Maak 8
8
Yisọs anọ awo tọsịn inaañ ndidia
1Ke ini ado atutu awo mfen emaediboho. Sia ammọ mmiikinieeghe se edia, Yisọs amaakood mme mbed amọ adat anyʌñ abo ate, 2“Mbon ami ennie miin udʌk; ammọ e-baba ye ami ke usen ita ado ñkpọ ibaaha se edia. 3Ñkpenọ ammọ enyọñọ ye mbiọñ, ammọ eyaesʌkkọ ke usʌñ, sia ubaak ammọ eto anyanusʌñ edi.”
4Mme mbed amọ emaebọọrọ anye ete, “Mmọ-ọ ke esịd idʌñ ami ke awo akeme adinie uyo adiyʌkkọ ammọ?”
5Yisọs amaabịp ate, “Eboho uyo ifañ ke ndufo enie?”
Ammọ ebọọrọ ete “Itiaba.”
6Anye amaabo atu awo ate esuuk etie ke isọñ. Ke anye amaakeben eboho uyo itiaba ami anyʌñ anọ ekọọm, anye amaabʌñ ammọ anyʌñ ayaak anọ mme mbed amọ ate edeeme enọ mme atutu awo ado, ammọ emaenyʌñ ntodo. 7Ammọ emaenie ntək iyak ifañ ñko; anye amaanyʌñ anọ ekọọm ndin abo yak mme mbed edeeme enọ mme atu awo ami. 8Mme atu awo ami emaeta enyʌñ eyʌkkọ. Ekema mme mbed emaetañ mbeñe a-akeyọhọke asʌhọ ayọhọ akpasa itiaba. 9Ñkpọ nte ideen tọsịn inaañ ekeba do. Ke ini anye amaakenọ ammọ enyọñọ, 10anye ye mbed amọ emaedʌk ubom eka ñkanñkʌk idʌñ ekoodo Daamanuta.
11Mme Farisi emaedi enyʌñ etọọñọ adibịp Yisọs mbịme. Ke adidomo anye, ammọ emaebịp anye idiọọñọ a-atooho ke hefịn. 12Anye amaanekke asiama anyʌñ abo ate, “Ntak emana ami ayemme idiọọñọ utịbe ñkpọ-ọ? Ami ntañ ami ke akpanikọ inọ ndufo mbo, ke awo idiinọọhọ idiọọñọ ndomokeed.” 13Ndin anye adakka akpọñ ammọ, atịmme akedʌk ubom akaaña ada ke edem uko.
Yis mme Farisi ye ake Herọd
14Mme mbed emaefre adidat uyo ibọhọke eboho uyo keed a-akesịneke ke ubom. 15Yisọs amaadʌt ammọ utọñ ate, “Itʌm ikpeme yis a-adooho ake mme Farisi ye ake Herọd.”
16Mme mbed emaeneme ñkpọ ami ke idem ammọ ebo, “Ato ntak a-ñnyịn mmiinieeghe uyo.”
17Sia anye amaakediọọñọ se ammọ eketaña, Yisọs amaabịp ammọ ate, “Ntak a-ndufo etañña ebaña unana uyo-o? Tutu ami ndufo ikịtte usʌñ, ñkpọ inyʌññọ iñwaña ndufo? Esịd ndufo adodo usiọọñ? 18Ndufo emenie anyen ado ikanna ikịt ñkpọ, utọñ ado ikanna ikop ikọ? Ndufo itoiyoke? 19Ke ini ñkebʌñọ eboho uyo ition nnọ awo tọsịn ition, mbeñe a-ndufo eketañña ekeyọhọ akpasa ifañ?”
Ammọ ebọọrọ ete, “Duop ye iba.”
20 “Ke ini ñkebʌñọ eboho itiaba nnọ tọsịn inaañ, mbeñe a-ndufo eketaña ekedo akpasa ifañ?”
Ammọ emaebọọrọ ete, “Itiaba?”
21Anye abo ammọ “Isʌkkọ inwanwaña ndufo ndin?”
Yisọs akọk awo nnan ke Bedsaida
22Ammọ emaedisịm Bedsaida, mme awo emaeben nnan edikpeiye Yisọs ete atuuk anye. 23Anye amaamʌm awo nnan ke ubọk, adat anye usʌñ asaña awuo akpọñ abio ado. Ke anye amaakefiad etab ke anyen awo nnan ami anyʌñ adot anye ubọk, Yisọs amaabịp anye ate, “Amekịt ñkpọ?”
24Awo ami amaadịppe anyen ase anyọñ, abọọrọ, “Mmekịt mme awo, ammọ etie nte eto esaaña.”
25Yisọs amaamaana adat ubọk atuuk anyen awo ado. Ndin anyen amọ amaatara, anye anyʌñ akịt ñkpọ mfọn-mfọn. 26Yisọs amaanam anye anyọñ ufọk anyʌñ abo, “Kuutịmme unyọñ esịd idʌñ.”
Bita atañ ke Yisọs ado Mesaya
27Yisọs ye mbed ammọ emaekaa mme abio ebaññake ke Siseria Fidibai. Ke usʌñ ammọ ekeesañake anye amaabịp ammọ ate, “Mme awo ebo ke ami ndo anie?”
28Ammọ ebọọrọ, “Ubaak ebo, Yọọn Aduọkmmọọñ; mbon mfen ete Edaiya; ado ndusʌk mfen ebo keed ke atu mme brọfed.”
29Anye amaabịp ammọ. “Ado ndufo-o? Ebo ke ami ndo anie?”
Bita abọọrọ: “Afo ado Mesaya.”
30Yisọs amaakpan ammọ keetañ enọ awo ndomokeed ibaña imọ.
Yisọs abemiso atañ abaña ñkpa amọ
31Ndin anye amaatọọñọ adikpeeb ammọ mbo ke Ayịn Awo anaabọ nsio-nsio ufen ke ubọk mme ñkpisọñ, mme ikpọ aku ye mme andikpeeb ibed, eyaesin anye nkoko eyaewot anye, ndin usen ita amaaboiyo anye ayaaset ke ñkpa. 32Anye amaatañ añwa-añwa abaña ñkpa ami ndin Bita amaaben anye asanna ada anyʌñ atọọñọ adikpaaña nnọ anye.
33Ado ke ini Yisọs amaakekanna ise mbed amọ, anye aduad Bita ate, “Kanna nda miin ke edem, Setan! Afo unieeghe akikere ubaña ñkpọ Abasi, ado akere abaña ñkpọ isọñ.”
Usʌñ ake krọs
34Ndin anye amaakood atu awo ye mbed amọ adat anyʌñ abo ammọ ate, “Awo abooho iñkeene miin ana anye akañ idem anyʌñ aben krọs amọ añkeene miin. 35Sia awo a-ayemme adinyaaña uwem amọ ayaaduọọk anye, ado awo a-aduọọkkọ uwem amọ ke ntak mmi ye ntak eti etob ayaamʌm uwem amọ akama. 36Nso-o ufọn ke awo adinie, adieke anye adiaaha afịd ukpọ abod ado aduọk ukpọñ amọ? 37Me nso-o ke awo adidat ikpʌgho ye ukpọñ amọ? 38Awo a-akoppo abuud ambaña miin ye ikọ mmi ke ayo emana efịbe ye idiọọkñkpọ ami, Ayịn Awo ayaakop abuud abaña anye naña anye adidi ke ubọọñ Ete ye mme ndisana enyere.”
Currently Selected:
Maak 8: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
