Utom 4
4
Bita ye Yọọn ke esop Sanhedrin
1Ndin ke ini Bita ye Yọọn esʌkkọ etañ ikọ enọ mme awo, mme aku ye adaiso mme akpeme tembịd, ye mme Sadusi, emaesaña ekpere ammọ. 2Ukpeebñkpọ a-abañake adised ke ñkpa ke anyịñ Yisọs a-mme abọsịd ekekwọrọke amaafịna mme aku ye mme Sadusi. 3Ado amaanam mme aku ye mme akpeme tembịd, ye mme Sadusi emaemʌm Bita ye Yọọn etop esịn ke ufọk ñkpakọb tutu asịm edem usen, sia akedooho ndubi. 4Ado umiaañ mbon e-ekekoppo etob ado emaenịm ke akpanikọ, ado amaanam ndin ibad awo emaesịm ñkpọ nte tọsịn ition.
5Edem usen, mme adaukara, mme mbọọñ, ye mme akpeeb ibed emaesoobo ke Yerusedem. 6Anas ekamba aku, ye Kaifas, ye Yọọn ye Adeksanda, ye afịd mbon se ikito ufọk akwa aku emaebañña do ñko. 7Ammọ emaeben Bita ye Yọọn edi ke iso ammọ enyʌñ etọọñọ adibịp ammọ mbịme: “Ke nso-o utọ adudu, ye ke anyịñ anie ke ndufo ekenam afịd ami?”
8Ndin Bita, a-amaakeyọhọ ye Adisana Sịbidịd, amaabo ammọ ate: “Mme andikara abio ye mme mbọọñ ke Isred! 9Adieke ibịppe ñnyịn mbịme mfịn ami ebaña eti utom i-ikinamma inọ awo mbʌñọ enyʌñ ebịp naña anye akesaña abọ nsọñidem, 10afịd ndufo, ye afịd ufọk Isred, idiọọñọ ami: ite ke ato anyịñ Yisọs Krais ake Nasared, a-ndufo ekekọññọ ewot ke eto krọs, a-Abasi akenamma aset ke ñkpa, ke awo ami anie nsọñidem, a-adaaha mi ke iso ndufo. 11Yisọs ado
“ ‘itiad a-ndufo mme abọbufọk ekesịnne,
a-adikappake ado akpan itiad inuuk.’
12Adinyaaña ibaaha ke awo mfen ndomokeed, sia anyịñ ndomokeed mfen ibaaha ke idak ikpaanyọñ e-enọọhọ uduudawo, a-anaaha ñnyịn ibọ adinyaaña ito.”
13Ke ini ammọ ekekịtte uko Bita ye Yọọn, enyʌñ ediọọñọ ke ammọ ikikaaha ñwed, ado ammọ ekedo mme ñkaña awo, idem amaakpa ammọ, ammọ enyʌñ ediọọñọ ke mme awo ami emaeba ye Yisọs. 14Ndin sia ammọ emaekekịt awo a-akebọọhọ nsọñidem nte asʌk ada ye ammọ, uyo ikibaaha ammọ aba ke itọñ. 15Ke ammọ emaekenọ uyo ete yak Bita ye Yọọn ekpọñ atu mbono esob Sanhidrin ekeba ke anwa, ammọ emaenie nneme ammọ-ammọ. 16Ammọ emaebịp idem ammọ mbịme ete, “Nso-o ke ñnyịn ikpinam ye mbon ami? Afịd awo se idʌñ ke Yerusedem ediọọñọ ete ke ammọ enam ata ekamba utom idiọọñọ, ndin ñnyịn idiikanna ifaaña. 17Ado mbaak itre ñkpọ ami adika iso nsuana nsịm afịd mme awo idem, ana ñnyịn ikpan ammọ ite yak ammọ keemaana etañ ikọ aba enọ awo keed ake adodo ke anyịñ ami.”
