Luka Enjil 19

Bag. 19.

1-2Ter wide Arihan tur torgi nogsum. Wide id Zakayay an aweran wer dasum. Wide mekiski aarilina dul ter esum. Widegon berbul esum. 3Yesugi nalarki wide ter ni ter engi iyirarki birigsum. Ama jemaged marossum, urtunay esinged. 4Owolgir bodirgi jimez werdogor darisum, tekki nalli an, manged binogtangi iyiros. 5Yesu jimeztogor bidargi, dogogi ururgi tekki nalos wetirsum: „Wo Zakaya, shutte shugur ta. Mine olongu ai enna kar bibeyirin.“ 6Ter wide shutte targi gurattiged abidirgi tenna kar ojjusum. 7Male mangi nalos nugnug wesan: „Ter zenbikol werna kar tosum, beyiri an.“ 8Zakaya kute tebos Yesugi wetirsum: „Ahan, wo tirti, ai anna sheina bagattigi hajebuligi atidirosrin. Widegon ai on zol wekki zalmekokrin, gir kemiski biwidegirtirrin.“ 9Yesu tekki wetirsum: „Olongu in kana osaransum. Mine tekkon teran Ebrehinna todum. 10Minergi zolna tod tasum, kash osirri an dabbuligi.“

11Ingi agijirrangon ter widergi metel wekki wetidirsum, mine ter Urushalimn igit esinged, wide tinn ergir awesan, artina mulki awtir bitabeln an. 12Ter wesum: „Zol sherif wer medine wari wekk abidi safrossum, tennewertir mulki wekki ared lefteri an. 13Ter nugud dimingi kongon, uwedtaïr mena dimingi tidirsum. Wide wetidirsum: ‚Tekked tajrew an ai tarinbokon.’ 14Ama tenna medinen idi tekki atisisan. Wide tenn agabir ishin wesan: ‚Ar abirigmunun in an̄dogochir oran tebingi.’ 15Ter mulkigi aressinn agabir wide targi man nugdigi uwedtaïrsum, nalli an menachiged awsangi. 16Owoldi targi wesum: ‚Wo tirti, enna mena mena dimingi attasum.’

17Or tekki wetirsum: ‚Adelum, wo nugud fala. Er gelillo falansum. Medine dimindogor tebu.’ 18Owitti targi wesum: ‚Wo tirti, enna mena mena dicchi attasum.’ 19Or tekki wetirsum: Ekkon medine dij dogor tebu.’ 20Wide agabdi targi wesum: ‚Wo tirti, ahan enna mena annai buelgi kaden balai werro digir uskuredagsim. 21Minergi ai eddoton asarkisim, mine er zol gasi engad. Er aarin uskurmensingi. 22Wide ewirmensingi ajorin.’ Tekki wetirsum: tenna agilloton belilged ekki bidinerin, wo nugud mili. Er iyirma ai zol gasi eringi, wide aarringi uskurmensingi, wide ajorringi ewirmensingi? 23Won er ma anna dugugi asarfeligi tidirmenu, mine ai tarinna kello anna dugugi tenna faidaged barsim?’ 24Wide teddo daligi wetidirsum: tennaiton menagi arrigi diminkolgi tiroswe!’ 25Tekki wetirsan: ‚Wo tirti, tennai mena dimin dan.’ 26‚Ai irgi awetidirrin, kolna tirtigi bitirtakkin. Ama komenilgi tennai daltodton bartakkin. 27Anna aduwichigong ankin, tindogochir oran tebringi abirigmeniligi, innegir attaïr ann owollo goj gojirwe!“

28Ingi werosirgi Urushalimgir kuj owolansum. 29Betfagigir wide Betanigir, guna zetundiy an awerannai tebilir, awtaningad hiran owigi ishinirsum. 30Wide wetidirsum: „Juwe neja inn owollo dalder. Ir torunna kello teddo bellun hanun farah wekki digbungon. Tendogor zol wer egirkomnum. Tekki kusedtawe! 31Ter on zol wer irgi isigkin: ‚Ir ma akusru?’ an, ikke wetirwe: ‚Tirti tekki hajebun“ an. 32Hiran owi jurgi ter wesin nawite elsan. 33Tir wide hanun farahki akusrangon, hanuna tirti wetidirsum: „Ir ma hanun farahki akusrun?“ 34Tir wesan: „Tirti hajebun.“ 35Wide Yesunai kusedtargi tinna kadechigi tendogor kujros Yesugi egirkidisan. 36Ter wide jubungon, tinna kadechigi darubdogor awidisan. 37Wide zetunna gunana soladegi awtandangad hiranina jema male gure artigi sebihesan hisi dul wekked, ayachi nalsan malena jiradilo. 38Wide wesan: „Barkebun or, artin eriged tabul. Simer gendar tebin wide dogochir mejid.“

39Ama Farisichirton weri jemarton tekki wetirsan: „Wo arif, enna hiranigi gobrir.“

40Ter widegir wetidirsum: „Ingu kitoskiran, kulwi buweran.“ 41Ter awtanbungon medinegi uru nalos tendogor oisum. 42Wide wesum: „Ekkon er on iyirkokin, enna in ugrosir, enna gendar min engi! Amagon enna misichirton tagtakkossum. 43Ugrosi weri bitaran. Tedder enna aduwichi ekki bihaligeran. Wide berichigedgon ekki biterseran. Wide bididran. 44Wide bihasreran jiha maleged. Widegon ekki biborkidiran, enna toni entur wawburangon. Edder kulu wekki kulu werdogor bimugminan. Mine er iyirkomnum enna osarna ugroski.“

45Ter wide jamar toros ugudisum, tedder ajanosiligi wide ajaniligi tur ososirsum. 46Wide wesum: „Bajbun: Anna ka salana kam an. Irgon magasina magaragrossun.“

47Ter wide jamar akurkidisum nahan nutin. Wide fegirina samli duligon abajiligon gebilana duligon abirigsan tekki berosarki. 48Ama tekki berarki misirossan. Mine gebila male tedder solibusinged wide agijirtirsinged.

Currently Selected:

Luka Enjil 19: XNZ1912

Highlight

Copy