Jọn 10

Itẹ rẹ Ogba rẹ Igegede

1Uyota, uyota, me ta kẹ ovwan, ohwo rọ wan anurhoro na ro ogba rẹ igegede na-a ẹkẹvuọvo ọ da ra kpanọ asan ọfa wan, ohwo yena hẹ oji kugbe igbunegbu; 2ẹkẹvuọvo ohwo rọ wan anurhoro na ruọ ọye hẹ osuigegede rẹ igodẹ na. 3Ọye ọrhẹrẹchẹ che rhiẹ ẹchẹ kẹ; igodẹ na nyo urhuru rọye, o se igodẹ rọye odẹ o mi sun ayen ro otafe. 4Ọke rọ da ghwẹ erọye ejobi ro otafe nu, kọ ka obaro kẹ ayen, igodẹ na ki nene, kidie ayen riẹn urhuru rọye. 5Ayen se nene ọrhorha-a, ẹkẹvuọvo ayen mrẹ djẹ, kidie ayen riẹn urhuru rẹ erhorha-a. 6Itẹ nana Jesu kpe kẹ ayen, ẹkẹvuọvo ayen vwo ẹruọ rẹ obo rọ ta kẹ aye-en.

Jesu Osuigegede rẹ Esiri

7Ọtiọye na Jesu da rhoma ta kẹ ayen, Uyota, uyota, me ta kẹ ovwan, Mẹvwẹ hẹ anurhoro rẹ igodẹ na. 8Ayen ejobi re ka rhe nu re me ke rhe na hẹ iji vẹ igbunegbu; ẹkẹvuọvo igodẹ na davwerhọn rẹ aye-en. 9Mẹvwẹ hẹ anurhoro na; ohwo da wan oma mẹ ruọ, kọ rhọ, kọ sa ro uwevwi ro otafe kọ mrẹ egbri re. 10Oji ọvo cha re o cho re o hwe re ọ ghwọrọ; me rhere rere ayen vwo vwo arhọ, rere ayen vwo buebu. 11Mẹvwẹ hẹ osuigegede rẹ esiri. Osuigegede rẹ esiri na vwẹ arhọ rọye kpahe otọ kẹ igodẹ na. 12Ọ re durhieri rọ dia osuigegede na-a na, rẹ igodẹ na dia erọye-e na, ọ da mrẹ okpohrokpo rọ cha ọ me djẹ jẹ igodẹ na vwo; okpohrokpo na mi fru ayen reyọ ọ me hra ayen. 13Ọ djẹre fikiridie ọ re durhieri oruẹ ọ rha davwerhọn rẹ igodẹ na-a. 14Mẹvwẹ hẹ osuigegede rẹ esiri; me riẹn e robọ mẹ e robọ mẹ je riẹn vwẹ, 15kirobo rẹ Ọsẹ na riẹn vwẹ na eriyin me je riẹn Ọsẹ na; me da vwẹ arhọ mẹ kpahe otọ kẹ igodẹ na. 16Mi ji vwo igodẹ efa, re je dia evun rẹ ogba na-a; me je cha reyọ ayen rhe, ayen ki nyo urhuru mẹ. Ọtiọye na ekru rẹ igodẹ ọvo re cha dia, osuigegede ọvuọvo. 17Fiki rẹ ọnana Ọsẹ na vwọ guọnọ ovwẹ, fikiridie me vwẹ arhọ mẹ kpahe otọ, rere me vwọ rhoma reyọ. 18Ohwo ọvuọvo sa reyọ mie vwe-e, ẹkẹvuọvo ọhorobọ mẹ me vwọ reyọ kpahe otọ. Mi vwo ogangan me vwọ reyọ kpahe otọ, mi ji vwo ogangan me rhoma reyọ; ọnana urhi re me reyọ miẹ Ọsẹ mẹ.

19Ogharọ da rhoma rhe dia vwẹ ohri ri Ju na fiki rẹ eta nana. 20Ayen buebu da ta, O vwo idẹbono, ọ je honvwa orhuẹ; die wa vwọ kerhọn rọye? 21Efa da ta, Enana dia eta rẹ ohwo ro vwo idẹbono-o Kẹ idẹbono se rhiẹ ẹro rẹ ohwo ro rhuru?

