Yọọn 18
18
Emʌm Yisọs
1Ke anye amaakebọñ akam ama, Yisọs amaasaña mme mbed amọ aboiyo abedeñ Kidọn. Inwañ amaaba ke edem mbeñ uko, ndin anye ye mbed ammọ emaefrọ eka do.
2Yudas, a-aketappa anye anọ, amaadiọọñọ itie ado sia Yisọs amaasika itie ado ndin-ndin ye ammọ. 3Yudas amaasaña aka inwañ ado, adat mme udịm mbon ekọñ a-mme ikpọ aku ye mme Farisi ekenọọhọ anye, ekaama utuenikañ, mme ikañ emuum, ye mme ñkpọ anwan mfen edika itie ado.
4Sia Yisọs amaakediọọñọ afịd ñkpọ se ikibiitịppe inọ anye, anye amaasaña awuọ akebịp ammọ ate, “Anie ke ndufo eyem?”
5Ammọ ebọọrọ ete, “Yisọs, Ayịn Nasared.”
Yisọs amaabọọrọ ammọ ate, “Ami ndo anye.” (Yudas, andikitap anye mmọdo akeda ye ammọ.) 6Ke Yisọs amaakebo ammọ ate, “Ami ndo anye,” ammọ emaetiime edem-edem eduọññọ ke isọñ.
7Anye amaamaana abịp ammọ ayọhọ akañ iba ate, “Ndufo ebo ke iyem anie?”
Ammọ ete, “Yisọs, Ayịn Nasared.”
8Yisọs amaabọọrọ ammọ abo ate, “Mmaatatañ inọ ndufo ke ami ndo anye. Ndin akpedo enyem miin, iyaak mbon ami enyọñọ.” 9Anye aketañ ntom nọ ikọ brọfesi asu a-anye akebooho ate, “Ami ñkeduọọhọ ndomokeed ke atu se afo akennọ.”
10Mi ke Saimọn Bita akesio akañkañ akpi ayịnufọk akwa aku utọñ udom adiañña. (Anyịñ awo ado akedo Maakus.)
11Yisọs ate Bita, “Sịn afịd mfo ke efọk! Me inaaha nte ami ñnwọñ kọọb e-Ete mmi annọọhọ miin?”
12Ndin mbon ekọñ ye etubom ammọ, ye etubom mme Yuu emaemʌm Yisọs. Emaebọp anye ubọk 13enyʌñ eben anye eka ke iso Anas, ete anwaan Kaifas, a-akedooho akwa aku isua ado. 14Kaifas akedo awo a-akenọọhọ etubom mme Yuu item abo ke akpaafọn awo keed adikpa ke iwuod afịd awo.
Akpa Bita adikañ Yisọs
15Saimọn Bita mme mbed keed mfen emaekeene Yisọs. Sia akwa aku amaakediọọñọ mbed anye ado, anye amaakeene Yisọs adʌk esịd akwere akwa aku. 16Ado Bita akena atuak ada ke inuaatob. Mbed akediọọñọke akwa aku amaatịmme adineme ye awonwaan a-akekpemeke inuaatob, anyʌñ adat Bita adʌk esịd akwere.
17Awonwaan ado amaabo Bita ate, “Afo ñko ado keed ke atu mbed awo ami?”
Bita amaabọọrọ, “Idooho ami.”
18Atueb amaaba, ndin nditọufọk ye ikpọ mbon utom ñko emaeda ekanna ikañ a-ammọ ekebarake ekʌk, ma ewue ikañ. Bita akeda do ñko ye ammọ awue ikañ.
Akwa aku abịp Yisọs mbịme
19Akwa aku ndin amaabịp Yisọs abaña mbed amọ ye mme ukpeebñkpọ amọ.
20Yisọs amaabọọrọ anye ate, “Ami mmaatañ anwa-anwa nnọ afịd ekondo, mmaakpeeb mme awo ñkpọ ke mme sinakọk ye ke tembịd, a-mme adaukara, nditọ mme Yuu esidisooboke. Mme awo emaekop ikọ mmi sia ñkekpeebe ñkpọ ndomokeed ke ndịbe. 21Nso-o ndin inam nọ afo ambịp miin. Akpekap abịp mbio se ikikop ukpeebñkpọ mmi. Ammọ ediọọñọ afịd se ñkekpeeb.”
