JUECES 20
20
Gabaa pueblopi causaccunahuan israelcuna piñarishcamanta
1Tucui israelcunami Dan pueblomanta Beerseba pueblocaman llucshishpa Mizpa pueblopi Mandac Diospac ñaupapi shuc shinalla tandanacurca. Chaipica Galaad llactapi causac gentecunacamanmi carca. 2Dios acllashcacunapac tandanacuipica, tucui Israel aillucunata pushaccunami carca. Espadahuan allita macanacuc runacunaca chuscu patsac huarangami carca. 3Benjamín aillucunaca israelcuna Mizpa puebloman huichai shamushcatami yachac chayarcacuna. Israelcunaca:
—Ima shina chai jatun llaquita ruhuashcata huillaiyari— nirca.
4Shina nicpimi, chai huañushca huarmipac cusa levitaca:
—Ñucaca, caishuc huarmihuanmi Benjamín aillucuna causana Gabaa puebloman pozangapac rircani. 5Chaipi samaricucpimi, Gabaa pueblopi causaccunaca tuta ñucata huañuchingapac chai huasita muyunacurca. Paicuna ñuca caishuc huarmita japishpa yallita llaquichicpimi, paica huañurca. 6Chashna ruhuashpaca cai Israel llactapica jatun mancharina millaitami ruhuashca. Chaimantami chai huañushca huarmitaca pitinacushpa tucui Israel gentecuna yachachun chai llactaman cacharcani. 7Riquichic, tucui cancunami israelcuna canguichic. Chaimanta cancuna parlanacushpa ima yuyaita cuichicyari— nirca.
8Shina nicpimi, tucui israelcuna shuc yuyailla tucushpa jatarishpaca:
—¡Ñucanchicpuramantaca shucllapish quiquin carpa huasicunaman, quiquin huasiman mana cutingachu! 9Cunanca, Gabaa pueblopi causaccunataca caitami ruhuana canchic. Paicunahuan macanacungapac ringapacca suerteta ruhuashpa huichai rishun. 10Tucui Israel aillumantaca patsacmantaca chungata, huarangamantaca patsacta, chunga huarangamantaca huaranga runacunata, micunata mashcachun cachashunchic. Cutin shuccunaca Gabaa pueblopi causac Benjamín aillucuna Israel llactapi jatun mancharina millaita ruhuashcamanta paicunatapish chashnallatac ruhuachuncuna— nirca.
11Tucui israelcunami shuc yuyailla tucushpa, Gabaa pueblota tucuchingapac tandarirca. 12Chaimantami israelcunaca maijan runacunata tucui Benjamín aillucunapacman tapuchun cacharca. Paicunataca:
—¿Cancunapurapica ima nishpatac cai jatun mancharina millaita ruhuarcanguichic? 13Cunanca, cai Gabaa pueblopi causaccunapuramanta jatun mancharina millaita ruhuac runata huañuchishpa Israel llactamanta mana allita anchuchingapac ñucanchic maquipi churaichic— nirca.
Shina nicpipish, Benjamín aillucunaca paicunapac huauqui israelcunataca mana uyasha nircacunachu. 14Uyanapac randica, israelcunahuan macanacungapacmi paicunapac pueblomanta llucshishpa Gabaa pueblopi tandanacurca. 15Chai punzhapica Benjamín aillucunaca ishcai chunga sucta huaranga runacunami tucui pueblomanta llucshishpa tandanacurca. Paicunaca espadahuan allita macanacuc runacunami carca. Gabaa pueblopi cac canchis patsac soldadocunataca mana yupashcachu carca. 16Chai tucui gentecunamantaca imatapish lluquihuan ruhuac canchis patsac runacunatami acllarca. Paicunaca ashallatapish mana pandarishpa, huaracahuan shuc acchapitac shitacmi carca.
17Benjamín aillumanta cac runacunata mana yupashpa israelcunallami chuscu patsac huaranga macanacunata alli yachac runacuna espadahuan carca.
Tucui Israel aillucuna Benjamín ailluhuan macanacushcamanta
18Chai quipaca, israelcuna jatarishpa, huichai rishpami Mandac Diostaca:
—¿Ñucanchicpuramantaca maijan aillutac Benjamín aillucunahuan macanacungapac punta rigrin?— nishpa tapurca.
Shina tapucpi Mandac Diosca:
—Judá ailluracmi ringa— nirca.
19Israelcunaca tutamanta utca jatarishpami Gabaa pueblo ñaupapi carpata shayachishpa tiyarirca. 20Shinami israelcunaca Benjamín aillucunahuan macanacungapac rishpa Gabaa pueblo cuchupi allichirircacuna. 21Chai punzhami Benjamín aillucuna Gabaa pueblomanta llucshishpaca ishcai chunga ishcai huaranga israelcunata chai pambapi huañuchirca. 22Shina cacpipish, israelcunaca cariyashpami utcapi macanacungapac allichirishca pushtullapitac allichirirca. 23Israelcunaca huichai rishpami Mandac Diospac ñaupapi tutayangacaman huacashpa Mandac Diostaca:
—¿Ñucanchic huauqui Benjamín aillucunahuanca Cutinllatac macanacugrishunchu?— nishpa tapurca.
Shina nicpimi, Mandac Diosca:
—Cutinllatac macanacugrichiclla— nirca.
24Chai cayandi punzhapish israelcunaca Benjamín aillucunahuan macanacungapac rircami. 25Chai punzhapish Benjamín aillucunaca Gabaa pueblomanta llucshishpaca chunga pusac huaranga israelcunatami huañuchirca. Chai huañuc israelcunaca tucuimi espadahuan allita macanacunata yachaccuna carca.
