Luk 17
17
Odavwini re vwo ruẹ Umwemwu
(Matiu 18.6-7, 21-22; Mak 9.42)
1Etiyin ọ da ta kẹ idibo rọye, Omuẹro nẹ ọdavwini rọ nẹrhẹ e ru umwemwu che jẹ cha-a; ẹkẹvuọvo ekan kẹ ohwo rọ wan obọ rọye rhe. 2Manẹ e yovwi kẹ ohwo yena re o churu oragha mu ohọre re o re divwi ghwu vwẹ evun rẹ abadi, nọ rọ da nẹrhẹ ọvo vwẹ usun rẹ imitete na ro de ru umwemwu. 3Wa kẹnoma rẹ ovwan; ọ dianẹ omoni wẹn ru umwemwu, ghwọ kuo, o de ku rhẹriẹ, vwo ghovwo; 4o de ru umwemwu kpahe owẹ asieghwrẹ ẹdọke, ọ da ta, Mi kurhẹriẹ, wo mi vwo ghovwo.
Ru Esegbuyota rẹ Avwanre Bu
5Iyinkọn na da ta kẹ Ọrovwohwo, Ru esegbuyota rẹ avwanre bu! 6Ọrovwohwo da ta, ọ dianẹ wo vwo esegbuyota kerẹ ubi rẹ uyerhie, ku wọ sa ta kẹ urhe ri sikamọ nana nẹ, Ghwie nẹ ne otọ, re wo re mudia vwẹ evun rẹ abadi, ko sa vwẹ ọghọ kẹ wẹ.
Iruo ro te Odibo
7Ono vwẹ usun rẹ ovwan na, ro vwo odibo ro kpo ivoro eyẹ ro churu igodẹ, rọ da ta kẹ vwẹ ọke rọ de nẹ aghwa rhe nẹ, Mọ wọ re emu? 8Ọ dianẹ o ta kẹ, Chere emu rẹ ovwọnvwọn kẹ vwẹ, chobiẹ amwa wẹn wo mu emu kẹ vwẹ, bẹsiẹ me vwọ re nu me vwọ da nu; wo de ru nu wo ke re wọ ke da? 9Kọ kpẹvwẹ odibo na fikiridie o ru obo re ji iji kẹ? 10Ọtiọye rhe, vwẹ ọke wo de ru obo re ji iji kẹ wẹ nu, kọ ta, Avwanre idibo ri fi emuọvo-o; avwanre di ru ẹkẹn iruo ro te avwanre.
Jesu Sivwi Ehọnvwoti Ihwe
11Rọ vwọ hẹ idjerhe kpọ Jerusalẹm kọ wan uvwre ri Sameria vẹ Galili vrẹn. 12Rọ vwọ vwẹriẹ ọko ọvo, ehọnvwoti ihwe da vwa, ri mudia tephe. 13e kpare urhuru e da ta, Jesu, Onini, ni arodọvwẹ rẹ avwanre. 14Ọke rọ vwọ mrẹ ayen ọ da ta kẹ ayen, yanran wa ra vwẹ oma nẹ irherẹn. Rẹ ayen vwọ yanran re ayen da ghwa fon. 15Etiyin ọvo vwẹ usun rẹ ayen, rọ vwọ mrẹ nẹ o sivwi ọye, o de rhivwi jiri Ọghẹnẹ vẹ urhuru ọgangan; 16o de she bọvwọn opharo rhuotọ vwẹ awọ ri Jesu, rọ kpẹvwẹ. Asakiephana ohwo na kẹ ohwo ri Sameria. 17Etiyin Jesu da ta, Ọ dia ihwe e sivwiri? Kẹ irhiri na rhọ? 18A gbe mrẹ ọvuọvo ro rhivwi rhe rhe vwẹ ejiro kẹ Ọghẹnẹ jokpa rẹ ọrhorha nana-a? 19Ọ da ta kẹ, Vrẹn kpo obo wọ ra; esegbuyota wẹn nẹrhẹ oma wẹ kpo.
Echa rẹ Uvie na
(Matiu 24.23-28, 37-41)
20Rẹ Farisi vwọ nọ nẹ ọkevọ uvie rẹ Ọghẹnẹ vwọ rhe, ọ da kpahe kẹ ayen, Uvie rẹ Ọghẹnẹ na cha rhe vẹ oka re che se vughee; 21eyẹ kẹ ayen cha ta, Nighe, ọna! eyẹ Etiyin i kidie nighe, uvie rẹ Ọghẹnẹ na ọ hẹ ohri rẹ ovwan.
22Ọ da ta kẹ idibo rọye, Ẹdẹ cha rẹ ovwan cha vwọ guọnọ ẹdẹ ọvo rẹ Ọmọ rẹ ohwo na mrẹ, yẹ ovwan cha sa mrẹ-ẹ. 23Ayen ke cha ta ke ovwan, Nighe, etiyin! eyẹ Nighe, etinẹ ! Wọ ra-a, wo nene aye-en. 24Kirobo rẹ enu nyavwaro rọ da la mu obenu nẹ abọ ọvo re te ọrivẹ na, ọtiọye Ọmọ rẹ ohwo cha dia vwẹ ẹdẹ rọye. 25Ẹkẹvuọvo ẹsosuọ na ọ ka cha re oja rẹ emu buebu tavwe uvwiẹ nana kọ cha siọn. 26Kirobo rọ epha vwẹ ọke ri Noa, ọtiọye ọ je cha dia vwẹ ọke rọ Ọmọ rọ ohwo. 27Ayen ria, ayen da, ayen rọvwọ, ayen vwo kpo orọvwe, bẹsiẹ ro rhi vwo te ọke ri Noa rhe vwọ ro okọ, oghwe na da rhe rhe ghwọrọ ayen ejobi. 28Ọ je họhọ obo rọ epha vwọ ọke ri Lọt–ayen ria, ayen da, ayen shẹ, ayen dẹ, ayen kọn, ayen bọn, 29ẹkẹvuọvo ẹdẹ ri Lọt ghwe vrẹn nẹ Sodọm, erhanre vẹ ibioso rẹ erhanre da rhọ nẹ odjuvwu rhe rhe ghwọrọ ayen ejobi– 30ọtiọye ọ je cha dia vwọ ẹdẹ ra da cha vwọ Ọmọ rọ ohwo phia. 31Vwọ ẹdẹ yena, e jẹn ohwo rọ họ okpo rọ uwevwi, rọ ekuakua rọye da họ evun rọ uwevwi, wotọ cha cha kua ayen no-o; e jẹn ohwo rọ họ obo udju rhivwi cha-a. 32Karohọ aye ri Lọt. 33Kohwo kohwo rọ guọnọ arhọ rọye sivwi ko kuofia, ẹkẹvuọvo kohwo kohwo ro ku arhọ rọye fia ko sivwo. 34Me ta kọ ovwan, vwọ ason yena eshare ivẹ cha dia ehwa ọvo; a cha reyọ ọvo re de jọ ọvo vwo. 35Eya ivẹ che wuye vwọ asan ọvo; a cha reyọ ọvo re de jẹ ọvo vwo.
36Eshare ivẹ che kpo udju, a cha reyọ ọvo re de je ọvo vwo.
37Ayen da ra kẹ, Tivọ vwo Ọrovwohwo? Ọ da ta kẹ ayen, Asan rẹ orivwi epha, etiyin ekana da ghwẹ koko.
Currently Selected:
Luk 17: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