18Ndin ammọ ekema, emaemaana ekood Bita ye Yọọn ebo edʌk edi esob, enyʌñ ewuuk ammọ ete keetañ ikọ, keenyʌñ ekpeeb ñkpọ ndomokeed ke anyịñ Yisọs. 19Ado Bita ye Yọọn emaebọọrọ ammọ ebo ete, “Itʌm ibiire ke idem ndufo ise me afọn ke iso Abasi adikop uyo ndufo ñkan uyo Abasi. 20Sia ñnyịn idiikanna itre aditañ mbaña se ñnyịn ikikịt inyʌñ ikop.”
21Ke emaekemaana idịkke ammọ uwem, emaesaana ammọ eyaak. Esob Ikpaisọñ mme Yuu ikikanna ibiire se ufen ekpenọ ammọ, sia adooho afịd awo ekesʌk etooro Abasi ke se ikittịppe. 22Ñko awo a-akebọọhọ utịbe-utịbe ukọk udọñọ ami amaabọhọ isua aba ke emana.
Mme andinịm ke akpanikọ ebọñ akam
23Ke emaekesaana ammọ iyaak, Bita ye Yọọn emaenyọñ ebịne mbon ammọ (mme ikọd Abasi) enyʌñ eketañ enọ ammọ afịd se mme ikpọ aku ye mme mbọọñ ekebo ammọ. 24Ammọ emaekekop ado, afịd ammọ emaebenne uyo ini keed ebọñ akam enọ Abasi, ete: “Akwa Abọọñ, afo ado Abasi a-akebotto anyọñ ye isọñ ye inyañ ye afịd-afịd ñkpọ se iyọhọ ammọ ke esịd. 25Ato ke Adisana Sịbidịd afo amaatañ ikọ ke inua asañautom mfo, ete ñnyịn Defid, abo ate:
“ ‘Nsinam yak mme idịd ekop ataaifiobesịd,
mme awo enyʌñ eduak ikpu-ikpu ñkpọ ke esịd ammọ?
26Mme ndidem isọñ edaaña eda,
ndin mme andikara eboho ammọ-ammọ
enyʌñ enwana ye Krais,
e-emaekeyet adan enịm.’
27Ado akpanikọ ke Herọd ye Bọntiọs Baided emaesoobo atọ keed ye mme Yentaid ye mbon Isred ke abio ami nọ ediana keed enwana ye adisana ayịn mfo Yisọs, a-afo akeyette adan anịm. 28Ammọ ekenam se adudu ye uduak mfo emaekebebiire enịm nọ atịppe. 29Ndin idahami, Abọọñ, se baña udịkke ammọ idịkkeke ñnyịn nyʌñ nọ mme asañautom mfo adudu aditañ ikọ mfo ke ata ayọhọ uko. 30Sio ubọk mfo nyan ke adikọk udọñọ, ye ke adinam mme ikpọ utom idiọọñọ ye mme utom utịbe ñkpọ ñkpaidem ke anyịñ adisana ayịn mfo, Yisọs.”
31Ke ammọ emaekebọñ akam, itie ammọ eketieeghe amaanyeeñe, ndin afịd ammọ emaeyọhọ ye Adisana Sịbidịd, enyʌñ ekwọrọ ikọ Abasi uko-uko.
Mme andinịm ke akpanikọ edeeme inie ammọ
32Afịd mme andinịm akpanikọ ekenie esịd keed ye akikere keed. Ndomo awo keed ikibooho ke se imọ inie akedo akpọ-akpọ inie imọ, ado afịd awo ekewaawana se ekenie. 33Ke ayọhọ adudu mme abọsịd emaeka iso ke aditie ntiense mbaña adised Abọọñ Yisọs ke ñkpa. Ndin umiañ mfọn Abasi amaakem ammọ udeme, 34anam awo uweene ntekeed ikibaaha ke atu ammọ. Adaña ibad awo se ikinieeñe isọñ ye mme ufọk emaenyaam, ekoono akʌk se ikido ekọmudua edi, 35edinịm mme abọsịd ke iso, ndin ekesideeme enọ awo keed-e-keed akeene mfịna awo ado.
36Yosef, awo Difaid a-aketooho Saiprọs, a-mme abọsịd ekebenne ekood Banabas (a-awuọọñọke “ayịn nsọọñọesịd”), 37amaanyam isọñ se anye akenie anyʌñ aben akʌk ado asọk mme abọsịd.
Currently Selected:
Utom 4: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
