Hanana Enjil 19

Bag. 19.

1Manin aharro Bilatus Yesugi arejju tukos. 2Widegon askari kiliserton kasir wekki awijos tenna urdogor kujurtirsan. 3Widegon kade gele wekki degidos wide awetirsan: „Salam alek, wo Yahudichina or.“ Widegon ajomdigsan.

4Owittiged Bilatus bochigir bel targi wide wetidirsum: „Ahan ai tekki bochigir irgi bossidirrin, ir iyirrunna joro ai tedder ila habbekkongi elmensingi.“ 5Bocchigir Yesu bel tasum, kasir kilisendigi kujredagingon wide kade gelegon. Wide Bilatus wetidirsum: „Ahan ogicchi.“ 6Fegirina samli duligon wide hadamigon tekki nalsanna wattigi lïwe wesan: „Beros! soligros! beros! soligros!“ Bilatus tirgi wetidirsum: „Iri arejju wide soligirwe. Ai tedder ila wekkongi elkomnim.“ 7Yahudichi rudetirsan: „Ar sheria wekki korun. Anna sheriana mujibirgon berarki hugebun, tennewertigi artina todtiringad.“ 8Bilatus in weregi gijred sarke dul werro tosum.

9Owittiged walayana kar toros wide Yesugi wetirsum: „Er saïrtonde?“ Ama Yesu rudetirkomnum. 10Bilatus wide wetirsum: „Er aigodon abainmunu? Er iyirmunu ai eske ekki berro soligringi widegon eskeringi ekki talgadti?“ 11Yesu rudetirsum: „Er andogor gudra wekkongi komnum, ter on ekki dogorton tirtakkimenkokin. Inin joro aigi ekki selimerel zenbi endin dogor dul werro tosum.“

12Mani wattirton Bilatus birigsum tekki talgadti. Ama Yahudichi in werechiged aüwesan: „Er on in ogicchi talgekin, er gaisarna tiwrimnum. Mine tennewertigi orkiril male gaisarna aduwum.“ 13Bilatus in weregi gijred Yesugi bochir osebbidargi wide hukumana kursin dogor tegossum. Man agarn erigon Balat esan, Ibrigedgon Jabatay esan. 14Basana jihazn ugros ter egongessum, saa gorjittir. Bilatus Yahudichigi wetidirsum: „Ahan inna orki.“ 15Ingu uwesan: „Arejju! arejju! soligros!“ Bilatus tirgi wetidirsum: „Inna orki soligirria?“ Fegirina samli duli rudetirsan: „Ari or wekki komnun, gaisark anmenkin.“ 16Mani wattigi tekki tirgi selimeirsum, soligirw an.

17Tir wide Yesugi morogirsan. Tenna berkon tennewertir kagsum. Wide tasum urna kidn agarro, Ibriged Juljutay eran. 18Teddo tekki soligirsan, wide tekkodon owigi, wekkon iyinneged, owittigon mayinneged, tekkon seler. 19Wide enwan wekki Bilatus bajsum, wide berdogor soligirsum. „Yesu Nasirandi, Yahudichina or“ an bajbusum. 20In enwangon Yahudichirton digrichi weri geryesan, agar teddo Yesu salibtakkisinder medinena igit esinged. Tekkon bajbusum Ibriged wide Rumaniged wide Rumiged. 21Yahudichina fegirina samli duli bel targi Bilatuski wetirsan: „Yahudichina orm an bajmen, ama man wesingi: ‚Ai Yahudichina or terrim’ an.“ 22Bilatus rudetidirsum: „Ai bajsingi bajoskosim.“

23Yesugi berdogor sokossann aharro askari tenna kadechigi arrigi gu kemsir uskursan, askar nutingi bagid wekki. Jiba kewidsum. In jibagon nichikiy esum. Guda weranbusum, dogorton togor junbokon. 24Askari ittiwrigodon wesan: „Orimenwe! Jiban dogor kulugi binjiru! Digrinna tirti ār agad!“ Ingon kitab werelgi timer an: „Anna kadechigi ittiwrin barer bagsan. Wide anna jiban dogor kulugi injisan.“ Ingi askari awsan.

25Teddo kute tebsum Yesuna salibnai tinengon wide tinenna tinisigon, Meryem Kilubana en, widegon Meryem Majdaliya. 26Yesu tinengi nalos, wide hiran ter adolsingi kute tebingi, tinengi wetirsum: „Wo en, ahan enna todti.“ 27Wide hirangi wetirsum; „Ahan inengi.“ Manin saarton hiran tennai tekki jamegirsum.

28Manin aharro Yesu uru nalsum haja male kiketakkossingi, kitabki timer an. Wide wesum: „Ai eridburin.“ 29Dadi wekkon busum, haliged eyebungon. Sifinja wekki halirton eyegros wide sha werdogor kujros tenna agildogor kujurtirsan. 30Haligi Yesu aressinna wattigi wesum: „Eleken kiketakkosum.“ Wide urki suriyegir newertigi osossum.

31Man ugroskon jihazna ugros ter esum. Jitachi teddo samtena ugroski soli tebmendanna joro — man samtegon edi dul ter esum — Yahudichi Bilatuski isigsan, tinna jognigi togijos shugudosirw an. 32Askari wide targi owoldina jognigi togijos wide owittindigon. 33Ama Yesunai tasanna wattigi tenna jognigi togijkomnan. Mine uru nalsan diossingi. 34Ama askar wer sha wekked tenna berir sheksum. Tenna saayen gew weri wide essi wekkon belsan. 35Tekki urwelgon shehedesum. Tenna shahadagon alem. Wide ter iyirin ter alegi awengi, irgi amnew an. 36Ingon jeltakkisum, kitab wesingi timer an: „Kid wer tenna kidirton bitogtakkimnum.“ 37Widegon kitab owitti wer awen: „Tir sheksanna tirtigi burukandan.“

38Inin aharro Yusif Arimatiyandi — tekkon hiran esum, ama bokeged, Yahudichina sarkeged — ter Bilatuski isigsum izingi, Yesuna jitagi injediry an. Bilatus: „Injed“ esum. Ter targi jitagi injessum. 39Tekkodongon Nikudimus tasum, ter Yesunai ugu wekki takorel. In tekkodon injedtasum iris, mirigon wide udirtongon sabbul wekki, ratil imil werkirigi. 40Yesuna jitagi arrigi wide kitan wekked iriskodon garossan, Yahudichina ada nawite. 41Tekki soligirsann agarrogon jinena wer dasum. Ter jinenargon te ēr wer dasum. Tedder zol wekkon tokomnum. 42Mando tir owingari Yesugi undursan, Yahudichina jihazna joro, wide tegon awt esinged.

Currently Selected:

Hanana Enjil 19: XNZ1912

Highlight

Copy