Maak 10
10
Uwuọọñọ ndọ
1Adikem Yisọs amaakpọñ itie ado aka ñkanñkʌk abio Yudia, akedʌk ubom aboiyo inyañ Yọdan. Uwak mme atu awo emaemaana ekịppe ekeene anye, nko, naña ido amọ akesido, anye amaakpeeb ammọ ñkpọ.
2Mme Farisi, e-ekeyemme usʌñ naña emʌm anye ke ndudue, edibịp anye ete, “Anen awo adisio anwaan amọ ndọ?”
3Ndin anye amaabọọrọ ammọ ye mbịme ate, “Nso-o ke Moses akitemme ndufo?”
4Ammọ ete anye, “Moses amaanyịmme abo ewet ñwed uwuọndo, ndin ebe asịn anwaan amọ.”
5Yisọs amaabo ammọ ate, “Moses akeawet ibed ami inọ ndufo ato isọñesịd ndufo. 6Ado tọọñọ ke ntọọñọ ederimbod a-Abasi akebot ammọ ‘awodeen ye awonwaan.’ 7‘Ato ntak ado, awodeen ayaakpọñ ete ye eka amọ akediana ye anwaan amọ, 8ndin ammọ awo iba eyaekappa edo abʌk keed.’ Ke ntodo ammọ idooho aba awo iba, ado edo abʌk keed. 9Do ndin, se Abasi amaakedian, yak awo akụụdianna.”
10Ke ammọ emaekekewuọ ufọk, mme mbed amọ emaemaana ebịp anye ebaña ikọ ndọ ami. 11Anye amaanyʌñ abọọrọ ammọ ate, “Awo ake adodo a-adiaññake anwaan amọ ndọ anyʌñ akedọ anwaan mfen, asịn efịbe, ye anye. 12Ñko, awonwaan a-asịnne ebe amọ anyʌñ akedọ awodeen mfen, asịn efịbe.”
Ntək nditọ ye Yisọs
13Mme awo ekeekoono ntəkayịn esʌk Yisọs ebo yak anye adot ammọ ubọk, ado mme mbed Yisọs emaebiiñe ammọ. 14Yisọs akekịt ami, anye amaayat esịd anyʌñ adọkkọ mbed amọ ate, “Yak ntəkayịn eñkeene miin; ikiikpan ammọ, sia abio ubọọñ Abasi anie utọ ammọ. 15Ke akpanikọ ke ntañ inọ ndufo, awo akeedodo a-mmiidiibọọhọ abio ubọọñ Abasi nte etəkayịn, idiikanna idʌk do.” 16Ndin anye amaakoono nditọ ado akama ke ubọk, adot ammọ ubọk anyʌñ adiọñ ammọ.
Mbon inie ye abio ubọọñ Abasi
17Daña Yisọs amaaketọọñọ isañ amọ, awodeen keed amaafeghe abịne anye anyʌñ akeduọ atọọñ edọñ ke iso amọ. Anye amaabịp Yisọs ate, “Eti andikpeeb, nso-o ke ndiinam nọ nnie nsi-nsi uwem?”
18Yisọs amaawọññọ abịp anye ate, “Nso-o ido nọ añkood miin eti? Eti awo ibaaha, ibọhọke Abasi ikpọọñ. 19Afo amediọọñọ mme ibed: ‘Kuuwot awo, kuusịn efịbe, kuuyịp inọ, kuutie ntiense nsu, kuutʌk awo, kpono usọ ye uka.’ ”
20Awo ado ate Yisọs, “Andikpeeb, mmenịm afịd ibed ami tọọñọ ke uyịn mmi.”
21Do ke Yisọs akewuuk anyen ase anye anyʌñ ama anye, ndin abo anye, “Ñkpọ keed asʌghọ afo adinam. Kaa kenyam afịd se afo anie nyʌñ kpọñ nọ uweene, ke ntom afo ayaanie akpan inie ke abio Abasi. Ndin di, disaña ye ami.”
22Iso amaafiakka ete ami ke akoppo se Yisọs atañ, anam anye amaanyọñ ye mfʌhọ sia anye akedo ata imọ awo.
23Akem Yisọs awọññọ anyen ate mme mbed ammọ, “Anekke asọñ eti-eti mbon inie adidʌk abio ubọọñ Abasi.”
24Ikọ ami amaayịk mme mbed idem. Ado Yisọs amaana atañ nọ añwaña ammọ ate, “Nditọ, anekke asọñ eti-eti adidʌk ke abio ubọọñ Abasi. 25Ado mmem-mmem ñkpọ enañ mbiomo adiboiyo ke adu abiaween akan awo inie adidʌk ke abio ubọọñ Abasi.”
26Ikọ ami amaanam idem adiọdiọñ akpa mme mbed, tutu ammọ ete anye, “Anie awo adikan ibọkkọ ndin?”
27Yisọs amaawuuk anyen ase ammọ anyʌñ abo ate, “Se awo miikanna inam, Abasi akan adinam sia Abasi akan adinam afịd ñkpọ.”
28Ndin Bita asịo uyo ate anye, “Nnyịn imikpọñ afịd ñkpọ ukeene fiin.”
