JUECES 19
19
Shuc levita runamanta, shinallatacpaipac charina huarmimanta
1Chai huatacunapica Israel llactapica jatun mandacca mana tiyarcachu. Chai huatallapitacmi Leví aillumanta shuc runaca, Efraín urcu llactata rishpa, achcata caruyashpa pozac shina causacurca. Chai runami Judá llacta Belén pueblomanta caishuc huarmihuan causacurca. 2Ashtahuanpish caishuc huarmica paihuan piñarishpami, Judá llacta Belén puebloman rishpa paipac taitapac huasipi causagrirca. Chaipimi chuscu quillata causacurca. 3Chaimantami paipac cusaca sumacta rimashpa inquitashpa cutichimungapac Belenman catirirca. Chashnami shuc servictapish, ishcai burrocunatapish, apashpa rirca. Chaipica chai huarmica paipac taitapac huasiman yaicuchircami. 4Chai huarmipac taita paita ricsishpaca cushicushpami chasquingapac llucshirca. Chai huarmipac taita chai levitapac suegro saquirichun nicpimi, chaipi quimsa punzhata ubiashpa, micushpa carca. 5Ña chuscuniqui punzhapimi levitaca cutingapac utca jatarirca. Ashtahuanpish chai huarmipac taitaca paipac yernotaca:
—Chushac huicsaca ama richu asha micunata micui, quipataca ringuillami— nirca.
6Shina nicpimi, chaipi tiyarishpa ishcai tucushpa micurcacuna, ubiarcacuna. Shina cashpami chai huarmipac taitaca:
—Cunan tuta caipi pacariyari, cushicunguimi— nirca.
7Levitaca cutingapac jatarircami. Shina cacpipish suegro saquirichun nicpimi, cutinllatac chaipi pacarirca. 8Ña pichcaniqui punzhapimi levitaca ringapac utca jatarirca. Shina cacpipish chai huarmipac taitaca:
—Cuerpo sinchicuchunca asha micunata micushpa chishiyangacaman caipi saquiri— nirca.
Shinami saquirishpa paicuna ishcai tucushpa micurca. 9Shina micushpaca, caishuc huarmihuan, paipac servic-huan cutingapacmi jatarirca. Shina cutigricpimi chai huarmipac taitaca:
—Riqui, punzhaca chishiyashpa tutayamucunmi. Chaimanta can cushilla canguica caipi pacariyari. Caya utca jatarishpa cambac huasiman ringuillami— nirca.
10Shina nicpipish, levitaca mana pacarisha nishpami jatarishpa rircalla. Shina rishpami Jebús nishca pueblo, Jerusalén pueblo chimba ladoman caishuc huarmihuan, parejashca ishcai burrocunahuan chayarca. 11Ña Jebús puebloman chayacucpica yallitami chishiyarca. Chaimantami servic runaca paipac amotaca:
—Chai jebuseocunapac puebloman rishpa chaipi cunan tuta pacarishun— nirca.
12Shina nicpimi, paipac amoca:
—Israelcuna mana causana shucpac llactacunamanca mana rishachu. Chaipac randica Gabaa puebloman chayangacaman rishun— nirca.
Shinallatac paita servictaca:
13—Gabaa pueblopi, mana cashpaca Ramá pueblopi, chai ishcaimanta maijan shuc pueblopi pacaringapac rishun— nirca.
14Chaita pasashpaca Benjamín llacta Gabaa pueblopimi ña inti tigrashpa amsayacucta chayarca. 15Chaiman chayashpa ña mana ashtahuan purishpami chai ñanmanta ladoyashpa Gabaa pueblopi pacaringapac rirca. Chai pueblopipish sueñuna huasita pi mana cucpimi, plazaman rishpa tiyarirca.
16Shina cacpimi, ña chishiyanata shuc yuyac runa chagrapi trabajashpa shamucurca. Chai runaca Efraín urcu llactacunamantami carca. Gabaa llactapica Benjaminpac aillucunami causacurca. Chaimantami chai runaca Gabaa pueblopica pozashpalla causacurca. 17Chai yuyac runa paicunata plazapi tiyacucta ricushpaca:
—¿Maimantatac shamungui? ¿Maimantac ricungui?— nishpa tapurca.
18Shina tapucpi paica:
—Judá llacta Belén pueblomantami Efraín urcu llactaman ringapacmi caipi samaricunchic. Chai caru llactamantami ñucaca cani. Ñucaca Judá llacta Belén pueblomanmi rircani. Cunanca Mandac Diospac huasimanmi ricuni. Shinapish pi mana pozachisha ninchu. 19Ñucanchicca ñucanchic burrocuna micuna ucshatapish, sueñuna ucshatapish charinchicmi. Canta servic ñuca huarmimanpish, ñuca serviccunapish, ñucamanpish tandata, vinota charinchicmi. Imapish mana illanchu— nirca.
20Shina nicpimi, chai yuyac runaca:
—Ama llaquirichu, jaculla. Can tucui minishtishcata cushallami, ashtahuanpish ama cai plazapi pacarichu— nirca.
21Chashna huasiman pusharishpami burrocuna sueñuna ucshatapish curca. Chashnami paicunaca chaquita jahuashpa, micushpa, ubiashpa carca.
22Chashna cushilla cacpimi chai pueblopi causac millai runacuna chai huasita muyunacushpa pungupi huactashpa chai yuyac runataca:
—¡Cambac huasipi pozashpa tiyaccunahuan chayarinacungapac canzhaman llucchi!— nirca.
23Chai yuyac runa ricungapac llucshishpaca:
—¡Ñuca huauquicunalla, cai runacunaca ñuca huasipi pozangapacmi shamushca! ¡Paicunataca ama millai juchata ruhuaichicchu! 24Riqui, caipimi carihuan manarac chayarishca ñuca ushipish, chai runapac charina huarmipish. Paicunata cancuna munashcata ruhuachun canzhaman llucchisha. Ashtahuanpish cai runataca ama millai juchata ruhuaichicchu— nirca.
25Shina nicpipish, chai runacunaca mana uyashun nircachu. Chaimantami chai Leví aillu runaca caishuc huarmitaca canzhaman llucchishpa cacharca. Shina ruhuacpimi, pacaringacaman chai huarmitaca millaita ruhuarcacuna. Ña achicyamucpimi saquishpa rircacuna.
26Ña achicyamucucta cutimushpami, paipac cusa pozashpa tiyacuc yuyac taitapac huasi pungu cuchupi urmarca. Chaipimi punzhacaman carca. 27Paipac cusaca cutinllatac puri callaringapacmi tutamanta utca jatarishpa punguta pascarca. Chashna pascashpami caishuc huarmi pungu yaicuna umbralpi maquita churashpa siricucta ricurca.
28Paita ricushpaca:
—Jatarishpa jacu— nirca.
Ashtahuanpish chai huarmica imata mana nircachu. Chashna cacpimi chai runaca chai huarmita burro jahuapi churashpa paipac puebloman rirca. 29Ña chai runa huasiman chayashpaca cuchillota japishpami, caishuc huarmitaca chunga ishcai pedazota ruhuarca. Chashna ruhuashpami tucui Israel llactaman cacharca. 30Chaita ricushpami israelcunaca:
—¡Caitaca israelcuna Egipto llactamanta shamushca punzhamanta cunancaman pipish mana ruhuashcachu, mana ricushcanchicchu! Cunanca yuyarinacushpa, tapunacushpa imata ruhuanami can— nirca.
Currently Selected:
JUECES 19: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
