Jọn 9

Jesu Sivwi Ohwo re Vwiẹri vẹ ẹro ro Rhuru

1Ri Jesu vwọ wan vrẹn, ọ da mrẹ ohwo ọvo ro rhuẹro nẹ ọke re vwo vwiẹ rhe. 2Idibo rọye da nọ, Rabbi, ono ri ru umwemwu, ohwo nana gbinẹ ọsẹ vẹ oni rọye, re vwo vwiẹ orhuẹro? 3Jesu da kpahe, Ọ dia ohwo nana ri ru imwemwu-u, eyẹ ọsẹ vẹ oni rọye-e, ẹkẹvuọvo rere iruo rẹ Ọghẹnẹ vwọ mrasan phia vwẹ oma rọye. 4Avwanre se ru iruo rẹ ohwo ro ji vwe rhe, rẹ ọke vwọ herọ na; ason cha, rẹ ohwo de jẹ iruo eruo. 5Re me vwọ hẹ evun rẹ akpọ na, mẹvwẹ hẹ urhukpẹ rẹ akpọ na. 6Rọ vwọ ta ọnana re, o de dje enya phihọ otọ ọ da vwẹ enya na gbe emekpẹn ọ da vwẹ emekpẹn na vwo sio ẹro, 7ọ da ta kẹ, Yanran, ra họ vwẹ ẹtẹrhe si Sailom (otọ rọye Ejo). Ọtiọye ọ da yanran ra họ ọ da rhe ọ da mrẹ orẹ. 8Ihwo re dia kẹrẹ kugbe otu re mrẹrẹ rọ yare emu jovwo, da ta, Ọnana dia ohwo na rọ yare emu jovwo na-a? 9Evo da ta, ọye, efa da ta, Ẹjo ẹkẹvuọvo ọ họherọ. Ọ da ta, Mẹvwẹ hẹ ohwo na. 10Ayen da ta kẹ, Komavọ ẹro wẹn ru rhie vwo? 11Ọ da kpahe, Ohwo na re se Jesu ọye gbe emekpẹn vwo si vwe ẹro ọ da ta kẹ vwẹ, Yanran kpo Sailom ra họ; ọtiọye me da yanran ra họ me da mrẹ orẹ. 12Ayen da ta kẹ, Kọ rhọ? Ọ da ta, Me riẹnre-e.

Ihwo ri Farisi Fuẹrẹ Esivwo na

13Ayen da reyọ ohwo na ro rhuẹro jovwo na vwo rhe ihwo ri Farisi. 14Asakiephana ẹdẹ na kẹ ẹdidjala kọye Jesu vwo gbe ekpẹn na o de rhiẹ ẹro rọye. 15Farisi na da rhoma nọ obo ro ru mrẹ orẹ. Ọ da ta kẹ ayen, Ọ vwẹ emekpẹn vwo si vwe ẹro, me da họ, me da mrẹ orẹ. 16Evo vwi Farisi na da ta, Ohwo nana dia obọ rẹ Ọghẹnẹ o nurhe-e, kidie ọ yọnrọn ẹdidjala-a. Ẹkẹvuọvo efa da ta, Komavọ ohwo rọ dia oruimwemwu se ru eka tiọnana? Ogharọ da herọ vwẹ ohri rẹ ayen. 17Ọtiọye na ayen da rhoma ta kẹ ọ ro rhuẹro jovwo na, Die wọ ta kpahọ, ro vwo rhiẹ ẹro wẹn na? Ọ da tanẹ, Ọmraro o ruẹ.

18Ihwo ri Ju na sere gbuyota nẹ o rhuẹro jovwo tavwe rọ ke rhe mrẹ orẹ na-a, eriyin na, ayen de re se ọsẹ vẹ oni rẹ ohwo re rhiẹ ẹro rọye na, 19ayen da nọ ayen, Ọnana ọmọ rẹ ovwan, ra tanẹ e vwiẹri orhuẹro nẹ orivwi rhe na? Komavọ o ru mrẹ orẹ vwẹ asakiephana? 20Ọsẹ vẹ oni rọye da kpahe, Avwanre riẹnre nẹ ọnana ọmọ rẹ avwanre, nẹ e ghine vwiẹ orhuẹro; 21ẹkẹvuọvo obo ro ru mrẹ orẹ vwẹ asakiephana avwanre riẹnre-e, eyẹ avwanre jẹ riẹn ohwo ro rhiẹ ẹro rọye-e. Ovwan nọ, ọ ghwanri re, e gbe jẹ ọ vwẹ unu rọye ta. 22Ọsẹ vẹ oni rọye ta ọnana fikiridie ayen djẹ oshọ rẹ ihwo ri Ju, kidie ihwo ri Ju ejobi rhọvwe kugbe nẹ ohwo ọvo da rhọvwe nẹ ọye ghine Kristi na, ayen ke djẹ nẹ evun ri sinagọg na. 23Kọye ọsẹ vẹ oni rọye vwọ ta, Ọ ghwanri re, gba nọ.

