Utom 5
5
Ananayas ye Safira
1Ndin awo keed e-ekekoodo Ananayas ye anwaan amọ Safira, emaenyam isọñ ammọ ñko. 2Ado Ananayas, ke ayọhọ unyịmme anwaan amọ, amaabakka ubaak akʌk isọñ ado anịm anọ idem amọ, ndin aben ubaak asọk mme abọsịd.
3Do ke Bita akeabo anye, “Ananayas, asaña die ayaak Setan anekke udʌk esịd tutu afo asʌghọ nsu anọ Adisana Sịbidịd, anyʌñ amʌm ubaak akʌk a-akenyamma isọñ anịm anọ idem mfo? 4Me nte isọñ ado ikidooho ake mfo naña awo mmiikinyamma anye? Ndin ke emaekenyam anye, me nte afịd ñkpọ ikisʌkkọ usịne fiin ke ubọk? Nsikinam nọ afo akere adinam utọ ñkpọ a-abaaha ntom? Afo usʌghọke nsu unọ awo kpọd, ado asʌghọ anọ Abasi.”
5Ananayas amaakekop mme ñkpọ ami, anye amaaduọ ke isọñ akpa. Ndin ataa uteñe amaanam afịd mbon se ikikop ñkpọ ami. 6Mme ñkparawa emaedakka eda, eben akpo amọ ebọp ke afọñ, eben anye ewuọ enyʌñ ekebuuk.
7Ke ñkpọ nte awa ita amaakeboiyo, anwaan amọ amaadʌk adi, ado anye ikidiọọñọke se ikitịppe. 8Ndin Bita amaabịp anye ate, “Tañ nnọ ise, me nte udua isọñ ado ndufo ekenyamma ado ami?”
Safira amaabo, “Ih, ekọmudua isọñ ado adodo.”
9Bita amaabo anye, “Nsinam yak ndufo eda uyo keed edomo Sịbidịd Abọọñ idomo? Sese mme andikibuuk ubed mmọdo eda ke inuausʌñ, ndin ammọ ñko eduuben fiin iwuọ.”
10Kpa ke ini ado anye aduọ ana ke iso Bita anyʌñ akpa. Do ndin mme ñkparawa ado emaedʌk edi, edikịt ke anye akpa, enyʌñ eben anye ewuọ ekebuuk ediana udi ebe amọ. 11Ekamba ndịk amaamʌm afịd ufọkabasi ye afịd mbon se ikikop ibaña mme adinam ami.
Mme abọsịd ekọk umiaañ awo udọñọ
12Umiaañ utịbe utom ye mme utom idiọọñọ emaedat itie ke atu mme awo ato ke ubọk mme abọsịd. Afịd mme andinịm ke akpanikọ ekesisoobo ke esa Sọdọmọn. 13Awo ndomokeed mfen ikidʌkkọ atu ammọ, akpọsʌk ado mme awo ekenekkeke ekpono ammọ. 14Ado ibad ideen ye ibaan se ikikeene ammọ inịm Abọọñ ke akpanikọ amaaka iso awak. 15Ke ntak ami, mme awo emaekoono mbon udọñọ ewuọọñọ edi ke mme efaak, ebon amọ ke beed ye ke aya, nọ ato do naña nte akpedodo, ke ini Bita amaabo isaña iboiyo, ndukpọñ amọ akpetuuk usʌk ammọ. 16Atu awo emaewuọọñọ ñko ke mme abio se ikida ikpere Yerusedem edi, enyʌñ ekoono mbon udọñọ edi, ye mbon se ndiọi sịbidịd eketʌkkọ, ndin afịd ammọ emaebọ nsọñidem.
Mme abọsịd ekịt ukọbọ
17Ndin akwa aku ye afịd mme nsaña amọ e-ekebaaha ke ñka mme Sadusi emaeyọhọ ye ufịb. 18Ammọ emaemʌm mme abọsịd, enyʌñ edọñ ammọ ke ufọk ñkpakọb afịd awo. 19Ado ke akonayo, enyere Abọọñ amaataad mme usʌñ ufọk ñkpakọb, asiooño ammọ do afep, 20anyʌñ abo ammọ ate, “Ikaa ikida ke mme afe tembịd itañ inọ mme awo afịd-afịd ikọ a-abañake ufa uwem ami.”
21Ke ammọ emaekekop ado, ammọ emaedʌk mme afe tembịd ke usieere, enyʌñ etọọñọ adikpeeb mme awo ñkpọ.
