Yọọn 17
17
Yisọs abọñ akam anọ idem amọ
1Ke Yisọs amaaketañ ikọ ami ama, anye amaadịppe anyen ase abio ubọọñ Abasi anyʌñ abọñ akam abo ate:
“Ete, ini akem afo adinọ Ayịn mfo ubọọñ nọ Ayịn mfo unọ fiin ubọọñ. 2Sia afo ameyaak adudu ukara afịd awo anọ anye ma anye anọ afịd mbon ami se afo akenọ anye nsi-nsi uwem. 3Idahami ami ado nsi-nsi uwem: ma ammọ udiọọñọ fiin, ukweeñe-ukweeñe Abasi akpanikọ, ye Yisọs Krais a-afo akenọọhọ adi. 4Ami mmunọ fiin ubọọñ ke isọñ ke adikweeñe utom afo akendọññọ abo yak nnam. 5Ndin, idahami, Ete nnọ miin ubọọñ ke iso mfo ke ubọọñ ami ñkenieeghe ye afo mbemiso ntọọñọ ederimbod.
Yisọs abọñ akam anọ mme mbed amọ
6 “Ami mmuyaara fiin nnọ mbon a-afo akesiooho ke ederimbod annọ. Ammọ ekedo ake mfo; afo akeben ammọ annọ, ammọ ekpono ikọ mfo. 7Idahami ammọ ediọọñọ ke afịd se afo akennọ akuto fiin. 8Sia ami mmaanọ ammọ ikọ a-afo akennọọhọ miin ndin ammọ emaenyịmme. Ammọ emaediọọñọ ayọhọ-ayọhọ ete ke ami ñkuto fiin ndi, ndin ammọ emaenịm ke afo akendọñ miin. 9Ami mbọñ akam nnọ ammọ, ami mbọññọ akam nnọ ederimbod, ado mbọñ nnọ mbon se afo anọ-ọ sia ammọ edo ake mfo. 10Afịd se ami nnie ado ake mfo, ñko afịd se afo anie ado ake mmi. Ndin itooro ato ammọ ansịm miin. 11Ami mbooho mba aba ke ederimbod, ado ammọ esʌk ebaba ke ederimbod, sia ami ñyaanyọñ ubịne fiin. Adisana Ete, dat adudu anyịñ mfo kpeme ammọ, anyịñ afo akennọọhọ miin nọ ammọ edo keed kpa naña ñnyịn ido keed. 12Idahami ami ñkebaaha mme ammọ mmaakpeme ammọ ñnyʌñ ndat anyịñ a-afo akennọọhọ nnịm ammọ ke ifure. Ammọ bene keed isoppo ke mmiibọhọke ada akenaaha nte asop ma ikọ Abasi asu.
13 “Ami nsʌk ñnyọñ ubịne fiin idahami, ado ntañ mme ñkpọ ami naña ami nsʌkkọ mba ke ederimbod nọ ammọ enie ayọhọ idaara a-antooho miin ke esịd ammọ. 14Mmenọ ammọ ikọ mfo, ado anam ederimbod esua ammọ sia ammọ idooho ake ederimbod, kpa nte ami mendooho ake ederimbod. 15Akam mmi idooho yak afo aben ammọ asio ke ederimbod, ado yak afo akpeme anyʌñ asio ammọ ke ubọk mme andidiọọk. 16Ammọ idooho ake ederimbod kpa naña ami mendooho ake ederimbod. 17Dat akpanikọ mfo nam ammọ esana, ikọ mfo ado akpanikọ. 18Daña afo akennọ miin ndi ederimbod, kpa ntodo ami mmenọ ammọ eka ke ederimbod. 19Ke ntak ammọ ami mmenam idem mmi asana, ma ammọ ñko esana ayọhọ-ayọhọ.
Yisọs abọñ akam anọ afịd mbon se inịm ke akpanikọ
20 “Ami mbọññọ akam ami nnọ ammọ ikpọọñ ado mmenyʌñ mbọñ mbaña mbon e-ediinnịm miin ke akpanikọ ato ke ikọ ntiense ammọ ami, 21nọ afịd ammọ edo keed, Ete, ukem-ukem naña afo aba ke ami, ami ñnyʌñ mba ke afo. Yak ammọ ñko eba ke ñnyịn nọ ederimbod enịm ke afo akendọñ miin. 22Mmenọ ammọ ubọọñ afo akennọọhọ miin nọ ammọ edo keed kpa naña ñnyịn ido keed. 23Ami ke ammọ, afo ke ami, ma ammọ ediana keed ayọhọ-ayọhọ. Do ndin ederimbod eyaediọọñọ ke afo akendọñ miin anyʌñ ama ammọ nte afo ammaagha miin.
24 “Ete, ami ñyem mbon a-afo annọhọ miin eba mme ami ke itie a-ami mbaaha nọ ammọ ekịt ubọọñ mmi, ubọọñ a-afo annọhọ miin sia afo amaamma miin mbemiso afo akebot ederimbod.
25 “Adinen Ete, ñkọm adooho ederimbod udiọọñọke fiin, ami mmudiọọñọ fiin, ammọ ñko ediọọñọ ke afo akendọñ miin. 26Ami mmuyaara fiin nnọ ammọ ndin ñyaaka iso uyaara fiin ma ima a-afo anieeghe annọ miin aba mme ammọ ndin ami ke idem mmi mba mme ammọ.”
Currently Selected:
Yọọn 17: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
