Luk 19

Jesu vẹ Zakiọs

1Ọ da vwẹriẹ Jeriko kọ wanvrẹn. 2Ọshare ọvo hẹ etiyin re se Zakiọs; onotu rẹ imiarhọghọ, kẹ ọdafe. 3Ọ da guọnọ Jesu mrẹ rọ riẹn ohwo rọ epha, ẹkẹvuọvo ọ gbe sa mrẹ-ẹ vwi fiki rẹ otu na, fikiridie ọ pha kuankọ. 4Ọtiọye na ọ da djẹ ka obaro re yeri urhe ri sikamọ re ọ vwọ sa mrẹ, kidie ọ cha wan idjerhe yena vrẹn. 5Ọke ri Jesu rhi vwo te asan na, o de ni enu ọ da ta kẹ, Zakiọs, jọphẹre wo woto rhe; kidie nonẹ na mi che wo uwevwi wẹn. 6Ọtiọye o de wotọ rhe okpokpakpa, ọ da reyọ vẹ aghọghọ. 7Ọke rẹ ayen vwọ mrẹ ayen ejobi ki guẹ nẹ, Ọ yanran re wo oruimwemwu. 8Zakiọs mudia ọ da ta kẹ Ọrovwohwo, Nighe, Ọrovwohwo, abọvo rẹ ekuakua mẹ me vwẹ ayen kẹ ivwiogbere; ọ da dianẹ me rha ghwa ohwo ọvo re, ke me rhan rhivwi ọhwọhwọ ẹne. 9Jesu da ta kẹ, Nonẹ na esivwo ro uwevwi nana, kidie ọmọ rẹ Ebraham o ruẹ. 10Kidie Ọmọ rẹ ohwo rhere rhe guọnọ re o sivwi i ri ghwruru.

Itẹ re Ikpahọ Ihwe na

(Matiu 25.14-30)

11Rẹ ayen vwo nyo imu nana, o de rhe kpe itẹ ọfa, fikiridie o si kẹrẹ Jerusalẹm re, fikiridie ayen roro nẹ uvie rẹ Ọghẹnẹ na cha rhe nanana. 12Eriyin na ọ da ta, Okpohwo ọvo de kpo isiorho shesheri ra reyọ ogangan rẹ ovie rere ọ rhivwi rhe. 13O se idibo rọye ihwe, ọ da vwẹ ikpaho ihwe vwọ kẹ ayen, ọ da ta kẹ ayen, Wa vwẹ ena cho eki bẹsiẹ me vwọ rhe. 14Ẹkẹvuọvo ivun rọye gbe vwerhe emotọ na-a ayen de ji ikọn nene, tanẹ, Avwanre gbe guọnọ nẹ ohwo nana re vwẹ enu rẹ avwanre-e. 15Rọ vwọ dẹ ogangan rẹ ovie na nu, o de rhivwi rhe, o de se idibo rọye, ro kere igho kẹ na, rere ọ riẹn uche erere rẹ ayen mrẹre vwẹ eki ẹchuọ na. 16Ọ rẹsosuọ de bro rhe tanẹ, Ọrovwohwo, ikpahọ wẹn rhoma mrẹ erere rẹ ikpahọ ihwe ọfa. 17Ọ da ta kẹ, Wo runọ, odibo rẹ esiri! Fikiridie wọ dia ọvwata vwẹ ememu otete, ku wo che vwo ogangan vwẹ enu rẹ irere ihwe. 18Ọrivẹ da rhe, tanẹ, Ọrovwohwo, ikpahọ, wẹn rhoma mrẹ ikpahọ iyori ọfa. 19Ọ da ta kẹ, ku wọ cha re vwẹ enu rẹ irere iyori. 20Etiyin ọfa da rhe, tanẹ, Ọrovwohwo, ikpahọ wẹn na, me vwẹ amwa pharọ mi de sionu; 21kidie oshọ wẹ mu vwe, fikiridie wẹ ohwo ro siaro; obo wo phihọ otọ-ọ ọye wọ tọrọ, obo wọ kọnre-e ọye wo vuẹ. 22Ọ da ta kẹ, obo ri nẹ unu wẹn rhe ọye mi vwo brorhiẹ hwe we wẹ odibo umwemwu na! Wọ riẹnre nẹ mẹvwẹ ohwo ro siaro, rọ tọrọ obo mi phihọ otọ-ọ, ro vuẹ obo Me kọnre-e? 23Kidie wo gbi phi igho mẹ phihọ ekpo-o, rere ọke me da rhe me reyọ kugbe isuo-o? 24Ọ da ta kẹ otu ri mudia vwẹ etiyin, Reyọ ikpahọ na mie, re wọ vwọ kẹ ọ ro vwo ikpahọ ihwe na. 25(Ayen da ta kẹ, Ọrovwohwo, o vwo ikpahọ ihwe!) 26Me ta kẹ wẹ nẹ, kohwo kohwo ro vwori ọye a vwọ ba kẹ; ẹkẹvuọvo ọ ro vwori-i, emerha ro vwori na ka reyọ mie. 27Ẹkẹvuọvo vwọ kẹ ivwighrẹ mẹ nana, re guọnọre nẹ me ria vwẹ enu rẹ aye-en na, vwẹ ayen rhe etinẹ ra teyọ ayen hwe vwẹ irharo mẹ.

