Luk 18

Itẹ rẹ Ayeuku vẹ Oguẹdjo na

1Ọ de kpe itẹ ọvo kẹ ayen nẹ, ọtiọna ovwan nẹ ẹrhovwo kọke kọke e jọ bẹn ovwa-an. 2Ọ da ta, Vwẹ orere ọvo oguẹdjọ ọvo da herọ rọ djẹ oshọ rẹ Ọghẹnẹ-ẹ eyẹ ro se ohwo gbe emuọvo-o; 3ayeuku ọvo je hẹ orere na ro bro cha kọke kọke ọ me ta, chọ oja rẹ ukọn ro gbe kpahe ovwẹ na kẹ vwẹ. 4Kidie vwẹ ọmọke ọ da sen; ẹkẹvuọvo vwẹ ukuko rọye ọ da ta kẹ oma rọye, Dede na nẹ me djẹ oshọ rẹ Ọghẹnẹ-ẹ eyẹ se ohwo gbe emuọvo-o na, 5yẹ ukpokpogho rẹ ayeuku nana gan nọ kẹ vwẹ, me chọ oja rọye, eyẹ ofu rẹ ẹcha rọye kọke kọke na che dje vwe hwe. 6Ọrovwohwo da ta, Nyo obọ rẹ oguẹdjọ umwemwu na tare. 7Kẹ Ọghẹnẹ rha chọ oja rẹ Ihwo rọ sanọ reyọ, ri kperẹ se te ason te uvo-o? Ko gbe eghẹrẹ vwẹ enu rọ ayen? 8Me ta kọ ovwan, ọ cha chọ oja rọ ayen kpata kpata. Ẹkẹvuọvo ọke rẹ Ọmọ rẹ ohwo da rhe, kọ sa mrẹ esegbuyota vwẹ akpọ?

Itẹ rẹ Ohwo ri Farisi vo Omiarhọghọ

9O de ji kpe itẹ nana kẹ ẹvo re vwẹ ẹro so omaobọ rẹ ayen nẹ ayen ma dia ọvwata kẹ ayen jẹ ihwo efa fia. 10Eshare ivẹ de kpo uwevwi rẹ ẹga ra nẹ ẹrhovwo, ọvo Farisi ọ ro chekọ kẹ omiarhọghọ. 11Farisi na vrẹn mudia ọ da nẹ ẹrhovwo enẹ kẹ oma rọye, Ọghẹnẹ, me kpẹvwẹ owẹ nẹ me họhọ ihwo efa-a, re ghwa ihwo ria, ifuevu-u, igberadja, eyẹ tobọ họhọ omiarhọghọ nana. 12Mi chirẹ owẹvwe asiava vwẹ ẹdidjala, me hwa ẹkẹn ehwe rẹ obo ri mi vwori ejobi. 13Ẹkẹvuọvo omiarhọghọ na, de mudia tephe, o gbi yivwi kpare opharo kpenu-u, ẹkẹvuọvo ọ da vwẹ abọ ghwiẹ udu, tanẹ, Ọghẹnẹ ni arodọvwẹ mẹ oruimwemwu! 14Me ta kẹ wẹ, ohwo na re ase kpo uwevwi rọye nọ ọ ro chekọ na; kidie kohwo kohwo ro mu oma rọye kpenu ke vwo kpotọ, ẹkẹvuọvo ọ rọ vwẹ oma rọye kpotọ ke vwo kpenu.

Jesu nẹ Ẹrhovwo kẹ Imitete

(Matiu 19.13-15; Mak 10.13-16)

15Asakiephana kẹ ayen muẹ emọboba rhe rere ọ vwẹ obọ te ayen; rẹ idibo na vwọ mrẹ, ke ghwọ kuẹ ayen. 16Ẹkẹvuọvo Jesu de se ayen bro rhe, tanẹ, Jẹn imitete na bru vwe rhe a da ayen jẹ-ẹ; kidie oghẹre ọtiọnana hẹ uvie rẹ Ọghẹnẹ. 17Uyota, me ta kẹ ovwan, kohwo kohwo rọ reyọ uvie rẹ Ọghẹnẹ kerẹ omotete-e ọ sa ruọ-ọ.

