Yọọn 19
19
Ebiire adikọñ Yisọs ke krọs
1Baided amaaben Yisọs aka akenam emia anye. 2Mbon ekọñ emaedọk anyanya ñkukịm eyat anye ke iwuod. Emaesịn anye afọñ ubọọñ, 3emaana ebịne anye ke ini-ke ini ete, “Itọñ uwem asọñ adidem mme Yuu!” Ammọ emaenyʌñ esiak anye ufia ke mbañ.
4Ini keed mfen, Baided amaatịmme awuọ adibo mme Yuu ate, “Se, ami ñyaasaana anye ñyaak inọ ndufo, nọ ediọọñọ ke ami ñkịtte ndudue mbaña anye.” 5Yisọs amaakewuọ idi ye anyanya ñkukịm ye afọñ ubọọñ, Baided ate ammọ “Se ete ado mi!”
6Ado mme ikpọ aku ye mme nsaña ammọ ekekekịt anye, ammọ emaesio ñkpo ete, “Ikọñ anye ke krọs! Ikọñ anye ke krọs!”
Ado Baided amaabọọrọ ammọ, “Ndufo iben anye ika ikikọñ ke krọs. Amaado ami ñkịtte ndudue mbaña anye.”
7Mme Yuu emaeyiire ete, “Ñnyịn iminie ibed, ñko ke adikeene ibed ado, ana anye akpa sia anye abo ke imọ ido Ayịn Abasi.”
8Baided akekop ami, idem amaanekke anyeñ anye, 9ndin anye amaatịmme adʌk esịd akwere amọ akebịp Yisọs ate, “Afo ato uke?” Ado Yisọs ikibọọrọke anye. 10Baided ate anye, “Umbọọrọke miin? Udiọọñọke ke mmenie adudu adusaana ñyaak me aduwot ke eto krọs?”
11Yisọs ndin amaabọọrọ anye ate, “Afo ukpunieeghe adudu ndomokeed ke idem mmi akpedo ukubọọhọ adudu uto anyọñ. Ke ntak ado anye a-ambenne miin usọk fiin anam idiọọkñkpọ a-akponno akan.”
12Tọọñọ ke idahado, Baided amaayem usʌñ naña anye akpesaana Yisọs ayaak, ado mme etubom mme Yuu emaeka iso ebọọñ ke akpọsọñ uyo ebo, “Uma usaana awo ami uyaak, afo udooho ufan Sisa. Awo ake adodo akebo ke ido abọọñ anwana mme Sisa.”
13Baided akekop afịd ami, anye amaaben Yisọs awuọ aditie ke itie ubiire ikpe ekoodo Mbenesa Itiad (ke Arameik ekood Kabata). 14Usen ado akedo usen mbeeñeidem nnọ Basofa; akedo ñkpọ nte ñkanika duop ye iba uweeme.
Ndin Baided amaabo mme Yuu, “Se Abọọñ ndufo mi.”
15Ammọ emaebọọñ ete, “Iben anye ika! Iben anye ika! Kọñ anye ke krọs!”
Baided amaabịp ammọ ate, “Ebo ñwot adidem ndufo ke krọs?”
Mme ikpọ aku emaebọọrọ ete, “Ñnyịn inieeghe abọọñ mfen ke mmibọhọke Sisa.”
16Ke akpatre Baided amaasaana anye ayaak anọ ammọ ekewot ke eto krọs.
Adikọñ Yisọs ke krọs
Ndin mbon ekọñ emaeben Yisọs ewuọ. 17Yisọs amaabiom krọs amọ awuọ aka itie ñkpọkpọrọ (ke usem Arameik, ekood itie ado Kọọdkọta). 18Ke emaekewuọ itie ami, ammọ emaekọñ anye ye ideen iba mfen, Yisọs akesịne ke ufọọd ideen iba ami.
19Baided amaanam ewet idiọọñọ se edian ke krọs Yisọs. Ekewet ete:
Yisọs awo Nasared, Adidem mme Yuu.
20Umiañ mme Yuu emaekood se ekewet ado, sia itie ado e-ekewotto Yisọs amaakpere anwa abio. Ekewet idiọọñọ ado ke mme usem Arameik, Datịn ye Krik. 21Mme ikpọ aku emaebo Baided, “Kuuwet, ‘Adidem mme Yuu’ ado wet ke ete ami akebo ke imọ ido Adidem mme Yuu.”
22Baided amaabọọrọ ammọ ate, “Se mmaakewet, mmaawewet.”