Ado ke akwa aku ye mme nsaña amọ emaekedi, ammọ emaekood mme esob Sanhidrin mme Yuu, a-adooho ekamba mbono afịd mme etubom nditọ Isred, enyʌñ edọñ ete eka ekeben mme abọsịd ke ufọk ñkpakọb edi. 22Ado ke mme isʌñutom emaekekewuọ ufọk ñkpakọb, ammọ ikikịtte mme abọsịd ke udo. Ndin ammọ emaetịmme enyọñ ekedọkkọ ammọ ete, 23“Imikikịt ufọk ñkpakọb nte asʌk abebede, ye mme akpeme ufọk ñkpakọb naña eda ke inuausʌñ, ado ke ñnyịn imaikibeede usʌñ, ñnyịn ikikịtte ndomo awo keed ke esịd ufọk.” 24Ke mme akamautom ke tembịd ye mme akpeme ufọk ñkpakọb ye mme ikpọ aku emaekekop etob ami, ammọ ikidiọọñọke se ekpenam, idem amaanyʌñ akpa ammọ abaña se utọ ñkpọ ami akpewuọọñọ.
25Akema, awo keed amaadi adibo ammọ ate, “Se! Mbon a-ndufo ekedọññọ ke ufọk ñkpakọb mmọ ko eda ke afe tembịd esʌk ekpeeb mme awo ñkpọ.” 26Ke adaiwuod ekọñ ye mme ikpọ mbon utom amọ emaekekop ado, ammọ emaeka ekeben mme abọsịd edi. Ado ammọ ikinamma ke afai mbaak mbon awo editọọñ ammọ ke itiad.
27Ke emaekeben mme abọsịd edi, emaenam ammọ edida ke iso esob Sanhidrin mme Yuu, nọ akwa aku abiime ammọ mbiime. 28“Ñnyịn imainekke iwuuk ite yak ndufo ikiikpeeb ñkpọ aba ke anyịñ ami, ado ndufo emenam ukpeebñkpọ ndufo akara afịd isọñ Yerusedem, enyʌñ ebeeñe idem adinam iyiib awo ami idodo ñnyịn ke idem.”
29Bita ye mme abọsịd mbon ñko emaebọọrọ ete: “Ñnyịn inie adikop uyo Abasi, idooho uyo awo! 30Abasi mme ete ñnyịn amaanam Yisọs ado a-ndufo ekewotto ke adikọñ anye ke eto krọs aset ke ñkpa. 31Abasi amaabenne anye anịm ke ubọk udom amọ nte Ayịn Abọọñ ye Andinyaaña ma anye anam Isred ekappa esịd, anye ñko anyʌñ afeen mme idiọọkñkpọ ammọ. 32Ñnyịn ido mme ntiense ibaña mme ñkpọ ami, ntodo ñko ke Adisana Sịbidịd ado, a-Abasi añọọhọ mbon e-ekoppo uyo amọ.”
33Ke ammọ emaekekop mme ikọ ami, esịd amaayat ammọ eti-eti, ndin ammọ emaeyem adiwot mme abọsịd. 34Ado awo Farisi keed a-akekereke Kamadied, akpeeb ibed, a-afịd awo ekekponoke, amaadakka ada ke esob Sanhidrin mme Yuu anyʌñ anọ uyo ate yak enam mme abọsịd ewuọọñọ diin ekebet ke anwaesiin. 35Ndin anye amaabo mbon esob Sanhidrin mme Yuu ate: “Ndufo mbon Isred, inekke ikere ibaña se ndufo eduak adinam mme ibon ideen ami. 36Ke usen edem, Tadius amaadakka ada, ate ke ido awuọiso awo, ndin ñkpọ nte awo ikie inaañ emaewuọñọ ekeene anye. Emaewot anye, mme mbed amọ emaenyʌñ esuaana, ke akpatre afịd ñkpọ se anye akenam akewuọọñọ ikpu-ikpu. 37Ke Tadius amaakekpa, Yudas a-aketooho Kadidi amaawuọ adi ke ini ekenamma ubadawo, anyʌñ akoono umiaañ awo adian idem esịn ntịme. Emaewot anye ñko, ndin afịd mme ibed amọ emaesuaana. 38Ndin idahami, ami mbo yak ndufo esiooño idem ekpọñ ibon ami, isaana ammọ iyaak nọ enyọñọ, sia akpedo uduak ye adinam ammọ ato awo, ayaakpu. 39Ado akpedo ato Abasi, ndufo idiikanna ikpan ammọ, utu ke ado ndufo eyaekappa enwana ye Abasi.”
40Ammọ emaenyịmme ke ikọ se Kamadied aketañ. Ke ntodo emaekood mme abọsịd edi, emaenyʌñ enam nọ emia ammọ. Emaenọ ammọ uyo ete ammọ ekuukpeeb ñkpọ aba ke anyịñ Yisọs, enyʌñ esaana ammọ eyaak.
41Mme abọsịd emaekpọñ esob Sanhidrin mme Yuu, edaara sia emaebat ammọ nte mbon e-edotto adidia buud ke ntak anyịñ Yisọs. 42Ke usen ke usen, ke mme afe tembịd ye ke ufọk ke ufọk, ammọ ikitreke adikpeeb ye adikwọrọ eti mbʌk mbo ke Yisọs ado Krais.
Currently Selected:
Utom 5: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
