JUECES 21
21
Israelcuna Benjamín aillucunata llaquichishcamanta
1Israelcuna Mizpa pueblopica: «Ñucanchicpuramantaca ñucanchic ushitaca Benjamín aillucunahuan cazarachunca pipish mana cushunchu» nishpami Diospac shutipi ari nishca carca. 2Chaimantami israelcunaca Bet-el puebloman rishpa, chishiyangacaman Mandac Diospac ñaupapi caparishpa huacashpaca:
3—Israelcunata Mandac Dioslla, ñucanchic israelcunapurapica shuc aillu illanmi. ¿Ima nishpatac Israelpica chashna tucurcayari?— nircacuna.
4Cayandi punzha israelcuna utca jatarishpami, shuc altarta ruhuashpa animalta Diosman cushpa tucui rupachircacuna. Shinallatac Dios-huan alli tucungapacpish animalcunata curcacunami. 5Chai quipami israelcunaca: «¿Tucui Israel aillumantaca maijantac Diospac tandanacuimanca mana shamurca?» nishpa tapurcacuna.
Paicunaca: «Mizpa puebloman maijanpish mana ricca huañungatacmi» nishpami Diospac shutipi ari nishca carcacuna.
6Israelcunaca, paicunapac huauqui Benjamín aillumantami munai llaquirirca. Shina llaquirishpaca: «¡Cunanca, israelcunapuramanta shuc aillu chingarishcami! 7Ñucanchicca: “Ñucanchic ushitaca Benjaminpac aillucunahuan cazarachunca mana cushunchu” nishpami, Mandac Diospac shutipi ari nircanchic. ¿Chai saquirishca Benjamín aillucunaman huarmicunata cungapacca imatatac ruhuashun?» nircacuna.
8Shinallatac paicunaca: «¿Israel aillupuramanta maijan aillu cai Mizpa puebloman Mandac Diospac ñaupaman mana shamushpa saquirishcangachu?» nishpa tapurca.
Jabes-galaad llactapi causaccunaca shucllapish chai tandanacuimanca mana rishcachu carca. 9Israel aillucunata yupacpica, Jabes-galaad llactamantaca pipish mana chaipichu carca. 10Chaimantami chai tandanacushca gentecunaca chunga ishcai huaranga alli sinchi runacunata cacharca. Paicunataca: «Riquichic, Jabes-galaad llactapi causaccunataca huarmicunatapish, huahuacunatapish espadahuan huañuchigrichic. 11Chaiman chayashpaca, tucui caricunata, carihuan chayarinacushca huarmicunatapish huañuchinguichic» nishpami cacharcacuna.
12Jabes-galaad llactapi causaccunapurapica carihuan manarac chayarishca huarmicunataca chuscu patsactami tarirca. Paicunatami Canaán llactapi cac Silo pueblopi cac carpa huasiman apamurcacuna.
13Chai quipami tandanacushca israelcunaca Rimón quingraipi tiyacuc Benjamín aillucunamanca: “Cunanca alli tucushun” nichun huillaccunata cacharca. 14Chashna cachacpimi, Benjamín aillucunaca cutirca. Paicunamanmi Jabes-galaad llactapi huañuimanta saquirishca huarmicunata cazarachun curca. Shina cacpipish mana tucuiman pactarcachu.
15Mandac Dios israelcunapurapi shuc ailluta anchuchishpa chushacllata saquishcamantami israelcunaca munai llaquirirca. 16Chaimantami chaipi tandanacushcata pushac yuyaccunaca: «Benjamín aillupurapica huarmicunaca mana tiyanchu, tucurishcami. Chai saquirishca Benjamín aillucunaman huarmicunata cungapacca ¿Imatatac ruhuashun?» nircacuna.
17Shinallatac: «Israelcunapurapi Benjamín aillucuna ama chingarichunca chai saquirishca Benjamín aillucunallatac chai allpata japishpami alli canga. 18Shina cacpipish, ñucanchicca ñucanchic ushicunata mana cui pudinchicchu— nirca.
Israelcunaca: “¡Maijanpish Benjamín aillucunaman cazarachun ushita cucca mana alli nishcami canga!” nishcami» nishpami, Diospac shutipi ari nishca carca. 19Israelcunaca: «Riquichic, huatantami Silo pueblopi Mandac Diosman shuc fiesta ruhuancuna. Silo puebloca Bet-el pueblomanta jahuamanmi saquirin. Bet-elmanta Siquemman rina ñanta, inti llucshina ladoman Lebona pueblomantaca ura ladomanmi can» nirca.
20Chaimantami Benjamín aillucunataca: «Silo puebloman rishpa uvas chagrapi miticushpa chapaichic. 21Chaipica, Silo pueblomanta solteracuna muyushpa bailangapac llucshicucpica, cancunapish uvas chagramanta llucshishpa cada shuc, shuc solterata shuhuashpa Benjamín llactaman apamuichic. 22Cutin solteracunapac taitacuna, mana cashpaca turicuna ñucanchicta imatapish nic shamucpica: “Ñucanchicca macanacushpapish mana tucui paicunaman solteracunataca tarircanchicchu. Cai ushicunataca mana cancunapac maquihuanchu cushcanguichic. Chaimanta mana juchayucchu tucunguichic. Cai solteracunata paicunaman cazarachun cuichicllayari” nishunllami» nirca.
23Shina nicpimi, Benjamín aillucunaca chai bailacucpuramanta cada shuc, shuc solterata shuhuashpa aparca. Chai quipaca quiquin llactaman cutishpami, cutinllatac pueblocunata ruhuashpa causai callarirca. 24Israelcunapish chaimantaca quiquin llactaman, quiquin aillupacman, quiquin familiacunapacmanmi cutircacuna.
25Chai huatacunapica Israel llactapica mana jatun mandac tiyarcachu. Chaimantami paicunaca quiquin munashcata ruhuashpa causarcacuna.
Currently Selected:
JUECES 21: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
