Yọọn 20
20
Ukpọk udi
1Ke akpa usen ke udua ke ini ayo miikiñwañake, Mmeri Makdadin amaadika udi, anyʌñ akekịt ke emaenək itiad ewọññọ esio ke inua udi. 2Anye amaafeghe abịne Saimọn Bita ye mbed keed, anye a-Yisọs akemaaha akebo ate, “Ammọ esio Abọọñ ke udi, ñnyịn idiọọñọke nte eben anye ekenịm.”
3Do ke Bita ye mbed anye ako edaaña ekaiya udi adise. 4Ammọ awo iba ekefeefeeñe eka, ado mbed anye ako amaasọp itọk akan Bita anyʌñ ato akeawuọ udi. 5Anye amaanʌhọ ase esịd udi anyʌñ akịt dinen afọñ nte ana ke isọñ, ado ikidʌkkọ esịd udi. 6Ndin Saimọn Bita a-akekeeneke ke edem amaakedisịm, amasọiyọ ini keed adʌk esịd udi. Anye amaakịt ubaak afọñ dinen a-akenaaha do, 7ye afọñ udi e-ekedatta ewañ Yisọs ke iwuod. Afọñ ami akena isio, nsan-nsan akpọñ dinen. 8Ke akpatre, mbed a-akebemme iso akewuọ amaanyʌñ adʌk esịd udi. Anye amaakịt anyʌñ anịm ke akpanikọ. 9(Sia ikitʌmmọ iñwaña ammọ se ñwed Abasi aketañ abo ke Yisọs ayaaset ke ñkpa.) 10Ndin mme mbed ado emaenyọñọ eka nte ammọ ekebañña.
Yisọs awọd Mmeri Makdadin idem
11Ado Mmeri Makdadin amaada ke mben udi atua. Ke ini anye asʌkkọ atua, anye amaanʌhọ ase esịd udi, 12anyʌñ akịt mme enyere iba nte esiine mfia afọñ ke idem etie ke itie e-ekenịmme akpo Yisọs keed, ke ukañ iwuod, keed ke ukañ ukod.
13Ammọ emaebịp anye ete, “Mma, nsinam afo atua?”
Anye amaabọọrọ, “Eben Abọọñ mmi esio. Ami ndiọọñọke nte ammọ eben anye ekenịm.” 14Anye aketañ ikọ ami ama, ke adikanna iso anye amaakịd Yisọs nte ada, ado anye ikidiọọñọ ke Yisọs ke ado.
15Anye amaabịp ate, “Awonwaan, ntak a-atuaaha? Anie awo ke afo ayem?”
Sia Mmeri Makdadin akekereke abo ke awo ado ado atọ inwañ, anye ate, “Ete, akpedo ameben anye asio tañ nnọ nte aben anye akenịm ndin ami ñyaakeben anye.”
16Yisọs abo anye, “Mmeri.”
Anye amaakanna iso ase anye, abọñ ke usem Arameik ate, “Raboni” (a-awuọọñọke “Andikpeeb”).
17Yisọs amaabo anye ate, “Kuuntuuk, sia ami ndọọhọ dion ñkeene Ete mmi. Ado bịne nditọeka mmi nyʌñ ke dọkkọ ammọ, ‘Ami ndọọk ke anyọñ ntịmme mbịne Ete mmi ye Ete ndufo, Abasi mmi ye Abasi ndufo.’ ”
18Mmeri Makdadin amaadakka abịne mme mbed ye mbʌk ami, akebo ammọ ate, “Mmekịt Abọọñ.” Anye amaatañ afịd ñkpọ se Yisọs akeneme ye anye anọ ammọ.
Yisọs awọt mme mbed amọ idem
19Ke ndubi ayo akpa usen ke udua ke ini mme mbed ebaaha itie keed ke ufọk, ammọ emaeyịt usʌñ ke ntak ndịk mme etubom mme Yuu, ndin Yisọs amaadʌk akeda ke ufọọd ammọ, ate, “Emem aba mme ndufo!” 20Ke amaaketañ ikọ ama, anye amaawọt ammọ ubọk mme ñkañ amọ. Mme mbed emaeyọhọ mme idaara ke ammọ adikịt Abọọñ.
21Yisọs amaamaana abo, “Emem aba mme ndufo! Nte Ete akendọññọ miin, ami mmidọñ ndufo.” 22Aketañ ami ama, anye amaanweek adudu aduọk ammọ anyʌñ abo, “Ibọ Adisana Sịbidịd. 23Mme idiọọkñkpọ awo a-ndufo efeene enọ, eyaefeen enọ ammọ; anye a-ndufo mmiifeene inọ, awo idiifeene inọ ammọ.”
Yisọs awọt Tọmọs idem
24Ado Tọmọs (esikoodo Didimọs), keed ke atu mme mbed duob ye iba, ikibaaha ye mbed mbon ñko naña Yisọs akedieeghe. 25Mme mbed mbon ñko emaeditañ enọ anye ate, “Ñnyịn imikịt Abọọñ ñnyịn.”
Ado anye ikinịmme, ndin anye abo ammọ, “Ibọhọke ami ñkịt mbọn akpuukuak ke ubọk amọ ñnyʌñ nsịn nnuun ubọk mmi ke itie mme akpuukuak ekewʌhọke ke ñkañ amọ, ami ndiinịmme.”
26Udua keed akeboiyo, afịd mme mbed emaekem ke esịd ufọk, Tọmọs ñko amaaba ye ammọ. Akpesʌk ado emaekeyịt usʌñ, Yisọs amaadʌk adida ke ufọọd ammọ abo, “Emem aba mme ndufo!” 27Ndin anye amaabo Tọmọs ate, “Sịn nnuun ubọk mfo mi; sese ubọk mmi. Nyan ubọk mfo sịn ke ñkañ mmi. Kuuyịk aba ado nịm ke akpanikọ.”
28Tọmọs amaabo anye, “Abọọñ mmi ye Abasi mmi.”
29Ndin Yisọs amaabo anye, “Sia ameñkịt miin, amenịm ke akpanikọ; edidiọñ anie mbon a-mmiikịtte ado enịm ke akpanikọ.”
Ntak eti etob Yọọn
30Yisọs amaanam uwak utịbe ñkpọ ye idiọọñọ mfen ke iso mme mbed amọ, a-awo mmiikanna iwet afịd ke ñwed ami. 31Ado ewet mbon mmi ma ndufo enịm ke akpanikọ ke Yisọs ado Mesaya, Ayịn Abasi, ndin ke adinịm ke akpanikọ ndufo enie uwem eto ke Anyịñ amọ.
Currently Selected:
Yọọn 20: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