22Ke anye amaaketañ ntom, awo ekọñ keed amaasiak Yisọs ufia, ate anye, “Afo abọọrọ akwa aku ntodo?”
23Yisọs ate anye, “Adieke ndueeghe se ntañ, nwọt ndudue ado. Ado akpedo ñketañ akpanikọ, nso-o ido ntak afo ammiaha miin?” 24Anas ndin anọ Yisọs, mme daña ekebọp anye, ate esọk Kaifas, akwa aku.
Bita amaana akañ Yisọs ayọọhọ ñkañ iba mme ita
25Saimọn Bita akesʌk ada ke ndo aka iso awue ikañ. Ammọ emaebịp anye ate, “Nte afo udooho awo keed ke atu mbed amọ?”
Anye amaakañ, abo ate, “Idooho ami.”
26Ayịnufọk akwa aku keed, ayakka awo a-Bita akediaññake utọñ, amaamaana abo Bita ate, “Afo abo ke ami ñkukịtte fiin ke inwañ mme anye?” 27Bita amaamaana akañ, ndin ukem-ukem idahado, akikọ atọọñọ akpọk.
Yisọs ke iso Baided
28Mme etubom mme Yuu emaeben Yisọs ndin ekpọñ iso Kaifas eka atʌñ Baided, Kọfnọ Rum. Ayo amaakpere adisieere. Ami akesịn mbon se ikiben anye ika ikikanna idʌk atʌñ Baided mbaak edibiad ibed adinam asana mme Yuu ke abaña ndutʌm usọrọ Basofa. 29Ke ntodo, Baided amaawuọ akebịp ammọ ate, “Nso-o ido ndudue awo ami? Nso-o ke ekood anye ikpe ebaña?”
30Ammọ ete anye, “Akpedo awo ami inieeghe ndudue, ñnyịn ikpimʌmmọ anye idi mi idiyaak unọ.”
31Baided amaabo ammọ ate, “Iben anye ika ikikpe ikpe amọ naña ibed ndufo ado.”
Mme Yuu emaefaaña ete, “Ñnyịn inieeghe unen adibiire ikpe ñkpa awo.” 32Ami akedo adinam ikọ se Yisọs aketañ abaña utọ ñkpa se anye adiikpa asu.
33Baided amaatịmme adʌk akwere amọ, akedọñ ate eben Yisọs edi, anyʌñ abịp Yisọs ate, “Nte afo ado adidem mme Yuu?”
34Yisọs ate anye, “Afo atañ ikọ ami ke ifiọk idem mfo, me ado se mbon awo etañ unọ fiin embaña miin?”
35Baided amaabo ate “Ami ndo Yuu? Ñkọ mbon ndufo ye mme ikpọ aku ndufo uben fiin ediyaak ennọ! Nso-o inekke ido se afo anam?”
36Yisọs ate anye: “Ubọọñ mmi idooho ubọọñ ederimbod ami. Akpekedooho ntodo, nditọufọk mmi ekpaenwana tutu mme etubom Yuu ikpikanna immʌm miin. Ado ubọọñ mmi ato ke itie mfen.”
37Baided ndin abịp anye, “Ke ntodo, nte afo ado adidem?”
Yisọs amaanọ ibọọrọ ate, “Afo abo ke ndo adidem. Ke aditịm ntañ, ntak a-ami ñkemanake ñnyʌñ ndi ke ederimbod ado adinam ekondo ediọọñọ akpanikọ. Afịd awo se ima akpanikọ edo mme andikop uyo mmi.”
38Mi ke Baided akebịp Yisọs abo, “Nso-o ido akpanikọ?” Ke anye amaaketañ ami, anye awuọ abịne mme Yuu e-ekebonoke ke anwa esiin, akebo ammọ, “Ami ñkịtte ndudue ndomokeed ke idem awo ami. 39Nte ido ndufo adooho akpena ami nsaana awo ñkpakọb keed ñyaak inọ ndufo ke ini usọrọ Basofa. Emeyem ñyaak adidem mme Yuu inọ?”
40Afịd ammọ edọñ uyo keed ebo, “Kuuyaak awo ami-o! Utu ke ado yaak Barabas.” Ndin Barabas akedo awo akesịnne nsọk nọ mme awo esịn ntịme ke abio.
Currently Selected:
Yọọn 18: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