Ihwo ri Ju siẹn Jesu

22Ọ da dia okẹ rẹ orẹ rẹ orufuọn vwi Jerusalẹm; 23ọ da dia ọke ohwahwa, Jesu kọ yan vwẹ uwevwi rẹ ẹga na, vwẹ ọguan ri Solomọn. 24Ọtiọye na ihwo ri Ju da rhe gba yariẹ phihọ ayen da ta kẹ, Mavọ wọ nẹrhẹ avwanre dia gedegede krite? Ọ da dia owẹ hẹ Kristi na ta kẹ avwanre phephẹ. 25Jesu da kpahe kẹ ayen, Me ta kẹ ovwan, ovwan sere gbuyota-a. Iruo na ri mi ruẹ vwẹ odẹ rẹ Ọsẹ mẹ na, ayen se oseri kẹ vwẹ; 26ẹkẹvuọvo ovwan se vwẹ gbuyota-a, fikiridie ovwan dia usun rẹ igodẹ mẹ-ẹ. 27Igodẹ mẹ nyo urhuru mẹ, me riẹn ayen, ayen nene uvwe; 28me da kẹ ayen arhọ ri bẹdẹ, ayen gbe ghwọrọ-ọ, ohwo ọvuọvo se fru ayen nẹ obọ mẹ-ẹ. 29Ọsẹ mẹ, rọ vwẹ ayen kẹ vwẹ na, ọ rhonọ ovwẹ, ohwo ọvuọvo ji che se fru ayen nẹ obọ rẹ Ọsẹ na-a. 30Mẹvwẹ vẹ Ọsẹ mẹ ọvuọvo.

31Ihwo ri Ju da tọrọ elalo re ayen vwo phio. 32Jesu da kpahe kẹ ayen, Me vwẹ iruo rẹ esiri buebu phia kẹ ovwan nẹ obọ rẹ Ọsẹ na rhe; kẹ ọrhọ vwẹ usun rẹ enana we che vwo phi vwe na? 33Ihwo ri Ju na da kpahe kẹ, Avwanre vwi fiki rẹ iruo esiri phi wee; ẹkẹvuọvo fiki rẹ avwavwe; fikiridie wẹ, rẹ ohwo ghevweghe, vwẹ oma wẹn ruẹ Ọghẹnẹ 34Jesu da kpahe kẹ ayen, E rhe sio phihọ urhi rẹ ovwan, me tare, ovwan hẹ edjọ? 35Ọ de se ayen edjọ ihwo rẹ ota rẹ Ọghẹnẹ bru rhe je se miovwi ọbe ọfuanfon na-a. 36Ku wọ ta kpahe ohwo rẹ Ọghẹnẹ ru fon nu ro de jo rhe akpọ na nẹ, Wo bru avwavwe, fikiridie me tare nẹ, Mẹvwẹ Ọmọ rẹ Ọghẹnẹ? 37Ọ da dianẹ mi rhe ru iruo rẹ Ọsẹ mẹ-ẹ, we gbi se vwe gbuyota-a; 38ẹkẹvuọvo mi de ru ayen, dede na nẹ we se vwe gbuyota-a, gbe se iruo na gbuyota, rere ovwan riẹn re ọ ro ovwan nẹ Ọsẹ hẹ evun mẹ nẹ mi he evun rẹ Ọsẹ na. 39Ayen da rhoma guọnọ mu, ọ da reyọ oma nẹ ohri rọye ayen abọ.

40Ọ rhoma yanran kpo obo ovrẹn ri Jọdan kpo asan ri Jọn da ka vwẹ ame kẹ ihwo, kẹ etiyin ọ diare. 41Buebu de bro rhe; ayen da ta, Jọn ru oka-a, ẹkẹvuọvo kota kota ri Jọn tare kpahe ohwo nana uyota. 42Buebu de segbuyota.

Currently Selected:

Jọn 10: UBV77

Highlight

Copy