Jọn 11

Ughwu ri Lazarọs

1Asakiephana ohwo ọvo kọ honvwa, Lazarọs ri Betani, ọko rẹ Meri vẹ oniọvo rọye Mata. 2Meri na re vwẹ ori ghworo Ọrovwohwo ọ da vwẹ ẹto rọye vwo rhie awọ rọye, ọye oniọvo rọye Lazarọs họnvwa na. 3Ọtiọye na iniọvo rọye rẹ emetẹ na de ji ohwo bru Jesu ra, tanẹ, Ọrovwohwo, ọ re wọ guọnọre na họnvwa. 4Ẹkẹvuọvo ọke ri Jesu vwo nyo ọ da ta, Emiavwe nana ọ dia ọ rẹ ughwu-u; ọ rẹ a wan vwẹ urinrin vwọ kẹ Ọghẹnẹ, rere Ọmọ rẹ Ọghẹnẹ vwo se vwo urinrin fiki rọye.

5Asakiephana Jesu guọnọ Mata vẹ oniọvo rọye rẹ ọmọtẹ kugbe Lazarọs. 6Ọtiọye na ro vwo nyo nẹ ọ họnvwa, ọ da da oma ji ẹdẹ ivẹ vwẹ asan rọ epha jovwo. 7Etiyin rẹ ọnana vwọ wan nu ọ da ta kẹ idibo rọye, E jẹn avwanre rhoma kpo Judia. 8Idibo na da ta kẹ, Rabbi, ihwo ri Ju na guọnọ owẹ phiẹ hwe vwẹ asakiephana, kẹ oboyi wọ rhoma ra na? 9Jesu da kpahe, Ọ dia unọke ihwivẹ re dia ẹdọke? Ohwo da yan vwẹ ogheruvo, o se she-e, kidie ọ mrẹ urhukpẹ rẹ akpọ nana. 10Ẹkẹvuọvo ohwo da yan vwẹ evun rẹ ason, o she, fikiridie urhukpẹ na hẹ evun rẹ oma rọye-e. 11Enẹ o ta nu, ọ da ta kẹ ayen, Ugbeyan rẹ avwanre Lazaros shero ovwerhẹ, ẹkẹvuọvo me ra ra rhọvwọ nẹ ovwerhẹ. 12Idibo na da ta kẹ, Ọrovwohwo, o de shero ovwerhẹ, yọ je cha rhọvwọ. 13Asakiephana Jesu ta ota rẹ ughwu rọye, ẹkẹvuọvo ayen de roro nẹ omaerovwo vwẹ ovwerhẹ ọye ọ ta. 14Etiyin Jesu da ta kẹ ayen phia, Lazarọs ghwuru; 15vwi fiki rẹ ovwan oma vwerhe ovwẹ ne me hẹ eriyi-in, rere ovwan vwo segbuyota. Ẹkẹvuọvo e gbe je bro ra. 16Tọmọs, re se Agbava, da ta kẹ otu rọye idibo na, E jẹn avwanre je ra rhe, rere a vẹ ọye ghwu.

Jesu hẹ Evrẹnushi kugbe Arho na

17Asakiephana ri Jesu vwọ rhe, ọ da mrẹ Lazarọs vwẹ ushi re shiri ẹdẹ ẹne nure. 18Betani kẹrẹ Jerusalẹm, kerẹ uroko ivẹ, 19ihwo ri Ju buebu bru Mata kugbe Meri rhe rhi bru ayen uche fiki rẹ oniọvo rayen na. 20Ọke ri Mata vwo nyo ni Jesu cha, ọ da yanran ra vwa, yi Meri tidia vwẹ evun rẹ uwevwi. 21Mata da ta kẹ Jesu, Ọrovwohwo, ọ diane wọ hẹ etinẹ nọ, oniọvo mẹ na e ghwu-u. 22Yẹ asakiephana me riẹnre nẹ kemu kemu ru wọ nọ mie Ọghẹnẹ, Ọghẹnẹ sa vwọ kẹ owẹ. 23Jesu da ta kẹ, Oniọvọ wẹn che vrẹn vwobọ. 24Mata da ta kẹ, Me riẹnre nẹ o che vrẹn vwobọ vwẹ evun rẹ evrẹnushi na vwẹ ẹdẹ rẹ obo oba na. 25Jesu da ta kẹ, Mẹvwẹ hẹ evrẹnushi na kugbe arhọ na; ọ ro se vwe gbuyota, owenẹ o ghwu, yọ je cha rhọ, 26ohwo kohwo rọ herọ ro se vwe gbuyota o gbi che ghwu bẹdẹ-ẹ. Ku wo se ọnana gbuyota? 27Ọ da ta kẹ, E, Ọrovwohwo; mi segbuyota nẹ wẹ hẹ Kristi na, Ọmọ rẹ Ọghẹnẹ na, ọye hẹ ọ rọ cha akpọ na.

