Hanana Enjil 18

Bag. 18.

1Yesu ingi werosirgi tenna hiranigodon belsum Gidrunn essina jerkir. Teddo jinena wer dasum. Teddo tenna hiraniged tosum.

2Yahudagon, tekki biselimel, agarki iyirbusum, mine Yesu teddo dime ajamekessum tenna hiranigodon. 3Yahuda askarigi wide hadamigi fegirina samli dulinaiton wide Farisichinaitongon ared mando tasum, ig wekki wide komsedichi werig uled, tinna silahked. 4Yesu iyirbusum tekked bawtakkil malegi. Tirg abidi belligi wetidirsum: „Nigi akashrun?“ 5Widegirtirsan: „Yesu Nasirandigi.“ Yesu wetidirsum: „Ai ter terrim.“ Yahudagon, tekki biselimel, tirgodon tebsum. 6Tirgi wetidirsinna wattigi: „Ai ter terrim“ an, aharkir rejae wide ariddogor ob digirsan. 7Widegon owittiged isigirsum: „Nigi akashrun?“ 8Wide wesan: „Yesu Nasirandigi.“ Yesu rudesum: „Ai irgi wetidirsim: ‚Ai ter terrim’ an. Ir on aig abirigkurun, ingugi wakosirwe, nogw an.“ 9Were ter wesingi timer an: „Er aigi densinirton, wekkongi tidderton dabirkomnim.“ 10Siman Butruskodon siwid wer dasum. Tenna karton soche osirgi fegirina samil dulna nugudti jom tenna ulug iyindigi merossum. Nugudna erigon Malkus esan. 11Yesu Butruski wetirsum: „Enna siwidti tenna kar dabuw an. Dibite abo aigi densingi nimendia?“

12Terin aharro askarkon wide zabitton wide Yahudichina hadamigon Yesun dogor ichigi kujur shartigi tedder undursan. 13Wide Hanannai koyalgi ojjusan. Mine ter Kayafana neseb ter esum. Tekkon man jengi fegirina samil dul ter esum. 14Wide Kayafa ter esum Yahudichigi wetidirel: „Ogij wer dikin, genum gebilana joro.“

15Siman Butruskon wide hiran owittigon Yesugi tebaedasan. Man hirangon fegirina samil dulnai iyirtakkibusum. In Yesugodon tosum fegirina samil dulna kar. 16Ama Butrus babnai bochiged kute tebsum. Hiran owitti, iyirtakkibul wer fegirina samil dulnai, belligi bawabki wetirsum: „Butruski arer undros.“ 17Nogo bawabanbul Butruski wetirsum: „Er eleken man zolna hiranirtonmunum?“ 18Man wesum: „Ai ter terminim.“ Teddogon kute tebsan nugdigon wide hadamigon, ig wekki ulos, od osinged, teddo akakesan. Butruskon kute tebingon akakesum.

19Fegirina samil dul Yesugi isigsum tenna hiranirton wide ter akurkidisindeton. 20Yesu rudetirsum: „Ai alamgi beyingir wetirsim ai kurkidisingi. Watti malegi jamar wide jemachir, Yahudichi ajamerann agarro, dime akurkidirsim. Wala bokeged haja wekkonged bainkomnim. 21Er ma aigi aïsigin? Isigir gijreligi, minged tirgodon abainsingi. Ahan mangu iyirran mingi wetidirsingi.“ 22Ingi werossinna wattigi hadamirton wer kute tebingon koidogor jomos wesum: „Ikkegon fegirina samil dulgi rudetirna?“ 23Yesu widegirtirsum: „Ai on us wekked bainkokrin, usdogor shehede. Won adel ekin, er ma aigi ajomin?“ 24Hanangon tekki ishinsum shartir dabungon Kayafa, fegirina samil dulnai.

25Siman Butruskon kute tebos akakesum. Tekki wide wetirsan: „Er eleken tenna hiranirtonmunu?“ Man gubos wide wesum: „Ai ter terminim.“ 26Fegirina samil dulna nugdirton wer, tekkon Butrus ulugki mertirsinna neseb ter esum, ter wesum: „Ai ekki nalkomnim tekkodon, jinenar?“ 27Butrus gubossum wideged. Tenna wattir darbadn ondi kililesum.

28Widegon Yesuged tasan Kayafanaiton walayana kar. Fejiranoskosum. Ama tiri tokomnan walayana kan tur, nejistakkimendanna joro, basana kalena jiradilo. 29Bilatus tirg abidi bel targi wide wesum: „Shekawi edi saïgi in iddogor ir kagrun?“ 30Rude wide tekki wetirsan: „Ter on miligi awkomenkin, ar tekki ekki attargi biselimekomnun.“ 31Bilatus tirgi wetidirsum: „Arejjuwe iri, wide tendogor hukmewe inna sheriaged.“ Yahudichi tekki wetirsan: „Ari hagigi komnun zol wekki berarki.“ 32Ingon Yesu wesinna weregi timer an, diar edi saïdiged ter bidikaningi.

33Bilatus wide walayana kar owittiged toros Yesugi uwe wetirsum: „Er Yahudichina or terre?“ 34Yesu rudetirsum: „Er ennewertirton ingi awena? Wala echeli weri ekki andogogir wetirsande?“ 35Bilatus rudetirsum: „Ai aba Yahudiy eria? Enna gebila wide fegirina samli duli ekki aigi selimesan. Mingi er awum?“ 36Yesu rudesum: „Anna mulki in alamirtonmunum. Anna mulki in alamirton ekokin, anna hadami bijahidesan. Wala Yahudichina ir bitokomnim. Ama elekengon anna mulki indotonmunum.“ 37Bilatus wide wetirsum: „Ikk ekin, er wide orre?“ Yesu rudesum: „Er awen ai or eringi. Inin joro uskitakkisum Inin jorogon tasim in alamir, hagigi shehdetirri an. Hagirton belbul male anna hisigi agijrin.“ 38Bilatus tekki wetirsum: „Won hagigon minde?“

Ikke werosirgi Yahudichinai bochir bel targi wetidirsum: „Ai tedder ila habbekkongi elkomnim. 39Ama iri annai ada wekki korun. Basa nutindo irgi wekki atalgetidirrin. Bidollua irgi Yahudichina orki talgetidirringi?“ 40Owittiged male uwe wesan: „Ingimnum. Barabaski talgedecchiru In Barabaskon magas esum.

Currently Selected:

Hanana Enjil 18: XNZ1912

Highlight

Copy