Jesu ne udje ro Jerusalẹm vwẹ Aghọghọ

(Matiu 21.1-11; Mak 11.1-11; Jọn 12.12-19)

28Ọke ro vwọ ta ọnana nu, ọ da yan hẹ obaro, ro kpo Jerusalẹm. 29Ọke ro rhi vwo si kẹre Bẹtfagi kugbe Bẹtani, vwẹ ugbenu re se Ọlivẹt, o de ji idibo rọye ivẹ, 30tanẹ Yanran kpo ọko ro hirhe aro ku ovwan na, asan wa da ghwa ruọ na wa cha mrẹ upene rẹ ekẹtẹkẹtẹ re churu, rẹ ohwo ji tidia dẹvo-o; rhan re vwo rhe vwe. 31Ọ da dianẹ ohwo nọ ovwan nẹ, Die ovwan vwọ rhan? ku wọ ta ọnana, Ọrovwohwo re guọnerọ. 32Ọtiọye na otu re jiri na yanran ayen da mrẹ kirobo rọ ta kẹ ayen na. 33Ọke rẹ ayen ghwa vwọ rhan upene rẹ ekẹtẹkẹtẹ na, ihwo ri vworo da ta kẹ ayen, Die wa vwọ rhan upene na? 34Ayen da ta, Ọrovwohwo re guọnerọ. 35Ayen da reyọ vwo rhe Jesu, rẹ ayen vwọ vwẹ iwun rayen vwọ hwa enu rẹ upene na nu ayen de mu Jesu vwo tidia. 36Rọ vwọ gua yanran re, ayen da riẹn iwun rayen vwọ hwa idjerhe. 37Asakiephana ro vwo siẹ kẹrẹ, ọghwrọrọ rẹ Ugbenn rẹ Oliv urogho rẹ idibo na de kuvwie, ke ghọghọ ki jiri Ọghẹnẹ fiki rẹ iruo rẹ ẹgba rọye rẹ ayen mrẹre, 38tanẹ, Ebruba kẹ Ovie rọ cha vwẹ odẹ rẹ Ọrovwohwo! Ufuoma vwẹ odjuvwu urinrin vwẹ asan ro kpenu! 39Ẹvo vwi Farisi na re hẹ usun rẹ urogho na da ta kẹ, Oyono, ghwọ ku idibo wẹn na. 40Ọ da kpahe, Me ta kẹ wẹ, enana de rhurhu unu, ibiekpẹn na dẹn che jiri uvwe.

41Ọke ro rhi vwo si kẹrẹ rọ vwọ mrẹ orere na ọ da viẹ kẹ, 42tanẹ, Mane ku wọ sa riẹn imu re kẹ ufuoma vwenẹ! Ẹkẹvuọvo Asakiephana e si ayen nu kẹ ẹro wẹn. 43Kidie ẹdẹ cha kẹ wẹ, ọke rẹ ivwighrẹ wẹn cha vwọ hwa hẹrhẹ owẹ re da gba riariẹ owẹ, rẹ ayen de ke we họ vwi kabọ kabọ, 44ra da vwẹ owẹ ghwiotọ, wẹ kugbe emọ wẹn vwẹ evun wẹn, ayen che ji oragha re mu kpahe ohwohwo vwo vwẹ enu rẹ ọfa-a; fikiridie wọ riẹn ọke ro che vwo te we oma-a.

Ephorho rẹ Uwevwi rẹ ẹga na

(Matiu 21.12-17; Mak 11.15-19; Jọn 2.13-22)

45Ọ ro uwevwi rẹ ẹga na kọ djẹ ayen otu re shẹ, 46tanẹ, E siro, Uwevwi mẹ hẹ uwevwi rẹ ẹrhovwo; ẹkẹvuọvo we vwiro ru unu rẹ iji.

47Ko yono kẹdẹ kẹdẹ vwẹ uwevwi rẹ ẹga na. Ilori rẹ irherẹn kugbe isiẹbe kugbe ikpihwo rẹ ihwo na da guọnọ obo rẹ ayen vwọ ghwọrọ; 48ẹkẹvuọvo ayen mrẹ obo rẹ ayen se ru-u, kidie ihwo na ejobi churu obọ mu ota rọye.

Currently Selected:

Luk 19: UBV77

Highlight

Copy