Luk 15

Itẹ rẹ Ogegede ro Ghwruru

(Matiu 18.12-14)

1Asakiephana imiarhọghọ kugbe iruimwemwu ki siẹ kẹrẹ rere ayen nyo ota rọye. 2Farisi kugbe isiẹbe ki guo, tanẹ, Ohwo nana reyọ iruimwemwu ọ vẹ ayen mia ria kuẹgbe.

3Ọtiọye o de kpe itẹ nana kẹ ayen. 4Didi ohwo vwẹ usun rẹ ovwan, ro vwo igodẹ ujori, ọ da dianẹ ọvo vwẹ usun rẹ ayen ghwruru, ọ gbe yan jẹ ọvo nuro vwẹ ujori na vwo vwẹ evun rẹ aghwa, ra guọnọ ọvo ro ghwruru na, bẹsiẹ rọ vwọ mrẹ? 5Ọke rọ da mrẹ re, ko muo kpahe akoko, rọ ghọghọ. 6Ọke ro de rhi te uwevwi, ko se igbeyan rọye koko kugbe ihwo re dia kẹrẹ, kọ ta kẹ ayen nẹ, Nene uvwe ghọghọ, kidie me mrẹ ogodẹ mẹ ro ghwruru. 7Ọtiọye ọ epha, me ta kẹ ovwan nẹ, aghọghọ herọ vwẹ obo odjuvwu vwẹ enu rẹ oruimwemwu ọvo ro kurhẹriẹ vwọ nọ evwata ọvo nuro vwẹ ujori re gbe guọnọ ekuorhẹriẹ-ẹ.

Itẹ rẹ Igho ri Ghwruru

8Eyẹ didi aye ri vwo idọnọ efuanfon ihwe, rẹ ọvo rọye de ghwru, ro de ji urhukpẹ egbe rọ de jẹ uwevwi ehwerhe rọ da nabọ guọnọ bẹsiẹ rọ vwọ mrẹ? 9Ọke rọ da mrẹ re, ko se igbeyan rọye koko kugbe ihwo re dia kẹrẹ, tanẹ, Nene uvwe ghọghọ, kidie me mrẹ idọnọ mẹ ro ghwruru. 10Ọtiọye ọ epha, me ta kẹ ovwan nẹ, aghọghọ herọ vwẹ obaro rẹ emakashe rẹ Ọghẹnẹ vwẹ enu rẹ oruimwemwu ọvo ro kurhẹriẹ.

Itẹ rẹ Ọmọ ro Ghwruru

11Ọ da ta, Ọshare ọvo herọ ro vwo emeshare ivẹ; 12ọ rẹ otete da ta kẹ ọsẹ rọye, Baba, kẹ vwẹ ẹkẹn uku mẹ ro te vwe. Ọ da ghare eyere rọye kẹ ayen. 13O ji ghwe krinọ-ọ, ọ rẹ otete na ghwe kru eghwa rọye koko o ghwe muẹ o de kpo isiorho, kẹ oboyi ọ da rhaphiẹ ekuakua na ejobi kufia. 14Rọ vwọ rhaphiẹ ayen ejobi nure, owẹvwe rode de rhi fi vwẹ orho yena, akpọ kọ bẹn. 15O de re gbe odibo kẹ ọmotọ rẹ orho yena ọvo, o de jo kpo obo aghwa rọye ra ghẹrẹ isi. 16Ephorhienẹ ra vwọ ghẹrẹ isi na kọye ọ vẹ ayen gbe sivwẹ ria; ohwo ọvuọvo rha kẹ ria-a. 17Ẹkẹvuọvo ọke rẹ iroro vwo bro rhe ọ da ta kẹ oma rọye, Bro idibo ọsẹ mẹ vwori re ria evun vọn re je mrẹ ria chekọ, ẹkẹvuọvo yẹ owẹvwe hwe vwe ghwẹ vwẹ obonẹ. 18Mi vrẹn mi bru ọsẹ mẹ, me ta kẹ, Baba, mi gbe odjuvwu ku mi ji gbe we ku rhe; 19mi gbi fo ohwo re se ọmọ wẹ-ẹn, vwẹ ovwẹ ru kerẹ odibo wẹn ra hwa osa kẹ. 20O de ghine vrẹn o de bru ọsẹ rọye ra. Ẹkẹvuọvo rọ vwọ cha vwe ogboko re; ọsẹ rọye da mrẹ ehrọre rọye da riọ, ọ da djẹ ra gbanọ ọ da fiọnfiọn unu. 21Ọmọ na da ta kẹ, Baba, mi gbe odjuvwu ku mi ji gbe we ku rhe; mi gbi fo ohwo re se ọmọ wẹn ọfa-a. 22Ẹkẹvuọvo ọsẹ na da ta kẹ idibo rọye, Jọphẹre ra reyọ adagba rhe, re kuo phihọ, ru we ku isa phihọ obọ, ku isabato phihọ awọ; 23we mu upene rẹ erhuẹn na rhe re hwe, re jẹn avwanre ra ghọghọ; 24Kidie ọmọ me nana ghwuru jovwo, ọ rhoma varhe; o ghwruru jovwo, a rhoma mrẹ. Kẹ ayen ghọghọ.

25Asakiephana yẹ ọmọ kpako na kpo aghwa; rọ vwọ cha che si kẹre uwevwi re, o de nyo ihwehworo vẹ eha. 26O de se odibo ọvo ọ da nọ obo re phiare. 27Ọ da ta kẹ; Oniọvo wẹn rhere, ọsẹ wẹn de hwe upene rẹ erhuẹn na, fikiridie o rhivwi rhe egberhẹnẹdẹ. 28Ẹkẹvuọvo ivun de miovwo, ọ gbe rhọvwe ro egodo-o. Ọsẹ rọye da rhe ọ da rẹ, 29ẹkẹvuọvo ọ da kpahe kẹ ọsẹ rọye, Nighe, ikpe buebu na me vwọ ga wẹ re, me je chọ urhi wẹn dẹvo-o; yi wo ji mu ẹmẹvwe kẹ vwẹ, rere me vẹ igbeyan mẹ vwọ ghọghọ-ọ. 30Ẹkẹvuọvo rẹ ọmọ wẹn nana vwọ rhe, ọ rọ vẹ igberadja gba ghwọrọ eyere wẹn nu na, wo de hwe upene rẹ erhuẹn na kẹ! 31Ọ da ta kẹ, Mọmẹ, ọmọ mẹ wo ruẹ bẹdẹ, obo ri mi vwori ejobi ewẹn. 32O fori re vwo omavwerhe ra ghọghọ, kidie oniọvo wẹn nana ghwuru jovwo, ọ rhoma varhe, o ghwruru jovwo, a rhoma mrẹ,

Currently Selected:

Luk 15: UBV77

Highlight

Copy