24Ọtiọye ayen da rhoma se ọ ro rhuẹro jovwo na, ayen da ta kẹ, Gba vwẹ ejiro kẹ Ọghẹnẹ; avwanre riẹnre nẹ ohwo nana oruimwemwu. 25Ọ da kpahe, Owenẹ ọ dia oruimwemwu eyẹ o jẹ dia, me riẹnre-e; emu ọvo me riẹnre na, mi rhuẹro jovwo, asakiephana me mrẹ orẹ re. 26Ayen da ta kẹ, Kidie o ru kẹ wẹ? Mavọ o rhiẹ ẹro wẹn wan? 27Ọ da kpahe kẹ ayen, Me ta kẹ ovwan nure, ovwan kerhọ-ọn. Kidie ovwan rhoma nyo ru? Ovwan je guọnọ dia idibo rọye rhe? 28Ayen de do kuo, tanẹ, Wẹ hẹ odibo rọye, ẹkẹvuọvo avwanre idibo ri Mosis. 29Avwanre riẹnre nẹ Ọghẹnẹ ta ota kẹ Mosis, ẹkẹvuọvo vwọ kẹ ohwo nana, avwanre riẹn asan ro nurhe-e. 30Ohwo na da kpahe, Die sorọ, ọnana hẹ igbunu! Ovwan riẹn asan ro nurhe-e, dede na yo rhiẹ ẹro mẹ. 31Avwanre riẹnre nẹ Ọghẹnẹ kerhọn rẹ iruimwemwu-u, ẹkẹvuọvo ọ da dianẹ ohwo ga Ọghẹnẹ ro de ru ọhọre rọye, Ọghẹnẹ kọ kerhọn rọye. 32Rhabae rẹ akpọ na vwo tophihọ na e ji nyo nẹ ohwo ọvo rhiẹ ẹro rẹ ohwo re vwiẹri orhuẹro-o. 33Ọ da dianẹ ohwo nana rhe nẹ obọ rẹ Ọghẹnẹ rhe-e, o se ru emu ọvuọvo-o. 34Ayen da kpahe kẹ, We re vwiẹri vwẹ evun rẹ imwemwu tototo na, kẹ owẹ ri che yono avwanre? Ayen da djẹ ro otafe.

Ẹruedje rẹ Erhi

35Jesu de nyo nẹ ayen djẹrẹ ro otafe, rọ vwọ mrẹ re ọ da ta, Wo se Ọmọ rẹ ohwo na gbuyota? 36Ọ da kpahe, Ọno vwo, ọga, rere mi vwo segbuyota? 37Jesu da ta kẹ, Wọ mrẹrẹ nure vwo, ke je vwẹ ọye re ta ota kẹ owẹ na. 38Ọ da ta, Ọrovwohwo, mi sere gbuyota, ọ da ga. 39Jesu da ta, Fiki rẹ ẹdjọeguo me vwọ rhe akpọ na, rere ihwo re mrẹ orẹ-ẹ vwọ mrẹ orẹ, rere otu re mrẹ orẹ vwo rhuẹro. 40Farisi evo ri si kerẹ vwo nyo ọnana, ayen da ta kẹ, Avwanre ji rhuẹro rhe? 41Jesu da ta kẹ ayen, Ọ dianẹ kẹ ovwan rhuẹro, ovwan rha re abe-e; ẹkẹvuọvo asakiephana re ovwan vwọ ta nẹ, Avwanre mrẹ orẹ, kọye abe rẹ ovwan vwo chekọ na.

Currently Selected:

Jọn 9: UBV77

Highlight

Copy