23Mbon ekọñ e-ekekọññọ Yisọs ke eto krọs emaedat afọñidem amọ, esiak ke itie inaañ edat keed-e-keed, afọñ idakidem amọ kpọd akesʌghọ Yisọs ke idem. Afọñ idakidem ami akedo ifre keed tọọñọ ke anyọñ tutu asịm isọñ, ikinieeghe itie e-ekesiaaha akịm ke ñkañ.
24Ammọ emaebo ete, “Yak ke ñnyịn emọ-emọ iwaak afọñ anye ami. Yak isịn ukañ ise me anie ke adiinyọñ ikeene.”
Ñkpọ ami aketịppe nọ ikọ Abasi e-ekewette asu, ekebooho,
“Ammọ edeeme afọñ mmi ke atu ammọ.
Enyʌñ esịn ukañ ebaña afọñ idak-idem mmi.”
Se mbon ekọñ ekenam akeedodo.
25Eka Yisọs, ayịneka awonwaan eka amọ, Mmeri anwaan Kropas ye Mmeri Makdadin mmọekedudak ekpere krọs Yisọs. 26Yisọs akewọññọ anyen akịt eka amọ naña ada do ye mbed a-anye akenekkeke ama naña ada akpere, anye ate eka amọ, “Adima eka, se ayịn mfo do,” 27awọññọ inua abo mbed ado, “Se eka mfo do.” Tọọñọ ke idahado, ibed ado amaaben eka Yisọs anyọñ ufọk amọ akedʌñ mme anye.
Ñkpa Yisọs
28Ke amaakemaana ko, Yisọs amaakediọọñọ ke afịd ñkpọ akweeñe, anye ate, “Itọñ ansat,” nọ ato do ikọ Abasi e-ekewette asu. 29Atu ukọd fineka amaana akpere, ammọ emaenyiin kusa ke atu ukọd fineka ado edat edot ke ñkọk isọb eben eyeed Yisọs ke ñkpọkinua. 30Ke Yisọs amaaketʌm ukọd ado, anye amaabo, “Akweeñe.” Ke anye amaakebo ntodo, anye amaasuuk iwuod ke isọñ, ayak sịbidịd amọ.
31Idahado akedo ini Mbeeñeidem mbaña asaña-asaña usen Sabad, ayo amaasieere. Sia mme Etubom mme Yuu ikiyemme mme akpo ado ekọñọ tutu usen Sabad adisịm, ammọ emaebo Baided yak ebʌñ mbon e-ekekọññọ do ke krọs ukod, ekoono akpo ammọ esioño. 32Mbon ekọñ emaedibʌñ ukod akpa awo e-ekekọññọ ediana Yisọs ye ukod awo anye ako. 33Amọ ekediwuọ itie Yisọs, emaekịt ke anye amaakpakpa, ammọ ikikpaaha idem adibʌñ ukod amọ aba. 34Utu ke ado, awo ekọñ keed amaakịm Yisọs ñkañ ke eduad, iyiib mme mmọọñ emaetop ewuọọñọ. 35Awodeen akekịtte ñkpọ ami akenọ ikọ ntiense, ndin ikọ amọ ado akpanikọ. Anye adiọọñọ ke itañ akpanikọ, atañ ma afo ñko anyʌñ anịm ke akpanikọ. 36Mme ñkpọ ami aketịppe ma ikọ Abasi e-ekewette asu: “Akpọ amọ ndomokeed idiibʌññọke,” 37Ikọ Abasi mfen amaana abo, “Ammọ eyaeda ese anye a-ammọ ekekịmme.”
Adibuuk Yisọs
38Akekem koo, Yosef awo Arimatia adibo Baided akpọñ akpo Yisọs inọ. Yosef ami akedo mbed Yisọs, ado anye akedo ndịbe-ndịbe ibed sia anye akebaabaak etubom mme Yuu. Ke Baided amaakenọ unyịmme, anye amaadiben akpo Yisọs. 39Anye akesaña ye Nikodimọs, ete a-akenwọọnọ-nwọọn akekịt Yisọs ke akoneyo. Ndin Nikodimọs amaakama inem ufịk adan e-ekewuaaha mai ye adoi a-adoppoke ñkpọ nte baund ata ye duob ye ition. 40Ammọ awo iba emaedat mme inem ufịk adan ami efiọññọ Yisọs ke idem enyʌñ edat afọñ dinen ewañ anye naña ido ubuuk awo mme Yuu asiedo. 41Ke itie ekekọññọ Yisọs, inwañ amaaba akpere. Ke inwañ ado ufa udi keed amaaba adooho kpaanam awo ibʌhọke. 42Sia usen ado akedooho usen Mbeeñeidem mme Yuu, ñko sia udi ado amaakpere, ammọ emaebuuk Yisọs do.
Currently Selected:
Yọọn 19: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