26Shina huañuchicpimi, israelcunapish, macanacuc runacunapish huichai rishpa, Mandac Diospac ñaupapi chishiyangacaman huacashpa, ayunashpa carca. Shinallatac Diosman cushpa tucui rupachishpa, Dios-huan alli tucungapac animaltapish curcacuna. 27Chaipimi israelcunaca Mandac Diosta tapurca. (Chai punzhacunaca Dios ari nishca quillcata huacaichina Arcaca chaipimi carca. 28Chai punzha Fineasca Eliazarpac churi Aaronpac nietomi Mandac Diosta servic cura carca). Chaipimi israelcuna Mandac Diostaca:
—¿Cutinllatac ñucanchic huauqui Benjamín aillucunahuan macanacugrishunchu? ¿Mana cashpaca ña saquishunllachu?— nishpa tapurca.
Shina nicpimi, Mandac Diosca:
—Macanacugrichiclla, cayami paicunataca cancunapac maquipi churasha— nirca.
29Shina nicpimi, israelcunaca Gabaa pueblo muyundipi miticushpa chapaccunata churarca. 30Quimsaniqui punzhami israelcunaca Benjamín aillucunahuan macanacungapac huichai rirca. Shina rishpami Gabaa pueblo chimbapurapi utcapi cashca pushtullapitac allichirirca. 31Chaipimi Benjamín aillucunaca israelcunahuan macanacungapac tucui pueblomanta llucshirca. Chashnami israelcunataca utcapi huañuchishca shinallatac chai pambapi, ñancunapi quimsa chunga israelcunata huañuchirca. Chai ñancunaca shucca Gabaaman rina, cutin caishucca Bet-elman rina ñancunami carca. 32Shina huañuchishpami Benjamín aillucunaca: «¡Puntapi shinallatacmi atishpa manchachinchic!» nirca.
Ashtahuanpish israelcunaca: «Benjamín aillucunata pueblomanta caruyachingapacmi ñancunaman manchashpa callpac tucushun» nishca carca. 33Ña caruyacpimi, israelcunaca jatarishpa Baal-tamar pueblopi macanacurca. Cutin Gabaa pueblo muyundipi miticushpa chapacuc runacunapish macanacungapac llucshircami. 34Chashnami Gabaa pueblopi causaccunahuan macanacungapac tucui israelcunata chunga huaranga runacunata acllarca.
Chai macanacui yalli sinchiyacucpipish Benjamín aillucunaca ima llaquicuna paicunata japigricushcataca mana yacharcacunachu. 35Chai macanacuita Mandac Dios ayudacpimi, chai punzhapica israelcunaca Benjamín aillucunataca ishcai chunga pichca huaranga shuc patsac espadahuan macanacunata alli yachac sinchi runacunata huañuchirca. 36Chaita ricushpami Benjamín aillucunaca: “¡Ñucanchictaca ña atincunami!” nirca.
Israelcunaca Gabaa pueblo muyundipi pacalla chapac runacuna atingacunallami nishpami, Benjamín aillucunahuan macanacushca pushtumantaca caruyarca. 37Chaipi pacalla chapacuc runacunaca Gabaa puebloman cungailla yaicushpami tucui chai pueblopi causaccunata espadahuan huañuchirca. 38Israelcunahuan pacalla chapacuc runacunahuanca: “Gabaa pueblomanta cushnita huichai cachanguichic” ninacushcami carca.
39Chai pueblomanta israelcuna cutishpa callpac tucucpimi, Benjamín aillucunaca quimsa chunga shinata chugrichishpa huañuchirca. Shina huañuchishpami: «Punta macanacuipi shinallatacmi atishpa, ñucanchic ñaupapi huañuchinchic» nishpami yuyarca. 40Ashtahuanpish paicuna tigrarishpa Gabaa pueblota ricucpica, chai tucui pueblomanta achca cushni huichai llucshicushcatami ricurca. 41Chaita ricushpami, israelcunaca Benjamín aillucunahuan macanacungapac cutirca. Chaimantami Benjamín aillucunaca paicunata llaqui japicushcata yachac chayashpa manchai callarirca. 42Chaimantami Israelpac ñaupamanta tigrarishpa shitashca pambaman rina ñanta callparca. Shina callpacpipish pueblomanta shamuc runacuna tupashpami chaipi huañuchirca. 43Shinami Benjamín aillucunataca muyunacushpa Menúha pueblomantaca Gabaa chimba inti llucshina ladocaman catishpa huañuchirca. 44Benjamín aillucunataca sinchi chunga pusac huaranga runacunatami huañuchirca.
45Cutin maijancunaca Rimón quingraipi miticungapacmi shitashca pamba ñanta callparca. Chai ñanpimi pichca huaranga runacunata huañuchirca. Chashnallatac Gidom pueblocaman catishpa ishcai huaranga runacunata huañuchirca. 46Chai punzhaca Benjamín aillucunataca ishcai chunga pichca huaranga ashtahuan alli sinchi runacunatami huañuchirca. 47Shina cacpipish, sucta patsac Benjamín aillucunami shitashca pambaman rishpa Rimón quingraipi miticurca. Chaipimi chuscu quillacaman carca. 48Israelcunaca Benjamín aillucunata huañuchingapac cutishpami chai pueblopi saquirishca gentecunatapish, animalcunatapish, espadahuan huañuchishpa maipi tiyashca pueblocunatapish ninata churashpa tucuchirca.
Currently Selected:
JUECES 20: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
