Utom 6
6
Umek awo itiaba
1Ke mme usen ado, nte ibad mme andikeene Krais akesʌkkọ atọt, mme Yuu e-ekesemme usem Krik emaesuuk mme Yuu ukañ Ibru uyo ke ntak ammọ mmiikiseeghe ibaña mme ebekpa ammọ ke ini edeemeke ndidia kwa usen. 2Ndin mbed duob ye iba emaesoobo atọ keed ye mbon andikeene Krais enyʌñ ebo ete, “Ikpifọnnọ ñnyịn adikpọñ utom usuan etob Abasi ñkappa ñkenedeeme ndidia. 3Nditọete, imek awo itiaba ke atu ndufo, e-eyọhọke ye Adisana Sịbidịd ye ifiọk. Ñnyịn iyaiyaak utom ami isịn ammọ ke ubọk, 4ndin ñnyịn iyaikan itʌm ise akpan utom adibọñ akam ye adikwọrọ ikọ Abasi.”
5Akikere ami amaanem afịd awo se ikiboho ami esịd. Ammọ emaemek Stifịn, a-akeyọhọke ye mbuọdidem ye Adisana Sịbidịd; ñko ye Fidib, Brokorus, Nikanọ, Timọn, Bamenas ye Nikodas awo Yentaid Antiọk, a-akekappake esịd akpọñ ukpono Abasi ke ido Yuu. 6Emaeben ammọ ewọt mme abọsịd e-ekebọññọ akam enyʌñ edot ammọ ubọk.
7Ndin ikọ Abasi amaaka iso asuana. Ibad mme andinịm ke akpanikọ ke Yerusedem amaatọt eti-eti, uwak mme aku Abasi enyʌñ esuuk iwuod enọ akpanikọ.
Emʌm Stifịn
8Ndin Stifịn, a-akeyọhọke ye mfọn ye adudu Abasi amaanañña ikpọ utịbe ñkpọ ye utom idiọọñọ ke ufọọd atu awo. 9Mfịna ye utọk amaatọọñọ, eto mbon Sinakọk Ubọkkọ (naña ekekood itie ado adodo), e-ekedoññoke mme Yuu ake Sirin ye Adeksandra, ñkọrọ mbon Sidisia ye Esia, emaedaaña eda etọọñọ mfaaña ye Stifịn. 10Ado ammọ ikikanna anye ke ifiọk a-Sịbidịd akenọọhọ anye idaaha anye atañña ikọ.
11Ammọ emaedọọñ mme awo ke ndịbbe, etemme ammọ aditañ mbo ntom, “Ñnyịn imikop naña Stifịn asappa Moses ye Abasi.”
12Ndin ammọ emaesịn nsọk, enam esịd abịmme mbon abio, mme etubom, ye mme akpeeb ibed. Ammọ emaekpappa Stifịn enyʌñ edat anye edi esob Sanhidrin mme Yuu. 13Emaesio mme atie ntiense nsu e-ekebooho ete, “Akenam awo ami itreke aditañ idiọọk ikọ ndian adisana itie ami ye ibed Moses. 14Sia ñnyịn imaikop nte anye abo ke Yisọs ayịn Nasared ayaabiad itie ami anyʌñ akpəgho mme ido a-Moses akinọọhọ ate ñnyịn inịm.”
15Afịd awo e-eketieeghe ke esob Sanhidrin emaewuuk anyen ese Stifịn, ammọ emaenyʌñ ekịt iso amọ naña abiod iso enyere.
Currently Selected:
Utom 6: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
