Hanana Enjil 15
15
Bag. 15.
1„Ai enebna jowi suhundi ter erin. Abogon torbar teran. 2Baki nutin adder kolibulgi, eneb digrigi attamenkin, bimerin. Ama baki male enebki attalgi bikayin, digrigir inj an. 3Iri eleken kayburun were ai irgi wetidirsinged. Adder kewidwe. 4Aigon idder bikewidrin. Baki tennewertirton eske enebki attamenin nawre, ter on jowina kidir koli tebmenkin, irgodongon ikke bun, ir on adder koli tebmenkurun. Ai jowi ter eri. 5Irgon bakichi ter erun. Adder koli tebil aigon tedder, in eneb digrigi battan. Mine iri anna masir eske haja wekkongi bawmunun. 6Wer on adder kewidmenkin, bochir bilufetakkin, baki alufetakkin nawre. Sowin kello jamegros wide igir bilufundurran, jug an. 7Ir on adder kewidkurun, wide anna weregon idder kewidkin, isigwe iri abirigrungi. Irgi bitirtakkin. 8Inged abo bikerimtakkin, ir eneb digrigi injedtakrun. Mani wattigi iri anna hirani terandun. 9Abo aigi dolsin nawre ikke aigon irgi dolirsim. Anna doler kewidwe. 10Ir on anna sheriagi hafadekrun, anna doler bikewidrun, ai anna kidir abona sheriagi hafadesin nawre, widegon kewidburi tenna doler. 11Irgodon abaindin in wereged, anna guratti idder kewdinna joro, won inna gurattigon kello juw an.“
12„In teran anna sheria, ittiwrigi dollungi, ai irgi dolsin nawre. 13Wekkon dole inin dogor dul wekki komnum, tennewertigi aüskurildogor tenna dolidachin joro. 14Iri anna dolidachi terrun, ir on awkurun ai irgi wesesingi. 15Ai irgi owittiged nugdim an buwemnim. Mine nugud aïyirmunum tenna tirti aawingi. Ama ai irgi anna dolidachiy an undurirsim, ai irgi wetidirringad abonaiton gijirsin malegi. 16Ir aigi barkomnun. Ai teran irgi barel. Widegon ebrirsim, jurgi teri digrigi attaw an, widegon inna teri kewd an, abogon irgi birigrun malegi ann eriged tidir an. 17Ingi ai irgi weseirrin, ittiwrigi dollungi.“
18„Alam on irgi tisirkin, iyirwe aigi tisisingi inn owollo. 19Ir on alamirton ekokrun, alam tendanilgi bidolsum. Alamirtonmendungad, ama ai irgi alamirton barirringad, inin joro alam irgi atisirin. 20Irgi wetidirsinna weregi jilewe: ‚Nugud tenna tirtin dogor dulmunum.’ Tir on aigi jomdigkokran, irgon bijomdigran. Won tir on anna weregi hafadekokran, inna weregon bihafadekandan. 21Ama tiri irged ikke bawkandan in malegi ann erina joro, mine aigi ishinelgi aïyirmendangad. 22Ai on tamenkokrin wide tirgodon bainmenkokrin, tindogor zenbi wer dakomnum. Ama eleken tiri ozir wekkongi komnan tinna zenbichir. 23Aigi tisil abogon atisili. 24Ai on tinna barer awdigi awmenkokrin, echel wer awmensinigi, tindogochir zenbi wer dakomnum. Ama eleken tir nalos wide aigi tisisan, wide abogon aigodon. 25Were tinna sheriar bajbulgi timer an: „Tir aigi sebebkiyir tisisan.“
26„Won irgi bitabegriril tan kello, ai abonaiton irgi bishintidirrin, newerti alendi abonaiton bital, ter aigi bishehededenin. 27Irgon bishehededendu, koyalloton aigodon darungad.“
Currently Selected:
Hanana Enjil 15: XNZ1912
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1912.
