Maak 7
7
Se isappa awo
1Akem mme Farisi ye usʌk mme akpeeb ibed e-eketooho Yerusedem edi emaadibono ekaana Yisọs, 2emaenyʌñ ekịt naña usʌk mbed amọ edia ndidia ye mbaad ubọk, ado ado, ubọk a-awo mmiikiyeeghe. 3(Ke mbed mme Yuu ye mme Farisi, ido idʌñ ammọ akedo ke ana awo ayie ubọk mbemiso adia ñkpọ. 4Ñko, awo a-anyọñọ udua, anaayie ubọk mmiidooho ntodo inaaha adia ñkpọ. Ammọ emaenieeñe umiañ ido mfen nte uyed kọọb mmọọñ, ako utem ñkpọ, usan afere ye aketịd utem mmọọñ.)
5Ndin mme Farisi ye mme akpeeb ibed ami ekebịp Yisọs, “Ntak mbed mfo mmiiduho uwem ikeene ndutʌm ikpaisọñ mme eteete ammọ ke aditre adidia ñkpọ ye mbaad ubọk?”
6Yisọs abọọrọ ate, “Aisaya amaanen ke anye akeataaña atañ brọfesi abaña ndufo mbon ndubịk; nte ewette ebo ete:
“ ‘Mbon ami eñkpono miin ke ñkpọkinua,
ado esịd ammọ amaañkpọñ miin anyọọñ usʌñ.
7 Ammọ eñkpono miin ke ikpu-ikpu usʌñ,
ekeene ibed awo ke ukpeebñkpọ ammọ.’
8 Ndufo emeesaana ibed Abasi eyak, enyʌñ esọọñọ emʌm ndutʌm ake ubọkawo ekama.”
9Anye amaaka iso adọkkọ ammọ ate, “Ndufo emekama ñkara ekpọñ item Abasi, ma enie ufañ etʌmmọ edu unam ñkpọ ndufo! 10Moses ke ibed akebo, ‘Kpono usọ ye uka’; nko ‘awo akeedodo asụụñọke ete ye eka amọ ana ewot anye.’ 11Ado ndufo ekedi, adibo ke awo akpebo ete ye eka amọ ke se ikpikidat ifọn ndufo mfọn ado Kọọban (adooho, asaña-asaña enọ a-anieeghe Abasi). 12Ke usʌñ ami ndufo iyakka ayịn anam ñkpọ ndomokeed anọ ete ye eka aba. 13Ntom ke ndufo eben ikọ Abasi eto ndọk, ekeene edu unam ñkpọ a-ndufo enọọhọ, ndin ndufo emenyʌñ enam umiañ ñkpọ akaaha ke utọ usʌñ ntom.”
14Ndin Yisọs amaatịmme akood atu awo abono, atañ ye ammọ ate, “Afịd ndufo ikpañ utọñ innọ miin inyʌñ inekke idiọọñọ ntom. 15Ñkpọ ndomokeed atooho adidʌk awo idem ikemeke isappa awo. Ado ñkpọ atoohoto awo idem awuọ, anye ado asappa awo. 16Awo ake anie utọñ adikop, yak anye akop.”
17Ke anye amaakekpọñ atu awo adʌk ufọk, mme mbed amọ emaebịp anye se ñke ado awuọọñọ. 18Ndin anye amaabịp ammọ ate, “Nte ndufo enana ifiọk ntom? Ndufo idiọọñọke ke se ito idʌk awo idem ikemeke isappa awo? 19Sia ñkpọ ado mmiidʌkkọ anye esịd, adʌk idịb kpọd, ndin awuọ anye ke idem.” (Anye aketañ ami adinam ammọ ediọọñọ ke afịd se awo adia ibaaha ake adiọọk.)
20Anye amaasʌk akaiso akedọkkọ ammọ ate: “Se ito awo esịd idem iwuọ ado se isappa awo. 21Sia afịd mme ndiọi akikere eto esịd awo ewuọọñọ; nte use, inọ, uwod awo, 22usịn efịbe, udọrọ itọñ, idiọọkesịd, abiaaña, ndukpo ido, ufịp, ubiad awo anyịñ, ntañidem ye ndisịme. 23Afịd ndiọiñkpọ ami eto esịd awo ewuọọñọ enyʌñ esappa awo.”
Yisọs akpono mbuọdidem awonwaan Sirofonisia
24Yisọs amaato do aka nkpere abio Taya ye Sidọn. Anye amaaboiyo adʌk ufọk keed, ikiiyeme awo ndomokeed adiọọñọ; ado anye ikikanna idịbe. 25Awonwaan keed i-idiọọk sịbidịd akesịneke ke idem ayịn amọ awonwaan akesʌk akookop ke Yisọs mmọọ aba, anye amaadi aditọọñọ edọñ ke ukod amọ. 26Mma ado akedo awo Krik, a-akemanake ke Siria Fonisia. Anye akpeiye Yisọs ate abịn dimọn asio ke idem ayịn imọ.
27Yisọs ate mma ami, “Yak nọ nditọ eto edia ñkpọ nọ eyuuñọ, sia ifọnnọ adiben ndidia nditọ ntop nnọ ewa.”
28Awonwaan ami amaabọọrọ anye, “Abọọñ, adot, sia mme ewa ke idak akpokoro esitañ mbeñe ndidia nditọ se iduọ ke isọñ edia.”
29Yisọs ate anye, “Ato ke ntak ibọọrọ mfo ado, nyọñ ufọk, ke dimọn awuọ ayịn mfo ke idem.”
30Awonwaan ado amaadakka anyọñ ufọk, akekịt ayịn amọ naña ana ke ikʌk anyʌñ akịt ke dimọn amaawuọ akpọñ anye.
Yisọs akọk awo inan ye imuum
31Akem Yisọs amaadakka akpọñ ñkpere Taya, asana Sidọn, aboiyo akewuọ mben inyañ Kadidi, ke ufọọd adaña Dekapodis. 32Mme awo emaeben ete keed a-akedooho inan, atịmme ado imuum esọk anye, ekekpeiye anye ebo adot anye ubọk ke idem.
33Ke anye amaasịkke adakka akpọñ atu awo ado, Yisọs amasịn awo imuum ami nnuun ubọk ke utọñ. Ndin anye akọkkọ etap atʌk anye ke edeme. 34Anye amaabenne anyen ase hefịn, atuak mmịm, ndin ate, “Ephphatta!” (awuọọñọke “Sịtte!”). 35Idahaado, utọñ awo ado amaasịtte, udʌk edeme akịppe, ndin awo ado atañ ikọ mfọn-mfọn.
36Yisọs amaadʌt ammọ utọñ ate keetañ enọ ndomo awo keed. Ado naña anye akpakpan, naña ammọ ekeekaiso esuan mbʌk ami. 37Sia idem amaakpa ammọ eti-eti ke utọ ñkpọ ado, afịd ammọ edian uyo keed ete, “Anye anekke anam afịd ñkpọ ọfọn ama, anye anam inan akop ikọ, imuum enyʌñ etañ ikọ.”
Currently Selected:
Maak 7: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
