Luk 14

Jesu Sivwi Ọshare ro she Enwẹnwẹn

1Vwẹ ẹdidjala ro vwo kpo uwevwi rẹ osun ri Farisi ọvo ra re emu, ayen ke rhẹrẹ. 2Nighe, ohwo ọvo hẹ etiyin ro she enwẹnwẹ. 3Jesu da ta ota kẹ eriẹn urhi kugbe Farisi, tanẹ, O fori re vwo sivwi vwẹ ẹdidjala, eyẹ ẹjo? 4Ẹkẹvuọvo ayen de fotovwi. Etiyin ọ da reyọ o de sivwo, o de siobọ no kpo. 5Ọ da ta kẹ ayen, Ono vwẹ usun rẹ ovwan na, ro vwo ekẹtẹkẹtẹ eyẹ erhuẹn ro she phihọ orhare, ro je siono kpatakpata vwẹ ẹdidjala? 6Ayen gbe sa kpahe phihọ ọnana-a.

Uyono kẹ Ihwo re se kpo Orẹ vẹ Ohwo ro Se Ayen

7Asakiephana o de kpe itẹ ayen otu re seri, rọ vwọ mrẹ obo re ayen sanọ asan ro vwo ọghọ, o da ta kẹ ayen, 8Ọke re de se ọvo vwẹ usun rẹ ovwan kpo orẹ rẹ ọpha, wo tidia asan ro vwo ọghọ-ọ, siẹvo yo ji se ohwo ọfa rọ rhonọ owẹ; 9ọ ro se ovwan ivẹ na kọ rhe, ọ me ta kẹ wẹ, Vwẹ asan kẹ ohwo nana, wọ vẹ omaẹvuọ ko re tidia asan ro kpotọ. 10Ẹkẹvuọvo e de se we, yanran re tidia asan ro kpotọ, rere siẹ rẹ ohwo ru wo wori na da rhe kọ ta kẹ owẹ, Oko, yanran kpo obo ro kpenu; etiyin re ku wo vwo ọghọ vwẹ obaro rẹ ayen ejobi re vẹ owẹ gbe tidia imẹjẹ na. 11Kidie kohwo kohwo ro mu oma kpenu ka phọphọ, ohwo ro mu ọghọ kẹ oma ka kparọ kpenu.

12Ọ da rhoma ta kẹ ohwo ro sere na, Ọke wo de chere emu kẹ ihwo eyẹ okpọre, wo se igbeyan eyẹ e re dia kẹre owẹ-ẹ, siẹvo ayen da rhoma se wẹ, ya hwa osa kẹ wẹ nure. 13Ẹkẹvuọvo wẹ da re orẹ, se ivwiogbere, ikruabọ, ikpono, irhuẹro, 14ke bruba kẹ wẹn, fikiridie ayen sa hwa osa kẹ wẹ-ẹ. A cha rhoma hwa osa kẹ wẹ vwẹ evrenushi rẹ evwata na.

Itẹ rẹ Orẹ Rode na

(Matiu 22.1-10)

15Ọke rẹ ọvo vwẹ usun rẹ otu re vẹ ọye gbe tidia imẹjẹ na vwo nyo Ọnana, ọ da ta kẹ, Ebruba kẹ ohwo rọ cha re emu vwẹ uvie rẹ Ọghẹnẹ na. 16Ẹkẹvuọvo ọ da ta kẹ, Ohwo ọvo de vwo okpọre, o de se ihwo buebu; 17ọke rẹ okpọre na vwo te, o de ji idibo rọye bru ihwo ro seri jovwo na nẹ, A mọ; kidie emu ejobi gbare. 18Ẹkẹvuọvo ihwo na ejobi ki vwerhe oma. Ọ rẹsosuọ da ta kẹ, Me dẹ udju, me ra re me ra mrẹ tavwe; biko, fa vwẹ. 19Ọfa da ta, Me dẹ ekru rẹ irhuẹn iyori, Me yanran re ni ayen tavwe; biko, fa vwẹ. 20Ọfa da rha ta, E sun aye rhe vwe, vwẹ ọtiọye na me sa rhe-e. 21Ọtiọye na odibo na da rhe rhe nẹ iyẹnrẹ kẹ onini rọye. Etiyin ọ ro vwo uwevwi na da vwẹ ivuemiovwo ta kẹ odibo rọye, yanran jọphẹre ro irhuvwu na kugbe idjerhe rẹ orere na, ru wo se ivwiogbere, ikruabọ kugbe irhuẹro kugbe ikpono. 22Odibo na da ta, Ọrovwovwe, obo wọ tare na e ruro gba, yẹ ẹdia je jerọ. 23Onini na da ta kẹ odibo na, yanran kpo idjerhe ride na vẹ otọ rẹ irhe na, re wọ gba ayen rhe, rere uwevwi mẹ vwọ vọn. 24Kidie me ta kẹ wẹ, ọvuọvo rẹ otu ri mi seri jovwo na gbe cha re okpọre mẹ na ọfa-a.

Aghanre rẹ Odibo Egbe

(Matiu 10.37-38)

25Asakiephana urogho rode de nene; ọ rhẹriẹ oma ọ da ta kẹ ayen, 26Ọ da dianẹ ohwo bru uvwe rhe ro sa sen ọsẹ robọ rọye kugbe oni kugbe aye kugbe emọ kugbe iniọvo rẹ eshare vẹ emetẹ-ẹ, tobọ arhọ rọye dede-e, ọ sa dia odibo mẹ-ẹ. 27Kohwo kohwo ro rhe mu agbagba rọye ro de nene uvwe-e, ọ sa dia odibo mẹ-ẹ. 28Kidie ono vwẹ usun rẹ ovwan, rọ guọnọ bọn ohẹrhẹ, ro de je tidia te otọ roro unu ro muru, so se vwo obo ro te vwo ruo gba? 29Ọ gbe dia ọtiọye-e, ọke ro de mu uchivwo rọye vi nu, rọ gbe sa bọn re-e, ihwo re mrẹrẹ ejobi ke vwọ jehwẹ, 30tanẹ, Ohwo nana mu ẹbọn phihọ ọ gbe sa bọn re-e. 31Eyẹ didi ovie, re cha kpare ofovwi vwọ so ovie ọfa, ro de je roro tavwe sẹ udu rẹ uriori ihwe sa gba ọ ro vwo uriori uje? 32Ọ gbe dia eriyi-in, ọke rẹ ọ ro chekọ vwọ hẹ ogboko ye, ko ji ikọn ra guọnọ arhuẹrẹ. 33Vwẹ ọtiọye na, kohwo kohwo rọ rha sen emu kemu ro vwori-i ọ sa dia odibo mẹ-ẹ.

Ughweri aka ro vwo Avwerhe-e

(Matiu 5.13; Mak 9.50)

34Ughweraka yoma; ẹkẹvuọvo ughweraka de ku avwerhe rọye kufia, kidie e vwo ruo vwerhe? 35O gbi fo kẹ otọ eyẹ erhurhu-u; ihwo ki kuo fia. Ọ ro vwo erhọn ro vwo nyo, e jo nyo.

Currently Selected:

Luk 14: UBV77

Highlight

Copy