Jọn 12

A vwẹ Ori Ghworo Jesu vwi Bẹtani

(Matiu 26.6-13; Mak 14.3-9)

1Ẹdẹ esan tavwe rẹ Ewanvrẹn ki rhi te, Jesu da rhe Betani, asan ri Lazarọs epha, ọ ri Jesu rhọvwọ nẹ ughwu na. 2Etiyin ayen de chere emu kẹ vwẹ ovwọnvwọn yena; Mata kọye chere emu na, ẹkẹvuọvo Lazarọs kẹ ọvo rọ vẹ ayen gbe tidia vwẹ imẹjẹ na. 3Meri da reyọ ori ri spaknad ghaghare ẹhọhọ rọye ikpahọ ọvo rẹ ovwavwọn o de vwo ghworo awọ ri Jesu ọ da vwẹ ẹto rẹ uyovwi rọye rhie; uwevwi na da rhe vọn vẹ ọnrhe ororo rẹ ori na. 4Ẹkẹvuọvo Judas Iskariọt, ọvo vwẹ idibo rọye (ọye ọ rọ cha shẹ na), ọ da ta, 5Kidie a gbe shẹ ori nana ikọba ujori erha re a vwọ kẹ ivwiogbere-e? 6Ọnana ọ tare, ọ dianẹ kọ davwerhọn rẹ ivwiogbere na-a, ẹkẹvuọvo oji o ruẹ, ekpeti rẹ igho na vwo rhe na kọ wanvwiẹ obo re hẹ evun rọye. 7Jesu da ta, Jẹn aye na vwo, e jẹn ọ yọnrọn fiki rẹ ẹdẹ rẹ esho mẹ. 8Ivwiogbere na vẹ ovwan gba herọ vwẹ ọke ejobi, ẹkẹvuọvo me vẹ ovwan sa dia vwẹ ọke ejobi-i.

A gba Ẹguaro rhurho Lazarọs

9Ọke rẹ otu ri Ju ri kokori gbidi na vwọ riẹn nẹ ọ hẹ etiyin, ayen da rhe, ọ dianẹ ki fiki rẹ Jesu ọvo-o ẹkẹvuọvo re ayen vwọ mrasan mrẹ Lazarọs rhe, ri Jesu rhọvwọ nẹ ughwu rhe na. 10Ọtiọye na ilori rẹ irherẹn na ke guọnọ obo rẹ ayen vwọ teye Lazarọs hwe, 11fikiridie, oma rọye ọye ihwo ri Ju buebu vwọ yan jẹ ayen vwo re se Jesu gbuyota na.

Jesu nẹ udje rẹ Aghọghọ ro Jerusalẹm

(Matiu 21.1-11; Mak 11.1-11; Luk 19.28-40)

12Vwẹ ẹdẹ rivẹ na ihwo buebu na re rhe orẹ na de nyo nẹ Jesu cha Jerusalẹm. 13Ọtiọye na ayen da reyọ ewanvwe rẹ iriẹ ayen da yanran ra vwa, ayen de kuvwie, Hozana, Ebruba kẹ ọ rọ cha vwẹ odẹ rẹ Ọrovowhwo, mrẹmrẹ ọye hẹ Ovie rẹ Izrẹl. 14Jesu da mrẹ upene rẹ ekẹtẹkẹtẹ o de tidia; kirobo re siro,

15A djẹ oshọ-ọ, ọmọtẹ ri Zayọn;

nighe, ovie wẹn cha,

o tidia vwẹ enu rẹ upene rẹ ekẹtẹkẹtẹ.

16Ọnana sa ro idibo na vwẹ ẹsosuọ-ọ; ẹkẹvuọvo ọke ra vwọ vwẹ urinrin kẹ Jesu nu, kẹsiẹye ayen ke rhe karohọ nẹ e si ọnana kpahọ nẹ e ruro kẹ nure. 17Otu na re vẹ ọye gba herọ vwẹ ọke ro vwo se Lazarọs nẹ ushi rhe rọ da rhọvwọ nẹ ughwu rhe na da dia iseri. 18Otọ rẹ obo rẹ otu na vwọ yan bro ra kẹ ọna nẹ ayen nyori nẹ o ru emu rẹ igbunu nana. 19Farisi na da ta kẹ ohwohwo, Ovwan rha mrẹ nẹ ovwan se ru emuọvo-o; nighe, akpọ na re nene.

Ihwo ri Grik Evo Guọnọ Jesu mrẹ

20Asakiephana vwẹ ohri rẹ ihwo ri kpo orẹ na ra ga ẹga na ihwo ri Grik evo herọ. 21Ọtiọye na ayen de bru Filip, rẹ ohwo ri Bẹtsaida vwi Galili, ayen da ta kẹ, Ọga, avwanre guọnọ Jesu mrẹ. 22Filip yanran ọ da vuẹ Andru; Andru vẹ Filip rhe vrẹn ayen da rhe ta kẹ Jesu. 23Jesu da kpahe kẹ ayen, Ọke na tere ra vwọ vwẹ urinrin kẹ Ọmọ rẹ ohwo re. 24Uyota, uyota, me ta kẹ ovwan, jokpa nẹ ubi rẹ ọka she phihọ otọ ro de ghwu-u, kọye ọvo kpoi re dia; ẹkẹvuọvo o de ghwu, kọ mọ emamọ buebu. 25Ọ rọ guọnọ rọye ko kuofia; ohwo ro ku arhọ rọye fia vwẹ akpọ nana kọ sẹro rọye re te arhọ ro vwo oba-a. 26Ohwo da ga vwẹ, ko nene uvwe; asan re me epha, kẹ etiyin idibo mẹ je dia rhe; ohwo da ga vwẹ, Ọsẹ na kọ vwẹ ọghọ kẹ.