29Yisọs amaabọọrọ enye: “Ntañ akpanikọ inọ ndufo, ibaaha ndomo awo keed a-akpọññọ ufọk me nditọeka ideen me nditọeka ibaan me eka me ete me nditọ me inwañ ke ntak mmi ye ukwọrọ eti etob 30a-mmiidiibọọhọ utịb akañ ikie uwak-uwak ke emana ami: mme ufọk, nditọeka ideen, nditọeka ibaan, eka, nditọ ye mme isọñ, adiana ye ukọbọ–amaana anie nsi-nsi uwem ke ini iso. 31Ado uwak mme aboiyo iso eyaekappa ekpe edem, ndin mme akpe edem eyaekappa eboiyo iso.”
Yisọs amaana abemiso atañ ayọhọ akan ita abaña ñkpa amọ
32Akem ammọ etọọñọ isañ eka Yerusedem. Yisọs aboiyo iso, mbed esaña ke edem ke ata ñkpaidem ye ndịk ekeene anye. Anye adiañña mbed duob ye iba, asanna ada, atọọñọ adineme ye ammọ mme ñkpọ mme ñkpọ se idiitịppe inọ anye, ate, 33“Ñnyịn ibidọọk ika Yerusedem, do eyaeyaak Ayịn Awo esịn ke ubọk mme ikpọ aku ye mme akpeeb ibed. Ammọ eyaebiom anye ikpe ete ewot anye, eyaenyʌñ eyaak anye enọ mme Yentaid, 34e-edidọọñ anye ndọk, etọọñ anye etab, emia anye enyʌñ emʌm anye ewot. Usen ita amaaboyo anye ayaaset ke ñkpa.”
Ebeeñe Yemsi ye Yọọn
35Ndin Yemsi ye Yọọn, nditọ Sebidi emaedi ebịne anye, ekebo ete, “Andikpeeb, ñnyịn iyem afo anam inọ ñnyịn se adodo a-ñnyịn ibooho ubeeñe fiin.”
36Anye amaabịp ammọ “Nso ke eyem ami nnam inọ ndufo?”
37Ammọ emaebo anye ete, “Nam nọ awo ñnyịn keed atie ke ubọk udom mfo, keed ke ubọk ufiin ke abio ubọọñ mfo.”
38Yisọs amaabọọrọ ammọ ate, “Ndufo idiọọñọke se ebeeñe ado. Me ndufo ekpaekan enwọñ kọọb ufen a-ami ndiinwọñ, me adibọ utọ uduọkmmọọñ a-ami ndiibọ?”
39Ammọ ebọọrọ ete: “Ñnyịn ikpaikan.”
Ndin Yisọs amaabo ammọ, “Eyaeñwọñ kọọb a-ami ndiinwọñ, enyʌñ ebọ uduọkmmọọñ a-ami ndiibọ, 40ado amaado aditie ke ubọk udom mmi, me ke ufiin, ado isịneke ke adudu mmi adinam. Mme itie ami enaenọ mbon ado e-kebeeñeke mme itie ado anịm anọ.”
41Ke mme mbed duob ako emaekeakop ado, ammọ emaeyat esịd ebaña Yemsi ye Yọọn. 42Ke ntak ado Yisọs amaakood ammọ abək anyʌñ abo ammọ ate, “Akpena ndufo ediọọñọ ke mbon edooho mme andikara mme Yentaid enie ayọhọ adudu ke idem ammọ, ndin mme adaha ukara enyʌñ ebre adudu ye ammọ. 43Idooho ntodo ye ndufo. Utuu ke ado, awo ake ayem adikpon ke atu ndufo ana ado ayịnufọk ndufo. 44Awo ake ayem ido aboiyo iso ke atu ndufo ana adʌk afʌn anọ afịd ndufo. 45Sia Ayịn Awo ke idem amọ ikidiighe ibo edinam ñkpọ enọ anye, akedi ma adinam ñkpọ anọ awo, anyʌñ adiyaak uwem amọ nte nkpọufak nnọ mme awo.”
Baatimus awo nnan akịt ñkpọ
46Akekem ammọ emaedi Yeriko. Nte Yisọs ye mbed amọ ye uwak atu awo ekekpọññọ abio ado, Baatimus (adooho “ayịn Timus”), a-akedooho nnan, akeatie do ke mben usʌñ abeeñe ebeeñe. 47Ke ini anye akeakoppo ke akedo Yisọs awo Nasared, anye amatọọñọ adibọọñ ñkpo ate, “Yisọs, Ayịn Defid, ntua miin mbọm!”
48Uwak awo emaekpan anye, ete anye akʌp inua, ado anye anee-nekke abọọñ, “Ayịn Defid, ntua miin mbọm!”
49Yisọs amaasọñ ada anyʌñ abo ate, “Kood anye.”
Ndin ammọ emaekood awo nnan ami enyʌñ ebo anye ete, “Sọñ idem! Dakka da! Anye asʌk ukood.” 50Ke aditop afọñ atueb amọ nduọk, anye atamma, ada ke ukod anyʌñ abịne Yisọs.
51Yisọs abịp anye ate, “Nso-o ke afo ayem ami nnam unọ fiin?”
Awo nnan amaabo ate, “Andikpeeb, ñyem ikịt usʌñ.”
52Yisọs amaabo anye ate, “Kaa, mbuọdidem mfo ukọk fiin udọñọ.” Ke ndo-ndo ado anye amaakịt usʌñ anyʌñ akeene asañña ye Yisọs ke usʌñ.
Currently Selected:
Maak 10: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
