Yọọn 21
21
Yisọs ye utịbe umʌm iyak
1Mme ñkpọ ami emaekeboiyo, Yisọs amaatịmme awọt mbed amọ idem ke mben inyañ Kadidi; ndin naña anye akewọt idem akedo ntom: 2Saimọn Bita, Tọmọs (e-ekesikoodo Didimọs), mme Natanied ayịn Kena ke Kadidi, mme nditọ Sebidi, ye mbed amọ iba mfen, ekeba ke itie keed. 3Saimọn Bita amaabo ammọ ate, “Ñyaaka ñkekọ iyak.” Ammọ ete anye, “Ñnyịn iyaukeene ika.” Ammọ emaedaaña ekedọñọ ubom, ado ke afịd akoneyo ado ammọ ikimʌmmọ iyak ndomokeed.
4Ke ayo amaakesiere, ammọ emaekịt Yisọs naña ada do ke esʌk, ado mbed ado ikidiọọñọke ibo ke Yisọs ke ado.
5Yisọs amaabịp ammọ, “Mme ufan mmi, ndufo imʌmmọ iyak ndomokeed?”
Ammọ ebọọrọ, “Iyo-o.”
6Anye amaabo ammọ ate, “Iduọọk iyịre ke ubọk nnasia ubom ke eyaemʌm iyak.” Ammọ ekeduọọk iyịre naña Yisọs aketemme, emaemʌm ata uwak iyak tutu ammọ ikikanna itap iyịre isịn ke ubom.
7Ami akenam nọ mbed a-Yisọs akemaaha abo Bita, “Abọọñ ke ado!” Saimọn Bita akekop naña anye abo, “Abọọñ ke ado,” anye amaatap afọñ afʌk idem (sia anye amaakpọk afọñ akebet ke isịn), atamma adʌk mmọọñ. 8Mbed mbon ñko emaewat ke ubom, edʌt iyịre iyak ebịne, sia ammọ ikinyọọñọ usʌñ ikpọñ esʌk, akedo ñkpọ nte yaad ikie adiwuọ abod. 9Ammọ ekedibeghe ke isọñ, emaekịt ikañ ukañ naña aduek, iyak mme uyo enyʌñ edoro do.
10Ndin Yisọs amaabo ammọ, “Iben usʌk iyak a-ndufo esʌkkọ emʌm idi.” 11Saimọn Bita amaatịmme akedʌk ubom, adʌt iyịre ye iyak adi abod. Ke ammọ ebatta, emaekịt ikpọ-ikpọ iyak ikie ye aba ye duob ye ita, ado iyịre ikikịppeke. 12Yisọs amaakood ammọ ate, “Idi ididia ndidia ubakusen.” Mbed amọ ndomokeed ikideehede ibịp anye, “Afo ado anie awo?” Sia emaenekke ediọọñọ ke Abọọñ ke akedo. 13Yisọs amaadi, adiben uyo anọ ammọ, anyʌñ anam ukem ntodo mme iyak. 14Ami akedo ayọhọ ukpa ita a-Yisọs akewọttọ mbed amọ idem tọọñọ nte ekenam anye aset ke ñkpa.
Yisọs anọ Bita ayọhọ itie amọ
15Ke ammọ emaekedia ñkpọ ema, Yisọs amaabịp Saimọn Bita ate: “Saimọn, ayịn Yọọn, nte afo amemma miin akan afịd mbon ami?”
Bita ate anye, “Ih Abọọñ, afo amediọọñọ ke ami mmuma fiin.”
Yisọs ate anye, “Bọọk mme edọñ mmi!”
16Yisọs amaatịmme abo, “Saimọn, ayịn Yọọn, nte afo amemma miin.”
Anye amaabọọrọ, “Ih Abọọñ, afo amediọọñọ ke mmuma fiin.”
Yisọs ate anye, “Kpeme mme edọñ mmi.”
17Anye atịmme abịp ayọhọ ukpa ita ate, “Saimọn, ayịn Yọọn, nte afo amemma miin?”
Bita amaatọhọ sia Yisọs akebịp anye mbịme ami ayọhọ akañ ita ate, “Nte afo amemma miin?” Anye ndin amaabo Yisọs ate, “Abọọñ, afo amediọọñọ ukeed-ukeed ñkpọ; afo amediọọñọ ke ami mmuma fiin.”
Yisọs ate anye, “Bọọk edọñ mmi. 18Ke ataa akpanikọ ke ami ntañ unọọ, idaha a-afo akedooho akparawa, afo akesibọbọ mbọbọ idem mfo anyʌñ asaña aka itie nte afo ama; ado naña afo umausọñ uduusunyanyan ubọk, ndin awo mfen usịn afọn, anyʌñ uben fiin aka itie nte afo uduumaaha.” 19Yisọs aketañ ami adiwọt utọ ñkpa a-Bita adidat inọ Abasi ubọọñ. Akema, Yisọs amaabo anye ate anye, “Ñkeene miin!”
20Bita akewọññọ iso, akịt mbed a-Yisọs akemaaha naña akeene ammọ. (Mbed ami ado anye a-akenyʌkkọke abere Yisọs ke ini akpatre ndidia ndubi, anyʌñ abịp Yisọs mbịme abo, “Abọọñ, anie ado awo a-aduutap fiin?”) 21Bita akekịt anye, amaabịp Yisọs abo ate: “Abọọñ, ake amọ adiiba die?”
22Yisọs ate anye, “Adieke adooho uduak mmi adibo anye adu uwem tutu ami ntịmme ndi, ado ubeghe die fiin? Ana afo añkeene miin.” 23Ibọọrọ ami akenam mbʌk asuana ke atu mme andinịm ke akpanikọ, ebo ke mbed ado idiikpaaha ñkpa. Ado Yisọs ikibooho ke mbed ado idiikpaaha ñkpa. Ado anye akebo, “Adieke ami mbooho anye adu uwem tutu ami ntịmme ndi, ado ubeghe die fiin?”
24Mbed ami ado anye a-atieeghe ntiense abaña mme ñkpọ ami, a-akenyʌññọ awet mme ñkpọ ami anịm. Ñnyịn imidiọọñọ ke se anye akewet ado akpanikọ.
25Yisọs amaanam mme uwak ñkpọ mfen ñko. Ekpebiiwewet afịd mme ñkpọ ado idọñ ke ñwed, ñkere mbo ke idem ederimbod ami ikpidọñọke mme ñwed se ekpewet.
Currently Selected:
Yọọn 21: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