A kpare Ọmọ rẹ Ohwo kpenu

27Asakiephana ẹnwẹ mẹ ko kpogho. Kidie me cha ta, Ọsẹ, sivwi uvwe nẹ ọke nana? Ejo, kidie fiki rẹ ọnana na me vwọ rhe rhi te ọke nana na. 28Ọsẹ, vwẹ urinrin kẹ odẹ wẹn. Etiyin urhuru ọvo de nẹ odjuvwu rhe, me vwẹ urinrin kẹ nure, me je rhoma vwẹ urinrin kẹ. 29Otu ri mudia kẹrẹ etiyin de nyo ayen da ta nẹ agbrara vare. Efa da rha ta, Amakashe ta ota kẹ. 30Jesu da kpahe, Urhuru nana rhere fiki rẹ ovwan, ọ dia fiki mẹ-ẹ. 31Asakiephana hẹ ẹdjọeguo rẹ akpọ nana, asakiephana a vwọ djẹ osun rẹ akpọ na kufia, 32mẹvwẹ dẹn, ọke ra da kpare ovwẹ kpenu nẹ akpọ na, ki mi si ihwo buebu nene oma mẹ. 33Ọ ta ọnana vwo dje oghẹre rẹ ughwu ro che ghwu. 34Otu na da kpahe kẹ, Avwanre nyori vwẹ evun rẹ urhi na nẹ Kristi dia bẹdẹ. Komavọ wọ rha vwọ ta nẹ a cha kpare Ọmọ rẹ ohwo kpenu? 35Jesu da ta kẹ ayen, Urhukpẹ na vẹ ovwan je dia kri emerha. Ovwan yan vwẹ ọke na rẹ urhukpẹ vwọ herọ na; ọ dia ọtiọye-e ebri na che muẹ ghene ovwan; ohwo rọ yan vwẹ evun rẹ ebri riẹn asan rọ ra-a. 36Ọke rẹ ovwan vwo vwo urhukpẹ na, se urhukpẹ na gbuyota, rere ovwan sa rhe vwọ dia emọ rẹ urhukpẹ.

Ijesegbuyota rẹ Ihwo ri Ju

Ọke ri Jesu vwọ ta ọnana nu, ọ de vrẹn nẹ etiyin o de sioma nu kẹ ayen. 37Dede nẹ o ru eka buebu kẹ ayen mrẹ na, yẹ ayen sere gbuyota-a; 38ọye kọye ota rẹ omraro Aizaya tare na vwọ mrasan gba;

Ọrovwohwo, ono ri se iyẹnrẹ rẹ avwanre gbuyota,

ono a vwẹ igbabọ rẹ Ọrovwohwo phia kẹ?

39Fiki rẹ ọtiọye na ayen gbi se segbuyota-a. Kidie Aizaya je rhoma ta.

40Orhurhu ẹro rayen o de ru udu rayen gan,

ayen da vwẹ ẹro rayen mrẹ orẹ

ayen da vwẹ udu rẹ ayen vughe,

ayen de kurhẹriẹ e de sivwi ayen.

41Aizaya ta ọnana fikiridie ọ mrẹ urinrin rọye ọ da ta ota kpahọ. 42Dede na buebu mrẹmrẹ vwẹ usun rẹ ihwo ri vwo ogangan na de segbuyota, ẹkẹvuọvo oshọ ri Farisi na gbi jẹ ayen rhọvwọ phia-a, a da rha djẹ ayen nẹ evun ri Sinegọg; 43kidie ayen guọnọ ejiro rẹ ihwo nọ ejiro rẹ Ọghẹnẹ.

Ota ri Jesu e che vwo Brorhiẹ na

44Jesu da van ọ da ta, Ọ ro se vwe gbuyota, o se vwe gbuyota-a ẹkẹvuọvo ọ ro ji vwe rhe. 45Ọ rọ mrẹ vwẹ jọ mrẹ ọ ro ju vwe rhe. 46Me rhere kerẹ urhukpẹ vwẹ evun rẹ akpọ na, rere ohwo kohwo ro se vwe gbuyota vwo jẹ ebri ẹdia. 47Ohwo ro nyo eta mẹ rọ yọnrọn aye-en, mi vwiro guẹdjọ-ọ; kidie me rhere rhi guẹdjọ rẹ akpọ na-a ẹkẹvuọvo mi rhi sivwi akpọ na. 48Ọ rọ sen vwẹ rọ reyọ eta mẹ-ẹ o vwo oguẹdjọ ọvo; ota na re me tare na ọye cha dia oguẹdjọ rọye vwẹ ẹdẹ rẹ obo oba na. 49Kidie ọ dia ogangan robọ mẹ me vwọ ta ota na-a; Ọsẹ na ro ji vwe na vẹ ekpuyovwi rọye re kẹ vwẹ urhi rẹ obo re me ta vẹ obo re me ta wan. 50Me riẹnre nẹ urhi rọye hẹ arhọ ri bẹdẹ. Obo re me ta na, me ta kirobo rẹ Ọsẹ na vuẹ vwẹ.

Currently Selected:

Jọn 12: UBV77

Highlight

Copy