Luka Enjil 18

Bag. 18.

1Wide metel wekki wetidirsum, dime saliw an marsigidkiyir. 2Wide wesum: „Medine werro gadi wer dasum, artigi asarkimenil wer, wala zol wekki aürumenil wer. 3Man medinekollo en azaba wer dasum. In en taka wide awetirsum: ‚Aigi anna hasimirton reyiher an.’ 4Tekkon wakti werbokon weriskomnum. Ama manin agabir tennewertigodon wesum: ‚Ai on artigi asarkimenkiringon, wala zol wekki aürumenkiringon, 5ama in en aigi agelgengad, tekki bireyiherin, mine dime taka ann urki osmen an.“

6Yesu wide wesum: „Gijirwe gadi mili awengi. 7Won arti tenna barbuligi, tekk abidi ugrosked wide uguged awigiligi, bigijirtidirmunum, tennewertigi tindogochir nosogredagingon? 8Ai irgi wetidirrin, tirgi shutte bireyiheirin. Amagon zolna tod takin, imankirigi ariddogor belna?“

9Wide werigi tinnewertichiged gendibuligi wide echeligi ahagreligi in metelgi wetidirsum: 10„Zol owi jamagir jusan, saliru an. Tiddeton wer Farisima, owittigon mekisduma. 11Farisi wide saliri an kute tebos tennewertir wesum: ‚Wo tir, ai ekki shukrerin ai zoli kewidbuli galigmendingi, akabkili, zalimi, soroskanegi aawili. Wala in mekisdi galigmendingi. 12Gir owigi dertigi aïnjirin juma nutin wide dimniregi aosrin ajamegirrin malerton.’ 13Ama mekisdi warirton tebos wala tenna mita sichigi simegir sokemen tenna ogdogor jom wesum: ‚Aigi rahme, wo arti, ai zenbikolgi.’ 14Ai irgi wetidirrin, in tenna kagir shugursum sereyanos manin masir. Mine tennewertigi sokel male bishuguditakkin. Wide tennewertigi shugudilna tirtigon bisoketakkin.“

15Affitonigon tekk abidi attasan, kumir an. Hirani tirgi nalosir hedeirsan. 16Ama Yesu uwe wetidirsum: „Affitonigi aig abidi taw anwe, wala mirirmenwe. Mine artina mulki ingu galigdum. 17Aleged irgi wetidirrin, artina mulkigi affitod nawite armenil kidir tedder bitomnum.“

18Wide samil wer tekki issig wetirsum: „Wo arif adel, min wekki awkirin, ayar dimendigi biwirterin?“ 19Yesu tekki wetirsum: „Er ma aigi adelm an awen? Wekkon adelmunum, wekk anmenkin. Tekkon arti teran. 20Er sheriachigi aïyiririn: Soroskanegi awmen an. Bemen an. Magmen an. Mursiged shehdemen an. Imbabkon inengongi kermer an.“ 21Ter wesum: „Ingu malegi ann affikanerton morogredagirrin.“ 22Yesu mangi gijred tekki wetirsum: „Ekki wer mirin. Er kon malegi janos hajebuligi tidiroskin, simer hazin wekki belkanin. Wide targi ann agabki aru.“ 23Ter wide mangi gijred muslossum, mine berbusinged. 24Yesu tekki muslossingi nalos wesum: „Mine gasire shein idin dogor artina mulkir torar! 25Kam werna torar ittilena urburked sahalum berbul werna torardogor artina mulkir.“ 26Tekki gijreli wesan: „Ni wer elon eskergi bostakkin?“ 27Ter wetidirsum: „Zolinai esketakkimenil artinai esketakkibun.“

28Butrus wide wesum: „Ahan ari annai dal malegi wakos ekki tebaossun.“ 29Ter wetidirsum: „Aleged irgi wetidirrin, zol wer damnum ka wekki, wala en wekki, wala timbesigi, wala tekki uskeligi, wala affichi werigi artina mulkina jiradilo wakosel, 30ter barmen in ayarro tindogoged imil wekki digrigir, wide aharargon ayar dimendigi.“

31Hirani diminde owingarigi arejjuir wetidirsum: „Ahan ar Urushalimgir kujburun. Wide nebichiged zolna todna gisar bajbul male bitimen. 32Mine umachin ir bundurtakkin. Wide tekked busuran. Bididgongendan. Bitufundurgongendan. 33Wide bitukigongendan. Widegon biberan. Ama ugros toskittir bimbelkan in.“ 34Ama tiri wekkongi fehmekomnan, in were tinnai bokibusinged. Wala mingi wesingi iyirkomnan.

35Arihag abidi awtaningad, teddo darubdogor dugur wer beddingon agsum. 36Ter wide jema sugbungi gijred isigirsum man min esingi. 37Tiri tekki wetirsan: „Yesu Nasirandi nogbun an.“ 38Ter wide uwe wesum: „Wo Yesu, Dawudna tod, aigi rahme!“ 39Talebuli hedesan: „Satter an.“ Ama ter desen digrigir uweka awesum: „Wo Dawudna tod, aigi rahmer an.“ 40Yesu tebarrigi wetidirsum: „Innegir attaw an.“ Awtansin kello isig wetirsum: „Mingi er awersin ekki awtirringi?“ 41Ter wesum: „Wo tir, nallingi awerisrin.“ 42Yesu wetirsum: „Nalu! Enna iman ekki gengirsum.“ 43Tenna wattikollo tenna misichi kustakkisan. Wide tekki tebae artigi amejidesum. Wide gebila male nalos artigi asebihesum.

Currently Selected:

Luka Enjil 18: XNZ1912

Highlight

Copy