asịn ke ikañ ye mmọọñ adiwot anye. Akpekan, itua ñnyịn mbọm nyʌñ inyaaña ñnyịn.
23Yisọs abo anye ate, “Awuọọñọ die afo adibo ‘akpekan?’ Afịd ñkpọ akeme itịppe nnọ awo a-anịmme ke akpanikọ.”
24Ke ndo-ndo ado, ete ayịn ami amaatañ anwa-anwa ate, “Mmenịm ke akpanikọ. Ñnwam miin nọ ñkan unana mbuọdidem mmi!”
25Ke ini Yisọs akịtte ke atu awo efeeñe edi adise se itịppe, anye amaawuuk ndedeghe sịbidịd ate, “Afo sịbidịd inan ye imuum, Ami mmuwuuk fiin, awuọ ke idem ayịn ami, kuunyʌñ utịmme udʌk ayịn ami idem aba.”
26Idiọọk sịbidịd ami amaabọọñ ñkpo, atop ayịn ami atọ ke isọñ, anyʌñ awuọ. Ayịn ami akappa aba nte awo ñkpa, anam uwak awo ekebo ete, “Anye akpa.” 27Ado Yisọs amʌm anye ke ubọk anyʌñ adịppe anye, ndin anye adakka ada.
28Ke Yisọs amaakedʌk esịd ufọk, mbed amọ emaebịp anye ke ndibbe ete, “Nso-o ikiido ntak a-ñnyịn mmiikikanna ibịn ndedeghe sịbidịd ami isio-o?”
29Yisọs amaabọọrọ ate, “Utọ anye ami edat akam ye utreudia esio.”
Yisọs abemiso atan abaña ñkpa amọ ayọhọ ñkañ iba
30Ammọ emaekpọñ do enyʌñ esaña eboiyo ke Kadidi. Yisọs ikiyakka ndomo awo keed adiọọñọ nte ammọ eba, sia anye akekpeeb mme mbed amọ ñkpọ. 31Anye amaabo ammọ ate, “Eyaetap Ayịn Awo enọ mme awo. Ammọ eyaewot anye, ndin ke usen ita amaaboiyo, anye ayaaset.” 32Ado ikinwañake ammọ se anye aketañ, kpa ye ado ammọ emaekop ndịk adibịp anye.
33Ammọ emaedidʌk Kapanọm. Ke ini anye abaaha ke esịd ufọk, anye amaabịp ammọ ate, “Nse mfaaña ke ndufo ekefaaña ke idaha isañake ke usʌñ?” 34Ammọ emaedodo sia ammọ ekefaaña ebaña me anie ke atu ammọ ido andikpon ñkan.
35Yisọs amaasuuk atie akood mbed amọ duop ye iba ate, “Awo a-ayemme adido akpa ana akappa ado akpatre ye ayịnufọk afịd awo.”
36Anye amaaben etəkayịn asịn ke ufọọd ammọ. Anye amaaben ayịn ado akama ke ubọk, abo ammọ ate, 37“Awo ake adodo a-adaarake etəkayịn ntom ke anyịñ mmi andaara miin; nko awo ake adodo andaarake miin, idooho ami ke anye adaara, ado adaara andiikiindọñ miin.”
Awo a-ammiinwanake ye ñnyịn ado ake ñnyịn
38Yọọn amaabo Yisọs ate: “Andikpeeb, ñnyịn imaikịt awo nte abịn idiọọk sịbidịd asio ke anyịñ mfo, ndin ñnyịn imaikpan anye sia anye idooho keed ke atu ñnyịn.”
39Yisọs amaabo ate, “Kuukpan anye. Koro ibaaha awo a-anamma utịbe ñkpọ ke anyịñ mmi a-akemeke ke etək ini, aditañ idiọọk ñkpọ imbaña miin. 40Sia awo a-mmiinwanake ye ñnyịn ada ye ñnyịn. 41Ke akpanikọ ke ntañ ami inọ ndufo, awo ake adodo i-inọọhọ ndufo kọọb mmọọñ keed ke anyịñ mmi, sia ndufo edoñño ake Mesaya, ikemeke-keme iduọọk utịp amọ.”
Adinam awo aduọ
42 “Awo akpenam keed ke atu mme ntəkayịn ami a-annịmme miin ke akpanikọ adue, akpaafọn ekpekọọñ anye ekamba itiad ke itọñ enyʌñ etop anye esịn ke inyañ. 43Adieke ubọk udom mfo akpenam nọ adue, kpịkke duọọk. Afọn afo adinie nsi-nsi uwem ye ubọk keed akan afo adikama ubọk mfo iba ndʌk nsi-nsi nsobo, itie i-ikañ mmiinịmeke ke nsi-nsi, 44itie
“ ‘u-utʌñ a-ataaha ammọ mmiikpaññake,
ikañ ñko mmiinịmeke.’
45 Ñko, adieke ukod mfo keed akpenam nọ afo anam idiọọk ñkpọ, kpịkke anye sio. Afọn afo adinie uwem ye ukod keed akan akpesañake ñkpad iba adʌk nsi-nsi ikañ, 46itie
“ ‘u-utʌñ a-ataaha ammọ mmiikpaññake,
ikañ ñko mmiinịmeke.’
47 Nko, adieke anyen mfo akpenam nọ afo anam idiọọkñkpọ, kappa anye sio. Sia afọn afo adidʌk abio ubọọñ Abasi ye anyen keed akan afo adisaña ye anyen iba ñkedʌk nsi-nsi ikañ, 48itie
“ ‘u-utʌñ a-ataaha ammọ mmiidikpaññake,
ndin ikañ ñko inịmeke.’
49 Eyaefọp afịd awo ke ikañ nọ ekappa eba nte inʌñ.
50 “Inʌñ afọn, ado adieke anye mmiinieeghe inem aba, afo akeme die adinam nọ anye amaana anem? Inie inem ke idem ndufo, inyʌñ iba ke emem ye keed aken.”
Currently Selected:
Maak 9: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