Jesu Viẹre

28Ọke rọ vwọ ta ọnana nu, ọ da yanran re se oniọvo rọye Meri, ọ da bẹbẹ ta kẹ, Oyono na hẹ etinẹ o re se we. 29Ọke ro vwo nyo, o de vrẹn kpre o de bro rhe. 30Asakiephana yi Jesu ji te obo ọko na-a, ẹkẹvuọvo yọ je hẹ asan ri Mata da vwa na. 31Ọke rẹ ihwo ri Ju re vẹ ọye gba hẹ evun rẹ uwevwi na, ri bro uche na, vwọ mrẹ Meri ro vrẹri kpre ro otafe na, ayen de nene, ki roro nẹ o kpo obo ushi na da ra viẹ vwẹ etiyin. 32Etiyin Meri, vwo te asan ri Jesu epha rọ vwọ mrẹ, o de she teye awọ rọye, ta kẹ nẹ, Ọrovwohwo, ẹ dianẹ wọ hẹ etinẹ nọ, oniọvo mẹ na e ghwu-u. 33Ọke ri Jesu vwọ mrẹ rọ viẹ, kugbe ihwo ri Ju ri bruro rhe re viẹ rhe, o de se iherihe rẹ oviẹ ọ da da gangan; 34Ọ da ta, Tivọ we shiro phihọ? Ayen da ta kẹ, Ọrovwohwo, mọ wọramrẹ. 35Jesu da viẹ. 36Ọtiọye ihwo ri Ju na da ta, nighe mavọ ọ guọnerọ te. 37Ẹkẹvuọvo evo rẹ ayen da ta, Kẹ ohwo nana ro se rhiẹ ẹro rẹ orhuẹro na gbi se ru ọshare nana ro de je ghwo?

Jesu Rhọvwọ Lazarọs nẹ Ughwu rhe

38Etiyin Jesu, da rhoma se iherihe kokodo, o de rhi te ushi na; ushi na ẹmwa, a vwẹ oragha rhurho. 39Jesu da ta, E mu oragha na no. Mata, oniọvo rẹ ohwo ro ghwuru na, da ta kẹ, Ọrovwohwo, vwẹ ọke nana yo gbore, kidie o ghwuru etiyin ason ẹne re. 40Jesu da ta kẹ, Me ta kẹ owẹ nẹ wo de segbuyota wọ cha mrẹ urinrin rẹ Ọghẹnẹ? 41Ọtiọye na ayen de mu oragha na no. Jesu da kpare opharo rọye kpenu ọ da ta, Ọsẹ, me kpẹvwẹ owẹ ru wo vwo nyo vwe. 42Me riẹnre nẹ wo nyo vwe kọke kọke, ẹkẹvuọvo me ta ọnana fiki rẹ ihwo ri mudia vwẹ etinẹ na, rere ayen vwo segbuyota nẹ wọwẹ ri ghine ji uvwe. 43Ọke rọ vwọ ta ọnana nu, ọ da van gangan se, Lazarọs, yanrhe. 44Ohwo ro ghwuru na da yanrhe, a vwẹ ukpoyibo gba abọ vẹ awọ rọye, a vwẹ amwa gba opharo rọye. Jesu da ta kẹ ayen, A rhan, rere e jo kpo.

A gba Ẹguare Rhurhu Jesu

(Matiu 26.1-5; Mak 14.1-2; Luk 22.1-2)

45Ihwo ri Ju buebu, ri bru Meri rhe re mrẹ obo ro ruru, de segbuyota; 46ẹkẹvuọvo evo rẹ ayen yanran bru otu ri Farisi ayen de gbe obo ri Jesu ruru kẹ ayen. 47Ọtiọye ilori rẹ irherẹn kugbe otu ri Farisi de se ẹguare koko, ayen da ta, kidie avwanre ru? Kidie ohwo nana ruẹ eka buebu re. 48Avwanre da yan jovwo enẹ, kohwo kohwo che segbuyota, ihwo ri Rom ke cha rhe rhe guọghọ asan ọfuanfon rẹ avwanre kugbe ẹgborho rẹ avwanre. 49Ẹkẹvuọvo ọvo vwẹ usun rẹ ayen, re se Kaifas, rọ dia orherẹn rode vwẹ ukpe yena da ta kẹ ayen, Ovwan riẹn emuọvo kakaka-a; 50ovwan vwo ẹruọ nẹ o fori kẹ ovwan rẹ ohwo ọvo vwo ghwu kẹ ihwo na, rere ẹgborho na vwo jẹ ghwọrọ. 51Ọ vwẹ ọhorọho rọye ọvo ta ọnana-a, ẹkẹvuọvo rọ vwọ dia orherẹn rode vwẹ ukpe yena kọye ọ vwọ mraro nẹ Jesu che ghwu kẹ ẹgborho na, 52ọ je dia ẹgborho na ọvo-o, ẹkẹvuọvo ro vwo se emọ rẹ Ọghẹnẹ re hrabọ ro isi na ejobi koko phihọ ọvuọvo. 53Ọtiọye na kẹ ẹdẹ yena yanran ayen de se umẹ rẹ obo rẹ ayen vwo hwe ghwu.

54Jesu gbe sa vwẹ oma phia gangan vwẹ ohri ri Ju na-a, ẹkẹvuọvo o de nẹ etiyin kpo orho rọ hẹ obo aghwa, vwo kpo orho re se Ifrem; kẹ etiyin ọ vẹ idibo rọye diare.

55Asakiephana Ewanvrẹn na rẹ ihwo ri Ju na te otọ re, buebu da yanran kpo obo orho kpo Jerusalẹm tavwe rẹ Ewanvrẹn ki rhi te, re ru oma rẹ ayen fuanfon. 56Kẹ ayen guọnọ Jesu ayen ke ta kẹ ohwohwo rẹ ayen vwo mudia vwẹ uwevwi rẹ ẹga na, Die wo rori? Ro vwo jẹ orẹ na ẹcha? 57Asakiephana ilori rẹ irherẹn kugbe Farisi ji urhi nẹ ohwo da ghwa riẹn asan rọ epha, o jẹn ayen riẹn, rere ayen mrasan muo.

Currently Selected:

Jọn 11: UBV77

Highlight

Copy