Ọdafe rẹ ọye ọvo je hẹ Osun

(Matiu 19.16-30; Mak 10.17-31)

18Osun ọvo da nọ, Oyono rẹ esiri, die mi ru me vwọ reuku rẹ arhọ ri bẹdẹ na? 19Jesu da ta kẹ, Die wo vwo se vwe ọ rẹ esiri? Ohwo esiri ọvuọvo herọ-ọ jokpa rẹ Ọghẹnẹ ọvo. 20Wọ riẹn irhi na: Wo gbe igberadja-a, Wo hwe ohwo-o, Wo cho uji-i, Wo se iseri rẹ eku-u, mu ọghọ kẹ ọsẹ wẹn vẹ oni wẹn. 21Ọ da ta, Me yọnre enana ejobi nẹ ọke-emọ mẹ rhe. 22Ọke ri Jesu vwo nyo, ọ da ta kẹ, Emu ọvo je kanre owẹ. Shẹ obo wo vwori ejobi re wọ ghare ayen kẹ ivwiogbere, ku wo vwo efe vwẹ obo odjuvwu; re wọ rhe, ri nene uvwe. 23Ẹkẹvuọvo ọke ro vwo nyo ọnana o de muomahọ, kidie o feri gangan. 24Ri Jesu vwo no ọ da ta, Mavọ ọ gan te kẹ otu ri feri re vwọ ro uvie rẹ Ọghẹnẹ! 25Kidie ọ lọhọ kẹ erhuẹn rọ vwọ wan unu rẹ ukoti vrẹn nọ ọdafe rọ vwọ ro uvie rẹ Ọghẹnẹ. 26otu ri nyoro da ta, ọtiọye na kono re sa rhọ? 27Ẹkẹvuọvo ọ da ta, obo re bẹn kẹ ohwo ọ bẹn kẹ Ọghẹnẹ-ẹ. 28Pita da ta, Nighe, avwanre yan je iwevwi rẹ avwanre vwo vwo nene uwe re. 29Ọ da ta kẹ ayen, Uyota me ta kẹ ovwan, o vwo ohwo rọ yan jẹ uwevwi vwo eyẹ aye eyẹ iniọvo eyẹ esẹ vẹ ini eyẹ emọ, fiki rẹ uvie rẹ Ọghẹnẹ na, 30ro je vwo kpahe vwẹ ọke nana, vwẹ akpọ rọ cha arhọ ri bẹdẹ.

Obọ Rerha Jesu ta Ota rẹ Ughwu vẹ Evrẹnushi Rọye

(Matiu 20.17-19; Mak 10.32-34)

31Rọ vwọ reyọ ihwivẹ na, ọ da ta kẹ ayen, Nighe, avwanre kpo Jerusalẹm re, kemu kemu ejobi rẹ emraro na si kpahe Ọmọ rẹ ohwo i che ru gba. 32Kidie e che muo rhe Keferi, ka vwọ jehwẹ ka phọphọ ke dje enya kuo; 33ka vwẹ ugbudia fa ke hwe ghwu, vwe ẹdẹ rerha kọ vrẹn. 34Ẹkẹvuọvo imu nana ro aye-en, e si eta nana nu kẹ ayen, ayen gbe sa yọnre obo rọ tare-e.

Jesu Sivwi Orhuẹro ro Yare Emu

(Matiu 20.29-34; Mak 10.46-52)

35Ro rhi vwo si kẹre Jeriko, orhuẹro ọvo tidia vwẹ orhoma rẹ idjerhe rọ yara; 36ro vwo nyo umri rẹ urogho re lọrọ wan, ọ da nọ nẹ ọna kidie. 37Ayen da ta kẹ, Jesu ri Nazarẹt re wanvrẹn. 38Ọ de kperi, Jesu, Ọmọ ri Devid, ni arodọvwẹ mẹ! 39Ayen otu re hẹ obaro da ghwọ kuo, nẹ o rhurhu unu; ẹkẹvuọvo ọ da rhoma kperi gan nọ ọtiọye, Ọmọ ri Devid, ni arodọvwẹ mẹ! 40Jesu de mudia, ọ da ta nẹ a reyọ rhe; ro vwo si kẹrẹ, ọ da nọ, 41Die wọ guọnọre ni mi ru kẹ wẹ? Ọ da ta, Ọrovwohwo, jẹn uvwe mrẹ orẹ. 42Jesu da ta kẹ, Mrẹ orẹ; esegbuyota wẹn nẹrhẹ oma wẹ gan. 43Siẹvuọvo na ọ da ghwa mrẹ orẹ o de nene, ko jiri Ọghẹnẹ; rẹ ihwo na ejobi, vwọ mrẹ, ayen de jiri Ọghẹnẹ.

Currently Selected:

Luk 18: UBV77

Highlight

Copy